སྡེ་ཚན་གསུམ་གྱིས་ཕྱོགས་བདུན་ཐད་ཀྱི་བྱ་ཐབས་དང་བླང་བྱ་བཏོན་ནས་ཚད་ལྡན་དང་ཕན་འབྲས་ཆེན་པོས་ནགས་ཚལ་བདག་དབང་རིགས་ཀྱི་གཏན་འཇགས་རྒྱུ་ནོར་ཐོ་འགོད་ལས་དོན་ཡག་པོ་བསྒྲུབ་རྒྱུ་ཡིན་པ།
ཉེ་ཆར་རང་བྱུང་ཐོན་ཁུངས་པུའུ་གཞུང་དོན་ཐིང་དང་། རྒྱལ་ཁབ་ནགས་ལས་དང་རྩྭ་ཐང་ཅུས་གཞུང་དོན་ཁང་། རྒྱལ་ཁབ་དངུལ་རྩ་ལྟ་འདོམས་སྤྱི་ཁྱབ་ཅུས་གཞུང་དོན་ཐིང་བཅས་ཀྱིས་མཉམ་དུ《མཉམ་སྡེབ་ནགས་དབང་ལམ་ལུགས་སྒྱུར་བཅོས་གཏིང་ཟབ་ཏུ་གཏོང་བའི་བླང་བྱ་དོན་འཁྱོལ་བྱས་ནས་ཚད་ལྡན་དང་ཕན་འབྲས་ཆེན་པོས་ནགས་དབང་རིགས་ཀྱི་གཏན་འཇགས་རྒྱུ་ནོར་ཐོ་འགོད་ལས་དོན་ཡག་པོ་བསྒྲུབ་རྒྱུའི་སྐོར་གྱི་བརྡ་ཐོ》བཀྲམ་ནས་ཚད་ལྡན་དང་ཕན་འབྲས་ཆེན་པོས་ནགས་དབང་ཐོ་འགོད་ལས་དོན་ཡག་པོ་ཇི་ལྟར་སྒྲུབ་པ་སོགས་ཐད་གཏན་འབེབས་དང་བླང་བྱ་ཁ་གསལ་བཏོན་ཡོད།
ནགས་དབང་ཐོ་འགོད་ཡག་པོ་བྱེད་པ་དེས་ནགས་ལས་བདག་དབང་ཁ་གསལ་ཡོང་བ་དང་། ནགས་དབང་བརྒྱུད་བཤུག་འགན་སྲུང་། ནགས་དབང་གི་མ་དངུལ་བསྡུ་སྒྲིལ་ལ་འདེགས་སྐྱོར་བཅས་བྱེད་པར་ནུས་པ་ཆེན་པོ་ཐོན་གྱི་ཡོད་པ་དེ་ནི་མཉམ་སྡེབ་ནགས་དབང་ལམ་ལུགས་སྒྱུར་བཅོས་གཏིང་ཟབ་ཏུ་གཏོང་བའི་ནང་དོན་གལ་ཆེན་ཞིག་རེད། ཉེ་བའི་ལོ་ཤས་རིང་། མཉམ་སྡེབ་ནགས་དབང་ལམ་ལུགས་སྒྱུར་བཅོས་གཏིང་ཟབ་ཏུ་སོང་བ་དང་། ནགས་དབང་བརྒྱུད་བཤུག་གི་ཁྲོམ་ར་ཉིན་བཞིན་འཁྲུག་ཆ་དོད་དུ་ཕྱིན་པ། ཐོ་འགོད་ལས་སྒོའི་དགོས་མཁོ་ཆེ་རུ་ཤུགས་ཆེན་བཅས་དང་བསྟུན་ཏེ་རང་བྱུང་ཐོན་ཁུངས་པུའུ་ཡིས་རྒྱལ་ཁབ་ནགས་ལས་དང་རྩྭ་ཐང་ཅུས་སོགས་སྡེ་ཚན་དང་མཉམ་དུ་ཡིག་ཆ་འདོན་པ་དང་། གསོ་སྦྱོང་བྱེད་ཤུགས་ཆེ་རུ་གཏོང་བ། ཚོད་ལྟ་བྱེད་པ་སོགས་ཀྱི་བྱ་ཐབས་བརྒྱུད་ལྟ་སྐུལ་མཛུབ་ཁྲིད་ལ་ཤུགས་སྣོན་བརྒྱབ་ནས་ནགས་དབང་ཐོ་འགོད་རིམ་བཞིན་རྒྱུན་རྣམ་ཅན་དང་ཚད་ལྡན་ཅན་དུ་འགྱུར་བར་སྐུལ་འདེད་བཏང་ཡོད། མང་ཚོགས་ཀྱི་ནགས་དབང་ཐོ་འགོད་འགྲོ་ལུགས་གཉེར་བའི་དགོས་མཁོར་ཞབས་འདེགས་ཞུ་ཆེད། རང་བྱུང་ཐོན་ཁུངས་པུའུ་ཡིས་རྒྱལ་ཁབ་ནགས་ལས་དང་རྩྭ་ཐང་ཅུས་དང་དངུལ་རྩ་ལྟ་འདོམས་སྤྱི་ཁྱབ་ཅུས་དང་མཉམ་དུ་གཞི་རིམ་གྱིས་བཏོན་པའི་ནགས་དབང་ཐོ་འགོད་ཀྱི་འགག་གནད་དང་དཀའ་གནད་དང་དེ་བཞིན་ནགས་དབང་ཐོ་འགོད་ལས་དོན་ཚད་ལྡན་དང་ཕན་འབྲས་ཆེན་པོས་ཡག་པོ་སྒྲུབ་པའི་དམིགས་ཚད་ལ་དམིགས་ཏེ་ལམ་ལུགས་དང་སྲིད་ཇུས་ཀྱི་ངོས་ནས་ལས་ཀའི་བླང་བྱ་སྔར་བས་ཁ་གསལ་བཟོས་པ་དང་མཛུབ་ཁྲིད་ལ་ཤུགས་སྣོན་རྒྱག་དགོས་པའི་བརྡ་ཐོ་བཟོས་ནས་བཀྲམ་ཡོད།
