འདི་ལོ་ནི་ཀྲུང་ཨ་མཉམ་ལས་གླེང་སྟེགས་བཙུགས་ནས་ལོ་20འཁོར་བའི་ལོ་ཞིག་རེད། ཀྲུང་གོ་དང་ཨ་རབ་རྒྱལ་ཁབ་ཀྱི་དབུ་ཚོགས་སྐབས་དང་པོ་ནས་བཟུང་། ཀྲུང་གོ་དང་ཨ་རབ་རྒྱལ་ཁབ་དབར་ཆབ་སྲིད་ཐད་ཕན་ཚུན་ཡིད་ཆེས་ཟམ་མི་ཆད་པར་ཟབ་ཏུ་ཕྱིན་པ་དང་། དངོས་སྒྲུབ་མཉམ་ལས་ལ་སྐྱེ་སྟོབས་ཀྱི་དཔལ་འབར་བ། མི་ཆོས་རིག་གནས་སྤེལ་རེས་སྣ་མང་ཕུན་སུམ་ཚོགས་པ། ཁྱབ་ཁོངས་ཁག་གི་མཉམ་ལས་ལ་གཡུར་ཟའི་གྲུབ་འབྲས་ཐོབ་པ་བཅས་བྱུང་ཡོད། ཀྲུང་ཨ་མཉམ་ལས་གླེང་སྟེགས་སྐབས་བཅུ་པའི་པུའུ་ཀྲང་རིམ་པའི་ཚོགས་འདུ་གོ་སྐབས་སུ་བྱས་ནས་ཀྲུང་ཨ་ཕྱོགས་གཉིས་པོས་ཀྲུང་ཨའི་མཛའ་གྲོགས་ཀྱི་སྙིང་སྟོབས་མུ་མཐུད་དར་སྤེལ་བཏང་ནས་ཀྲུང་ཨའི་ཕྱོགས་ཡོངས་དང་། རིམ་པ་མང་བ། ཁྱབ་ཁོངས་རྒྱ་ཆེ་བ་བཅས་ཀྱི་མཉམ་ལས་རྣམ་པ་རྒྱུན་ཆད་མེད་པར་ཕུན་སུམ་ཚོགས་སུ་དང་གཏིང་ཟབ་ཏུ་བཏང་ནས་ཆུ་ཚད་དེ་བས་མཐོ་བའི་ཀྲུང་ཨའི་ལས་དབང་གཅིག་མཐུན་ཚོགས་པ་འཛུགས་རྒྱུར་སྟོབས་ཤུགས་གཅིག་ཏུ་བསྒྲིལ་ཡོད་པ་རེད།

“ཀྲུང་གོ་ནི་ཨ་རབ་རྒྱལ་ཁབ་ཀྱིས་ཡིད་ཆེས་བྱེད་རིན་ཡོད་པའི་གྲོགས་པོ་དང་རོགས་ཟླ་ཞིག་རེད”

