“ལོ་ལྔ་ཚན་བཅུ་བཞི་པའི”ཚུན་དུ་རང་ལྗོངས་ཀྱིས་ཁ་གཏད་བོད་སྐྱོར་ཐད་གཞན་བརྟེན་ནས་རང་བརྟེན་དུ་འགྱུར་བ་མཐའ་འཁྱོངས་ཀྱིས་རོགས་སྐྱོར་བྱ་ཡུལ་གྱི་འཕེལ་རྒྱས་ཀྱི་གཏིང་ཤུགས་སྔོག་འདོན་ཧུར་ཐག་དང་ས་མཐོའི་ཁྱད་ལྡན་ཐོན་ལས་ཀྱི་སྤུས་འབྲས་ལེགས་གཉེར་ལ་སྐུལ་འདེད་བཏང་ནས། ཞིང་འབྲོག་མང་ཚོགས་ཀྱི་འབབ་འཕར་དང་གྲོང་ཚོ་རིམ་པའི་མཉམ་སྡེབ་དཔལ་འབྱོར་འཕེལ་རྒྱས་ལ་སྣེ་ཁྲིད་བྱས་པ་རེད།

ལྷ་ས་གྲོང་ཁྱེར་ཆུ་ཤུར་རྫོང་ཚལ་སྣེ་ཤང་དུ་གནས་པའི་རྒྱལ་ཁབ་དེང་རབས་ཞིང་ལས་དཔེ་སྟོན་ཁུལ་ནི་ཐོན་སློབ་ཞིབ་གསུམ་གཞི་གཅིག་ཅན་གྱི་ས་གཙང་བདེ་ཐང་ཐོན་ལས་གླིང་ཞིག་རེད། ཉེ་བའི་ལོ་ཤས་རིང་། གླིང་ཁུལ་གྱིས་མང་ཚོགས་ཀྱི་འབབ་འཕར་ཕྱུག་འགྱུར་ཐབས་ལམ་རྒྱུན་ཆད་མེད་པར་འཚོལ་ཞིབ་བྱས་ནས“ཏང་ཀྲི་པུའུ+ཁེ་ལས+རྟེན་གཞི+ཞིང་དུད”ཀྱི་གཉེར་སྐྱོང་བྱེད་ཐབས་སྤྱད་དེ། ཞིང་འབྲོག་མང་ཚོགས་དང་མཐོ་སློབ་སློབ་ཐོན་སློབ་མར་ལས་གནས་སྣ་ཚོགས་མཁོ་འདོན་བྱས་པ་རེད།

མཐའ་མཚམས་ཀྱི་རྫོང་ཆུང་མེ་ཏོག་ཏུ་སྐྱེ་ཁམས་མཛེས་ལ་གནམ་གཤིས་དྲོ་གྲང་སྙོམ་པོ་ཡོད། བོད་སྐྱོར་ལས་དོན་རུ་ཁག་གི་རོགས་སྐྱོར་ཤུགས་ཆེན་འོག ཉེ་བའི་ལོ་ཤས་རིང་མེ་ཏོག་རྫོང་གིས་ཇའི་ཐོན་ལས་འཕེལ་རྒྱས་ལ་སྐུལ་འདེད་བཏང་ནས་སྐྱེ་ཁམས་ཀྱི་ལེགས་ཆ་དཔལ་འབྱོར་གྱི་ལེགས་ཆར་བསྒྱུར་ཏེ། རི་མཐོའི་སྐྱེ་ལྡན་ཇ་ལས་བྱུང་བའི་ཁེ་སྤོགས་ལ་བརྟེན་ནས་མེ་ཏོག་གི་མི་དམངས་ལ་ཕན་པ་བསྐྲུན་ཡོད། 2023ལོའི་བར་མེ་ཏོག་རྫོང་དུ་རི་མཐོའི་སྐྱེ་ལྡན་ཇ་ར་103བསྐྲུན་པ་དང་ཇ་ཤིང་འདེབས་འཛུགས་རྒྱ་ཁྱོན་མུའུ་ཁྲི་1.9ཟིན་ལ། ད་ཆ་ཇ་ལས་སྣོན་བྱེད་མཁན་གྱི་ཁེ་ལས་6ཡོད་པ་རེད།

