ཉེ་ཆར། མཉམ་འབྲེལ་རྒྱལ་ཚོགས་སྐབས་དོན་བརྒྱད་པའི་ཚོགས་ཆེན་ཐོག་ཀྲུང་གོས་བཏོན་པའི་གྲོས་ཆོད་ལ་གྲོས་མོལ་བྱས་ཏེ་གྲོས་འཆམ་བྱུང་ནས་ཟླ་6ཚེས་10ཉིན་དེ་ཤེས་དཔལ་གླེང་མོལ་གྱི་རྒྱལ་སྤྱིའི་ཉིན་མོར་གཏན་འཁེལ་བྱས་པ་རེད། འདི་ལོའི་ཟླ་6ཚེས་10ཉིན་ནི་གྲོས་ཆོད་ལ་གྲོས་འཆམ་བྱུང་རྗེས་ཀྱི་ཤེས་དཔལ་གླེང་མོལ་གྱི་རྒྱལ་སྤྱིའི་ཉིན་མོ་དང་པོ་དེ་ཡིན་པས་དམིགས་བསལ་གྱི་དོན་སྙིང་ལྡན་ལ་དྲན་གསོ་ཞུ་འོས་པ་ཞིག་ཀྱང་ཡོད།

མིག་སྔར་ཉམས་ཉེན་དང་འགྲན་སློང་མང་པོ་མཉམ་འདྲེས་བྱས་ཏེ་འཛམ་གླིང་ཟང་ཟིང་དང་འཕོ་འགྱུར་གྱི་དུས་སྐབས་གསར་པར་སླེབས་ནས་མིའི་རིགས་ཀྱི་སྤྱི་ཚོགས་ལོ་རྒྱུས་ཀྱི་ལམ་བཞི་མདོ་ཁར་སླར་ཡང་སླེབས་ཡོད། མཐུན་སྒྲིལ་མཉམ་ལས་ལ་ཤུགས་སྣོན་རྒྱག་པ་དང་ཐུན་མོང་གི་འགྲན་སློང་ལ་ཁ་གཏད་གཅོག་པ་ནི་རྒྱལ་སྤྱིའི་སྤྱི་ཚོགས་ཀྱི་ཐུན་མོང་གི་འབོད་སྒྲ་ཡིན། མཉམ་འབྲེལ་རྒྱལ་ཚོགས་ཀྱིས་འདི་ལོའི་ཟླ་9པར་འབྱུང་འགྱུར་དབུ་ཚོགས་འཚོགས་ནས་མིག་སྔའི་མིའི་རིགས་ཀྱི་སྤྱི་ཚོགས་ལ་འཕྲད་པའི་ཐུན་མོང་གི་འགྲན་སློང་ཐད་བརྒྱུད་རིམ་རང་བཞིན་གྱི་ཁ་གཏད་གཅོག་པའི་ཇུས་གཞི་འདོན་རྒྱུ་རེད། ཀྲུང་གོ་ཕྱོགས་ཀྱིས་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག་ཤེས་དཔལ་གླེང་མོལ་གྱི་རྒྱལ་སྤྱིའི་ཉིན་མོ་འཛུགས་རྒྱུར་སྐུལ་འདེད་གཏོང་བའི་དམིགས་ཡུལ་ནི་ཤེས་དཔལ་གླེང་མོལ་གྱིས་མཐོང་ཆུང་དང་ཕྱོགས་ཞེན་མེད་པ་བཟོ་བ་དང་། བསམ་ཤེས་དང་ཡིད་ཆེས་ཟབ་ཏུ་གཏོང་བ། དམངས་སེམས་གཅིག་སྒྲིལ་ལ་སྐུལ་འདེད་གཏོང་བ། མཐུན་སྒྲིལ་མཉམ་ལས་ལ་ཤུགས་སྣོན་རྒྱག་པ་བཅས་ཀྱི་ཐད་ནུས་པ་གལ་ཆེན་འདོན་སྤེལ་གང་ལེགས་བྱས་ནས་མིའི་རིགས་ཀྱི་སྤྱི་ཚོགས་མཐུན་སྒྲིལ་གྱིས་ཐུན་མོང་གི་འགྲན་སློང་ལ་ཁ་གཏད་གཅོག་པར་དྲང་ནུས་སྣོན་ཆེད་རེད། དེའི་ཐོག་ནས་ཀྲུང་གོས་ཕྱོགས་མང་རིང་ལུགས་དང་མཉམ་འབྲེལ་རྒྱལ་ཚོགས་ཀྱི་ལས་དོན་ལ་རྒྱབ་སྐྱོར་བརྟན་པོ་བྱེད་པ་དང་དེ་བཞིན་འཛམ་གླིང་གི་ལོ་བརྒྱའི་རིང་བྱུང་མ་མྱོང་བའི་འགྱུར་ལྡོག་ཆེན་པོའི་ཁྲོད་ཀྲུང་གོས་རྒྱལ་ཁབ་ཆེན་པོའི་འགན་འཁྲི་ཁུར་བ་གང་ལེགས་མཚོན་ཡོད།