བརྡ་ཐོའི་ནང་། མཉམ་སྡེབ་ནགས་དབང་ལམ་ལུགས་སྒྱུར་བཅོས་གཏིང་ཟབ་ཏུ་གཏོང་བའི་བཀོད་སྒྲིག་ལག་བསྟར་དོན་འཁྱོལ་ཡོང་བར་དམིགས་ནས། ཕྱོགས་བདུན་ཐད་ཀྱི་བྱ་ཐབས་ཞིབ་ཕྲ་དང་ལས་ཀའི་བླང་བྱ་བཏོན་ཡོད་པ་སྟེ། ཐོག་མའི་ནགས་དབང་ལག་ཁྱེར“མི་སྒྱུར་བ་དང་མི་བརྗེ་བའི”བླང་བྱ་སྔར་བས་ཁ་གསལ་འདོན་པ་དང་ནན་བཤད་བྱ་རྒྱུ་དང་། ནགས་དབང་ཐོ་འགོད་བདག་སྤྲོད་དང་ཞིབ་དཔྱད་ལ་དམིགས་ས་ཡོད་པའི་སྒོ་ནས་ཚད་ལྡན་དུ་གཏོང་རྒྱུ། གཏན་འབེབས་ཁ་གསལ་བཟོས་ནས་ཞིང་དུད་ཀྱི་ནགས་སའི་འགན་གཙང་ལེན་དབང་ཡུན་རིང་བརྟན་པོ་གནས་པའི་འགན་སྲུང་བྱ་རྒྱུ། ནགས་སའི་གཉེར་སྐྱོང་དབང་ཆ་ཐོ་འགོད་ཀྱི་སྒྲིག་སྲོལ་ཞིབ་ཚགས་སུ་བཏང་ནས་འོས་འཚམ་ངང་ནགས་ལས་གཞི་ཁྱོན་ཅན་གྱི་གཉེར་སྐྱོང་ལ་རྒྱབ་སྐྱོར་བྱས་ཏེ། ས་གནས་ཁག་གིས་གཏན་འཇགས་རྒྱུ་ནོར་ཐོ་འགོད་ཆ་འཕྲིན་དོ་དམ་གྱི་གཞི་རྩའི་ལས་སྟེགས་ཁྲོད“ནགས་སའི་གཉེར་དབང”གི་དབང་ཆའི་རིགས་སོགས་ཀྱི་ཁ་སྣོན་ཡིག་འབྲུ་བཅུག་སྟེ། གཉེར་དབང་གི་དཔེ་རིས་ལོགས་སུ་བཀོད་དེ་ནགས་སའི་གཉེར་དབང་ཁྲིམས་བཞིན་བརྒྱུད་བཤུག་དང་གཏའ་མར་བཞག་ནས་མ་རྩ་བསྡུ་སྒྲིལ་ལ་འདེགས་སྐྱོར་བྱ་རྒྱུ། བྱེད་སྟངས་དང་བྱ་ཐབས་གསར་གཏོད་བྱས་ནས་ནགས་ལས་ཀྱི་ཁྱད་ཆོས་དང་འཚམ་པའི་ནགས་དབང་ས་ཐོ་ཞིབ་བཤེར་བྱ་རྒྱུ། དམངས་ལ་ཕན་པའི་ཞབས་ཞུའི་བྱ་ཐབས་བཟོས་ནས་ནགས་དབང་ཐོ་འགོད་དང་འགྲོ་ལུགས་གཉེར་སྟངས་ལེགས་སུ་བཏང་བའི་ཐོག་ཕན་འབྲས་ཆེན་པོས“ལག་ཁྱེར་གཅིག”ཡག་པོ་གཉེར་ནས་ནགས་ལས་དང་རྩྭ་ཐང་སྡེ་ཚན་དང་ཐོ་འགོད་སྒྲིག་གཞིའི་དབར་ལས་སྒོའི་མཐུན་སྦྱོར་དང་ཆ་འཕྲིན་མཉམ་སྤྱོད་བྱ་ཤུགས་ཆེ་རུ་བཏང་སྟེ་ནགས་དབང་ཐོ་འགོད“སྐར་ཁུང་གཅིག་ནས་བདག་སྤྲོད་དང་། འགྲོ་ལུགས་མཉམ་དུ་གཉེར་བ”དོན་འཁྱོལ་ཡོང་བའི་གྲོས་འགོ་འདོན་རྒྱུ། ལས་ཀའི་ལམ་སྲོལ་བཙུགས་ནས་ལོ་རྒྱུས་ཐོག་ཐག་མ་ཆོད་པའི་གནད་དོན་མཉམ་དུ་སེལ་རྒྱུ་བཅས་ཡིན་པ་རེད།