བོད་ཀྱི་འབྲོག་པ་དཀར་ཏོག་ལ་ཀྲུང་གོ་རྒྱ་གྲམ་དམར་པོ་ཐེབས་རྩ་ལྷན་ཚོགས་ཀྱི་ལས་དོན་མི་སྣའི་ཁ་པར་འབྱོར་ཞིང་། རང་ཉིད་ཀྱི་བུར་སྨན་བཅོས་དང་བླངས་རུ་ཁག་གིས་ལྷན་འཛོམས་ནད་དཔྱད་བྱས་པ་བརྒྱུད་གཤགས་བཅོས་ཀྱི་རེ་བ་དང་མཐུན་པས། གང་མགྱོགས་མུའུ་ཏན་ཅང་གཙང་པོ་སྙིང་ཁམས་ཁྲག་རྩའི་ནད་ཀྱི་སྨན་ཁང་དུ་རིན་མེད་གཤགས་བཅོས་བྱེད་པར་བཀོད་སྒྲིག་བྱས་པ་ཤེས་རྟོགས་བྱུང་།

ཁོང་གི་བུ་པད་མ་བསམ་གྲུབ་འདི་ལོ་ལོ་14ལ་སླེབས་ཀྱང་གཟུགས་པོའི་རིང་ཚད་སྨི་1སྐར་མ་29ལས་མེད། དམའ་འབྲིང་ལོ་རིམ་དང་པོར་སླེབས་རྗེས་གཟུགས་པོའི་གནས་ཚུལ་དབང་གིས་སློབ་མཚམས་འཇོག་དགོས་འཁེལ་བ་དང་། འོན་ཀྱང་ད་བར་ཆ་རྐྱེན་སྐྱོ་དྲགས་པས་གཟུགས་པོར་བརྟག་དཔྱད་དང་སྨན་བཅོས་ཆ་ཚང་པོ་ཞིག་བྱེད་ཐུབ་མེད།

ཉིན་གསུམ་གྱི་སྔོན་ལ་བུའི་འཛིན་གྲྭའི་ཀྲུའུ་རེན་གྱིས་ང་ཚོར་ཁ་པར་བཏང་ནས་སྨན་ཁང་ཆེ་གྲས་ཀྱི་རིགས་གཅིག་མཁས་ཅན་གྱིས་ཕྲུ་གུ་ཚོར་རིན་མེད་ཀྱི་སྙིང་ནད་བརྟག་དཔྱད་བྱེད་ཀྱི་འདུག་ཅེས་བཤད་པ་དང་། དཀར་ཏོག་གིས་བུ་ཁྲིད་དེ་རླངས་འཁོར་བཏང་ནས་ཆུ་ཚོད་ལྔ་ལྷག་ཙམ་བསྐྱོད་རྗེས་གཞི་ནས་སློབ་གྲྭར་འབྱོར་ཡོད།

སྙིང་ནད་ཀྱི་ཚད་བརྒལ་སྒྲ་རླབས་ཀྱི་བརྟག་དཔྱད་བྱས་པ་བརྒྱུད་པད་མ་བསམ་གྲུབ་ཀྱི་སྙིང་སྟེང་གི་ཧའོ་སྨི་4ཡི་འཕར་རྩའི་འདྲེན་སྦུག་ཁ་ཟུམ་མེད་པ་དེས་ཕྲུ་གུའི་འཚར་ལོངས་ལ་ཐད་ཀར་ཤུགས་རྐྱེན་བཟོ་གི་ཡོད་པས་ངེས་པར་དུ་གཤགས་བཅོས་བྱེད་དགོས་པ་ཤེས་རྟོགས་བྱུང་།

ཀྲུང་གོ་རྒྱ་གྲམ་དམར་པོ་ཐེབས་རྩ་ལྷན་ཚོགས་ཀྱི་ལས་དོན་མི་སྣས་དཀར་ཏོག་ལ་ཁྱོད་ཀྱི་བུས“ཀྲུང་དབྱང་གི་ཆེད་དོན་རྒྱན་ཤོག་གི་སྤྱི་ཕན་མ་དངུལ་གྱི་ནད་ཆེན་གྱི་བྱིས་པའི་རོགས་སྐྱོབ་རྣམ་གྲངས”དང་དེ་བཞིན་སྤྱི་ཚོགས་ཀྱི་གཅེས་སེམས་ཞལ་འདེབས་མ་དངུལ་གྱི་མཉམ་འབྲེལ་རོགས་སྐྱོབ་ལོངས་སྤྱོད་བྱེད་ཆོག་པས་རིན་མེད་གཤགས་བཅོས་བྱེད་ཐུབ་པ་མ་ཟད། གཤགས་བཅོས་བྱས་རྗེས་བུ་དྲག་སྐྱེད་ཐུབ་ནས་བདེ་མ་ཐང་མའི་གྲོགས་པོ་ཆུང་ཆུང་གཞན་དང་འདྲ་བར་འཚར་ལོངས་ཡོང་ཐུབ་ཅེས་བཤད་པས་དཀར་ཏོག་གི་སེམས་ཁྲལ་ཡོངས་སུ་བསལ་ཡོད།

