ཤིན་ཧྭ་གསར་འགྱུར་ཁང་པེ་ཅིང་ནས་ཟླ་6ཚེས་4ཉིན་གློག་འཕྲིན་འབྱོར་གསལ། ཚེས་4ཉིན་ཕྱི་འབྲེལ་པུའི་མགྲིན་ཚབ་པ་མའོ་ཉིང་གིས། ཀྲུང་གོ་ཕྱོགས་ཀྱིས་ཐོག་མཐའ་བར་གསུམ་དུ་ཀྲུང་གོ་དང་ཡོ་རོབ་ཀྱི་དཔལ་འབྱོར་ཚོང་དོན་འབྲེལ་བའི་ངོ་བོ་ནི་གཉིས་ཁེ་གཉིས་ཕན་ཡིན་པས་སྲུང་སྐྱོང་རིང་ལུགས་ལ་མདུན་ལམ་མེད་ཅིང་། སྒོ་དབྱེ་མཉམ་ལས་ནི་ཡང་དག་པའི་ལམ་བུ་ཞིག་ཡིན་པའི་ངོས་འཛིན་བྱེད་ཀྱི་ཡོད། ཡོ་རོབ་ཕྱོགས་ཀྱིས་རང་མོས་ཚོང་དོན་མཐའ་འཁྱོངས་དང་སྲུང་སྐྱོང་རིང་ལུགས་ལ་ངོ་རྒོལ་བྱེད་པའི་དམ་བཅར་བརྩི་སྲུང་ནན་པོ་ཞུས་ནས་ཀྲུང་གོ་ཕྱོགས་དང་མཉམ་དུ་ཀྲུང་གོ་དང་ཡོ་རོབ་ཀྱི་དཔལ་འབྱོར་ཚོང་དོན་མཉམ་ལས་ཀྱི་དུས་བབ་མཉམ་དུ་སྲུང་སྐྱོང་བྱ་རྒྱུའི་རེ་བ་ཡོད་ཅེས་བརྗོད།

ཉིན་དེའི་གསར་འགོད་པའི་འཆར་ཅན་ཚོགས་འདུའི་ཐོག་གསར་འགོད་པ་ཞིག་གིས། ཚེས་2ཉིན་ཡོ་རོབ་མནའ་འབྲེལ་གྱི་ཕྱི་འབྲེལ་དང་བདེ་འཇགས་སྲིད་ཇུས་ཀྱི་མཐོ་རིམ་འཐུས་མི་པོ་ལེ་ལིས་བཅར་འདྲི་དང་ལེན་བྱེད་སྐབས། ཀྲུང་གོ་དང“འབྲེལ་བ”གཅོད་ཁག་པོ་ཡོད། གཉིས་ཁེ་གཉིས་ཕན་གྱི་འབྲེལ་བ་མུ་མཐུད་རྒྱུན་འཁྱོངས་བྱ་རྒྱུའི་རེ་བ་ཡོད། འོན་ཀྱང་ངེས་པར་དུ་དྲང་གཞག་དོ་སྙོམས་ཡོང་བར་བྱེད་དགོས། ཡོ་རོབ་ཀྱིས་ཨ་རིའི་རྗེས་སུ་འབྲངས་ནས་ཀྲུང་གོར་སྒོ་ཁྲལ་བསྡུ་མི་སྲིད་ལ། ཚོང་དོན་དམག་འཐབ་ལས་གཡོལ་གང་ཐུབ་བྱེད་དགོས། ང་ཚོས་རང་མོས་ཚོང་དོན་ལ་ཡིད་ཆེས་བྱེད་ཀྱི་ཡོད་མོད། འོན་ཀྱང་རང་མོས་ནི་ངེས་པར་དུ་དྲང་གཞག་ཅིག་ཡིན་དགོས་ཞེས་བརྗོད་ཡོད། མགྲིན་ཚབ་པས་དེའི་ཐད་དཔྱད་གཏམ་གང་ཞིག་སྤེལ་རྩིས་ཡོད་དམ་ཞེས་དྲིས།