ཀྲུང་གོས་ཨ་རབ་རྒྱལ་ཁབ་14དང་ཨ་རབ་མནའ་འབྲེལ་དང་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བའམ་ཡང་ན་འཐབ་ཇུས་རོགས་ཟླའི་འབྲེལ་བ་བཙུགས་ཡོད། ཨ་རབ་མནའ་འབྲེལ་ནི་ཀྲུང་གོ་དང་ཐུན་མོང་ཐོག་གྲངས་གཞིའི་བདེ་འཇགས་མཉམ་ལས་ཀྱི་གྲོས་འགོ་འདོན་མཁན་ཐོག་མ་དང་། གོ་ལ་ཧྲིལ་པོའི་ཤེས་དཔལ་གྲོས་འགོའི་མཉམ་འབྲེལ་གསལ་བསྒྲགས་སྤེལ་མཁན་དང་ལག་ལེན་བསྟར་མཁན་ཐོག་མ། ཇུས་འདོན་ཚོགས་པའི་མནའ་འབྲེལ་འཛུགས་རྒྱུའི་སྐོར་གྱི་མཉམ་ལས་ཡིག་ཆར་མིང་རྟགས་འགོད་མཁན་གྱི་ས་ཁུལ་དང་རྩ་འཛུགས་ཐོག་མ་བཅས་རེད། ཀྲུང་ཨའི་མཉམ་ལས་གླེང་སྟེགས་ཀྱི་སྒྲོམ་གཞིའི་ནང་ཁྱབ་ཁོངས་ཁག་ལ་ཁྱབ་པའི་ལམ་སྲོལ་ཁག་19བཙུགས་པ་དང་རིགས་ཁག་གི་གྲུབ་འབྲས་ཡིག་ཆ་85ཁྱབ་བསྒྲགས་བྱས་པས་ཀྲུང་ཨའི་དངོས་སྒྲུབ་མཉམ་ལས་ལ་སྐུལ་འདེད་གཏོང་བའི་དམ་འཛིན་བྱ་གཞི་ནུས་ལྡན་ཞིག་ཏུ་གྱུར་ཡོད། ཨ་རབ་མནའ་འབྲེལ་གྱི་དྲུང་ཆེའི་མགྲིན་ཚབ་པ་ཅ་མའེ་ལེ་ཡིས་ཀྲུང་གོའི་འཕེལ་རྒྱས་ནི་ཞི་བདེ་དང་ཡར་ཐོན་གྱི་སྟོབས་ཤུགས་འཕེལ་བར་བྱེད་པ་ཞིག་ཡིན་པ་དང“ཀྲུང་གོ་ནི་ཨ་རབ་རྒྱལ་ཁབ་ཀྱིས་ཡིད་ཆེས་བྱེད་རིན་ཡོད་པའི་གྲོགས་པོ་དང་རོགས་ཟླ་ཞིག་ཡིན་པའི”ངོས་འཛིན་བྱས་པ་རེད།

ཀྲུང་གོ་ཕྱོགས་ཀྱིས་ཨ་རབ་རྒྱལ་ཁབ་ཀྱིས་འཐབ་ཇུས་རང་བརྟེན་དང་མཐུན་སྒྲིལ་རང་སྟོབས་ལ་ཤུགས་སྣོན་རྒྱག་པར་རྒྱབ་སྐྱོར་མཐའ་གཅིག་ཏུ་བྱས་པ་དང་། ཨ་རབ་རྒྱལ་ཁབ་ཀྱིས་རང་རྒྱལ་ཁབ་ཀྱི་རྒྱལ་བབ་དང་མཐུན་པའི་འཕེལ་རྒྱས་ཀྱི་ལམ་བུའི་ཐོག་བསྐྱོད་རྒྱུར་རྒྱབ་སྐྱོར་བྱས་ཡོད་ལ། ཨ་རབ་རྒྱལ་ཁབ་ཀྱིས་འཛམ་གླིང་དབུས་ཤར་ས་ཁུལ་གྱི་བདེ་འཇགས་དང་བརྟན་ལྷིང་སྲུང་སྐྱོང་བྱེད་པའི་འབད་བརྩོན་ལ་ཡང་རྒྱབ་སྐྱོར་བྱས་ཡོད། ཀྲུང་གོས་སོ་ཏི་ཨ་རབ་དང་དབྱི་རན་དབར་ཕྱི་འབྲེལ་འབྲེལ་བ་སླར་གསོ་བྱ་རྒྱུར་སྐུལ་འདེད་བཏང་ནས་འཛམ་གླིང་དབུས་ཤར་ས་ཁུལ་དུ“འདུམ་འགྲིག་གི་ཚ་རླབས”འཕྱུར་རྒྱུར་སྐུལ་ཁྲིད་བྱས་ཡོད། ཀྲུང་གོས་ཕ་ལེ་སི་ཐན་མི་དམངས་ཀྱིས་མི་རིགས་ཀྱི་ཁྲིམས་མཐུན་དབང་ཆ་སླར་གསོ་བྱེད་པའི་དྲང་བདེན་བྱ་གཞག་ལ་རྒྱབ་སྐྱོར་མཐའ་གཅིག་ཏུ་བྱས་པ་དང་། ཕ་ལེ་སི་ཐན་གྱི་གནད་དོན་ཕྱོགས་ཡོངས་དང་། དྲང་གཞག རྒྱུན་མཐུད་བཅས་ཀྱི་སྒོ་ནས་ཐག་གཅོད་བྱ་རྒྱུར་ཐོག་མཐའ་བར་གསུམ་དུ་གཞོལ་བཞིན་ཡོད། ཨ་རབ་མནའ་འབྲེལ་གྱི་དྲུང་ཆེ་ཀའེ་ཐེས་ཀྲུང་གོ་ཕྱོགས་ཀྱིས་ཕ་ལེ་སི་ཐན་གྱི་གནད་དོན་ཐད་དྲང་གཞག་གཙོ་སྐྱོང་བྱས་ནས་དམག་མཚམས་འཇོག་པ་དང་། གཏུམ་སྤྱོད་སྤེལ་མཚམས་འཇོག་པ། དུས་བབ་ཞི་ལྷོད་དུ་གཏོང་བ། མི་སེར་སྲུང་སྐྱོབ་བྱེད་པ་བཅས་ཀྱི་ཆེད་དུ་ལེགས་སྐྱེས་གལ་ཆེན་ཕུལ་བར་ང་ཚོས་ཚད་མཐོའི་བསྔགས་བརྗོད་བྱ་རྒྱུ་ཡིན་ཞེས་བརྗོད་པ་རེད།