“གྲངས་གཞི་ལས་མངོན་པར། ས་མཐོའི་ཁུལ་དུ་ལྷན་སྐྱེས་སྙིང་ནད་ཕོག་ཚད་བདེ་ཐང་ཁུལ་དང་ས་བབ་དམའ་བའི་ས་ཁུལ་ལས་མངོན་གསལ་དོད་པོས་མཐོ་བ་ཡོད་པས། ནད་ཕོག་པའི་བྱིས་པ་དེ་བས་མང་བ་དུས་ཐོག་ཏུ་ཤེས་རྟོགས་དང་ཆབས་ཅིག་སྨན་བཅོས་བྱེད་དགོས་ཀྱི་ཡོད”མུའུ་ཏན་ཅང་གཙང་པོ་སྙིང་ཁམས་ཁྲག་རྩའི་ནད་ཀྱི་སྨན་ཁང་གི་སྙིང་ཁམས་ཕྱི་ནད་ཚན་ཁག་གི་ཀྲུའུ་རེན་གཞོན་པ་ཀྲུའུ་རེན་སྨན་པ་བཀའ་བཅུ་པ་ཅིན་ཀྲུང་ཆང་གིས་ལོ་6རིང“གོས་དཀར་ལྷ་རྗེའི་ལྗོངས་རྒྱུའི”ལྷན་སྐྱེས་སྙིང་ནད་ཕོག་པའི་བྱིས་པར་དབྱེ་བཤེར་སྐྱོབ་རོགས་བྱེད་པའི་བྱ་སྤྱོད་དང་མཉམ་དུ་བོད་དུ་སྨན་བཅོས་བྱེད་པར་ཐེངས་བདུན་ཙམ་བསྐྱོད་ནས་བྱིས་པ་ནད་པ་240ལྷག་ཙམ་ལ་གཤགས་བཅོས་བདེ་བླག་བྱས་ཡོད།

ཁོང་གིས་དྲ་ཐོག་ནས་སྨན་བཅོས་དང་ལེན་བྱེད་མཁན་བྱིས་པའི་ཁྱིམ་བདག་རེ་རེར་དུས་ཐོག་ཏུ་འབྲེལ་གཏུག་དང་བྱིས་པ་ཚོའི་བདེ་ཐང་གི་གནད་དོན་ལ་ལན་རྒྱག་གི་ཡོད། “བྱིས་པ་ནད་པར་སྨན་བཅོས་བྱེད་པའི་བརྒྱུད་རིམ་ཁྲོད་ངས་སྨན་པ་ཞིག་གི་འགན་འཁྲིར་སྔར་བས་གོ་བ་ཟབ་མོ་ལེན་པ་དང་། བྱིས་པ་ནད་པ་དྲག་སྐྱེད་བྱུང་བ་དང་བྱིས་པ་ནད་པའི་ནང་མིའི་སེམས་ཀྱི་ཁུར་པོ་མེད་པར་གྱུར་ནས་རེ་བས་ཁེངས་པ་མཐོང་སྐབས་མུ་མཐུད་ལེགས་སྐྱེས་འབུལ་བའི་དད་སེམས་བརྟན་དུ་ཕྱིན་སོང”ཞེས་ཅིན་ཀྲུང་ཆང་གིས་བཤད།

ད་ཐེངས་ཀྱི“གོས་དཀར་ལྷ་རྗེའི་ལྗོངས་རྒྱུ”2024བོད་ཀྱི་ལྷན་སྐྱེས་སྙིང་ནད་ཕོག་པའི་བྱིས་པར་དབྱེ་བཤེར་སྐྱོབ་རོགས་བྱེད་པའི་བྱ་སྤྱོད་དེ་ཟླ་5ཚེས་27ནས་ཟླ་6ཚེས་7ཉིན་བར་དུས་ཡུན་ཉིན་12སྤེལ་རྒྱུ་ཡིན་པ་རེད། དེའི་རིང་སྨན་བཅོས་དང་བླངས་རུ་ཁག་གཞིས་རྩེ་གྲོང་ཁྱེར་གྱི་ས་སྐྱ་རྫོང་དང་། སྐྱིད་གྲོང་རྫོང་། བཞད་མཐོང་སྨོན་རྫོང་སོགས་སུ་བསྐྱོད་དེ་ས་གནས་དེ་གའི་བུ་བཅོལ་ཁང་དང་སློབ་གྲྭ་འབྲིང་ཆུང་གི་སློབ་མར་ལྷན་སྐྱེས་སྙིང་ནད་ཡོད་མེད་རིན་མེད་དབྱེ་བཤེར་བྱ་རྒྱུ་མ་ཟད། དེ་གོང་གཤགས་བཅོས་བྱས་པའི་བྱིས་པ་ནད་པ་ཁག་གཅིག་གི་ཁྱིམ་དུ་བསྐྱོད་ནས་འཚམས་འདྲི་དང་བྱིས་པའི་བདེ་ཐང་གནས་ཚུལ་རྒྱུས་ལོན་བྱ་རྒྱུ་རེད།

