འདི་ནི་ཧང་ག་རིའི་ཁ་ཤིན་ཚི་པ་ཚི་ཁ་གྲོང་ཁྱེར་དུ་གནས་པའི་དབན་ཧྭ་པའོ་སི་ཏེ་ཀུང་སིའི་བཟོ་གྲྭའི་ཟུར་ཞིག་ཡིན་པ།

ཉེ་བའི་ལོ་ཤས་རིང་། ཀྲུང་ཧང་དབར་གྱི་དཔལ་འབྱོར་ཚོང་དོན་འབྲེལ་བ་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་ནས་དངོས་སྒྲུབ་མཉམ་ལས་ལ་གྲུབ་འབྲས་གཡུར་དུ་ཟ་བ་ཐོབ་ཡོད། ཀྲུང་གོ་ནི་ཡོ་རོབ་ཕུད་པའི་ཧང་ག་རིའི་ཚོང་དོན་རོགས་ཟླ་ཆེ་ཤོས་དེ་རེད། ཧང་ག་རིས་ལོ་མང་བསྟུད་མར་ཡོ་རོབ་དབུས་ཤར་ས་ཁུལ་གྱི་ཀྲུང་གོའི་མ་རྩ་གཏོང་ཡུལ་རྒྱལ་ཁབ་ཆེ་ཤོས་ཀྱི་གནས་བབ་བརྟན་པོར་བཟུང་ཡོད། 2023ལོར་ཀྲུང་གོས་ཧང་ག་རིའི་མ་འཇོག་ལོ་རྒྱུས་ཀྱི་ཟིན་ཐོ་གསར་པ་བཏོད་ནས། སླར་ཡང་ཧང་ག་རིའི་ཕྱི་རྒྱལ་གྱི་མ་དངུལ་ཡོང་ཁུངས་རྒྱལ་ཁབ་ཆེ་ཤོས་སུ་གྱུར་ཡོད།

“ཧང་ཀྲུང་དཔལ་འབྱོར་ཚོང་དོན་མཉམ་ལས་ཀྱི་དཔེ་མཚོན”

དབྱར་སྟོད་དུ་ཧང་ག་རིའི་བྱང་ཤར་རྒྱུད་ཀྱི་པོར་ཧྲའོ་ཏེ་ཀྲོའུ་ཁ་ཤིན་ཚི་པ་ཚི་ཁ་གྲོང་ཁྱེར་གྱི་ཁྲོམ་གཞུང་གཙོ་བོའི་གཞོགས་གཉིས་སུ་ལྗོན་ཤིང་སྔོ་ཐིང་ཐིང་དུ་གནས་པ་དང་གྲོང་ཁྱེར་དོ་དམ་ཐིང་གི་མདུན་ངོས་ཀྱི་ཐང་ཆེན་དུ་རིང་ཚད་སྨི་10ཙམ་ཡོད་པའི་ལྗང་མདོག་གི་ཤིང་འབྲུག་བརྐོས་བརྙན་ཧ་ཅང་མངོན་གསལ་དོད་པོར་སྣང་།

“འདི་ནི་ལོ་10ལྷག་ཙམ་གོང་ས་གནས་དེ་གའི་སྒྱུ་རྩལ་མཁས་ཅན་གྱིས་ཀྲུང་གོའི་ཁེ་ལས་ལ་དགའ་བསུ་ཞུ་ཆེད་བཟོས་པ་ཞིག་རེད”ཅེས་ས་གནས་དེ་གའི་གྲོང་མིས་གསར་འགོད་པར་བཤད། སྤྱི་ཁྱབ་པུའུ་ཧྲན་ཏུང་ཡན་ཐའེ་རུ་ཡོད་པའི་དབན་ཧྭ་ཚོགས་པ་ཧང་ག་རིའི་པའོ་སི་ཏེ་རྫས་འགྱུར་ཀུང་སི་དཀའ་གནད་ལས་སྒྲོལ་རོགས་བྱས་པས་ས་གནས་དེ་གར་སྙན་གྲགས་ཧ་ཅང་ཆེན་པོ་ཡོད་པ་དང་ཕྱོགས་གཉིས་པོའི་མཉམ་ལས་ལ་ས་གནས་དེ་གའི་སྨྱན་སྦྱོར་གྱིས“ཧང་ཀྲུང་དཔལ་འབྱོར་ཚོང་དོན་མཉམ་ལས་ཀྱི་དཔེ་མཚོན”ཞེས་བསྔགས་བརྗོད་བྱེད་ཀྱི་ཡོད།