2023ལོའི་ཟླ་3ཚེས་15ཉིན། ཀྲུའུ་ཞི་ཞི་ཅིན་ཕིང་གིས་གོ་ལ་ཧྲིལ་པོའི་ཤེས་དཔལ་གྱི་གྲོས་འགོ་གཟབ་ནན་གྱིས་བཏོན་ནས་ཤེས་དཔལ་མི་འདྲ་བ་སྤེལ་རེས་དང་ཕན་ཚུན་དཔྱད་གཞིར་འཛིན་རྒྱུར་སྐུལ་འདེད་གཏོང་བ་དང་། རྒྱལ་ཁབ་ཁག་གི་མི་དམངས་ཕན་ཚུན་རྒྱུས་མངའ་དང་འཆམ་མཐུན་ཟབ་ཏུ་གཏོང་བ། རྒྱལ་སྤྱིའི་སྤྱི་ཚོགས་མཉམ་ལས་ཀྱི་ཐུན་མོང་ངོས་འཛིན་གཅིག་ཏུ་སྒྲིལ་བ། མིའི་རིགས་ཀྱི་ཤེས་དཔལ་འཕེལ་རྒྱས་ཡར་ཐོན་ཡོང་བར་སྐུལ་འདེད་གཏོང་བ་བཅས་ལ་དམིགས་པས་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་སྤྱི་ཚོགས་ཀྱིས་དང་ལེན་ཧུར་ཐག་བྱས་ཡོད། མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཀུ་ཐེ་ལེ་སིས་ཤེས་དཔལ་ཕན་ཚུན་དཔྱད་གཞིར་འཛིན་རྒྱུ་དེས་མིའི་རིགས་ཀྱི་ཡར་ཐོན་བྱ་གཞག་ལ་ནུས་པ་གལ་ཆེན་ཐོན་གྱི་ཡོད་ལ་ཤེས་དཔལ་སྣ་མང་རང་བཞིན་རྒྱུན་འཁྱོངས་བྱེད་པར་དམིགས་བསལ་གྱི་དོན་སྙིང་གལ་ཆེན་ཡང་ལྡན་ཡོད། མཉམ་འབྲེལ་རྒྱལ་ཚོགས་ཀྱིས་ཀྲུང་གོ་ཕྱོགས་དང་མཉམ་དུ་གོ་ལ་ཧྲིལ་པོའི་ཤེས་དཔལ་གྱི་གྲོས་འགོའི་ཐད་འབྲེལ་གཏུག་དང་མཉམ་ལས་རྒྱུན་འཁྱོངས་བྱེད་འདོད་ཡོད་ཅེས་བརྗོད་ཡོད།

