གཅིག ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་མཆོག་གི་གདན་ཞུས་ལྟར། ཨ་རབ་ཨེ་ཅིབ་སྤྱི་མཐུན་རྒྱལ་ཁབ་ཀྱི་ཙུང་ཐུང་ཨཱ་པུའུ་ཏུའུ་ལེ་ཧྥ་ཐཱ་ཧོ·སའེ་ཤིས་མཆོག་གིས་2024ལོའི་ཟླ་5ཚེས་28ནས་ཚེས་31ཉིན་བར་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ལ་རྒྱལ་དོན་འཚམས་འདྲི་གནང་བ་རེད།

གཉིས། རྒྱལ་ཁབ་གཉིས་ཀྱི་གཙོ་བདག་གིས་ཕྱོགས་གཉིས་ཀྱི་འབྲེལ་བ་དང་། ཁྱབ་ཁོངས་ཁག་གི་མཉམ་ལས་ལ་སྐུལ་འདེད་གཏོང་བ། ཕྱོགས་མང་སྒྲོམ་གཞིའི་འོག་མཐུན་སྦྱོར་བྱེད་ཤུགས་ཆེ་རུ་གཏོང་བ་བཅས་ལ་དམིགས་ནས་དངོས་གཞིའི་གྲོས་མོལ་གནང་བ་མ་ཟད། ད་དུང་ཐུན་མོང་ཐོག་དོ་ཁུར་བྱེད་པའི་རྒྱལ་སྤྱི་དང་ས་ཁུལ་གྱི་གནད་དོན་མང་དག་ཅིག་གི་ཐད་ཀྱང་དགོངས་འཆར་བརྗེ་རེས་གནང་བ་རེད།

གསུམ། རྒྱལ་ཁབ་གཉིས་ཀྱི་གཙོ་བདག་གིས། 2014ལོར་ཀྲུང་ཨེའི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་བཙུགས་ཚུན་རྒྱལ་ཁབ་གཉིས་དབར་ཀྱི་ཁྱབ་ཁོངས་ཁག་གི་མཉམ་ལས་ལ་འཕེལ་རྒྱས་མངོན་གསལ་དོད་པོ་དང་མཆོང་སྐྱོད་ཆེན་པོ་བྱུང་བར་བསྔགས་བརྗོད་གནང་བ་དང་ཆབས་ཅིག ཕྱོགས་གཉིས་དབར་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་བཙུགས་ནས་ལོ་10འཁོར་བ་གོ་སྐབས་སུ་བཟུང་ཐོག་རྒྱལ་ཁབ་གཉིས་ཀྱི་སྲིད་གཞུང་དང་། ཁྲིམས་འཛུགས་སྒྲིག་གཞི། ས་གནས་སྲིད་གཞུང་བཅས་དབར་རིམ་མཐོའི་ཕན་ཚུན་གྱི་འཚམས་འདྲི་བྱེད་མང་དུ་བཏང་ནས་ཕྱོགས་གཉིས་ཀྱི་འབྲེལ་བའི་ཆུ་ཚད་མཐོ་རུ་གཏོང་བ་དང་། མདུན་ལམ་དེ་བས་ཆེ་བ་བཏོད་དེ་རྒྱལ་ཁབ་གཉིས་ཀྱི་ཁེ་ཕན་ལ་ཞབས་འདེགས་ཞུ་བ། མཛའ་མཐུན་གྱི་འབྲེལ་བ་ལྡན་པའི་རྒྱལ་ཁབ་གཉིས་ཀྱི་མི་དམངས་ཀྱི་རེ་སྒུག་དང་བསམ་འདུན་མངོན་འགྱུར་བྱེད་པ། དུས་རབས་གསར་པར་ལས་དབང་གཅིག་མཐུན་ཚོགས་པ་འཛུགས་པའི་དམིགས་ཚད་ལ་ཕྱོགས་ནས་རྒྱལ་ཁབ་གཉིས་ཀྱི་འབྲེལ་བའི་ཆུ་ཚད་མཐོ་རུ་གཏོང་བ་བཅས་བྱས་ཏེ། ཀྲུང་ཨེའི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་སྐས་རིམ་གསར་པ་ཞིག་ཏུ་བསླེབ་པར་སྐུལ་འདེད་གཏོང་དགོས་པའི་ནན་བཤད་གནང་བ་རེད།