ཀུང་སིར་ལས་ཀ་ལོ་40ཙམ་བྱེད་མྱོང་བའི་མི་ཤུགས་ཐོན་ཁུངས་པུའི་སྤྱི་ཁྱབ་ཅིང་ལི་གཞོན་པ་པེ་ལཱ·ཝར་ཅ་ཡིས་གསར་འགོད་པར་དེའི་སྐོར་གྱི་ལོ་རྒྱུས་ངོ་སྤྲོད་བྱས་པ་སྟེ། “པའོ་སི་ཏེའི་འདུས་ཨན་ཞག་ཐོན་ནུས་ཡོ་རོབ་ཀྱི་མདུན་གྲལ་དུ་སླེབས་ཀྱི་ཡོད། འོན་ཀྱང་2008ལོ་ནས་བཟུང་ཀུང་སིར་བསྟུད་མར་གྱོང་གུན་ཕོག་ཡོད། ང་ཚོ་དཀའ་ངལ་ཆེ་ཤོས་ཀྱི་སྐབས་སུ་ཀྲུང་གོའི་ཁེ་ལས་ཀྱིས་རོགས་སྐྱོར་བྱས་བྱུང”ཞེས་བརྗོད།

ཁ་ཤིན་ཚི་པ་ཚི་ཁ་གྲོང་ཁྱེར་དུ་མི་འབོར་ཁྲི་3ཡང་ཟིན་གྱི་མེད་ཀྱང་མི་3600ལྷག་ཙམ་ཀྲུང་ཧང་པའོ་སི་ཏེ་དཔལ་འབྱོར་ཚོང་དོན་མཉམ་ལས་ཁུལ་དུ་ལས་ཀ་བྱེད་ཀྱི་ཡོད། ཡོ་རོབ་ཀྱི་བུ་ལོན་ཉམས་ཉེན་གྱི་རྒྱབ་ལྗོངས་འོག་དབན་ཧྭ་ཚོགས་པས་ཕྱི་ཕྱོགས་ཀྱི་གནོན་ཤུགས་ཐེག་པར་བྱས་པ་མ་ཟད། ད་དུང་ལས་མི་ཉུང་འཕྲིའི་འཆར་གཞིའི་ནང་ཚུད་པའི་ལས་མི་རྣམས་མུ་མཐུད་ཁེ་ལས་སུ་ལས་ཀ་བྱེད་དུ་བཅུག་ཡོད།

ལོ་10ལྷག་ཙམ་འཕེལ་རྒྱས་བཏང་བ་བརྒྱུད། དེ་སྔ་མ་རྩ་སྟོངས་ཉེར་ཡོད་པའི་པའོ་སི་ཏེ་ད་ཆ་ཧང་ག་རིའི་ཕྱོགས་བསྡུས་ཨང་རིམ་མདུན་གྲལ་བཅུ་པར་སླེབས་པའི་ཁེ་ལས་སུ་གྱུར་ཡོད། 2023ལོའི་ལོ་མཇུག་བར་ཀྲུང་ཧང་པའོ་སི་ཏེ་དཔལ་འབྱོར་ཚོང་དོན་མཉམ་ལས་ཁུལ་གྱིས་རྫས་འགྱུར་བཟོ་ལས་དང་། བཟོ་ལས་རླངས་གཟུགས། ནུས་རྒྱུ། འཕྲུལ་ཆས་ལས་སྣོན་སོགས་ལས་རིགས་ཀྱི་ཁེ་ལས་13ནང་འདྲེན་བྱས་པའི་ནང་6ནི་ཀྲུང་གོས་མ་དངུལ་བཏང་བའི་མ་རྐང་ཚོད་འཛིན་གྱི་ཁེ་ལས་ཡིན་པ་རེད།