ཤེས་དཔལ་གླེང་མོལ་གྱི་རྒྱལ་སྤྱིའི་ཉིན་མོ་འཛུགས་རྒྱུའི་སྐོར་གྱི་མཉམ་འབྲེལ་རྒྱལ་ཚོགས་ཚོགས་ཆེན་གྱི་གྲོས་ཆོད་ནང་གོ་ལ་ཧྲིལ་པོའི་ཤེས་དཔལ་གྲོས་འགོའི་ལྟེ་བའི་དོན་སྙིང་གང་ལེགས་མཚོན་པ་དང་། རྒྱལ་ཁབ་14ཡི་གྲོས་ཆོད་ཀྱི་ལྟེ་བའི་ཚོགས་ཆུང་ནང་ཞུགས་པ་དང་རྒྱལ་ཁབ་83མཉམ་འབྲེལ་ཧྲུའུ་ནང་ཞུགས་པ་དང་འབྲེལ་ཚོགས་མིའི་རྒྱལ་ཁབ་ཡོངས་ཀྱི་རྒྱབ་སྐྱོར་མཐའ་གཅིག་ཏུ་ཐོབ་ཡོད། དེའི་ཐོག་ནས་གོ་ལ་ཧྲིལ་པོའི་ཤེས་དཔལ་གྱི་གྲོས་འགོ་དེ་དུས་རབས་ཀྱི་རླབས་རྒྱུན་དང་དུས་རབས་ཀྱི་དགོས་མཁོ་དང་མཐུན་ནས་ཀྲུང་གོའི་འདུ་ཤེས་དང་ཀྲུང་གོའི་ཇུས་གཞི་དེ་རྒྱལ་སྤྱིའི་ཐུན་མོང་ངོས་འཛིན་དུ་འགྱུར་བཞིན་ཡོད་པ་གང་ལེགས་མཚོན་ཡོད།

མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག་གྲོས་འཆམ་བྱུང་བའི་གྲོས་ཆོད་དེའི་ནང་མཉམ་འབྲེལ་རྒྱལ་ཚོགས་ཀྱི་ཚོགས་མིའི་རྒྱལ་ཁབ་དང་མཉམ་འབྲེལ་རྒྱལ་ཚོགས་ཀྱི་སྒྲིག་གཞི་ཁག་སོགས་ཤེས་དཔལ་གླེང་མོལ་གྱི་རྒྱལ་སྤྱིའི་ཉིན་མོར་རྟེན་འབྲེལ་ཞུ་བར་གདན་དྲངས་པ་དང་། མཉམ་འབྲེལ་རྒྱལ་ཚོགས་སློབ་གསོ་དང་ཚན་རིག་རིག་གནས་རྩ་འཛུགས་དང་མཉམ་འབྲེལ་རྒྱལ་ཚོགས་ཤེས་དཔལ་མནའ་འབྲེལ་བྱེད་སྒོར་གཞོགས་འདེགས་བྱེད་པར་གདན་དྲངས་པ། ཁེ་ཕན་དང་འབྲེལ་བ་ཡོད་པའི་ཕྱོགས་ཚང་མ་རྒྱལ་སྤྱིའི་ཉིན་མོར་རྒྱབ་སྐྱོར་བྱེད་པར་གདན་དྲངས་པ་བཅས་རེད། གྲོས་གཞི་འདོན་མཁན་ཡིན་པའི་ཀྲུང་གོས་ནུས་པ་འདོན་སྤེལ་ཧུར་ཐག་བྱས་ནས་གྲོས་ཆོད་ཀྱི་དགོངས་དོན་དང་དབང་ཆ་གཞིར་བཟུང་། རྒྱ་ཆེའི་ཚོགས་མིའི་རྒྱལ་ཁབ་དང་མཉམ་ལས་དམ་ཟབ་བྱས་ཏེ་སྣ་མང་ཕུན་སུམ་ཚོགས་པའི་རྣམ་པ་བརྒྱུད་ཤེས་དཔལ་གླེང་མོལ་གྱི་རྒྱལ་སྤྱིའི་ཉིན་མོར་དྲན་གསོ་ཞུས་ནས་གོ་ལ་ཧྲིལ་པོའི་ཤེས་དཔལ་གྲོས་འགོའི་ནང་དོན་ཟམ་མི་ཆད་པར་ཕུན་སུམ་ཚོགས་སུ་བཏང་སྟེ་འཛམ་གླིང་ཞི་བདེ་དང་འཕེལ་རྒྱས་ཆེད་ཀྲུང་གོའི་ལེགས་སྐྱེས་དེ་བས་མང་བ་འབུལ་རྒྱུ་རེད།

(རྩོམ་པ་པོ་ནི་མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་སྐུ་ཚབ་དང་དམིགས་བསྐོས་དབང་ཆ་ཆ་ཚང་ཡོད་པའི་གཞུང་ཚབ་ཆེ་མོ་བ་ཡིན)