“ལོ་རྒྱུས་ཀྱི་གོ་སྐབས་དམ་འཛིན་བྱས་ནས་ཀྲུང་གོ་དང་གཉིས་ཁེ་གཉིས་ཕན་མུ་མཐུད་མངོན་འགྱུར་ཡོང་བ་བྱ་རྒྱུ་ཡིན”

“རྒྱུད་གཅིག་ལམ་གཅིག”མཉམ་སྐྲུན་ནི་ཀྲུང་ཨ་མཉམ་ལས་ཀྱི་ལས་སྟེགས་གལ་ཆེན་ཞིག་ཡིན་པས་ཀྲུང་གོས་ཨ་རབ་རྒྱལ་ཁབ་22དང་ཨ་རབ་མནའ་འབྲེལ་དང“རྒྱུད་གཅིག་ལམ་གཅིག”གི་མཉམ་ལས་ཡིག་ཆར་མིང་རྟགས་བཀོད་ཟིན། ཀྲུང་གོས་ཨ་རབ་རྒྱལ་ཁབ་ཀྱི་ཚོང་དོན་རོགས་ཟླའི་རྒྱལ་ཁབ་ཆེ་གྲས་ཨང་དང་པོའི་གནས་བབ་བརྟན་པོར་བཟུང་ནས་ཀྲུང་ཨའི་ཚོང་དོན་དངུལ་འབོར་2004ལོའི་ཨ་སྒོར་དུང་ཕྱུར་367ནས་2023ལོའི་ཨ་སྒོར་དུང་ཕྱུར་3980བར་འཕར་བ་དང་། ཀྲུང་ཨའི་ཕྱོགས་གཉིས་ཀྱི་ཐད་ཀའི་མ་དངུལ་གསོག་ཚད་ཨ་སྒོར་དུང་ཕྱུར་300ལས་བརྒལ་ཡོད། ཅོར་ཏན་གྱི་དབུ་བཞུགས་བློན་ཆེན་གཞོན་པ་ཟུར་པ་ཅ་ཝ་ཏེ·ཨ་ན་ཉི་ཡིས“ང་ཚོས་ལོ་རྒྱུས་ཀྱི་གོ་སྐབས་དམ་འཛིན་བྱས་ནས་ཀྲུང་གོ་དང་གཉིས་ཁེ་གཉིས་ཕན་མུ་མཐུད་མངོན་འགྱུར་ཡོང་བའི་རེ་སྒུག་བྱེད་ཀྱི་ཡོད། ཨ་ཀྲུང་མཉམ་ལས་ཀྱི་མདུན་ལམ་ཡངས་ཤིང་རྒྱ་ཆེ་ལ་བྱེད་རིན་ཡང་ཆེན་པོ་ཡོད”ཅེས་བརྗོད།

