“2007ལོར་ཀྲུང་གོར་འཚམས་འདྲི་ཐེངས་དང་པོ་བྱས་པ་ནས་ད་བར་ང་ཀྲུང་གོར་ཐེངས་15ཡོང་མྱོང་ཡོད། ཀྲུང་གོའི་གྲོང་ཁྱེར་མང་པོ་ཞིག་ལའང་འགྲོ་མྱོང་། ངས་པེ་ཅིང་གི་གནའ་བོའི་ཕོ་བྲང་ལ་ལྟ་སྐོར་དང་ཧྲའན་ཤིས་ཤིས་ཨན་གྱི་དུར་རྫས་རྫ་བཟོས་གྱད་རྟར་ལྟ་མྱོང་ལ་ཧྲང་ཧའེ་རུ་གུང་གསེང་སྐྱིད་པོ་ཞིག་ཀྱང་གཏོང་མྱོང་། མྱོང་བ་དེ་དག་ནི་མཛེས་སྡུག་ལྡན་པའི་དྲན་འཆར་ཞིག་རེད”ཅེས་འདི་ག་ཚགས་པར་གྱི་གསར་འགོད་པའི་ཆེད་དོན་བཅར་འདྲི་དང་ལེན་བྱེད་སྐབས་ཧང་ག་རིའི་ཧང་ཀྲུང་དཔལ་འབྱོར་ཚོང་ཚོགས་ཀྱི་ཚོགས་གཙོ་ཕེ་ཐེ·ཨེར་ནོ་ཡིས་ཀྲུང་གོར་དགའ་པོ་ཡོད་པའི་སྐོར་བརྗོད་བྱུང་།

“འདས་ཟིན་པའི་ལོ་10ལྷག་ཙམ་རིང་། ཀྲུང་གོའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གྲུབ་འབྲས་མངོན་གསལ་དོད་པོ་ཐོབ་ནས་མི་དམངས་ཀྱི་འཚོ་བའི་ཆུ་ཚད་གང་ས་ཅི་ཐད་ནས་མཐོ་རུ་ཕྱིན་ཡོད། ཀྲུང་གོར་ཡོང་རིམ་བཞིན་གྲོང་ཁྱེར་གྱི་འཕེལ་རྒྱས་དང་འགྱུར་ལྡོག་དང་། དཔལ་འབྱོར་གྱི་འཕེལ་ཤུགས་དང་དར་རྒྱས། དམངས་ཚོགས་ཀྱི་བསམ་པའི་ཉམས་འགྱུར་བཅས་ལ་ང་ཧ་ལས་ཧང་སངས་བྱུང”ཞེས་ཕེ་ཐེ་ཡིས་བརྗོད།

འདི་ལོ་ནི་ཀྲུང་ཧང་རྒྱལ་ཁབ་དབར་ཕྱི་འབྲེལ་བཙུགས་ནས་ལོ་75འཁོར་བའི་ལོ་ཞིག་རེད། རྒྱལ་ཁབ་གཉིས་པོའི་འགོ་ཁྲིད་པས་ཉེ་ཆར་ཐུན་མོང་ཐོག་ཀྲུང་ཧང་འབྲེལ་བ་དེ་དུས་རབས་གསར་པའི་དུས་དང་རྣམ་པ་ཀུན་གྱི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བར་རིམ་སྤོར་བྱ་རྒྱུའི་ཁྱབ་བསྒྲགས་བྱས་པ་རེད། ཕེ་ཐེས“སྔར་ནས་བཟུང་ཧང་ཀྲུང་རྒྱལ་ཁབ་གཉིས་པོས་ཕན་ཚུན་རྒྱབ་སྐྱོར་དང་གཉིས་ཁེ་གཉིས་ཕན་བྱས་ནས་ཧང་ཀྲུང་གི་དངོས་སྒྲུབ་མཉམ་ལས་ལ་གཡུར་དུ་ཟ་བའི་གྲུབ་འབྲས་ཐོབ་ཡོད”ཅེས་བརྗོད།

ཕེ་ཐེ་ཡིས“ཧང་ཀྲུང་གི་གཉིས་ཕན་དངོས་སྒྲུབ་མཉམ་ལས་ཀྱིས་རྒྱལ་ཁབ་གཉིས་པོའི་མི་དམངས་ལ་བདེ་སྐྱིད་བསྐྲུན་ཡོད། མཉམ་ལས་རྣམ་གྲངས་ཆེ་ཆུང་གིས་ཧང་ཀྲུང་རྒྱལ་ཁབ་གཉིས་པོའི་མི་དམངས་ལ་སྤེལ་རེས་དང་ཤེས་རྟོགས་དེ་བས་མང་བ་བྱུང་བ་དང་། ཕན་ཚུན་བསམ་ཤེས་དང་མཛའ་གྲོགས་ཟབ་ཏུ་ཕྱིན་ནས་དམངས་ཚོགས་ལ་ཕན་པ་ཏན་ཏིག་ཐོབ་ཡོད། རྒྱལ་ཁབ་གཉིས་པོའི་གཙོ་བདག་གི་འཐབ་ཇུས་སྣེ་ཁྲིད་དང་རྒྱལ་ཁབ་གཉིས་པོའི་མི་དམངས་ཀྱི་ཐུན་མོང་འབད་བརྩོན་འོག ཧང་ཀྲུང་རྒྱལ་ཁབ་གཉིས་ཀྱིས་དངོས་སྒྲུབ་མཉམ་ལས་སྔར་བས་ཟབ་ཏུ་བཏང་ནས་མི་དམངས་ཀྱི་མཛའ་གྲོགས་སྔར་བས་ཟབ་ཏུ་འགྲོ་ངེས་ཡིན་པ་ངར་ཡིད་ཆེས་ཡོད”ཅེས་བརྗོད།