ཟླ་5ཚེས་28ཉིན་སྨན་བཅོས་དང་བླངས་རུ་ཁག་གིས་རི་བོ་དུ་མ་བརྒལ་ནས་ས་བབ་སྨི་4500ཙམ་ཟིན་པའི་གཞིས་རྩེ་གྲོང་ཁྱེར་ས་སྐྱ་རྫོང་མོ་ལྷ་ཤང་མདའ་རྐྱང་གྲོང་ཚོར་སྒྲོལ་མ་གཡང་སྐྱིད་དང་པད་མ་ཚེ་ཕན་གཅེན་གཅུང་གཉིས་ལ་ལྟ་བར་ཡོང་ཡོད།

གཅེན་གཅུང་གཉིས་ཀྱིས་2021ལོར་ཀྲུང་དབྱང་གི་ཆེད་དོན་རྒྱན་ཤོག་གི་སྤྱི་ཕན་མ་དངུལ་གྱི་རོགས་སྐྱོར་འོག་ལྷན་སྐྱེས་སྙིང་ནད་ཀྱི་གཤགས་བཅོས་དང་ལེན་བྱས་པ་རེད། བསྐྱར་བཤེར་དང་ནད་དཔྱད་བྱས་པ་བརྒྱུད། ཁོང་ཚོ་ད་ལྟ་དྲག་སྐྱེད་ཡག་པོ་བྱུང་ཡོད།

རང་ཉིད་ལ་ཚེ་སྲོག་གསར་པ་སྦྱིན་མཁན་གྱི་སྨན་པ་ཚོ་སླར་ཡང་མཐོང་སྐབས་གཅེན་གཅུང་གཉིས་དགའ་སྤྲོས་མྱོས་ནས་ཁོང་ཚོའི་འགྲམ་དུ་བསྡད་དེ་ལོ་འགའི་རིང་ལ་ཐོབ་པའི་གཟེངས་བསྟོད་ལག་ཁྱེར་སྣ་ཚོགས་བསྟན་ནས་རང་ཉིད་འཚར་ལོངས་ཡག་པོ་བྱུང་བ་མཚོན་པར་བྱས་པ་དང་ད་དུང་མཉམ་དུ་ཞབས་བྲོ་ཡང་འཁྲབ་ཡོད།

“སྨན་པ་ཚོ་སྐུ་གཟུགས་གསལ་ཐང་དང་བྱ་བ་ལམ་འགྲོ་ཡོང་བའི་རེ་བ་ཡོད། ང་རང་ཆེན་པོ་ཆགས་རྗེས་སྨན་པ་བྱས་ནས་ངའི་ཕ་ཡུལ་དུ་ནད་བཅོས་སྲོག་སྐྱོབ་བྱ་རྒྱུ་ཡིན”ཞེས་གཅེན་གཅུང་གཉིས་པོས་བྲལ་མི་བཟོད་པའི་བརྩེ་བ་ཟབ་མོ་འཆང་བཞིན་དེ་ལྟར་བརྗོད།