“ཀྲུང་གོའི་ཁེ་ལས་དང་མཉམ་དུ་འཕེལ་རྒྱས་གཏོང་རྒྱུའི་གདམ་ག་བྱས་པར་ང་སྤོབས་པ་ཧ་ཅང་ཆེན་པོ་སྐྱེད་ཀྱི་འདུག”

དེ་སྔའི་མི་འབོར་ཉུང་བ་ནས་ད་ལྟ་སྒྲིག་བཀོད་འཐུས་སྒོ་ཚང་བ་དང་འགྲིམ་འགྲུལ་སྟབས་བདེ་བའི་ཧང་ག་རིའི་རྒྱལ་ས་པུ་ཏ་ཕེ་སིར་གནས་པའི་ཀྲུང་གོ་དང་ཡོ་རོབ་ཀྱི་ཚོང་དོན་ཟོག་འགྲེམས་གླིང་ནི་ཀྲུང་གོས་ཡོ་རོབ་ས་ཁུལ་དུ་བསྐྲུན་པའི་ཚོང་དོན་ཟོག་འགྲེམས་རྣམ་པའི་རྒྱལ་ཕྱིའི་དཔལ་འབྱོར་ཚོང་དོན་མཉམ་ལས་ཁུལ་ཐོག་མ་དེ་ཡིན་པ་དང་ཀྲུང་གོའི་ཚོང་ཟོག་ཉོ་ཚོང་འགྲེམས་སྟོན་ལྟེ་གནས་དང་ཆེ་ཕེར་གྲུ་ཁའི་ཟོག་འགྲེམས་གླིང་སོགས་བསྐྲུན་པས་འགག་བཤེར་དང་། ཁྲལ་མེད་བཀར་འཇུག རྒྱལ་ཕྱིའི་མཛོད་ཁང་བཅས་ཀྱི་ཞབས་ཞུ་སྣ་ཚོགས་མཁོ་འདོན་བྱེད་ཀྱི་ཡོད།

པར་ཐ་·ཨ་ཐི་ལ་ནི་སྔོན་ཆད་ཕོ་ལན་གྱི་གློག་སྒྲོན་རྒྱན་སྤྲས་ཀུང་སི་ཧང་ག་རིའི་ཡན་ལག་ཀུང་སིའི་མཐོ་རིམ་དོ་དམ་པ་ཞིག་ཡིན། 2015ལོར་ཁོང་གིས་ཀྲུང་གོ་དང་ཡོ་རོབ་ཚོང་དོན་ཟོག་འགྲེམས་གླིང་དུ་གཉེར་བའི་ཀྲུང་གོའི་ཚོང་ཟོག་འགྲེམས་ཚོགས་ཐོག་ཀྲུང་གོའི་ཧུའེ་ཀྲོའུ་ལེ་ཧྲི་འོད་གློག་ཚན་རྩལ་ཚད་ཡོད་ཀུང་སིའི(གཤམ་དུ“ལེ་ཧྲི་གློག་སྒྲོན”ཞེས་བསྡུ་རྒྱུ)ཐོན་རྫས་ལ་རྒྱུས་མངའ་བྱུང་སྟེ་མཉམ་ལས་གཏིང་ཟབ་བྱ་རྒྱུར་ཕན་པ་ཐོབ་ཡོད།