བཞི། རྒྱལ་ཁབ་གཉིས་ཀྱི་གཙོ་བདག་གིས་ཕྱོགས་གཉིས་དབར་གྱི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བར་ཐོབ་པའི་གཡུར་ཟའི་གྲུབ་འབྲས་ལ་ཐུགས་བློ་ཚིམས་པོ་གནང་བ་དེ་རྒྱལ་ཁབ་གཉིས་དར་རྒྱས་གོང་འཕེལ་འགྲོ་བར་སྐུལ་འདེད་གཏོང་རྒྱུར་ཕན་པ་ཡོད། རྨང་གཞིའི་སྒྲིག་བཀོད་དང་། འགྲིམ་འགྲུལ། ལྕགས་ལམ། གྲུ་བཟོ། བཟོ་སྐྲུན། མ་འཇོག བར་སྣང་ཚན་རིག་སོགས་ཁྱབ་ཁོངས་ཀྱི་ཨེ་ཅིབ་ཀྱི་དཔལ་འབྱོར་རྣམ་གྲངས་ཆེ་གྲས་མང་དག་ཅིག་འཛུགས་སྐྲུན་བྱེད་པའི་ནང་ཀྲུང་གོ་ཕྱོགས་ཞུགས་ཡོད་པ་དང་། དེ་དག་ནང་སྲིད་འཛིན་རྒྱལ་ས་གསར་པའི་ལྟེ་བའི་ཚོང་དོན་ཁུལ་འཛུགས་སྐྲུན་ནང་ཞུགས་པ་དང་། སྨྱུང་སྲུང་ཟླ་བའི་ཉིན་བཅུའི་གྲོང་ཁྱེར་གྱི་གློག་ཤུགས་ཅན་གྱི་ལྕགས་ལམ་བསྐྲུན་པ། ཀྲུང་ཨེའི་ཐའེ་ཏཱ་སུའུ་དབྱི་ཧྲི་དཔལ་འབྱོར་ཚོང་དོན་མཉམ་ལས་ཁུལ་ལ་མ་རྩ་བཏང་བ། ཨེ་ཅིབ་ཀྱི་སྲུང་སྐར་ཨང་གཉིས་པ་འཕེན་གཏོང་བྱས་པ་སོགས་ཚུད་ཡོད་པ་རེད། གཞན་ཡང་། ཕྱོགས་གཉིས་པོས་དངུལ་རྩའི་མཉམ་ལས་ལ་ཤུགས་སྣོན་བརྒྱབ་ནས་རང་དངུལ་ཕན་ཚུན་བརྗེ་རེས་གྲོས་མཐུན་མུ་མཐུད་བཞག་སྟེ། ཨེ་ཅིབ་ཀྱིས་ཀྲུང་གོར་དོམ་ཁྲའི་བུན་ལོར་གྲུབ་འབྲས་ཐོབ་པའི་ངང་འགྲེམས་སྤེལ་བྱས་པ་དང་། རྒྱལ་སྤྱིའི་དཔལ་འབྱོར་གར་སྟེགས་ཐོག་མཐུན་སྦྱོར་བྱེད་ཤུགས་ཆེ་རུ་བཏང་བའི་ཁྲོད་ཨེ་ཅིབ་ཨེ་ཤེ་ཡའི་རྨང་གཞིའི་སྒྲིག་བཀོད་མ་འཇོག་དངུལ་ཁང་ནང་ཞུགས་པ་དང་སྦྲགས་དངུལ་ཁང་དེའི་2023ལོའི་ལོ་ཚོགས་ཀྱང་གཉེར་བ་དང་། 2023ལོར་དངོས་སུ་གསར་སྤེལ་དངུལ་ཁང་གསར་པར་ཞུགས་པ། 2024ལོར་འབོ་གསེར་ལམ་སྲོལ་གྱི་ཁོངས་མིར་གྱུར་པ་བཅས་རེད།

