བོད་ཀྱིས་ཏང་གི་སྒྲིག་ཁྲིམས་སློབ་སྦྱོང་སློབ་གསོ་གཏིང་ཟབ་སྤེལ་རྒྱུའི་སྒྲིག་འཛུགས་ཞིབ་ཚགས་བྱས་པ།
སྒྲིག་ཁྲིམས་ནི་ཏང་ལ་དོ་དམ་དང་ཏང་ནན་པོས་སྐྱོང་བའི“གཅུན་ལྕག”ཅིག་ཡིན་ལ། ཏང་ཡོན་ལས་བྱེད་པས་རང་ངོས་ཀྱི་བྱ་སྤྱོད་ལ་ཚོད་འཛིན་བྱེད་པའི་ཚད་གཞི་དང་གཞི་འཛིན་ས་ཞིག་ཀྱང་ཡིན། ཏང་གི་སྒྲིག་ཁྲིམས་སློབ་སྦྱོང་སློབ་གསོ་སྤེལ་འགོ་བཙུགས་ཚུན། རང་ལྗོངས་ཀྱི་ས་གནས་ཁག་གིས་ཏང་གི་སྒྲིག་ཁྲིམས་སློབ་སྦྱོང་སློབ་གསོ་སྤེལ་རྒྱུ་དེ་ཆབ་སྲིད་ཀྱི་ལས་འགན་གལ་ཆེན་ལ་བརྩིས་ནས་དོན་དངོས་དང་ཟུང་འབྲེལ་དམ་ཟབ་དང་སྒྲིག་འཛུགས་དང་ལག་བསྟར་ཞིབ་ཚགས་བྱས་ཏེ་སློབ་སྦྱོང་བྱེད་སྟངས་ཕུན་སུམ་ཚོགས་སུ་གཏོང་བ་དང་ཉེན་བརྡའི་སློབ་གསོ་གཏོང་ཤུགས་ཆེ་རུ་བཏང་སྟེ། རྒྱ་ཆེའི་ཏང་ཡོན་ལས་བྱེད་པར་སྒྲིག་ཁྲིམས་དང་སྒྲིག་ལམ་སེམས་ལ་བརྟན་པོར་ངེས་ནས་ལག་ལེན་བསྟར་རྒྱུར་ཁྲིད་སྟོན་བྱས་ཡོད།
ཉེན་བརྡའི་སློབ་གསོ་གཏིང་ཟབ་དང་ཏན་ཏིག་སྤེལ་ཆེད། ཉེ་ཆར། གུང་གཞོན་སྡེ་ཚོགས་གོ་འཇོ་རྫོང་ཨུ་ཡོན་ལྷན་ཁང་གིས་རྫོང་ཡོངས་ཀྱི་གཞོན་ནུ་ཏང་ཡོན་ལས་བྱེད་པ་27སྒྲིག་འཛུགས་བྱས་ནས། ཆབ་མདོ་གྲོང་ཁྱེར་སྲིད་གཙང་སློབ་གསོའི་རྟེན་གཞིར་མཉམ་སྡེབ་ལྟ་སྐོར་བྱས་ཏེ་སྲིད་གཙང་སློབ་གསོ་དང་ལེན་བྱས་པ་རེད། ཆབ་མདོ་གྲོང་ཁྱེར་གྱི་སྲིད་གཙང་སློབ་གསོའི་རྟེན་གཞིའི་གསོན་ཉམས་དོད་པའི་གྱོད་དཔེ་རེ་རེ་དང་མི་རྣམས་རྨོངས་གཉིད་ལས་སད་པའི་འགྱོད་བཤགས་ཡི་གེ་རེ་རེ་ལས་དེ་གར་ཡོད་པའི་ན་གཞོན་ཏང་ཡོན་ལས་བྱེད་པ་ཚང་མར་བསམ་བློའི་སློབ་གསོ་དང་སེམས་ཁམས་ལ་གཡོ་འགུལ་ཆེན་པོ་ཐེབས་ཏེ། ཚང་མར་མཐོང་ཚོར་དང་ཐོས་ཚོར་ཐོག་ནས་ཕྱོགས་ཡོངས་དང་གསོན་ཉམས་དོད་པའི་རུལ་རྒོལ་གཙང་སྤེལ་གྱི་ཉེན་བརྡའི་སློབ་གསོ་དང་ལེན་བྱེད་དུ་བཅུག་ཅིང་།
ཚང་མས་ཏང་གི་སྒྲིག་ཁྲིམས་སློབ་སྦྱོང་སློབ་གསོ་གོ་སྐབས་སུ་བྱས་ནས《ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག》སློབ་སྦྱོང་དང་། ལག་བསྟར། དོན་འཁྱོལ་བཅས་ནན་ཏན་བྱས་ཏེ། ཆབ་སྲིད་ཀྱི་སྒྲིག་ཁྲིམས་དང་ཆབ་སྲིད་ཀྱི་སྒྲིག་ལམ་ནན་པོ་སྲུང་བ་དང་རྒྱུན་དུ་གུས་སྐྲག་གི་བསམ་པ་བཅངས་ནས་ཁྲིམས་འགལ་སྒྲིག་འགལ་གྱི་གྱོད་དཔེའི་བསླབ་བྱ་བླངས་ནས་ཡང་དག་པའི་དབང་ཆའི་ལྟ་བ་དང་། སྲིད་དོན་བྱས་རྗེས་ཀྱི་ལྟ་བ། ཁེ་ཕན་གྱི་ལྟ་བ་བཅས་བརྟན་པོར་བཙུགས་ཏེ་དུས་དང་རྣམ་པ་ཀུན་ཏུ་རང་བརྩི་རང་སྐུལ་གྱིས་སྤྱོད་གཙང་སྲིད་སྐྱོང་གི་གོམ་པ་དང་པོ་ལེགས་པར་སྤོ་གི་ཡིན་ཞེས་གཅིག་མཇུག་གཉིས་མཐུད་ངང་བཤད།
ཏང་གི་སྒྲིག་ཁྲིམས་སློབ་སྦྱོང་སློབ་གསོ་སྤེལ་ཚུན། ཁྲེང་ཏུར་བཅའ་སྡོད་བོད་རང་སྐྱོང་ལྗོངས་མི་དམངས་སྲིད་གཞུང་དོན་གཅོད་ཁྲུའུ་ཡིས་ཁོངས་གཏོགས་ཡོངས་སུ་ཏང་ཡོན་གྱི་གྲངས་འབོར་བལྟོས་བཅས་ཀྱིས་མང་བའི་དོན་དངོས་དང་ཟུང་འབྲེལ་བྱས་ཏེ་ལས་བྲལ་དང་རྒན་ཡོལ་ཞུས་པའི་ཏང་ཡོན་ལས་བྱེད་པ་དང་གཞོན་ནུ་ཏང་ཡོན་ལས་བྱེད་པའི་ཁྲོད་དུ་ཏང་གི་སྒྲིག་ཁྲིམས་སློབ་སྦྱོང་སློབ་གསོའི་ཐབས་ལམ་གསར་པ་འཚོལ་ཞིབ་ཧུར་ཐག་བྱས་ནས་སློབ་གསོའི་འབྲེལ་ཐག་སྔར་བས་སྣུར་སྲིང་གིས་ཏང་གི་སྒྲིག་ཁྲིམས་སློབ་སྦྱོང་སློབ་གསོ་གཏིང་ཟབ་དང་ཏན་ཏིག་སྤེལ་བར་སྐུལ་འདེད་བཏང་ཡོད། ཞིང་ཆེན་རིམ་པའི་ལས་བྲལ་དང་རྒན་ཡོལ་ཞུས་པའི་ཞབས་ཞུ་ཅུས་ཏང་ཀྲི་པུས་ཁྲེང་ཏུར་ཁ་ཐོར་དུ་སྡོད་པའི་རང་སྐྱོང་ལྗོངས་ཀྱི་ཞིང་ཆེན་རིམ་པའི་ལས་བྲལ་དང་རྒན་ཡོལ་ཞུས་པའི་ལས་བྱེད་པའི་ཏང་ཀྲི་པུའུ་དང་རང་སྐྱོང་ལྗོངས་རིམ་པའི་ལས་བྲལ་དང་རྒན་ཡོལ་ཞུས་པའི་ལས་བྱེད་པའི་ཧྲུན་ཅང་ཡོན་ཞབས་ཞུ་ལྟེ་གནས་ཀྱི་གནས་སྐབས་ཏང་ཀྲི་པུའུ་དང་མཉམ་དུ་ཆེད་དོན་དཔེ་ཀློག་འཛིན་གྲྭ་དང་དྲ་ཐོག་དང་དྲ་ཕྱིའི་སྤེལ་རེས་དང་གྲོས་བསྡུར་ཟུང་འབྲེལ་བྱེད་པའི་བྱ་ཐབས་སྤྱད་དེ། ལས་བྲལ་དང་རྒན་ཡོལ་ཞུས་པའི་ཏང་ཡོན་ལས་བྱེད་པ་དང་ལས་ཐོག་ཏང་ཡོན་ལས་བྱེད་པ་སྒྲིག་འཛུགས་ཀྱིས་ཀྲི་པུའུ་མཉམ་འཛུགས་ཀྱི་ཆེད་དོན་སློབ་སྦྱོང་བྱས་ཡོད། ཁྲེང་ཏུའི་ལས་བྱེད་པ་ངལ་གསོ་ཁང་གིས་ལས་ཐོག་ཏང་ཡོན་ལས་བྱེད་པས་ལས་བྲལ་དང་རྒན་ཡོལ་ཞུས་པའི་ལས་བྱེད་པའི་ཏང་ཀྲི་པུའུ་ཡི་ཧྲུའུ་ཅི་དང་། ཨུ་ཡོན། འབྲེལ་གཏུག་པ་བཅས་གཅིག་ལྕོགས་བྱེད་པའི་དགེ་མཚན་གང་ལེགས་བཏོན་ཏེ་ལས་བྲལ་དང་རྒན་ཡོལ་ཞུས་པའི་ལས་བྱེད་པའི་ཏང་ཀྲི་པུའུ་རྩ་འཛུགས་ཀྱི་མཉམ་སྡེབ་སློབ་སྦྱོང་ལ་ཞུགས་པ་དང་འབྲེལ་འགྲོ་སྐྱོད་སྟབས་མི་བདེ་བའི་ཏང་ཡོན་རྒན་གྲས་རྣམས་ལ་ཁྱིམ་དུ་སློབ་སྦྱོང་གི་ནང་དོན་བསྐྱལ་ཡོད། ཧྲོང་ལིའུ་ལས་བྱེད་པའི་ངལ་གསོ་ཁང་གིས་རིགས་གཅིག་མཁས་ཅན་དང་དགེ་རྒན་ཆེ་མོ་བ་གདན་དྲངས་ནས་ལས་བྲལ་དང་རྒན་ཡོལ་ཞུས་པའི་བློ་མཐུན་རྒན་གྲས་དང་ལས་ཐོག་ལས་བྱེད་པ་དང་ལས་བཟོར་ལས་དོན་གྱི་ཆེད་དོན་སློབ་ཁྲིད་དང་ཟུར་ཁྲིད་བྱས་ཡོད།
ཏང་གི་སྒྲིག་ཁྲིམས་སློབ་སྦྱོང་སློབ་གསོ་གཏིང་ཟབ་དང་ཏན་ཏིག་སྤེལ་བར་སྐུལ་འདེད་གཏོང་ཆེད། མཚོ་བོད་ལྕགས་ལམ་ལྷ་སའི་འཁོར་དོན་དུམ་བུའི་ཏང་ཨུད་ཀྱིས་དམིགས་ཚད་དང་ལས་འགན་ཁོང་དུ་ཡང་དག་ཆུད་པར་བྱས་ཏེ་ཏང་ཡོན་ལས་བྱེད་པར་སྒྲིག་ཁྲིམས་སྦྱོང་བ་དང་། སྒྲིག་ཁྲིམས་ཤེས་པ། སྒྲིག་ཁྲིམས་དམ་པ། སྒྲིག་ཁྲིམས་སྲུང་བ་བཅས་ལ་འབད་བརྩོན་བྱ་རྒྱུར་སྐུལ་འདེད་ཧུར་ཐག་བཏང་ཡོད།
ཏང་གི་སྒྲིག་ཁྲིམས་སློབ་སྦྱོང་སློབ་གསོ་སྤེལ་འགོ་བཙུགས་ཚུན། མཚོ་བོད་ལྕགས་ལམ་ལྷ་སའི་འཁོར་དོན་དུམ་བུས་རྩ་འཛུགས་ཀྱི་ལག་བསྟར་ཐད་ནུས་ཤུགས་ཟམ་མི་ཆད་པར་བསྣན་ནས་རིགས་དབྱེ་མཛུབ་ཁྲིད་ལ་ཤུགས་སྣོན་བརྒྱབ་སྟེ“ཏང་ཨུད་ཀྱིས་སྤྱི་འདོམས་དང་། ཀྲི་པུའུ་ཡིས་སྣེ་ཁྲིད། ཏང་ཡོན་གྱིས་ཁྲིད་སྟོན”བཅས་ཀྱི་ཏང་གི་སྒྲིག་ཁྲིམས་སློབ་སྦྱོང་སློབ་གསོར་སྐུལ་འདེད་གཏོང་སྟངས་བཏོད་པ་དང་། 《ལྷ་སའི་འཁོར་དོན་དུམ་བུའི་ཏང་གི་སྒྲིག་ཁྲིམས་སློབ་སྦྱོང་སློབ་གསོའི་ལས་དོན་གྱི་སྐུལ་འདེད་འཆར་གཞི》ལེགས་སྒྲིག་བྱས་ནས་གྲུབ་པ། “ལྷ་ས་འཁོར་དོན་སྐར་ཁུང”གི་སྐད་འཕྲིན་སྤྱི་རྟགས་སོགས་སུ“ཏང་གི་སྒྲིག་ཁྲིམས་སློབ་སྦྱོང་སློབ་གསོའི”ཆེད་བསྒྲིགས་ལེ་ཚན་བཀོད་སྒྲིག་བྱས་ཏེ《ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག》ཁྱབ་སྤེལ་བཏང་བ་དང་ཆབས་ཅིག “ཉེན་བརྡའི་སློབ་ཚན”དང“གསར་བརྗེའི་སློབ་ཚན”སོགས་བཀོད་སྒྲིག་བྱས་ཏེ་རུལ་འགོག་འགྱུར་ཟོན་གྱི་བསམ་བློའི་འགོག་སྲུང་འཛིང་རགས་དེ་བས་བརྟན་པོ་བསྐྲུན་ནས་ཏང་ཡོན་ལས་བྱེད་པའི་སྒྲིག་ཁྲིམས་ཀྱི་འདུ་ཤེས་ཟམ་མི་ཆད་པར་ཟབ་ཏུ་བཏང་སྟེ་སྤྱོད་གཙང་རང་འདོམས་ཀྱི“གློག་སྒོ་ལྟེ་བ”དམ་དུ་བཏང་ཡོད།