དུས་རབས་གསར་པར་ཁ་ཕྱོགས་པའི་ཨ་ཀྲུང་ལས་དབང་གཅིག་མཐུན་ཚོགས་པ་གཏོད་ཆེད་འབད་བརྩོན་བྱེད་པ།
ཧ་སང·ལཱ་ཅེ་པུའུ།
ཨ་རབ་རྒྱལ་ཁབ་ཀྱིས་ཀྲུང་གོ་དང་མཉམ་དུ་དུས་རབས་གསར་པར་ཁ་ཕྱོགས་པའི་ཨ་ཀྲུང་ལས་དབང་གཅིག་མཐུན་ཚོགས་པ་ནུས་ཤུགས་ཡོད་རྒུས་བཏོད་ནས་ས་ཁུལ་དང་འཛམ་གླིང་ཞི་བདེ་འཕེལ་རྒྱས་དང་དར་རྒྱས་ལ་སྐུལ་འདེད་གཏོང་ཆེད་ལེགས་སྐྱེས་དེ་བས་ཆེ་བ་འབུལ་རྒྱུའི་རེ་བ་ཡོངས་ཁྱབ་ངང་བྱེད་ཀྱི་ཡོད།
མིག་སྔར་གོ་ལ་ཧྲིལ་པོ་འགྱུར་ལྡོག་འགྲོ་བཞིན་ཡོད་པ་དང་རྒྱལ་སྤྱིའི་དུས་བབ་ཟང་ཟིང་ཆེ་བར་བརྟེན་ཀྲུང་གོས་བཏོན་པའི་མིའི་རིགས་ཀྱི་ལས་དབང་གཅིག་མཐུན་ཚོགས་པ་གཏོད་པའི་འདུ་ཤེས་གལ་ཆེན་གྱི་གཏིང་ཟབ་རང་བཞིན་དང་རྒྱང་ལྟའི་རང་བཞིན་སྔར་བས་མངོན་གསལ་དོད་དུ་འགྲོ་བཞིན་ཡོད། མིའི་རིགས་ཀྱི་ལས་དབང་གཅིག་མཐུན་ཚོགས་པ་གཏོད་པ་ནི་དེང་སྐབས་འཛམ་གླིང་ལ་འཕྲད་པའི་གནད་དོན་གལ་ཆེན་དང་འགྲན་སློང་ལ་ལན་ཧུར་ཐག་སློག་པ་ཞིག་རེད། ཨ་རབ་རྒྱལ་ཁབ་ཀྱིས་ཀྲུང་གོ་དང་མཉམ་དུ་དུས་རབས་གསར་པར་ཁ་ཕྱོགས་པའི་ཨ་ཀྲུང་ལས་དབང་གཅིག་མཐུན་ཚོགས་པ་ནུས་ཤུགས་ཡོད་རྒུས་བཏོད་ནས་ས་ཁུལ་དང་འཛམ་གླིང་ཞི་བདེ་འཕེལ་རྒྱས་དང་དར་རྒྱས་ལ་སྐུལ་འདེད་གཏོང་ཆེད་ལེགས་སྐྱེས་དེ་བས་ཆེ་བ་འབུལ་རྒྱུའི་རེ་བ་ཡོངས་ཁྱབ་ངང་བྱེད་ཀྱི་ཡོད།
ཀྲུང་གོས་ཨ་རབ་རྒྱལ་ཁབ་དང་ལག་གདང་སྦྲེལ་ནས“རྒྱུད་གཅིག་ལམ་གཅིག”མཉམ་དུ་བསྐྲུན་ཏེ་ཨ་རབ་རྒྱལ་ཁབ་འཕེལ་རྒྱས་ལ་སྒུལ་ཤུགས་བསྣན་ཡོད། ཨ་རབ་རྒྱལ་ཁབ་དང་ཀྲུང་གོའི་དབར་རྨང་གཞིའི་སྒྲིག་བཀོད་འཛུགས་སྐྲུན་དང་། ནུས་རྒྱུ། ཚོང་དོན་སོགས་ཀྱི་ཁྱབ་ཁོངས་སུ་གཉིས་ཁེ་གཉིས་ཕན་གྱི་མཉམ་ལས་བྱས་ནས་རང་སོ་སོའི་དཔལ་འབྱོར་འཕེལ་རྒྱས་ལ་སྐུལ་འདེད་བཏང་ཡོད། ཨ་ཀྲུང་གིས་དཔལ་འབྱོར་རིམ་པའི་མཉམ་ལས་ལ་དོ་ཁུར་བྱེད་པ་མ་ཟད། ཚུལ་ལྡན་གྱི་སྐད་ཆ་ཤོད་རེས་དང་རིག་གནས་སྤེལ་རེས་ལའང་མཐོང་ཆེན་བྱེད་ཀྱི་ཡོད། ཉེ་བའི་ལོ་ཤས་རིང་ཨ་རབ་རྒྱལ་ཁབ་ཏུ“རྒྱ་ཡིག་སྦྱོང་བའི་ཚ་རླབས”འཕྱུར་ནས་ཨེ་ཅིབ་དང་། སོ་ཏི། ཨ་རབ་མཉམ་འབྲེལ་ཚོ་དཔོན་རྒྱལ་ཁབ་སོགས་རྒྱལ་ཁབ་མང་པོ་ཞིག་གིས་རྒྱ་ཡིག་རྒྱལ་དམངས་སློབ་གསོའི་མ་ལག་ནང་བཅུག་ཡོད། རིག་གནས་སྤེལ་རེས་དང་ཤེས་དཔལ་ཕན་ཚུན་དཔྱད་གཞིར་འཛིན་པ་དེས་ཨ་ཀྲུང་གི་བར་ཐག་སྔར་བས་ཉེ་རུ་ཕྱིན་ཡོད། ཕན་ཚུན་གྱི་རིག་གནས་ལ་ཤེས་རྟོགས་ཟབ་ཏུ་ཕྱིན་པ་བརྒྱུད་ཨ་ཀྲུང་དབར་ཐུན་མོང་གི་ཆ་དེ་བས་རྙེད་སླ་བར་གྱུར་ནས་རོགས་ཟླའི་འབྲེལ་བ་དེ་བས་དམ་ཟབ་ཏུ་འགྲོ་རྒྱུ་རེད། ཀྲུང་གོས་ད་དུང་ཨ་རབ་རྒྱལ་ཁབ་ཀྱིས་རྒྱལ་སྤྱིའི་གར་སྟེགས་ཐོག་ནུས་པ་དེ་བས་ཆེ་བ་འདོན་རྒྱུར་རྒྱབ་སྐྱོར་ཧུར་ཐག་བྱེད་པ་དང་། སོ་ཏི་དང་། ཨེ་ཅིབ། ཨ་རབ་མཉམ་འབྲེལ་ཚོ་དཔོན་རྒྱལ་ཁབ་སོགས་འབོ་གསེར་རྒྱལ་ཁབ་ཀྱི་ཁོངས་མིར་དངོས་སུ་འགྱུར་བར་རྒྱབ་སྐྱོར་བྱེད་ཀྱི་ཡོད།
མིའི་རིགས་ཀྱི་ལས་དབང་གཅིག་མཐུན་ཚོགས་པ་གཏོད་པའི་འདུ་ཤེས་ལ་ཨ་རབ་རྒྱལ་ཁབ་ཏུ་རྒྱབ་སྐྱོར་རྒྱ་ཁྱབ་ཐོབ་པ་དང་། རྒྱལ་སྤྱིའི་ལས་དོན་སྣ་ཚོགས་ཁྲོད་ཀྱི་ཀྲུང་གོའི་འགན་འཁུར་བའི་ལངས་ཕྱོགས་ལ་ཨ་རབ་རྒྱལ་ཁབ་ཀྱི་སྲིད་གཞུང་དང་མི་དམངས་ཀྱི་ཚད་མཐོའི་གདེང་འཇོག་ཐོབ་ཡོད། ཀྲུང་གོས་གོ་ལ་ཧྲིལ་པོའི་ལས་དོན་རྒྱལ་ཁབ་ཁག་གིས་གྲོས་བསྡུར་བྱས་ནས་སྒྲུབ་དགོས་ལུགས་ནན་བཤད་བྱས་པ་དང་། གོ་ལ་ཧྲིལ་པོའི་བཅོས་སྐྱོང་མ་ལག་དེ་བས་དྲང་གཞག་ལུགས་མཐུན་གྱི་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་གཏོང་རྒྱུའི་འདོད་ཚུལ་འཛིན་གྱི་ཡོད། ཀྲུང་གོས་ཕྱོགས་མང་རིང་ལུགས་ངོ་མ་མཐའ་འཁྱོངས་བྱས་ནས་རྒྱལ་སྤྱིའི་འབྲེལ་བ་དམངས་གཙོ་ཅན་ལ་སྐུལ་འདེད་ཧུར་ཐག་གཏོང་བ་དང་། འདྲ་མཉམ་