ལྔ། ཀྲུང་ཨེའི་དབར་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་བཙུགས་ནས་ལོ་10འཁོར་བའི་སྐབས་འདིར། ཀྲུའུ་ཞི་ཞི་ཅིན་ཕིང་དང་ཙུང་ཐུང་སའེ་ཤིས་རྣམ་གཉིས་ཀྱིས་འདི་ལོ་ནི“ཀྲུང་ཨེའི་རོགས་ཟླའི་ལོ”ཡིན་ཞེས་ཁྱབ་བསྒྲགས་གནང་ནས་ཕྱི་འབྲེལ་དང་། དཔལ་འབྱོར་ཚོང་དོན། མ་འཇོག རིག་གནས། ཡུལ་སྐོར་བཅས་ཀྱི་བྱེད་སྒོ་རབ་དང་རིམ་པ་སྤེལ་ཏེ། ཕྱོགས་གཉིས་ཀྱི་ཁྱབ་ཁོངས་ཁག་གི་འབྲེལ་བ་འཕེལ་རྒྱས་ལ་སྐུལ་འདེད་གཏོང་རྒྱུ་ཡིན་པ་རེད།

དྲུག རྒྱལ་ཁབ་གཉིས་ཀྱི་གཙོ་བདག་གིས་2024ལོའི་ཟླ་དང་པོའི་ནང་ཕྱོགས་གཉིས་ཀྱིས་བཞག་པའི་《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དང་ཨ་རབ་ཨེ་ཅིབ་སྤྱི་མཐུན་རྒྱལ་ཁབ་ཀྱི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་ལག་བསྟར་རྩ་གནད(2024—2028)》ལ་བསྔགས་བརྗོད་གནང་ཞིང་། རྩ་གནད་དེའི་ནང་ཉེ་བའི་ལོ་ཤས་རིང་རྒྱལ་ཁབ་གཉིས་ཀྱི་འབྲེལ་བར་ཐོབ་པའི་དངོས་དོན་གྲུབ་འབྲས་རྨང་གཞིར་བཟུང་ཡོད་པས་ཕྱོགས་གཉིས་ཀྱི་འབྲེལ་བ་འཕེལ་རྒྱས་བཏང་ནས་ཆུ་ཚད་དེ་བས་མཐོན་པོར་སླེབ་པར་བྱེད་པའི་ལམ་རིས་ལྟ་བུ་ཡིན། རྒྱལ་ཁབ་གཉིས་ཀྱིས་ཐོན་ལས་རང་ཡུལ་ཅན་དང་ལག་རྩལ་གཞན་སྒྱུར་ལ་སྐུལ་འདེད་ཧུར་ཐག་གཏོང་རྒྱུ་དང་ཆབས་ཅིག དེ་ཉིད་འབྱུང་འགྱུར་ལོ་ཁ་ཤས་རིང་ཀྲུང་ཨེའི་མཉམ་ལས་ཀྱི་སྔོན་འདེམས་ཁ་ཕྱོགས་སུ་འཛིན་པ་དང་། ཀྲུང་གོས་ཨེ་ཅིབ་ཏུ་ཡོད་པའི་ཐོན་ལས་ལ་མ་འཇོག་བྱེད་ཤུགས་ཆེ་རུ་ཧུར་ཐག་གཏོང་བ་སྟེ། དེའི་ནང་གློག་སྒུལ་རླངས་འཁོར་བཟོ་སྐྲུན་དང་། གློག་རྡུལ་སྒྲིག་ཆས། ཉི་ནུས་གློག་རྫས་ལེབ་མོ་བཟོ་སྐྲུན། རྫས་འགྱུར་བཟོ་ལས། བཟོ་སྐྲུན་རྒྱུ་ཆ་བཅས་དང་དེ་བཞིན་དེང་རབས་ཞིང་ལས་ལག་རྩལ་སོགས་ཁྱབ་ཁོངས་ཚུད་ཡོད། ཕྱོགས་གཉིས་ཀྱི་ཚོང་དོན་དེ་བས་དོ་སྙོམས་ཡོང་བར་སྐུལ་འདེད་ཧུར་ཐག་གཏོང་བ་སྟེ། དེའི་ནང་ཨེ་ཅིབ་ཀྱི་སྤུས་ལེགས་ཐོན་རྫས་དེ་བས་མང་བ་ཀྲུང་གོའི་ཁྲོམ་རར་བཙོངས་ཆོག་པ་དང་། ཀྲུང་གོའི་ཐོན་སྐྱེད་ཀྱི་རྒྱུ་རྐྱེན་གཙོ་བོ་ཨེ་ཅིབ་ཏུ་བསྐྱོད་དེ་མཇུག་མཐའི་ཐོན་རྫས་ཐོན་སྐྱེད་བྱེད་པར་སྟབས་བདེ་སྐྲུན་པ། རྒྱལ་ཁབ་གཉིས་ཀྱི་རང་དངུལ་སྤྱད་དེ་ཚོང་དོན་བསྡོམས་རྩིས་རྒྱག་པའི་ཐད་ཞིབ་དཔྱད་བྱེད་པ། ཀྲུང་གོའི་ཡུལ་སྐོར་བ་ཨེ་ཅིབ་ཏུ་ཡུལ་སྐོར་དུ་འགྲོ་བར་སྐུལ་འདེད་གཏོང་བ། ཀྲུང་གོ་ཕྱོགས་ཀྱིས་གསོལ་མགྲོན་ཁང་འཛུགས་སྐྲུན་དང་དོ་དམ་ཁྱབ་ཁོངས་སུ་ཨེ་ཅིབ་ལ་ཐད་ཀར་མ་འཇོག་བྱེད་པར་སྐུལ་འདེབས་སོགས་ཚུད་ཡོད། གསར་འགྱུར་དང་། རིག་གནས། ཚན་རིག མིས་བཟོས་རིག་ནུས། རིག་གཞུང་སོགས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་རྒྱག་པ་བཅས་ལ་མོས་མཐུན་བྱས་པ་རེད།

བདུན། རྒྱལ་ཁབ་གཉིས་ཀྱི་གཙོ་བདག་གིས་ཕྱོགས་གཉིས་པོའི་འབྲེལ་ཡོད་སྡེ་ཚན་གྱིས་ལག་རྩལ་གྲོས་མོལ་བྱས་ནས། ཕྱོགས་གཉིས་ཀྱི་འབྲེལ་བར་སྐུལ་འདེད་དང་ཤུགས་སྣོན་རྒྱག་རྒྱུའི་སྐོར་གྱི་རྒྱལ་ཁབ་གཉིས་པོའི་འགོ་ཁྲིད་པའི་ཐུན་མོང་ངོས་འཛིན་དོན་འཁྱོལ་བྱེད་དགོས་པའི་མཛུབ་སྟོན་གནང་བ་སྟེ། དེའི་ནང་ཀྲུང་ཨེ་སྲིད་གཞུང་དབར་གྱི་མཉམ་ལས་ཨུ་ཡོན་ལྷན་ཁང་གི་ཚོགས་འདུ་སྔ་ཙམ་འཚོག་རྒྱུར་སྐུལ་འདེད་གཏོང་རྒྱུ་ཚུད་ཡོད།

བརྒྱད། ཕྱོགས་གཉིས་པོས་ཕན་ཚུན་གྱི་ལྟེ་བའི་གནད་དོན་དང་འབྲེལ་བ་ཡོད་པའི་ཐད་ཕན་ཚུན་རྒྱབ་སྐྱོར་བྱེད་པར་བསྔགས་བརྗོད་བྱས་ཡོད། ཀྲུང་ཨེ་རྒྱལ་ཁབ་གཉིས་པོས་ཕན་ཚུན་གྱི་ཐུན་མོང་རྩ་དོན་དང་ལྟེ་བའི་ཁེ་ཕན་སྲུང་སྐྱོང་བྱེད་པར་ཕན་ཚུན་རྒྱབ་སྐྱོར་བྱས་ཏེ་གོ་ལ་ཧྲིལ་པོའི་རང་བཞིན་གྱི་འགྲན་སློང་སྣ་ཚོགས་དང་ལྷག་པར་དུ་ཏོག་གསར་རིམས་ནད་དང་དེ་བཞིན་དེས་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་བཟོས་པའི་ལྡོག་ཕྱོགས་ཀྱི་ཤུགས་རྐྱེན་ལ་ལག་གདང་སྦྲེལ་ནས་ཁ་གཏད་གཅོག་རྒྱུ་རེད།

དགུ། རྒྱལ་ཁབ་གཉིས་ཀྱི་གཙོ་བདག་གིས་ཕྱོགས་གཉིས་པོས་ཕན་ཚུན་གྱི་ལྟེ་བའི་ཁེ་ཕན་ལ་རྒྱབ་སྐྱོར་མཐའ་གཅིག་ཏུ་བྱེད་པ་དང་། ཕན་ཚུན་གྱི་དོ་ཁུར་བྱ་ཡུལ་ལ་ལྟ་རྟོག་བྱེད་པ། ཕན་ཚུན་གྱི་འཇིགས་སྐུལ་ལ་ངོ་རྒོལ་བྱེད་པའི་འབད་བརྩོན་ལ་རྒྱབ་སྐྱོར་བཅས་བྱེད་དགོས་