ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དར་སྤེལ་གཏོང་དགོས།
2024ལོའི《བདེན་འཚོལ》དུས་དེབ་འདོན་ཐེངས་8པའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་རྩོམ་གལ་ཆེན་སྤེལ་ཞིང་། “ཀྲུང་ཧྭའི་ཤེས་དཔལ་ནི་མི་རིགས་མང་པོའི་མཐུན་ཡང་མི་འདྲ་བའི་རིག་གནས་ཀྱི་ས་རྒྱུ་གཤིན་པོར་རྩ་བ་ཚུགས་ཤིང་ལོ་རྒྱུས་ཡུན་རིང་ལྡན་པས། འཛམ་གླིང་ཐོག་ད་བར་ཆད་མེད་འཕེལ་རྒྱས་འགྲོ་བའི་ཤེས་དཔལ་འབའ་ཞིག་དེ་རེད”ཅེས་ནན་བཤད་གནང་ཡོད། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ནི་ཀྲུང་ཧྭའི་ཤེས་དཔལ་གྱི་བློ་གྲོས་ཀྱི་ཉིང་བཅུད་གནས་ས་ཞིག་དང་། ཀྲུང་ཧྭ་མི་རིགས་ཀྱི་རྩ་བ་དང་བླ་སྲོག འཛམ་གླིང་རིག་གནས་ཀྱི་ཡོ་ལང་ཁྲོད་ང་ཚོ་རྐང་པ་བརྟན་པོ་ཚུགས་ཐུབ་པའི་རྨང་གཞི་ཞིག་བཅས་རེད།
ཀྲུང་ཧྭའི་ཤེས་དཔལ་གྱིས་ང་ཚོའི་རྒྱལ་ཁབ་དང་མི་རིགས་ཀྱི་བསམ་པའི་ཁྲག་རྒྱུན་གཅིག་རྒྱུན་གཅིག་འཛིན་གྱིས་མི་རབས་ནས་མི་རབས་བར་སྲུང་སྐྱོང་བྱེད་དགོས་པ་མ་ཟད། དེ་བས་ཀྱང་དུས་བསྟུན་མདུན་སྐྱོད་དང་གསར་གཏོད་བྱེད་ཕོད་པ་བྱེད་དགོས། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དར་སྤེལ་གཏོང་བར་གནའ་བཟང་དེང་སྤྱོད་དང་། ཕྱི་བཟང་ཀྲུང་སྤྱོད། སྙིགས་དོར་བཅུད་ལེན། རྫུན་སྤངས་བདེན་འཛིན་བཅས་བྱ་རྒྱུ་མཐའ་འཁྱོངས་བྱེད་པ་དང་། ཀྲུང་ཧྭའི་ཤེས་དཔལ་གསར་གཏོད་རང་བཞིན་གྱི་གཞན་སྒྱུར་དང་གསར་གཏོད་རང་བཞིན་གྱི་འཕེལ་རྒྱས་ལ་སྐུལ་འདེད་གཏོང་བ། ཀྲུང་ཧྭ་མི་རིགས་ཀྱི་ཆེས་གཞི་རྩའི་རིག་གནས་གཞི་རྒྱུ་དེ་དེང་རབས་རིག་གནས་དང་འཚམ་ཞིང་དེང་རབས་སྤྱི་ཚོགས་དང་མཐུན་སྦྱོར་ཡོང་བར་བྱེད་པ། མི་རྣམས་ཀྱིས་ལྟ་འདོད་ཅིང་ཉན་སྤྲོ་བ་དང་ཐེ་ཞུགས་ཀྱི་རང་བཞིན་ལྡན་པའི་རྣམ་པའི་ཐོག་ནས་ཁྱབ་གདལ་གཏོང་བ། དུས་དང་བར་སྟོང་ལས་བརྒལ་བ། རྒྱལ་ཁབ་ལས་བརྒལ་བ། རྟག་བརྟན་གྱི་ཡིད་དབང་འཕྲོག་ཤུགས་ལྡན་པ། དེང་རབས་ཀྱི་རིན་ཐང་ལྡན་པ་བཅས་ཀྱི་རིག་གནས་སྙིང་སྟོབས་དར་སྤེལ་གཏོང་བ་བཅས་བྱས་ནས། རྟེན་མཛོད་ཁང་དུ་ཉར་ཚགས་བྱས་པའི་རིག་དངོས་དང་། ཡངས་ཤིང་རྒྱ་ཆེ་བའི་ས་གཞིའི་ཐོག་ཡོད་པའི་ཤུལ་བཞག གནའ་དཔེའི་ནང་བྲིས་པའི་ཡི་གེ་བཅས་ལ་གསོན་ཤུགས་ལྡན་པ་བྱེད་དགོས།
ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ལ་ཀྲུང་ཧྭ་མི་རིགས་ཀྱི་གཞི་རྒྱུ་དང་ཁྲག་རྒྱུན་གཏན་པས་ང་ཚོའི་མི་རབས་འདིར་དབང་བ་མ་ཟད། ཕ་ཚ་བུ་རྒྱུད་ཚང་མར་དབང་གི་ཡོད། ང་ཚོས་རང་འགུལ་གྱིས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཁྱབ་སྤེལ་དང་དར་སྤེལ་གཏོང་བའི་འགན་འཁྲི་དང་ལས་འགན་འཁུར་ཏེ་ཀྲུང་ཧྭའི་ཤེས་དཔལ་གྱི་ལོ་རྒྱུས་ཕྱོགས་ཡོངས་ནས་ཤེས་རྟོགས་གཏིང་ཟབ་དང་། གནའ་བོའི་རླབས་ཆེན་གྱི་ཀྲུང་ཧྭ་མི་རིགས་ཇི་ལྟར་བྱས་ནས་སྐྱེ་འཚར་རྒྱུན་ཆད་མེད་པར་བྱེད་པ། ལོ་རྒྱུས་ཡུན་རིང་ལྡན་པའི་ཀྲུང་ཧྭའི་ཤེས་དཔལ་ཇི་ལྟར་བྱས་ནས་རྒྱ་ཆེ་ཞིང་གཏིང་ཟབ་ཤེས་རྟོགས་ཐུབ་པ་བཅས་བྱས་ཏེ། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཁྲོད་ནས་ལས་ཀར་སྐུལ་འདེད་གཏོང་བ་དང་ལག་ལེན་ལ་མཛུབ་ཁྲིད་བྱེད་པའི་འབྱུང་ཁུངས་འཚོལ་དགོས། སྤྱི་པའི་རིག་གནས་ཀྱི་ཞབས་ཞུའི་མ་ལག་འཐུས་སྒོ་ཚང་དུ་བཏང་ནས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་མཚན་ཉིད་རིག་པའི་བསམ་བློ་དང་། མི་ཆོས་རིག་གནས་ཀྱི་སྙིང་སྟོབས། རིན་ཐང་གི་འདུ་ཤེས། ཀུན་སྤྱོད་ཀྱི་ཚད་གཞི་བཅས་སྔོག་འདོན་གཏིང་ཟབ་བྱས་ཏེ། བསམ་བློ་གཏོང་ཤུགས་དང་། རིག་གནས་ཀྱི་ཤུགས་རྐྱེན་ཐེབས་ཤུགས། སྒྱུ་རྩལ་གྱི་ཡིད་དབང་འཕྲོག་ཤུགས་བཅས་ལྡན་པའི་བརྩམས་ཆོས་རྩེ་གྲ་སྔར་ལས་མང་བ་ཧུར་ཐག་བཏོད་ནས་མི་རིགས་ཁག་གི་མང་ཚོགས་ཀྱི་སྣ་མང་ཅན་དང་། རིམ་པ་མང་བ། ཕྱོགས་མང་པོ་བཅས་ཀྱི་བསམ་པའི་རིག་གནས་ཀྱི་དགོས་མཁོ་རྒྱུན་ཆད་མེད་པར་སྐོང་དགོས། རིག་གནས་ལ་བརྟེན་ནས་མི་སྣ་ལེགས་སྐྱོང་མཐའ་འཁྱོངས་བྱས་ཏེ། སྐད་ཆ་དང་། རྣམ་པ། ཐབས་ལམ་བཅས་གསར་གཏོད་བྱེད་པ་དང་། དེང་རབས་ཆ་འཕྲིན་ལག་རྩལ་སྤྱོད་པ། སྲོལ་རྒྱུན་སྒྱུ་རྩལ་གྱི་མཚོན་སྟངས་འདོན་སྤེལ་བྱེད་པ། བརྙན་ཤེལ་ཆེ་ཆུང་བརྒྱུད་སྤེལ་དང་། དྲ་ཐོག་དང་དྲ་ཕྱི་སྤེལ་རེས། མཆེད་རྫས་གསར་སྤེལ་སོགས་ཀྱི་རྣམ་པ་སྣ་མང་བརྒྱུད་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་ཐུན་མོང་མ་ཡིན་པའི་ཡིད་དབང་འཕྲོག་ཤུགས་དང་ཡོངས་ཁྱབ་རིན་ཐང་སྔར་བས་མངོན་པ་དང་སྔར་བས་རྒྱ་ཁྱབ་ངང་ཁས་ལེན་ཐུབ་པར་བྱེད་དགོས།