ཀྲུང་གོ་རྒྱ་གྲམ་དམར་པོ་ཐེབས་རྩ་ལྷན་ཚོགས་ཀྱི་རྒྱན་ཤོག་གི་སྤྱི་ཕན་མ་དངུལ་རྣམ་གྲངས་གཞུང་ལས་ཁང་གི་ཀྲུའུ་རེན་གཞོན་པ་ཅའོ་ཞའོ་ཝུའེ་ཡིས“ང་ཚོས་ཐོག་མཐའ་བར་གསུམ་དུ་དགོས་མཁོ་ཡོད་པའི་བྱིས་པ་ནད་པར་མ་དངུལ་གྱི་རོགས་སྐྱོབ་དང་སྤུས་ལེགས་ཀྱི་སྨན་བཅོས་ཐོན་ཁུངས་མཁོ་འདོན་བྱེད་ཀྱི་ཡོད”2013ལོ་ནས་ད་བར་ཀྲུང་དབྱང་གི་ཆེད་དོན་རྒྱན་ཤོག་གི་སྤྱི་ཕན་མ་དངུལ་གྱི་རྒྱབ་སྐྱོར་ཤུགས་ཆེན་འོག་ཀྲུང་གོ་རྒྱ་གྲམ་དམར་པོ་ཐེབས་རྩ་ལྷན་ཚོགས་ཀྱིས་སྨན་བཅོས་དང་བླངས་རུ་ཁག་6སྒྲིག་འཛུགས་བྱས་ནས་སྔ་རྗེས་སུ་བོད་ལ་ཐེངས་14ཙམ་བསྐྱོད་དེ“གོས་དཀར་ལྷ་རྗེའི་ལྗོངས་རྒྱུའི”ལྷན་སྐྱེས་སྙིང་ནད་ཕོག་པའི་བྱིས་པར་དབྱེ་བཤེར་སྐྱོབ་རོགས་བྱེད་པའི་བྱ་སྤྱོད་སྤེལ་ཡོད། དབྱེ་བཤེར་བྱ་ཡུལ་དེ་ནག་ཆུ་དང་། གཞིས་རྩེ། ཆབ་མདོ། ལྷོ་ཁ། ཉིང་ཁྲི། མངའ་རིས་སོགས་ས་ཁུལ་དུ་ཁྱབ་ནས་རིམ་རྩིས་བྱས་ན་ལྷན་སྐྱེས་སྙིང་ནད་ཕོག་པའི་བྱིས་པ་ནད་པ་600ལ་རོགས་སྐྱོབ་བྱས་ཏེ་རོགས་སྐྱོབ་དངུལ་སྒོར་ཁྲི་1300ལྷག་ཙམ་བཏང་ཡོད་ཅེས་ངོ་སྤྲོད་བྱས་པ་རེད།

“‘གོས་དཀར་ལྷ་རྗེའི་ལྗོངས་རྒྱུ’ནི་དུས་ཐོག་གི་རོགས་སྐྱོབ་ཅིག་ཡིན་ལ་ཡུན་རིང་གི་སྲུང་སྐྱོང་ཞིག་དེ་བས་ཀྱང་ཡིན” སྨན་ཁང་ཕྱོགས་ནས་ཚད་མཐོའི་མཐོང་ཆེན་བྱས་ཏེ་ཀྲུང་དབྱང་གི་ཆེད་དོན་རྒྱན་ཤོག་གི་སྤྱི་ཕན་མ་དངུལ་རྣམ་གྲངས་ལག་བསྟར་ཡག་པོ་བྱས་ནས་ད་རེས་ཀྱི་དབྱེ་བཤེར་ཁྲོད་ཤེས་རྟོགས་བྱུང་བའི་ལྷན་སྐྱེས་སྙིང་ནད་ཕོག་པའི་བྱིས་པ་ནད་པར་སྤུས་ལེགས་ཀྱི་སྨན་བཅོས་ཞབས་ཞུ་མཁོ་འདོན་བྱེད་པ་དང་ཆབས་ཅིག་སྨན་དོན་མི་སྣ་སྤྱི་ཕན་བྱ་སྤྱོད་དེ་རིགས་ནང་ཞུགས་རྒྱུར་མུ་མཐུད་རྒྱབ་སྐྱོར་ཤུགས་ཆེན་བྱས་ནས། མེས་རྒྱལ་གྱི་འབྱུང་འགྱུར་ཆེད་གཡས་སྲུང་གཡོན་འདེགས་བྱ་རྒྱུ་ཡིན་ཞེས་མུའུ་ཏན་ཅང་གཙང་པོ་སྙིང་ཁམས་ཁྲག་རྩའི་ནད་ཀྱི་སྨན་ཁང་གི་ཡོན་ཀྲང་ལིའུ་ཁའེ་ཡིས་བཤད།

ས་མཐོའི་གནམ་གཤིས་གྲང་ངར་ཆེ་ལ་རི་ལམ་ཀྱག་ཀྱོག་མང་ནའང“གོས་དཀར་ལྷ་རྗེའི་ལྗོངས་རྒྱུའི”འགྲུལ་བཞུད་ཀྱི་གོམ་སྟབས་ལ་ནམ་ཡང་ཤུགས་རྐྱེན་ཐེབས་མེད།

(ཤིན་ཧྭ་གསར་འགྱུར་ཁང་ལྷ་ས་ནས་ཟླ་6ཚེས་1ཉིན་གློག་འཕྲིན་འབྱོར་གསལ)