པའི་ནན་བཤད་གནང་བ་རེད། ཀྲུང་གོ་ཕྱོགས་ཀྱིས་ཨེ་ཅིབ་ཕྱོགས་ཀྱི་རྒྱལ་ཁབ་ཀྱི་བདག་དབང་དང་མངའ་ཁོངས་ཆ་ཚང་སྲུང་སྐྱོང་བྱེད་པ་དང་ཕྱིའི་ཕྱོགས་གཏོགས་ཀྱིས་མིང་གང་རུང་གི་ཐོག་ནས་དེའི་ནང་སྲིད་ལ་ཐེ་ཇུས་བྱེད་པར་ངོ་རྒོལ་བྱེད་པའི་ལུགས་མཐུན་ཁེ་དབང་ལ་མུ་མཐུད་རྒྱབ་སྐྱོར་དང་། ཨེ་ཅིབ་ཕྱོགས་ལ་འགྲན་སློང་འཕྲད་སྐབས་རང་ངོས་ཀྱི་བདེ་འཇགས་དང་བརྟན་ལྷིང་སྲུང་སྐྱོང་བྱེད་པའི་ལུགས་མཐུན་ཁེ་དབང་ལ་རྒྱབ་སྐྱོར། ཨེ་ཅིབ་ཕྱོགས་ཀྱི་རང་ངོས་ཀྱི་ཆུའི་བདེ་འཇགས་དང་། འབྲུ་རིགས་བདེ་འཇགས། འཕེལ་རྒྱས་ཀྱི་ཁེ་ཕན་བཅས་སྲུང་སྐྱོང་བྱེད་པའི་ལུགས་མཐུན་ཁེ་དབང་ལ་རྒྱབ་སྐྱོར་བཅས་བྱ་རྒྱུ་ཡིན་པའི་ནན་བཤད་བྱས་པ་དང་། ཨེ་ཅིབ་ཕྱོགས་ཀྱིས་ཀྲུང་གོ་གཅིག་གི་རྩ་དོན་ལ་མུ་མཐུད་བརྩི་སྲུང་མཐའ་གཅིག་ཏུ་ཞུ་རྒྱུ་དང་། ཐའེ་དབན་ནི་ཀྲུང་གོའི་ཁ་འབྲལ་ཐབས་མེད་པའི་ཆ་ཤས་ཤིག་ཡིན་པ། ཀྲུང་གོ་ཕྱོགས་ཀྱི་རང་ངོས་ཀྱི་བདག་དབང་དང་མངའ་ཁོངས་ཆ་ཚང་དང་འབྲེལ་བ་ཡོད་པའི་གནད་དོན་ཐད་འཛིན་པའི་ལངས་ཕྱོགས་ལ་རྒྱབ་སྐྱོར་དང་། ཀྲུང་གོ་གཅིག་གྱུར་མངོན་འགྱུར་ཡོང་བར་རྒྱབ་སྐྱོར། ཕྱིའི་ཕྱོགས་གཏོགས་ཀྱིས་ཀྲུང་གོའི་ནང་སྲིད་ལ་ཐེ་ཇུས་བྱེད་པར་ངོ་རྒོལ་བཅས་བྱ་རྒྱུ་ཡིན་པའི་ནན་བཤད་བྱས་པ་རེད།

བཅུ། རྒྱལ་ཁབ་གཉིས་ཀྱི་གཙོ་བདག་གིས“རྒྱུད་གཅིག་ལམ་གཅིག”གི་གྲོས་འགོ་དང་ཨེ་ཅིབ་ཀྱི“2030ལོའི་རྒྱུན་མཐུད་ཆོག་པའི་འཕེལ་རྒྱས་ཀྱི་འདོད་འདུན”འབྲེལ་མཐུད་ཡོང་བ་དང་འབྲེལ་རྒྱལ་ཁབ་གཉིས་པོའི་འབྲེལ་ཡོད་མཉམ་ལས་རྣམ་གྲངས་བདེ་འཇགས་དང་བདེ་བླག་ངང་ལག་བསྟར་ཐུབ་པར་ཐུན་མོང་ཐོག་འགན་ལེན་བྱེད་དགོས་པའི་ནན་བཤད་གནང་བ་རེད། ཨེ་ཅིབ་ཕྱོགས་ཀྱིས་ཀྲུའུ་ཞི་ཞི་ཅིན་ཕིང་གིས་བཏོན་གནང་བའི“གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོར”བསྔགས་བརྗོད་བྱེད་པ་དང་དེ་ནི་མཉམ་འབྲེལ་རྒྱལ་ཚོགས་ཀྱི་2030ལོའི་གྲོས་རིམ་གྱི་རྒྱུན་མཐུད་ཆོག་པའི་འཕེལ་རྒྱས