“བོད་སྐྱོར་ལས་དོན་ཚོགས་ཆུང་གིས་ཆ་སྒྲིག་རོགས་སྐྱོར་བརྒྱུད་ནས་ང་ཚོའི་སྒོ་ར་སྒྱུར་བཀོད་དང་དམངས་སྲོལ་གནས་ཚང་འཕེལ་རྒྱས་གཏོང་རོགས་བྱས་བྱུང་། ལོ་ལྟར་ཁམ་བུའི་མེ་ཏོག་དུས་ཆེན་སྐབས་ཡུལ་སྐོར་བ་མང་བར་བརྟེན། ངའི་ཁྱིམ་གྱི་དམངས་སྲོལ་གནས་ཚང་ཟླ་བ་གཉིས་གསུམ་གྱི་གོང་ནས་མངགས་མཁན་ཡོད”ཅེས་ཀ་གནམ་གྲོང་ཚོའི་ཡུལ་མི་དབང་མོས་བཤད། ཁོང་གིས་སྤོ་བོ་རྫོང་ཁམ་བུའི་མེ་ཏོག་ལུང་པར་དམངས་སྲོལ་གནས་ཚང་གཉེར་ཞིང་། ཟ་ཁང་བཙུགས་པ་དང་ཁྱད་ལྡན་ཐོན་རྫས་བཙོངས་ནས། ད་ཆ་ཉེ་རིང་གང་སར་སྐད་གྲགས་ཆོད་པའི་ཕྱུག་འགྱུར་སྣེ་ཁྲིད་པ་ཞིག་ཏུ་གྱུར་པ་དང་ལོའི་ཡོང་འབབ་སྒོར་ཁྲི་30ལྷག་ཟིན་གྱི་ཡོད་པ་རེད།

“ལོ་ལྔ་ཚན་བཅུ་བཞི་པའི”ཚུན་དུ་ཧྲན་ཏུང་ཞིང་ཆེན་གྱིས་རྒྱལ་ཁབ་ཞིང་ལས་ཚན་རྩལ་གླིང་དང་། ལྕགས་འདམ་ཤང་དེང་རབས་སྐྱེ་ཁམས་ཐོན་ལས་གླིང་། འདྲེ་ཚེར་མ་མུའུ་ཁྲིའི་སྐྱེ་ཁམས་ལྟ་སྐོར་ཐོན་ལས་གླིང་སོགས་ཀྱི་སྒྲིག་བཀོད་ནུས་པ་འཐུས་སྒོ་ཚང་དུ་བཏང་ནས་གཞིས་རྩེའི་ཞིང་འབྲོག་ལས་ཚན་རྩལ་ཁེ་ལས་འཛུགས་སྐྲུན་བྱ་གཞག་སྤུས་ཚད་མཐོ་པོས་འཆར་འགོད་བྱས་ཡོད། ཧོ་པེ་ཞིང་ཆེན་གྱིས“ངོ་མཚར་གྱི་མངའ་རིས·འཛམ་གླིང་གིས་མཉམ་སྤྱོད”ཀྱི་ཚོང་འགུགས་མ་འདྲེན་འོས་སྦྱོར་འདུ་ཚོགས་སྒྲིག་འཛུགས་བྱས་ཤིང་། ཁེ་ལས་30ལྷག་ཙམ་གདན་དྲངས་ཏེ་མཉམ་ལས་གྲོས་མཐུན་ཁག་8བཞག་པ་དང་མ་འཇོག་དངུལ་འབོར་སྒོར་དུང་ཕྱུར་14.77ཟིན་ཡོད། ནག་ཆུ་གྲོང་ཁྱེར་གྱིས་ཀྲེ་ཅང་ཞིང་ཆེན་གྱི“ཞོག་ཁོག་མངར་མོའི་དཔལ་འབྱོར”དང་གྲོང་ཁྱེར་གྱི་ཚོང་འགུགས་མ་འདྲེན་གྱི“ལས་གྲྭ་ཨང་དང་པོ”ལག་བསྟར་གཏིང་ཟབ་བྱས་ནས་ཚོང་འགུགས་མ་འདྲེན་རྣམ་གྲངས་11ལ་ཁྱོན་མ་དངུལ་སྒོར་དུང་ཕྱུར་47.85བཏང་ཡོད། ལེའོ་ཉིང་ཞིང་ཆེན་གྱིས་ཁེ་ལས་130ལྷག་ཙམ་སྒྲིག་འཛུགས་བྱས་ནས“བོད་ལྗོངས་ནག་ཆུ་·ལེའོ་ཉིང་གི་ཚོང་འགུགས་མ་འདྲེན་འོས་སྦྱོར་ངོ་སྤྲོད་འདུ་ཚོགས”ནང་ཞུགས་ཡོད། ལྷོ་ཁ་གྲོང་ཁྱེར་གྱིས་བོད་བྱ་དང་། ས་མཐོའི་སྐྱེ་ཕན་འབུ་ཕྲ། ནུས་རྒྱུ་གཙང་མ་སོགས་ལེགས་ཆའི་ཐོན་ལས་ལ་དམིགས་ཏེ་ཚོང་འགུགས་མ་འདྲེན་བྱས་ཏེ་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་རྒྱ་སྐྱེད་གཏོང་བ་དང་གྲོང་གསེབ་དར་རྒྱས་འབྲེལ་མཐུད་ནུས་ལྡན་བྱས་པ་རེད།