“ཀྲུང་གོ་ཕྱོགས་ཀྱིས་ཐོག་མཐའ་བར་གསུམ་དུ་ཀྲུང་གོ་དང་ཡོ་རོབ་ཀྱི་དཔལ་འབྱོར་ཚོང་དོན་འབྲེལ་བའི་ངོ་བོ་ནི་གཉིས་ཁེ་གཉིས་ཕན་ཡིན་པས། སྲུང་སྐྱོང་རིང་ལུགས་ལ་མདུན་ལམ་མེད་ཅིང་། སྒོ་དབྱེ་མཉམ་ལས་ནི་ཡང་དག་པའི་ལམ་བུ་ཡིན་པའི་ངོས་འཛིན་བྱེད་ཀྱི་ཡོད” མའོ་ཉིང་གིས་ཀྲུང་གོ་དང་ཡོ་རོབ་མནའ་འབྲེལ་ཕྱོགས་གཉིས་ནི་ཚོང་དོན་རོགས་ཟླ་ཆེ་གྲས་གཉིས་པ་ཡིན་པ་དང་སྐར་མ་རེར་ཆ་སྙོམས་ཚོང་དོན་འགྲོ་འོང་ཨ་སྒོར་ཁྲི་150ཙམ་ཟིན་གྱི་ཡོད། ཀྲུང་ཡོའི་ཕྱོགས་གཉིས་ཀྱི་མ་རྩ་འཇོག་རེས་བྱེད་པའི་གསོག་ཚད་ཨ་སྒོར་དུང་ཕྱུར་2500ལས་བརྒལ་བ་དང་ཕྱོགས་གཉིས་པོའི་ཁེ་ལས་ཀྱིས་ད་དུང་ཕ་རོལ་པོའི་ཁྲོམ་རར་མུ་མཐུད་མ་འཇོག་བྱེད་བཞིན་ཡོད། ཀྲུང་ཡོའི་དུས་གཏན་མེ་འཁོར་གཏོང་ཚད་རིམ་རྩིས་བྱས་ན་ཁྲི་9ལས་བརྒལ་ནས་མིང་དོན་མཚུངས་པའི་ཨེ་ཤེ་ཡ་དང་ཡོ་རོབ་དབར་གྱི་ཚོང་དོན་བགྲོད་ལམ་རྩེ་གྲ་ཞིག་ཏུ་གྱུར་ཡོད། ཀྲུང་གོ་དང་ཡོ་རོབ་དབར་གྱི་མཁོ་སྤྲོད་འཁོར་འབྲེལ་དང་། ཐོན་ལས་འཁོར་འབྲེལ། རིན་ཐང་འཁོར་འབྲེལ་བཅས་ཕན་ཚུན་མཉམ་འདྲེས་ཟབ་པའི་རྣམ་པ་ཆགས་ཟིན་ཡོད་ཅེས་བརྗོད་ཆོག་ཅེས་བརྗོད།

མའོ་ཉིང་གིས་ཀྲུང་གོ་ཕྱོགས་ཀྱིས་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་སྐུལ་འདེད་གཏོང་རྒྱུ་མཐའ་འཁྱོངས་བྱས་ནས་རྒྱལ་ཁབ་ཁག་གི་ཁེ་ལས་ལ་སྒོ་དབྱེ་དང་། བསྟུན་མཁས། ཕྱི་གསལ་ནང་གསལ་བཅས་ཀྱི་ཚོང་གཉེར་ཁོར་ཡུག་མཁོ་འདོན་བྱ་རྒྱུར་འབད་བརྩོན་བྱེད་ཀྱི་ཡིན་ལ། ཡོ་རོབ་ཕྱོགས་ཀྱིས་ཀྱང་རང་མོས་ཚོང་དོན་མཐའ་འཁྱོངས་དང་སྲུང་སྐྱོང་རིང་ལུགས་ལ་ངོ་རྒོལ་བྱེད་པའི་དམ་བཅར་བརྩི་སྲུང་ནན་པོ་ཞུས་ནས་ཀྲུང་གོ་ཕྱོགས་དང་མཉམ་དུ་ཀྲུང་ཡོའི་དཔལ་འབྱོར་ཚོང་དོན་མཉམ་ལས་ཀྱི་དུས་བབ་ལ་མཉམ་དུ་སྲུང་སྐྱོང་བྱ་རྒྱུའི་རེ་བ་ཡོད་ཅེས་བརྗོད།