་ཀྱི་དམིགས་ཚད་མགྱོགས་མྱུར་མངོན་འགྱུར་ཡོང་བར་ཕན་ཐོགས་ཡོད་པའི་གོ་ལ་ཧྲིལ་པོའི་རང་བཞིན་གྱི་གྲོས་འགོ་ཞིག་ཡིན་པའི་ངོས་འཛིན་བྱེད་ཅིང་། ཨེ་ཅིབ་ཕྱོགས་ཀྱིས་གྲོས་འགོ་དེའི་སྒྲོམ་གཞིའི་འོག་གི་ཁྱབ་ཁོངས་ཁག་གི་མཉམ་ལས་ནང་མུ་མཐུད་ཧུར་ཐག་ཞུགས་རྒྱུ་དང་། ཨེ་ཅིབ་ཕྱོགས་ཀྱིས་ཀྲུང་གོ་ཕྱོགས་ཀྱིས་བཏོན་པའི“གོ་ལ་ཧྲིལ་པོའི་བདེ་འཇགས་གྲོས་འགོར”བསྔགས་བརྗོད་བྱེད་པ་དང་ཀྲུང་གོ་ཕྱོགས་དང་མཉམ་དུ་འཛམ་གླིང་གི་ཞི་བདེ་དང་བདེ་འཇགས་སྲུང་སྐྱོང་དང་སྐུལ་འདེད་གཏོང་རྒྱུར་དམིགས་ནས་སྤེལ་རེས་དང་། དཔྱད་བསྡུར། མཉམ་ལས་བཅས་ལ་ཤུགས་སྣོན་རྒྱག་འདོད་ཡོད་པ། ཨེ་ཅིབ་ཕྱོགས་ཀྱིས“གོ་ལ་ཧྲིལ་པོའི་ཤེས་དཔལ་གྲོས་འགོར”བསྔགས་བརྗོད་བྱེད་ཀྱི་ཡོད། གང་ལགས་ཤེ་ན། ཀྲུང་ཨེ་ཕྱོགས་གཉིས་པོས་གཅིག་མཚུངས་ཀྱི་རྩ་དོན་འཛིན་པ་དང་འདྲ་མཉམ་གྱི་རྨང་གཞིའི་ཐོག་མིའི་རིགས་ཀྱི་རིག་གནས་དང་ཤེས་དཔལ་ལ་བརྩི་འཇོག་བྱེད་ཀྱི་ཡོད། ཀྲུང་ཨེའི་གནའ་བོའི་ཤེས་དཔལ་ཆེན་པོ་གཉིས་ལ་ལོ་རྒྱུས་ཡུན་རིང་ལྡན་པ་དང་གཉིས་ཀས་མིའི་རིགས་ཀྱི་ལོ་རྒྱུས་འཕེལ་རྒྱས་ལ་ལེགས་སྐྱེས་ཧ་ཅང་ཆེན་པོ་ཕུལ་ཡོད། དེར་བརྟེན་ཨེ་ཅིབ་ཕྱོགས་ཀྱིས་ཀྲུང་གོ་ཕྱོགས་ཀྱིས་བཏོན་པའི་ལོ་ལྟར་གྱི་ཟླ་6པར་ཤེས་དཔལ་གླེང་མོལ་གྱི་རྒྱལ་སྤྱིའི་ཉིན་མོ་འཛུགས་རྒྱུའི་གྲོས་འགོར་རྒྱབ་སྐྱོར་བྱ་རྒྱུ་ཡིན་ཞེས་བརྗོད་པ་རེད། ཀྲུང་གོ་ཕྱོགས་ཀྱིས་ཨེ་ཅིབ་ཀྱི“འཚོ་བ་ཡག་པོ་སྐྱེལ་བའི”གྲོས་འགོར་བསྔགས་བརྗོད་བྱེད་པ་དང་དེ་ནི་ཨེ་ཅིབ་ཀྱི་གྲོང་གསེབ་ས་ཁུལ་གྱི་རྨང་གཞིའི་སྒྲིག་བཀོད་དང་མི་དམངས་ཀྱི་འཚོ་བའི་ཆུ་ཚད་མཐོ་རུ་གཏོང་རྒྱུ་དམིགས་ཡུལ་དུ་བྱེད་པའི་འཕེལ་རྒྱས་ཀྱི་གྲོས་འགོ་གལ་ཆེན་ཞིག་ཡིན་པའི་ངོས་འཛིན་བྱེད་པ་དང་། གྲོས་འགོ་དེ་དང་ཨེ་ཅིབ་ཕྱོགས་ཀྱི་འཕེལ་རྒྱས་དོན་གཉེར་གྱི་འབད་བརྩོན་མཐའ་དག་ལ་རྒྱབ་སྐྱོར་བྱ་རྒྱུ་ཡིན་པའི་ནན་བཤད་བྱས་པ་རེད།