དང་གོ་རིམ་ལྡན་པའི་འཛམ་གླིང་སྣེ་མང་ཅན་དང་ཀུན་ཕན་བསྟུན་མཁས་ཀྱི་དཔལ་འབྱོར་གོ་ལ་ཅན་དར་སྤེལ་བཏང་སྟེ། གོ་ལ་ཧྲིལ་པོའི་བཅོས་སྐྱོང་མ་ལག་གིས་གོ་ལ་ཧྲིལ་པོའི་རྒྱལ་ཁབ་ཁག་གི་ཐུན་མོང་ཁེ་ཕན་ལ་ཞབས་འདེགས་དེ་བས་ལེགས་པ་ཞུ་རྒྱུར་སྐུལ་འདེད་གཏོང་བཞིན་ཡོད། ཀྲུང་གོས་གོ་ལ་ཧྲིལ་པོའི་གྲོས་འགོ་ཆེན་པོ་གསུམ་བཏོན་ནས་རྒྱལ་སྤྱིའི་སྤྱི་ཚོགས་ཀྱིས་མཐུན་སྒྲིལ་མཉམ་ལས་ལ་ཤུགས་སྣོན་རྒྱག་པར་སྒུལ་ཤུགས་བསྣན་ཡོད། གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོས་དབུལ་པོ་ཉུང་གཏོང་དང་། འབྲུ་རིགས་བདེ་འཇགས། གནམ་གཤིས་འགྱུར་ལྡོག་དང་ལྗང་མདོག་འཕེལ་རྒྱས། བཟོ་ལས་ཅན་སོགས་ཀྱི་ཁྱབ་ཁོངས་མང་པོའི་མཉམ་ལས་ལ་སྐུལ་འདེད་བཏང་ནས་རྒྱལ་ཁབ་ཁག་གི་ཐུན་མོང་གི་འཕེལ་རྒྱས་དང་དར་རྒྱས་ལ་སྐུལ་འདེད་བཏང་ཡོད། གོ་ལ་ཧྲིལ་པོའི་བདེ་འཇགས་གྲོས་འགོའི་ནང་རྒྱལ་ཁབ་ཁག་གིས་བདེ་འཇགས་ཀྱི་འཇིགས་སྐུལ་དང་འགྲན་སློང་ལ་ཐུན་མོང་ཐོག་ཁ་གཏད་གཅོག་པར་སྐུལ་འདེད་གཏོང་རྒྱུར་མཐོང་ཆེན་བྱས་ནས་བདེ་འཇགས་བརྟན་ལྷིང་གི་རྒྱལ་སྤྱིའི་ཁོར་ཡུག་མཉམ་དུ་གཏོད་རྒྱུར་སྐུལ་འདེད་བཏང་ཡོད། ཀྲུང་གོས་སྣེ་ཁྲིད་དེ་ཐུན་མོང་དང་། ཕྱོགས་བསྡུས། མཉམ་ལས། རྒྱུན་མཐུད་ཆོག་པ་བཅས་ཀྱི་བདེ་འཇགས་ལྟ་བ་ལག་ལེན་བསྟར་ནས་དྲང་གཞག་དྲང་བདེན་བརྟན་སྲུང་བྱས་ཏེ། ཟང་ཟིང་ཆེ་བའི་འཛམ་གླིང་ལ་བརྟན་ལྷིང་རང་བཞིན་དེ་བས་མང་བ་བསྣན་ཡོད། གོ་ལ་ཧྲིལ་པོའི་ཤེས་དཔལ་གྱི་གྲོས་འགོས་རིག་གནས་སྤེལ་རེས་ལ་སྐུལ་འདེད་གཏོང་བར་མཐོང་ཆེན་བྱས་ནས་ཤེས་དཔལ་མི་འདྲ་བ་མཉམ་འདྲེས་དང་ཕན་ཚུན་དཔྱད་གཞིར་འཛིན་རྒྱུར་སྐུལ་འདེད་གཏོང་གི་ཡོད།
(རྩོམ་པ་པོ་ནི་ཨེ་ཅིབ་ཀྱི་སུའུ་དབྱི་ཧྲི་མིས་བཟོས་གཙང་པོ་སློབ་ཆེན་ཁུང་ཙི་སློབ་གླིང་གི་ཕྱི་ཕྱོགས་ཡོན་ཀྲང་ཡིན)