རྩྭ་མདའ་རྫོང་ཞ་ཡེ་གྲོག་རོང་གི་དྲུ་རོང་མཛེས་ལྗོངས་ཁུལ་དུ་སྐྱོད་སྐབས་ཞ་ཡེ་གྲོག་རོང་མཛེས་ལྗོངས་ཁུལ་དང་བར་ཐག་སྤྱི་ལེ་8ཡོད་པའི་བྱང་རྩེ་ཤང་སྲིད་གཞུང་གནས་ཡུལ་དུ་གང་སར་ཚ་ཚ་འུར་འུར་ངང་འཛུགས་སྐྲུན་བྱེད་པའི་རྣམ་པས་ཁེངས་ཤིང་། དེ་ལས་མངའ་རིས་ཀྱི་གྲགས་ཅན་ཡུལ་སྐོར་ཤང་དང་གྲོང་རྡལ་གྱི་མདུན་ལམ་དེ་བས་ཡངས་པ་མངོན་གྱི་ཡོད།

“བྱང་རྩེ་ཤང་ཡུལ་སྐོར་གྲོང་རྡལ་ཆུང་ངུའི་རྣམ་གྲངས་ནི‘ལོ་ལྔ་ཚན་བཅུ་བཞི་པའི’ཧོ་པེ་ཞིང་ཆེན་གྱིས་རྩྭ་མདའ་རྫོང་ལ་ཁ་གཏད་རོགས་སྐྱོར་བྱེད་པའི་གཙོ་གནད་རྣམ་གྲངས་ཀྱི་གྲས་ཤིག་ཡིན་པ་དང་དེར་ཁྱོན་མ་དངུལ་སྒོར་དུང་ཕྱུར་1.1ཙམ་བཏང་བ་དང་། སྤྱི་ཡོངས་ཀྱི་གྲུབ་ཆ་ནི་བྱང་རྩེ་ཤང་དང་ཞ་ཡེ་གྲོག་རོང་གི་དྲུ་རོང་རང་བྱུང་མཛེས་ལྗོངས་ཁུལ་ལྟེ་བར་བྱེད་པ་དང་། བྱང་རྩེ་ཤང་དང་བྱང་རྩེ་གྲོང་ཚོའི་ཞ་ཡེ་ཚོགས་ཆུང་གི་སྐྱེ་ཁམས་རླངས་འཁོར་འགྲོ་ལམ་དང་འབྲེལ་བ། འབྱུང་འགྱུར་ད་དུང་མཛེས་ལྗོངས་ཁུལ་མང་པོ་བཀོད་སྒྲིག་བྱ་རྒྱུ་རེད”ཅེས་བྱང་རྩེ་ཤང་གི་ཤང་ཀྲང་ལི་ཡཱ་ལིན་གྱིས་གསར་འགོད་པར་བཤད།

མིག་སྔར། བྱང་རྩེ་ཤང་ཡུལ་སྐོར་གྲོང་རྡལ་ཆུང་ངུའི་རྣམ་གྲངས་ཁྲོད་ཀྱི་ཞ་ཡེ་གྲོག་རོང་མཛེས་ལྗོངས་ཁུལ་གྱི་ཡུལ་སྐོར་དོ་དམ་ལྟེ་གནས་དང་། ཁྱད་ལྡན་ལྗོངས་གཟིགས་རྒྱལ་སྒོ “འབྲོག་ཁྱིམ་སྤྲོ་སྐྱིད་ཁང”དམངས་སྲོལ་གནས་ཚང་ཞབས་ཞུའི་ས་ཚིགས། རྒྱང་ལྟའི་སྟེགས་བུ་དང་དེ་བཞིན་བདེ་འཇགས་སོགས་རྨང་གཞིའི་སྒྲིག་བཀོད་འཛུགས་སྐྲུན་སྤྱིར་ན་ལེགས་གྲུབ་ཟིན་པ་དང་འདི་ལོའི་ཟླ་4ཚེས་30ཉིན་ནས་བཟུང་། ཧོ་པེ་བོད་སྐྱོར་གྱིས་གདན་དྲངས་པའི་རྩྭ་མདའ་རྫོང་ཡིའུ་ལན་ཡུལ་སྐོར་དོ་དམ་ཚད་ཡོད་ཀུང་སིས་ཚོད་ལྟའི་གཉེར་སྐྱོང་གི་འགན་འཁུར་གྱི་ཡོད། རྣམ་གྲངས་སྤྱོད་འགོ་ཚུགས་པ་དང་བསྟུན་ནས་ས་གནས་དེ་གའི་ཞིང་འབྲོག་པའི་འཚོ་བའི་སྤུས་ཚད་ལེགས་སུ་ཕྱིན་པ་མ་ཟད། ཡུལ་སྐོར་བར་དེ་བས་ཕུན་སུམ་ཚོགས་པོའི་ཡུལ་སྐོར་གྱི་ཉམས་ལེན་ཐུབ་པར་བྱས་ཡོད།

“རྩྭ་མདའ་རྫོང་ལ་གུ་གེའི་གནའ་ཤུལ་དང་། ཕྱི་གཡང་དུང་དཀར་ཕུག་པ།

ཁྱུང་ལུང་དངུལ་མཁར་སོགས་གྲགས་ཅན་མཛེས་ལྗོངས་ཁུལ་15ཡོད་པས་ཡུལ་སྐོར་ཐོན་ཁུངས་ཧ་ཅང་ཕུན་སུམ་ཚོགས་པོ་ཡོད”ཅེས་རྩྭ་མདའ་རྫོང་ཨུད་ཀྱི་རྒྱུན་ཨུ་དང་། རྫོང་དཔོན་གཞོན་པ། ཧོ་པེ་ཞིང་ཆེན་གྱི་བོད་སྐྱོར་ལས་བྱེད་པ་བཅས་ཡིན་པའི་ཝང་ལེས་བཤད།

ཁོང་གིས་ང་ཚོས་བོད་སྐྱོར་ལས་དོན་སྒྲུབ་རིང་རྩྭ་མདའི་ཕུན་སུམ་ཚོགས་པའི་ཐོན་ཁུངས་དང་ཟུང་འབྲེལ་བྱས་ནས་ཡུལ་སྐོར་ཐོན་ལས་བོད་སྐྱོར་དེ་ཐོག་མཐའ་བར་གསུམ་དུ་མངོན་གསལ་དོད་པའི་གནས་སུ་བཞག་པ་དང་། “ཡུལ་སྐོར་ལ་བརྟེན་ནས་རྫོང་དར་རྒྱས་ཡོང་བ་དང་། སྒོ་དབྱེ་དམངས་ཕྱུག”གི་བསམ་བློར་དམིགས་ཏེ། “གུ་གེའི་འཆམ་ཡག་པོ་འཁྲབ་པ་དང་དྲུ་རོང་གི་སྤུས་རྟགས་ཡག་པོ་གཏོད་རྒྱུ”དེ་ལས་ཀའི་དམིགས་ཚད་དུ་བྱས་ནས། བྱང་རྩེ་ཤང་ཡུལ་སྐོར་གྲོང་རྡལ་ཆུང་ངུའི་རྣམ་གྲངས་སོགས་གཙོ་གནད་བོད་སྐྱོར་ལས་གྲྭ་ལག་བསྟར་བྱས་པ་བརྒྱུད། རྩྭ་མདའ་རྫོང་གི་ཡུལ་སྐོར་ཐོན་ལས་འཕེལ་རྒྱས་ཀྱི་རྨང་གཞི་བརྟན་དུ་ཕྱིན་པ་དང་རང་རྟེན་ནུས་པ་ཆེ་རུ་སོང་སྟེ་ཡུལ་སྐོར་འཕེལ་རྒྱས་ཆེན་པོར་བརྟེན་ནས་རྩྭ་མདའི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་ཡོད་ཅེས་བཤད།

ཞ་ཡེ་གྲོག་རོང་མཛེས་ལྗོངས་ཁུལ་གྱི་སྒོ་འགྲམ་དུ་བྱང་རྩེ་གྲོང་ཚོའི་ཞ་ཡེ་ཚོགས་ཆུང་གི་ལྟ་སྐོར་རླངས་འཁོར་གྱི་ཁ་ལོ་བ་སྐལ་བཟང་བསྟན་འཛིན་གྱིས་འཛུམ་དམུལ་དམུལ་ངང་ཡུལ་སྐོར་བར་བསུ་བ་ཞུས་ཤིང་། ཁོང་དང་གྲོང་ཚོའི་ཁ་ལོ་བ་གཞན་དག་8ཀྱིས་མཛེས་ལྗོངས་ཁུལ་ཚོད་ལྟའི་གཉེར་སྐྱོང་བྱེད་འགོ་ཚུགས་པ་ནས་བཟུང་མི་4རེས་ཚོགས་ཆུང་རེ་བྱས་ཏེ་རེས་མོས་ཀྱིས་ཡུལ་སྐོར་བ་བསུ་སྐྱེལ་བྱེད་ཀྱི་ཡོད། “ད་ལྟ་ནི་ཡུལ་སྐོར་བ་མང་བའི་དུས་ཚིགས་ཡིན་པས་ཞ་ཡེ་གྲོག་རོང་དུ་ཡུལ་སྐོར་བ་ཧ་ཅང་མང་པོ་ཡོད། ཡུལ་སྐོར་བ་མང་ཤོས་ཀྱི་སྐབས་སུ་ཕར་འགྲོ་ཚུར་འོང་ཐེངས་20ལྷག་ཙམ་བྱེད་དགོས་ཀྱི་ཡོད། ང་ལ་ཟླ་རེར་གླ་ཆ་སྒོར་4500ཡོད་པ་མ་ཟད། ཁྱིམ་གྱི་སྒོ་འགྲམ་ནས་ལས་ཞུགས་ཐུབ་པས་དངོས་གནས་སྐྱིད་པོ་འདུག”ཅེས་སྐལ་བཟང་བསྟན་འཛིན་གྱིས་བཤད།

ཞ་ཡེ་གྲོག་རོང་མཛེས་ལྗོངས་ཁུལ་གྱི་རྨང་གཞིའི་སྒྲིག་བཀོད་རྒྱུན་ཆད་མེད་པར་འཐུས་སྒོ་ཚང་དུ་བཏང་བ་དེས་མང་ཚོགས་ཀྱི་ཐོབ་སྣང་དང་སྐྱིད་སྣང་སྔར་བས་ཆེ་རུ་ཕྱིན་ཡོད། རྩྭ་མདའ་རྫོང་ཡིའུ་ལན་ཡུལ་སྐོར་དོ་དམ་ཚད་ཡོད་ཀུང་སིའི་འགན་འཁུར་བ་ཝང་ཉིང་གིས“གོམ་སྟབས་རྗེས་མར་ཀུང་སིས་ཞ་ཡེ་གྲོག་རོང་མཛེས་ལྗོངས་ཁུལ་གྱི་ཡུལ་སྐོར་དོ་དམ་ལྟེ་གནས་སུ་ཟ་ཁང་དང་། སྒོ་རྩིས་ཚོང་ཁང་། ཀོག་ཧྥེ་ཁང་སོགས་བཙུགས་ནས་ཡུལ་སྐོར་བར་དེ་བས་སྟབས་བདེ་དང་དེ་བས་ཕུན་སུམ་ཚོགས་པའི་ཡུལ་སྐོར་མྱོང་རོལ་ཐུབ་པ་བྱ་རྒྱུ་ཡིན། རྣམ་གྲངས་དེས་རྩྭ་མདའ་རྫོང་གི་ཞིང་འབྲོག་པ་123ལས་ཞུགས་གཞན་སྒྱུར་ཐུབ་པ་དང་འབབ་འཕར་སྒོར་ཁྲི་120ཡོང་གི་ཡོད། རྣམ་གྲངས་ཚང་མ་བསྐྲུན་ཟིན་རྗེས་བྱང་རྩེ་ཤང་གི་རྨང་གཞིའི་ལེ་ལག་ཚང་བའི་སྒྲིག་བཀོད་ལེགས་སུ་གཏོང་བ་དང་། ས་གནས་དེ་གའི་ཡུལ་སྐོར་ཐོན་ལས་ཁྲོམ་ར་ཅན་གྱི་དོ་དམ་ཆུ་ཚད་མཐོ་རུ་གཏོང་བ། ཡུལ་སྐོར་ལས་རིགས་སྤུས་ཚད་མཐོ་བའི་འཕེལ་རྒྱས་དང་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་གཏོང་བ་བཅས་བྱས་ནས། ས་གནས་དེ་གའི་ཞིང་འབྲོག་མང་ཚོགས་འབབ་འཕར་ཕྱུག་འགྱུར་ལ་སྐུལ་ཁྲིད་ནུས་ལྡན་ཐུབ་རྒྱུ་རེད”ཅེས་བཤད།