བཅུ་གཅིག རྒྱལ་ཁབ་གཉིས་ཀྱི་གཙོ་བདག་གིས་ཕྱོགས་གཉིས་པོས་ཀྲུང་ཨ་མཉམ་ལས་གླེང་སྟེགས་ཀྱི་སྒྲོམ་གཞིའི་འོག་གི་ཕན་འབྲས་ལྡན་པའི་མཉམ་ལས་ལ་བསྔགས་བརྗོད་གནང་བ་དང་། རི་ཡ་ཏེ་རུ་འཚོགས་པའི་ཀྲུང་ཨའི་དབུ་ཚོགས་སྐབས་དང་པོའི་ཐོག་ཐོབ་པའི་གྲུབ་འབྲས་ལ་དགའ་བསུ་ཞུ་བ། ཀྲུའུ་ཞི་ཞི་ཅིན་ཕིང་གིས་བཏོན་གནང་བའི་ཀྲུང་ཨའི་དངོས་སྒྲུབ་མཉམ་ལས་ཀྱི“ཐུན་མོང་གི་བྱ་སྤྱོད་ཆེན་པོ་བརྒྱད”ཚུད་པའི་དབུ་ཚོགས་ཀྱི་གྲུབ་འབྲས་ཁག་ཐུན་མོང་ཐོག་དོན་འཁྱོལ་བྱེད་དགོས་པའི་ངོས་འཛིན་གནང་བ་རེད། ཨེ་ཅིབ་ཕྱོགས་ཀྱིས་ཀྲུང་ཨའི་དབུ་ཚོགས་གཉེར་རྒྱུའི་རེ་ཞུ་བྱས་པར་ཀྲུང་གོ་ཕྱོགས་ཀྱིས་དགའ་བསུ་ཞུ་བ་དང་། ཨེ་ཅིབ་ཕྱོགས་ཀྱིས་ཀྲུང་ཨ་མཉམ་ལས་གླེང་སྟེགས་ཀྱི་པུའུ་ཀྲང་རིམ་པའི་ཚོགས་འདུ་སྐབས་བཅུ་པ་གྲུབ་འབྲས་ཐོབ་པའི་ངང་འཚོག་རྒྱུའི་རེ་སྒུག་བྱེད་ཀྱི་ཡོད་ཅེས་བརྗོད་པ་རེད།

བཅུ་གཉིས། རྒྱལ་ཁབ་གཉིས་ཀྱི་གཙོ་བདག་གིས་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་སྒྲོམ་གཞིའི་འོག་ཕྱོགས་གཉིས་པོས་མཉམ་ལས་དང་མཐུན་སྦྱོར་བྱས་པར་བསྔགས་བརྗོད་གནང་བ་དང་། ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་པུའུ་ཀྲང་རིམ་པའི་ཚོགས་འདུ་སྐབས་བརྒྱད་པའི་གྲུབ་འབྲས་དང་ལྷག་པར་དུ་ཀྲུའུ་ཞི་ཞི་ཅིན་ཕིང་གིས་ཁྱབ་བསྒྲགས་གནང་བའི“འདུ་འགོད་ཁག་དགུ”མུ་མཐུད་དོན་འཁྱོལ་བྱེད་དགོས་པའི་ངོས་འཛིན་གནང་བ། 2024ལོའི་ཟླ་9པར་འཚོག་རྒྱུའི་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་སྐབས་གསར་པའི་དབུ་ཚོགས་གྲུབ་འབྲས་ཐོབ་པའི་ངང་གཉེར་ཐུབ་པའི་རེ་སྒུག་གནང་བ་རེད།

བཅུ་གསུམ། རྒྱལ་ཁབ་གཉིས་ཀྱི་གཙོ་བདག་གིས《མཉམ་འབྲེལ་རྒྱལ་ཚོགས་ཀྱི་རྩ་འཛིན》གྱི་དགོངས་པ་དང་རྩ་དོན་ལ་བརྩི་སྲུང་ནན་པོ་ཞུས་ཏེ་ཚད་གཞི་ཉིས་བརྩེགས་དང་ཕྱོགས་རྐྱང་བྱེད་སྤྱོད་ལ་ངོ་རྒོལ་བྱེད་པ་དང་། རྒྱལ་སྤྱིའི་སྒྲིག་གཞི་སྒྱུར་བཅོས་ལ་གཞོལ་ནས་དེ་སྔར་བས་དྲང་གཞག་ཡོང་བ་དང་