ཟླ་6ཚེས་3ཉིན་གྱི་ཉིན་གུང་། བོད་ལ་ཡུལ་སྐོར་དུ་ཡོང་མཁན་ཞིག་གིས་སྒེར་གྱི་སྨྱན་སྦྱོར་ལས་སྟེགས་ཐོག་བསྐུར་བའི“ལྷ་སའི་བདལ་གཏོང་རླངས་འཁོར་ཚང་མས་ཆུ་ཚོད་བཀག་གི་མི་འདུག ལྟོས་དང་། འདི་ལྷ་སའི་གནམ་ཐང་རེད”ཅེས་པའི་བརྙན་ཐུང་ལ་དྲ་དམངས་ཀྱིས་དོ་ཁུར་ཆེན་པོ་བྱས་པས། ལྷ་ས་གྲོང་ཁྱེར་འགྲིམ་འགྲུལ་སྐྱེལ་འདྲེན་ཅུས་ཀྱིས་བརྟག་དཔྱད་བྱས་འབྲས་དུས་ཐོག་ཏུ་ཁྱབ་བསྒྲགས་བྱས་པ་རེད།

བརྟག་དཔྱད་བྱས་འབྲས།

ཞིབ་དཔྱད་བྱས་པ་བརྒྱུད། ཡུལ་སྐོར་བ་དེས་ཉིན་དེར་བདལ་གཏོང་རླངས་འཁོར་གསུམ་ལ་སྐད་ཆ་དྲིས་པ་དང་། བདལ་གཏོང་རླངས་འཁོར་གཉིས་ཀྱིས་ཆུ་ཚོད་བཀག་གི་མིན་ཞེས་བརྗོད་པ་མ་ཟད། ད་དུང་འདི་གཉིས་ལ་བདལ་གླ་གང་བྱུང་དུ་ལེན་པ་སོགས་ཀྱི་སྒྲིག་འགལ་བྱེད་སྤྱོད་ལྡན་འདུག ཟླ་6ཚེས་3ཉིན་གྱི་དགོང་མོར་བརྟག་དཔྱད་མི་སྣས་ཁག་བགོས་ནས་གོང་དཀར་གནམ་ཐང་དང་བདལ་གཏོང་རླངས་འཁོར་ཁེ་ལས་ཁག་ལ་བསྐྱོད་དེ་འདྲི་རྟོགས་དང་བརྙན་ལམ་ལ་ལྟ་བ་སོགས་བྱས་ཏེ། དཔང་རྟགས་བླངས་ནས་འབྲེལ་ཡོད་རླངས་འཁོར་ལ་ཞིབ་བཤེར་བཀག་སྡོམ་བྱས་ཤིང་། ལྷ་ས་གྲོང་ཁྱེར་ཧེང་ཨན་བདལ་གཏོང་རླངས་འཁོར་ཚད་ཡོད་ཀུང་སི་དང་། ལྷ་ས་གྲོང་ཁྱེར་སྤྱི་སྤྱོད་བདལ་གཏོང་རླངས་འཁོར་ཚད་ཡོད་ཀུང་སི། བོད་ལྗོངས་མྱུར་འབྱོར་བདལ་གཏོང་རླངས་འཁོར་ཚད་ཡོད་ཀུང་སི་བཅས་བདལ་གཏོང་རླངས་འཁོར་ཁེ་ལས་གསུམ་གྱི་འགན་འཁུར་བ་སྐོང་འདྲི་བྱས་ནས་འཕྲལ་མར་དུས་བཀག་ནང་ཡོ་བསྲང་བྱེད་དུ་བཅུག་པ་དང་། དེ་བཞིན་འབྲེལ་ཡོད་བདལ་གཏོང་རླངས་འཁོར་གྱི་ཁ་ལོ་བས་རྣམ་འགྱུར་ངན་པ་བསྟན་པ་དང་། ཆུ་ཚོད་མ་བཀག་པ། བདལ་གླ་གང་བྱུང་ལེན་པ་སོགས་སྒྲིག་འགལ་གྱི་བྱེད་སྤྱོད་སྤེལ་བར་དམིགས་ནས《ལྷ་ས་གྲོང་ཁྱེར་གྱི་བདལ་གཏོང་རླངས་འཁོར་དོ་དམ་བྱ་ཐབས》ཀྱི་དོན་ཚན་ཞེ་གཅིག་པའི་གཏན་འབེབས་ལྟར་ཐག་གཅོད་ནན་པོ་བྱས་པ་རེད།

དེ་དང་ཆབས་ཅིག་རྒྱ་ཆེའི་གྲོང་མི་དང་ཡུལ་སྐོར་བས་ལྷ་སའི་འགྲིམ་འགྲུལ་སྐྱེལ་འདྲེན་ཁྲོམ་རར་ལྟ་སྐུལ་གནང་རོགས་ཞུ་རྒྱུ་དང་། གལ་ཏེ་ཁྱེད་ཀྱི་ཉེ་འགྲམ་དུ་འགྲིམ་འགྲུལ་སྐྱེལ་འདྲེན་གྱི་ཁྲིམས་འགལ་སྒྲིག་འགལ་གྱི་བྱེད་སྤྱོད་ཐོན་ཚེ། དུས་ཐོག་ཏུ“12345”“96123”ཐད་སྦྲེལ་ཁ་པར་བརྒྱབ་ནས་ཐེར་འདོན་གོང་ཞུ་གནང་རོགས་ཞུ་རྒྱུ་ཡིན།