ན་ནིང་ཟླ་6པར་སོ་ཏི་ཨ་རབ་ཀྱིས་གཉེར་བའི་ཀྲུང་ཨའི་མཉམ་ལས་གླེང་སྟེགས་ཀྱི་ཁེ་ལས་མཁས་ཅན་ཚོགས་ཆེན་སྐབས་བཅུ་པ་དང་མ་འཇོག་བགྲོ་གླེང་ཚོགས་འདུ་སྐབས་བརྒྱད་པའི་ཐོག་ཀྲུང་ཨས་རིན་ཐང་དངུལ་འབོར་མི་དམངས་ཤོག་སྒོར་དུང་ཕྱུར་700ལས་བརྒལ་བའི་དཔལ་འབྱོར་ཚོང་དོན་གྱི་གྲོས་མཐུན་ཁག་30ལ་མིང་རྟགས་བཀོད་པ་དང་། ན་ནིང་ཟླ་9པར་ཀྲུང་གོ་དང་ཨ་རབ་རྒྱལ་ཁབ་ཀྱི་དངོས་མང་སྟོན་ཚོགས་སྐབས་དྲུག་པའི་ཐོག་མཉམ་ལས་གྲུབ་འབྲས་403ཐོན་པ་དང་དངུལ་འབོར་མི་དམངས་ཤོག་སྒོར་དུང་ཕྱུར་1709.7ཟིན་པ་དང་། རྣམ་གྲངས་དེ་དག་དེང་རབས་ཞིང་ལས་དང་། ནུས་རྒྱུ་གཙང་མ། སྨན་བཅོས་བདེ་ཐང་། གྲངས་འཛིན་དཔལ་འབྱོར། ཡུལ་སྐོར་མཉམ་ལས་སོགས་ཁྱབ་ཁོངས་མང་པོ་དང་འབྲེལ་བ་ཡོད། སོ་ཏི་ཨ་རབ་ཀྱི་མ་འཇོག་བློན་ཆེན་ཧྥ་ལི་ཧོ་ཡིས་ཨ་ཀྲུང་གི་ཉིན་བཞིན་ཟབ་ཏུ་འགྲོ་བའི་ཚོང་དོན་འགྲོ་འོང་གིས་ཕྱོགས་གཉིས་པོའི་མཉམ་ལས་ལ་མདུན་ལམ་ཆེན་པོ་བཏོད་ཡོད། སོ་ཏི་ཨ་རབ་ཀྱིས་ཕྱོགས་གཉིས་པོའི་དཔལ་འབྱོར་ཚོང་དོན་གྱི་མ་འཇོག་མཉམ་ལས་རྒྱ་ཆེར་གཏོང་བར་ཧུར་ཐག་གཞོལ་ནས“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དང་སོ་ཏི་ཨ་རབ་ཀྱི“2030ལོའི་རེ་འདུན”འབྲེལ་མཐུད་བྱ་རྒྱུར་ཤུགས་སྣོན་བརྒྱབ་སྟེ་ཕྱོགས་གཉིས་དང་དེ་བཞིན་ཕྱོགས་གཉིས་པོའི་མི་དམངས་ལ་ཐུན་མོང་ཐོག་བདེ་སྐྱིད་བསྐྲུན་རྒྱུ་ཡིན་ཞེས་བརྗོད།

“ཤེས་དཔལ་སྤེལ་རེས་ལ་ཤུགས་སྣོན་བརྒྱབ་སྟེ་མིའི་རིགས་ཐུན་མོང་ཐོག་འཕེལ་རྒྱས་ཡོང་བར་དཔྱད་གཞི་ཡག་པོ་མཁོ་འདོན་བྱས་ཡོད”