“སྔོན་ཆད་ཀྲུང་གོའི་གློག་སྒྲོན་ཐོན་རྫས་ལ་རྒྱུས་མངའ་དེ་ཙམ་མེད། ཐོན་རྫས་དེ་དག་དང་འབྲེལ་འདྲིས་ཐུབ་རྗེས་ངས་ཀྲུང་གོའི་ཐོན་རྫས་རྒྱུན་ཆད་མེད་པར་རིམ་སྤོར་བྱུང་བ་དང་། སྤུས་ཚད་ལེགས་སུ་ཕྱིན་པ། འགྲན་རྩོད་ནུས་པ་ཆེ་རུ་ཕྱིན་པ་བཅས་ཤེས་རྟོགས་བྱུང་སྟེ་ཀྲུང་གོའི་ཁེ་ལས་དང་མཉམ་དུ་འཕེལ་རྒྱས་གཏོང་རྒྱུའི་གདམ་ག་བྱས་པར་ང་སྤོབས་པ་ཧ་ཅང་ཆེན་པོ་སྐྱེད་ཀྱི་འདུག”ཅེས་པར་ཐ་ཡིས་འདི་ག་ཚགས་པར་གྱི་གསར་འགོད་པར་བཤད།

ཀྲུང་ཡོའི་ཚོང་དོན་ཟོག་འགྲེམས་གླིང་ནི་ཀྲུང་ཧང་གི་དཔལ་འབྱོར་ཚོང་དོན་མཉམ་ལས་ཉིན་བཞིན་ཟབ་ཏུ་ཕྱིན་པའི་མཚོན་བྱེད་ཅིག་རེད། ཧང་ག་རིའི་ཧང་ཀྲུང་དཔལ་འབྱོར་ཚོང་ཚོགས་ཀྱི་ཀྲུའུ་ཞི་ཕེ་ཐེ·ཨེར་ནུའོ་ཡིས“རྒྱུད་གཅིག་ལམ་གཅིག”མཉམ་སྐྲུན་ནང་ཞུགས་པ་བརྒྱུད་ཧང་ག་རི་འདི་ཀྲུང་གོ་དང་ཡོ་རོབ་དབུས་ཤར་རྒྱལ་ཁབ་དང་ཡོ་རོབ་མནའ་འབྲེལ་གྱི་ཁྲོམ་ར་འབྲེལ་མཐུད་བྱེད་པའི་ཚོང་ཟོག་ཚོང་དོན་དང་། སྐྱེལ་འདྲེན་ཟོག་འགྲེམས། དངུལ་རྩའི་ལྟེ་བ་བཅས་ལ་རིམ་བཞིན་འཕེལ་རྒྱས་ཕྱིན་ཡོད། “ཡོ་རོབ་དབུས་ཤར་རྒྱལ་ཁབ་དང་ཀྲུང་གོའི་དཔལ་འབྱོར་ཚོང་དོན་གྱི་མཉམ་ལས་སྲ་བརྟན་དང་འཕེལ་རྒྱས་གཏོང་བའི་ཐད་ཧང་ག་རིའི་སྒྲོག་ཐག་གི་ནུས་པ་ཉིན་བཞིན་མངོན་གསལ་དོད་དུ་འགྲོ་བཞིན་ཡོད”ཅེས་ཕེ་ཐེས་བརྗོད།

“ཧང་ག་རིའི་ཁྱད་ལྡན་སྤུས་ལེགས་ཞིང་ལས་ཐོན་རྫས་དེ་བས་མང་བ་ཀྲུང་གོའི་ཁྲོམ་རར་འདོན་པར་སྐུལ་འདེད་གཏོང་དགོས”

རླངས་འཁོར་བཏང་སྟེ་པུ་ཏ་ཕེ་སི་ནས་བྱང་ཤར་ཕྱོགས་སུ་སྤྱི་ལེ་140ཙམ་བསྐྱོད་རྗེས་ཧང་ག་རིའི་རྒུན་ཆང་ཐོན་ཁུལ་གཙོ་བོའི་གྲས་ཤིག་ཡིན་པའི་ཨའེ་ཀེར་སླེབས་ཀྱི་ཡོད། དེ་གའི་རི་ཀླུང་གང་སར་ཡལ་འདབ་རྒྱས་མ་ཐག་པའི་རྒུན་འབྲུམ་སྡོང་པོ་སྐྱེས་ཡོད། དམིགས་བསལ་གྱི་ས་རྒྱུ་དང་གནམ་གཤིས་ཀྱི་ཆ་རྐྱེན་འོག་ས་གནས་དེ་གའི་ཤིང་འབྲས་འདེབས་མཁན་ཞིང་པས་དམིགས་བསལ་གྱི་རྒུན་ཆང་བཟོ་བྱེད་ཀྱི་རྒུན་འབྲུམ་བཏབ་ཡོད།