། འཕེལ་རྒྱས་འགྲོ་བཞིན་པའི་རྒྱལ་ཁབ་ལ་སྔར་བས་མཚོན་བྱེད་རང་བཞིན་ལྡན་པ། གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ཁ་གཏད་དེ་བས་ནུས་ལྡན་གཅོག་ཐུབ་པ་བཅས་བྱེད་དགོས་པའི་ངོས་འཛིན་ཐུན་མོང་ཐོག་གནང་བ་རེད། ཕྱོགས་གཉིས་པོས་རྒྱལ་སྤྱིའི་སྤྱི་ཚོགས་ཀྱིས་ཐུན་མོང་ཐོག་འབད་བརྩོན་བྱས་ནས། གོ་ལ་ཧྲིལ་པོའི་བདེ་འཇགས་དང་བརྟན་ལྷིང་ལ་འཇིགས་སྐུལ་བཟོ་བའི་གླེང་མང་བའི་གནད་དོན་དང་ལྟེ་བའི་གནད་དོན་ལ་ཁ་གཏད་གཅོག་པ་དང་དཔལ་འབྱོར་སླར་གསོ་ཡོང་བ་བྱས་ཏེ། འབྲུ་རིགས་བདེ་འཇགས་དང་། ཆུའི་ཐོན་ཁུངས་དཀོན་པ། གནམ་གཤིས་འགྱུར་ལྡོག ཐང་རྒོད་ཅན་འགོག་བཅོས་བཅས་ཀྱི་གནད་དོན་ཐག་གཅོད་བྱེད་པ་དང་རྒྱལ་ཁབ་ཁག་གིས་གོང་གསལ་གནད་དོན་ཐད་ཀྱི་འགན་འཁྲི་ལག་བསྟར་བྱེད་དགོས་ཞེས་ནན་བཤད་བྱས་པ་རེད། ཕྱོགས་གཉིས་པོས། ཀྲུང་གོ་དང་ཨེ་ཅིབ་ཕྱོགས་གཉིས་པོས་གོང་གསལ་གྱི་གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ཁ་གཏད་གཅོག་རྒྱུར་མུ་མཐུད་གཞོལ་བ་དང་། འབོ་གསེར་ལམ་སྲོལ་དང་ཧྲང་ཧའེ་མཉམ་ལས་རྩ་འཛུགས་སོགས་ས་ཁུལ་དང་རྒྱལ་སྤྱིའི་མཉམ་ལས་དང་མཐུན་སྦྱོར་ལ་ཤུགས་སྣོན་རྒྱག་པ་མ་ཟད། རྒྱལ་སྤྱིའི་མ་ལག་ཁྲོད་གསར་དར་ཁྲོམ་ར་དང་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ནུས་པ་ཆེ་རུ་གཏོང་གང་ཐུབ་བྱེད་དགོས་པའི་ནན་བཤད་བྱས་པ་རེད།

བཅུ་བཞི། ཙུང་ཐུང་སའེ་ཤིས་ཀྱིས་ཀྲུའུ་ཞི་ཞི་ཅིན་ཕིང་གིས་སྤྲོ་སེམས་འཁོལ་བའི་སྣེ་ལེན་གཟབ་རྒྱས་གནང་བར་ཐུགས་རྗེ་ཆེ་ཞུས་པ་དང་བསྔགས་བརྗོད་གནང་བ་མ་ཟད། ཀྲུའུ་ཞི་ཞི་ཅིན་ཕིང་ཨེ་ཅིབ་ཏུ་འཚམས་འདྲིར་གདན་འདྲེན་ཞུས་པ་རེད། ཀྲུའུ་ཞི་ཞི་ཅིན་ཕིང་གིས་གདན་ཞུ་དང་ལེན་ཞུས་པ་དང་འབྲེལ་ཕྱོགས་གཉིས་ཀར་སྟབས་བདེ་པོ་ཡོད་པའི་སྐབས་སུ་སྔ་ཙམ་ཨེ་ཅིབ་ལ་འཚམས་འདྲི་བྱེད་འདོད་ཡོད་ཅེས་གསུངས་པ་རེད།

(ཤིན་ཧྭ་གསར་འགྱུར་ཁང་པེ་ཅིང་ནས་ཟླ་5ཚེས་29ཉིན་འབྱོར་བའི་གློག་འཕྲིན)