ཁ་ཐར་ཕྱི་འབྲེལ་པུའི་ཨ་རབ་ལས་དོན་སིའི་སི་ཀྲང་ནཱ་དབྱི་ཧྥུའུ་ཡིས“ཨ་ཀྲུང་གིས་ཤེས་དཔལ་སྤེལ་རེས་ལ་ཤུགས་སྣོན་བརྒྱབ་སྟེ་མིའི་རིགས་ཐུན་མོང་ཐོག་འཕེལ་རྒྱས་ཡོང་བར་དཔྱད་གཞི་ཡག་པོ་ཞིག་མཁོ་འདོན་བྱས་ཡོད”ཅེས་བརྗོད། མོ་རོ་ཁོའི་མུའུ་ཧན་མོ་ཏེ་ཁྲི་ཐོག་ལྔ་པའི་སློབ་ཆེན་གྱི་བཅའ་ཁྲིམས་དང་། དཔལ་འབྱོར། སྤྱི་ཚོགས་ཚན་རིག་སློབ་གླིང་གི་ཡོན་ཀྲང་གཞོན་པ་མུའུ་སི་ཐ་ཧྥ·མ་ཧྲི་ལ་ཧྥེས། གནའ་བོའི་དར་གོས་ལམ་བུ་བརྒྱུད་དེ་ཨ་ཀྲུང་གིས་ཚོང་དོན་འགྲོ་འོང་དང་ཤེས་དཔལ་སྤེལ་རེས་བྱས་པས་མིའི་རིགས་ཀྱི་ཤེས་དཔལ་སྤྱི་ཡོངས་ཡར་ཐོན་ཡོང་བར་སྐུལ་འདེད་བཏང་ཡོད། ཤེས་དཔལ་ཕན་ཚུན་དཔྱད་གཞིར་འཛིན་པར་ཤུགས་སྣོན་བརྒྱབ་ཚེ་རྒྱལ་སྤྱིའི་མཉམ་ལས་ལ་སྐུལ་འདེད་གཏོང་བ་དང་དེ་བས་དྲང་གཞག་དྲང་བདེན་དང་སྣ་མང་བསྟུན་མཁས་ཀྱི་འཛམ་གླིང་འཛུགས་སྐྲུན་བྱ་རྒྱུར་སྐུལ་འདེད་གཏོང་བར་ཕན་ཐོགས་ཡོད་ཅེས་བརྗོད།

ན་ནིང་ལོ་མཇུག་ཏུ་ཀྲུང་ཨ་གཞོན་ནུའི་འཕེལ་རྒྱས་གླེང་སྟེགས་སྐབས་དང་པོ་ཧའེ་ནན་དུ་འཚོགས་པ་དང་། ཚོགས་ཞུགས་འཐུས་མི་200ལྷག་ཙམ་གྱིས་ཀྲུང་ཨ་གཞོན་ནུའི་རོགས་ཟླའི་འབྲེལ་བར་ཤུགས་སྣོན་རྒྱག་རྒྱུའི་ཐད་ཐུན་མོང་ཐོག་གྲོས་བསྡུར་བྱས་པ་རེད། “གཞོན་ནུ་ནི་ཨ་ཀྲུང་མཉམ་ལས་ཀྱི་སྒུལ་ཤུགས་དང་ཨ་ཀྲུང་མཛའ་གྲོགས་ཀྱི་འབྱུང་འགྱུར་ཡིན”ཨ་རབ་རྒྱལ་ཁབ་མནའ་འབྲེལ་གྱི་དྲུང་ཆེའི་ལས་རོགས་ཧའེ་ཧྥ·ཨ་པུའུ·ཅ་ཀྲ་ལའེ་ཡིས་ཨ་ཀྲུང་ཕྱོགས་གཉིས་པོས་ཐུན་མོང་ཐོག་འབད་བརྩོན་བྱས་ཏེ་གཞོན་ནུའི་འཇོན་ཐང་ཆེ་རུ་བཏང་ནས་ཁོ་ཚོ་དུས་རབས་ཀྱི་དགོས་མཁོ་སྐོང་མཁན་དང་། འབྱུང་འགྱུར་འཕེལ་རྒྱས་ཀྱི་དགོས་མཁོ་རྟོགས་མཁན། རྒྱལ་ཁབ་དང་སྤྱི་ཚོགས་ལ་ལེགས་སྐྱེས་འབུལ་མཁན་བཅས་ཀྱི་བྱང་ཚད་མཐོ་བའི་གཞོན་ནུ་ཞིག་ཏུ་འགྱུར་བ་བྱེད་དགོས་ཞེས་བརྗོད།