ཉེ་ཆར། རང་སྐྱོང་ལྗོངས་ཡོམ་འགོག་གེགས་སེལ་བཀོད་འདོམས་པུའུ་དང་། རང་སྐྱོང་ལྗོངས་འཕྲལ་སྡོམ་དོ་དམ་ཐིང་། ནག་ཆུ་གྲོང་ཁྱེར་དང་ཉིང་ཁྲི་གྲོང་ཁྱེར་སྲིད་གཞུང་བཅས་ཀྱིས་ནག་ཆུ་གྲོང་ཁྱེར་གསེར་རྙེད་ཆུས་སུ་མཉམ་འབྲེལ་ཐོག“འཕྲལ་སྡོམ་ལས་འགན། བོད་ཀྱི་2024ལོའི”མཐོ་གྲང་ས་ཁུལ་གྱི་ས་ཡོམ་གནོད་འཚེའི་ས་ཁོངས་ཀྱི་མཉམ་འབྲེལ་རོགས་སྐྱོབ་ནང་སྦྱོང་བྱས་པ་རེད། ནང་སྦྱོང་བྱེད་ས་གཙོ་བོ་ནག་ཆུ་གྲོང་ཁྱེར་གསེར་རྙེད་ཆུས་སུ་བཙུགས་པ་དང་། རྣམ་གྲངས་ནང་སྦྱོང་བྱེད་ས་ལྷ་རི་རྫོང་དང་། སྨན་གླིང་གྲོང་ཁྱེར། སྤོ་བོ་རྫོང་སོགས་སུ་བཙུགས་ཡོད། ལྗོངས་ཏང་ཨུད་ཀྱི་རྒྱུན་ཨུ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་རེན་ཝེ་ནང་སྦྱོང་ལ་ཞུགས་ནས་གསུང་བཤད་གནང་བ་དང་། སྤྱི་བདེ་པུའུ་དང་། འཕྲལ་སྡོམ་དོ་དམ་པུའུ། རྒྱལ་ཁབ་མེ་ཟོན་རོགས་སྐྱོབ་ཅུས། ཤིན་ཅང་ཡུ་གུར་རང་སྐྱོང་ལྗོངས་བཅས་ཀྱིས་མི་སྣ་མངགས་ནས་ལྟ་སྦྱོང་ལ་ཞུགས་པ་རེད།

རེན་ཝེ་ཡིས་ནང་སྦྱོང་ནི་དམག་གྲབས་ཤིག་ཡིན་ལ་དངོས་འཐབ་ཅིག་ཀྱང་ཡིན། “ནང་སྦྱོང”ལ་བརྟེན་ནས་འགོག་རགས་བརྟན་དུ་གཏོང་བ་དང“སྦྱོང་བརྡར”ལ་བརྟེན་ནས་དམག་གྲབས་བྱེད་རྒྱུ་མཐའ་འཁྱོངས་བྱས་ཏེ། གནོད་འཚེ་སྔོན་འགོག་དང་། ཉུང་གཏོང་། རོགས་སྐྱོབ་བཅས་ཀྱི་འདུ་ཤེས་སྔར་བས་ཟབ་ཏུ་བཏང་ནས་ཉེན་ཁ་དང་མངོན་མེད་རྐྱེན་ངན་གྲལ་བཤེར་ལ་དམ་འཛིན་ཡག་པོ་དང་དམ་འཛིན་ཏན་ཏིག་བྱེད་དགོས། “གནོད་འཚེའི་རིགས་ཡོངས་རྫོགས་དང་འཕྲལ་སྡོམ་ཆེན་པོའི”ལས་འགན་གྱི་བླང་བྱར་དམིགས་ཏེ་ཕྱོགས་བསྡུས་འཕྲལ་སྡོམ་རོགས་སྐྱོབ་དཔུང་ཁག་ཕྱོགས་ཡོངས་ནས་སྟོབས་ཆེར་གཏོང་དགོས། ནང་སྦྱོང་གི་ཕན་འབྲས་བསྐྱར་དུ་ཕྱོགས་སྡོམ་བྱས་ནས་ཡུལ་བབ་དང་བསྟུན་ཏེ་འཕྲལ་སྡོམ་སྔོན་ཇུས་སྟབས་བདེ་རུ་དང་ལག་ལེན་དངོས་སུ་བསྒྱུར་བར་བྱེད་པ་དང་། འཕྲལ་སྡོམ་རོགས་སྐྱོབ་ཀྱི་དམིགས་སའི་རང་བཞིན་དང་དངོས་འཐབ་རང་བཞིན་ཆེ་རུ་གཏོང་བ། མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་དང་སྤྱི་ཚོགས་ཀྱི་སྤྱི་ཡོངས་བརྟན་ལྷིང་ཡོང་བར་འགན་ལེན་མཐའ་གཅིག་ཏུ་བྱས་ནས། ཆུ་ཚད་མཐོ་བའི་བདེ་འཇགས་ཀྱིས་སྤུས་ཚད་མཐོ་བའི་འཕེལ་རྒྱས་ལ་གཡས་གཞོགས་གཡོན་འདེགས་བྱེད་དགོས་པ་བཅས་ཀྱི་ནན་བཤད་གནང་བ་རེད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་ནང་སྦྱོང་སྐབས་ནག་ཆུ་གྲོང་ཁྱེར་གསེར་རྙེད་ཆུས་སུ་ས་ཡོམ་རྒྱག་ཁུལ་བྱས་ནས་གངས་རྡིབ་བརྒྱབ་པ་དང་། ཆུ་རགས་ཤོར་བ། རི་ཉིལ་བ། འཁྱགས་རོམ་དང་འདམ་རྡོའི་ཆུ་རུད་ཀྱི་གནོད་འཚེ་དང་། ནགས་ཚལ་དང་རྩྭ་ཐང་གི་མེ་སྐྱོན་རོགས་སྐྱོབ་སོགས་རྣམ་གྲངས་ཁག་37ལ་དངོས་འཐབ་རང་བཞིན་གྱི་བརྒྱུད་རིམ་ཆ་ཚང་གི་ནང་སྦྱོང་བྱས་ཡོད། ཆུས་དང་གྲོང་ཁྱེར་གྱི་དཔུང་ཁག་33དང་མི་1560ནང་སྦྱོང་ལ་ཞུགས་ཡོད་པ་རེད།