འཛད་སྤྱོད་རོགས་སྐྱོར་ལ་སྐུལ་འདེད་གཏོང་བའི་ཐད། ཧེ་ལུང་ཅང་ཞིང་ཆེན་གྱིས་ཧར་པིན་གྲོང་ཁྱེར་གྱི་ལྟེ་བའི་ཁྲོམ་གཞུང་དུ་འགྲེམས་ཁུལ་བཙུགས་ཏེ་ནས་ཀྱི་ཐོན་རྫས་དང་། ས་མཐོའི་སྐྱེ་ཁམས་ཚགས་ཤ་དང་ལུག་ཤ ས་མཐོའི་ཁྱད་ལྡན་ཆང་རག འཚོ་བཅུད་བཟའ་བཅའ་སོགས་ཁྱོན་རིགས་ཆེ་གྲས་བཞིའི་བོད་ཀྱི་ཁྱད་ལྡན་ཞིང་འབྲོག་ཐོན་རྫས་སྣ་ཁ་59འགྲེམས་སྟོན་དང་ཕྱིར་ཚོང་བྱས་ཡོད། ཧྲན་ཏུང་ཞིང་ཆེན་གྱིས་ས་མཐོའི་ཁྱད་ལྡན་ཐོན་རྫས་ཉམས་ལེན་ཁང་15བསྐྲུན་པ་དང་སྒོར་ཁྲི་1600བཏང་ནས་བོད་ཀྱི་ནས་རྟེན་མཛོད་ཁང་ཐོག་མ་བསྐྲུན་ཡོད། ལེའོ་ཉིང་ཞིང་ཆེན་གྱིས་ནག་ཆུ་གྲོང་ཁྱེར་སྒྲིག་འཛུགས་ཀྱིས་ལེའོ་ཉིང་གི་ངོ་འཕྲད་གྲོས་མོལ་འདུ་ཚོགས་ལ་ཞུགས་པ་དང་། ནག་ཆུ་གྲོང་ཁྱེར་གྱི་ཞིང་ལས་ཐོན་རྫས་གསར་སྤེལ་ཁྱད་ལྡན་ཁེ་ལས་10ལྷག་ཙམ་གྱིས་བོད་ལྗོངས་ནག་ཆུ་འགྲེམས་སྟོན་ཁུལ་དུ་འགྲེམས་སྟོན་བྱས་ཡོད། ཀོང་ཏུང་ཞིང་ཆེན་གྱིས་ཉིང་ཁྲི་གྲོང་ཁྱེར་གྱི་ཁེ་ལས་སྒྲིག་འཛུགས་བྱས་ནས་ཀྲུང་གོ·ཧྲེན་ཀྲེན་རྒྱལ་སྤྱིའི་དེང་རབས་ལྗང་མདོག་ཞིང་ལས་དངོས་མང་སྟོན་ཚོགས་སྐབས་བརྒྱད་པ་དང་། ཀྲུང་གོ(ཧྲེན་ཀྲེན)རྒྱལ་སྤྱིའི་རིག་གནས་ཐོན་ལས་དངོས་མང་སྟོན་ཚོགས་སྐབས་བཅོ་བརྒྱད་པ། ཧྲེན་ཀྲེན་ཞིང་ལས་ཐོན་རྫས་ཉོ་ཚོང་འགྲེམས་ཚོང་འདུ་ཚོགས་སོགས་སུ་ཞུགས་ཡོད། ཐེན་ཅིན་གྲོང་ཁྱེར་གྱིས་སྤུས་ཚད་མཐོ་བའི་ཁྲོམ་རའི་མ་ལག་ཧུར་ཐག་བསྐྲུན་ནས་གནམ་སྔོན་དྭངས་གཙང་སྣེ་འདྲེན་དུ་བྱེད་པ་དང་ཆབ་མདོ་གྲོང་ཁྱེར་གྱི་ཁེ་ལས་20ལྷག་ཙམ་ལ་ཁྱབ་པའི“འགྲེམས་ཚོང་ལྟེ་གནས་1+རོགས་སྐྱོར་ཆེད་ཚོང་འགྲེམས་ཁང་6+ཕྱིར་འཚོང་ཁང་20”བཅས་ཀྱི་ཆབ་མདོ་གྲོང་ཁྱེར་གྱི་ཐོན་རྫས་ཁྲོམ་རའི་མ་ལག་གྲུབ་པ་རེད།

ཁྱད་ལྡན་ཐོན་ལས་འཕེལ་རྒྱས་ལ་རོགས་རམ་བྱེད་པ་དང་། འཛད་སྤྱོད་རོགས་སྐྱོར་ལ་སྐུལ་འདེད་ཧུར་ཐག་གཏོང་བ། ཚོང་འགུགས་མ་འདྲེན་ལ་ཤུགས་སྣོན་རྒྱག་པ་བཅས་ཀྱི་ཐད་བོད་སྐྱོར་ཚོགས་པ་ཚང་མས་བོད་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་དང་མཉམ་དུ་ཐོག་མའི་བསམ་འདུན་མ་བརྗེད་པར་དཔའ་ངར་ཆེན་པོས་མདུན་སྐྱོད་བྱས་ཏེ། གངས་ལྗོངས་ས་མཐོའི་སྤུས་ཚད་མཐོ་བའི་འཕེལ་རྒྱས་ཀྱི་ལེའུ་གསར་པ་མཉམ་དུ་བརྩམས་པ་རེད།