ཝང་ལེ་ཡིས་ངོ་སྤྲོད་བྱས་པར་གཞིགས་ན། འདི་ལོའི་ཟླ་5ཚེས་4ཉིན་བར་རྩྭ་མདའ་རྫོང་གིས་རིམ་རྩིས་བརྒྱབ་ན་ཡུལ་སྐོར་བ་མི་ཐེངས་ཁྲི་1.67ལྷག་ཙམ་ལ་སྣེ་ལེན་ཞུས་པར་ཡོང་འབབ་སྒོར་ཁྲི་8554.64བྱུང་ཡོད། གོམ་སྟབས་རྗེས་མར། ཧོ་པེ་ཞིང་ཆེན་གྱི་བོད་སྐྱོར་ལས་དོན་རུ་ཁག་གིས་མུ་མཐུད་ཁྱད་ལྡན་ཡུལ་སྐོར་ཐོན་ཁུངས་སྔོག་འདོན་གཏིང་ཟབ་དང་། རིག་གནས་ལ་བརྟེན་ནས་ཡུལ་སྐོར་དར་བ་བྱ་རྒྱུ་མཐའ་འཁྱོངས། གསར་གཏོད་རྣམ་པའི་རིག་གནས་ཡུལ་སྐོར་བྱེད་སྒོ་རྒྱུན་ཆད་མེད་པར་སྤེལ་བ། མཛེས་ལྗོངས་ཁུལ་གྱི་ཞབས་ཞུའི་སྤུས་ཚད་ནུས་ཤུགས་ཡོད་རྒུས་མཐོ་རུ་གཏོང་བ། ཁྱད་ལྡན་ཡུལ་སྐོར་ལམ་ཐིག་རྩེ་གྲ་སྔར་བས་གཏོད་པ། རྫོང་ཁོངས་ཀྱི་མཛེས་ལྗོངས་ཁུལ་དང་ཡུལ་སྐོར་ཁྱད་ལྡན་གྲོང་གསེབ་མཉམ་འགུལ་འཕེལ་རྒྱས་ལ་སྐུལ་འདེད་གཏོང་བ་བཅས་བྱས་ཏེ། ས་ཁོངས་ཡུལ་སྐོར་གྱི་གཞི་ཁྱོན་ཆགས་པར་བྱས་ནས་ཡུལ་སྐོར་གྱི་སྐད་གྲགས་ཆོད་ཚད་ཆེ་རུ་གཏོང་རྒྱུ་རེད།