མཉམ་དུ་ཡོད་པའི་ཧང་ག་རིའི་ལག་བཟོས་རྒུན་ཆང་མཐུན་ཚོགས་ཀྲུང་གོའི་ཁུལ་གྱི་གཞུང་ལས་ཁང་གི་ཀྲུའུ་རེན་ཏ་ཝུའེ·ཝར་ཅ-ས་པུའུ་དབྱང་གིས་འདི་ག་ཚགས་པར་གྱི་གསར་འགོད་པར་མིག་སྔར་ཧང་ག་རིར་རྒུན་ཆང་ཐོན་ཁུལ་20ལྷག་ཙམ་དང་རྒུན་ཆང་གི་སྣ་ཁ་100ཙམ་ཡོད་པ་དང་ལོ་རེར་རྒུན་ཆང་ཐོན་ཚད་ཧྲེང་དུང་ཕྱུར་2.7ཙམ་ཟིན་གྱི་ཡོད། སྔོན་ཆད་ཧང་ག་རིའི་རྒུན་ཆང་གཙོ་བོར་ཧྥ་རན་སེ་དང་དབྱི་ཐ་ལི་སོགས་ཡོ་རོབ་རྒྱལ་ཁབ་ལ་ཕྱིར་གཏོང་བྱེད་ཀྱི་ཡོད། ཉེ་བའི་ལོ་ཤས་རིང་། ཀྲུང་གོར་ཕྱིར་གཏོང་བྱེད་པའི་རྒུན་ཆང་གི་གྲངས་འབོར་ལོ་རེ་བཞིན་མང་དུ་འགྲོ་གི་ཡོད་ཅེས་ངོ་སྤྲོད་བྱས་པ་རེད།

ཧང་ག་རིའི་ཞིང་ལས་པུའི་པུའུ་ཀྲང་ན་ཅི·དབྱི་ཧྲི་ཐེ་དབན་གྱིས་འདི་ལོ་ནི་ཧང་ཀྲུང་དབར་ཕྱི་འབྲེལ་བཙུགས་ནས་ལོ་75འཁོར་བའི་ལོ་ཡིན་པས། རྒྱལ་ཁབ་གཉིས་པོའི་དཔལ་འབྱོར་ཚོང་དོན་འབྲེལ་བ་སྔར་བས་འཕེལ་རྒྱས་གཏོང་བར་གོ་སྐབས་བཟང་པོ་མཁོ་འདོན་བྱས་ཡོད། “ཧང་ག་རིས་ཀྲུང་གོའི་རྒྱ་ཆེ་བའི་འཛད་སྤྱོད་ཁྲོམ་རར་ལྟ་སྟངས་ཡག་པོ་འཛིན་གྱི་ཡོད་པས་ཀྲུང་གོའི་ཞིང་ལས་དང་ཚོང་དོན་མཉམ་ལས་ལ་ཤུགས་སྣོན་རྒྱག་རྒྱུར་གཞོལ་ནས་ཧང་ག་རིའི་ཁྱད་ལྡན་སྤུས་ལེགས་ཞིང་ལས་ཐོན་རྫས་དེ་བས་མང་བ་ཀྲུང་གོའི་ཁྲོམ་རར་འདོན་རྒྱུར་སྐུལ་འདེད་གཏོང་བཞིན་ཡོད”ཅེས་བརྗོད། (འདི་ག་ཚགས་པར་ཁང་དུ་པུ་ཏ་ཕེ་སི་ནས་འབྱོར་བའི་གློག་འཕྲིན)