ཉེ་ཆར། ཨ་རི་ཕྱོགས་ཀྱིས་རྒྱལ་ནང་གི་ཆབ་སྲིད་ཐད་ལ་བསམ་གཞིག་བྱས་ནས་སྒོ་ཁྲལ་301གི་བསྐྱར་ཞིབ་གོ་རིམ་གང་བྱུང་དུ་སྤྱད་དེ་སྔར་ཀྲུང་གོར་དམིགས་པའི་སྒོ་ཁྲལ་301གི་རྨང་གཞིའི་ཐོག་ཀྲུང་གོ་ནས་ནང་འདྲེན་བྱས་པའི་གློག་སྒུལ་རླངས་འཁོར་སོགས་ཐོན་རྫས་ལ་སྒོ་ཁྲལ་ཐོལ་པ་བསྡུ་རྒྱུའི་ཁྱབ་བསྒྲགས་བྱས་པ་རེད། ཨ་རི་ཕྱོགས་ཀྱིས་ལྐུགས་པ་ཨུ་ཚུགས་ཀྱིས་དཔལ་འབྱོར་ཚོང་དོན་གྱི་གནད་དོན་ཆབ་སྲིད་ཅན་དང་ལག་ཆ་ཅན་དུ་བསྒྱུར་ཐབས་བྱེད་པ་དང་སྒོ་ཁྲལ་ལ་བརྟེན་ནས་ཀྲུང་གོའི་ཐོན་ལས་འཕེལ་རྒྱས་དང་རྒྱུན་གཏན་གྱི་དཔལ་འབྱོར་ཚོང་དོན་གྱི་ཚན་རྩལ་བྱེད་སྒོར་གཙན་གནོན་བྱེད་པ་དེས། ཁྲོམ་རའི་དཔལ་འབྱོར་གྱི་རྩ་དོན་དང་རྒྱལ་སྤྱིའི་དཔལ་འབྱོར་ཚོང་དོན་གྱི་སྒྲིག་སྲོལ་ལ་རྡོག་རོལ་ཚབས་ཆེན་བཏང་བ་མ་ཟད། འཛམ་གླིང་དཔལ་འབྱོར་སྐྱོན་བྲལ་ངང་འཕེལ་རྒྱས་འགྲོ་བར་ཡང་གནོད་འཚེ་ཚབས་ཆེན་བཟོས་ཡོད།

ཨ་རི་ཕྱོགས་ཀྱིས་སྒོ་ཁྲལ་ཐོལ་པ་བསྡུ་བ་དེ་ནི་དཔེ་མཚོན་གྱི་ཕྱོགས་རྐྱང་རིང་ལུགས་དང་སྲུང་སྐྱོང་རིང་ལུགས་ཀྱི་བྱེད་སྤྱོད་ཅིག་རེད། ཨ་རི་ཕྱོགས་ཀྱིས་ཀྲུང་གོའི་འབྲེལ་ཡོད་ཐོན་རྫས་ཀྱིས་ཨ་རིའི“རྒྱལ་ཁབ་བདེ་འཇགས”ལ་འཇིགས་སྐུལ་བཟོ་ལུགས་བརྗོད་པ་དང་ཀྲུང་གོས“དྲང་གཞག་མིན་པའི་ཚོང་དོན་བྱ་སྤྱོད་སྤེལ་གྱི་འདུག”ཟེར་བ་དེ་ནི་ཁུངས་ལུང་མེད་པའི་ཁ་གཡར་ས་ཙམ་ཞིག་རེད། ཨ་རི་ཕྱོགས་ཀྱིས་བཙན་ཤེད་ངང་ཀྲུང་གོའི་ཐོན་རྫས་ལ་སླར་ཡང་སྒོ་ཁྲལ་ཐོལ་པ་བསྡུ་བའི་དམིགས་ཡུལ་གཙོ་བོ་ནི་ཨ་རིའི་འབྲེལ་ཡོད་ཐོན་ལས་སྲུང་སྐྱོང་བྱེད་པར་ཁ་གཡར་ནས་ཆབ་སྲིད་ཀྱི་སྒེར་ཕན་རག་ཐབས་བྱ་རྒྱུ་དེ་རེད། ཨ་རིའི་ཡེ་ལུའུ་སློབ་ཆེན་གྱི་མཐོ་རིམ་ཞིབ་འཇུག་པ་སི་ཏི་ཧྥུན·ལུའོ་ཆིས་ཨ་རི་སྲིད་གཞུང་གིས་སྤེལ་བའི་ཀྲུང་གོར་དམིགས་པའི་301བརྟག་དཔྱད་ནང་གི་འབྲེལ་ཡོད་སྐྱོན་འཛུགས་ཞུ་གཏུག་ལ་དཔང་རྟགས་འདང་གི་མེད། ཨ་རིས་སྒོ་ཁྲལ་སྲིད་ཇུས་ལ་བརྟེན་ནས་ཀྲུང་གོའི་ཐོན་ལས་འཕེལ་རྒྱས་ལ་བཀག་འགོག་བྱེད་པའི་རེ་ངན་འཆང་བ་ནི“མིག་རྒྱང་ཐུང་བའི”བྱེད་སྤྱོད་ཅིག་ཡིན་པས། ཨ་རིའི་ཐོན་ལས་བསྐྱར་གསོ་བྱེད་པའི་ཕུགས་ཀྱི་དམིགས་ཡུལ་འགྲུབ་མི་ཐུབ་ཅེས་བརྗོད།

ཨ་རི་ཕྱོགས་ཀྱིས་སྒོ་ཁྲལ་ཐོལ་པ་བསྡུས་པ་དེ་ནི་དཔེ་མཚོན་གྱི་བཙན་དབང་རིང་ལུགས་དང་བཙན་དབང་བཙན་ཤེད་ཀྱི་བྱེད་སྤྱོད་ཅིག་རེད། ཨ་རིའི་སྐབས་གོང་མའི་སྲིད་གཞུང་གིས་ཀྲུང་གོར་དམིགས་པའི་301གི་སྒོ་ཁྲལ་ཐོལ་པ་བསྡུ་བ་དེས། ཀྲུང་གོ་དང་ཨ་རིའི་རྒྱུན་གཏན་གྱི་དཔལ་འབྱོར་ཚོང་དོན་འགྲོ་འོང་ལ་འགོག་རྐྱེན་ཚབས་ཆེན་བཟོས་པར་བརྟེན། འཛམ་གླིང་ཚོང་དོན་རྩ་འཛུགས་ཀྱིས་འཛམ་གླིང་ཚོང་དོན་གྱི་སྒྲིག་སྲོལ་ལས་འགལ་བའི་ཁྲུན་ཐག་བཅད་ཡོད། ཁོ་པ་ཚོས་རང་ཉིད་ཀྱི་ཕྱོགས་རྐྱང་པའི་བཙན་དབང་སྲུང་སྐྱོང་བྱ་ཆེད། ཀྲུང་གོའི་འཕེལ་རྒྱས་དེ་འཇིགས་སྐུལ་དུ་བརྩིས་ནས་ཐབས་ཤེས་ཡོད་ཚད་སྤྱད་དེ་ཀྲུང་གོར་གཙན་གནོན་གང་ཐུབ་བྱེད་ཀྱི་ཡོད། ཨ་རིས་ཀྲུང་གོའི་འབྲེལ་ཡོད་ཐོན་ལས་འཕེལ་རྒྱས་ལ་བཀག་འགོག་བྱེད་པ་དེས། ཨ་རི་སྟོབས་ཆེན་ཡིན་པ་ར་སྤྲོད་བྱེད་མི་ཐུབ་པར། དེ་ལས་ལྡོག་སྟེ་ཨ་རི་ཕྱོགས་ཀྱི་གདེང་ཚོད་ཤོར་ངེས་ཡིན་པ་དམར་རྗེན་དུ་མངོན་པ་དང་། ཨ་རི་རང་ཉིད་ཀྱི་གནད་དོན་ཐག་གཅོད་བྱེད་མི་ཐུབ་པར་དེ་ལས་ལྡོག་སྟེ་རྒྱལ་སྤྱིའི་ཐོན་སྐྱེད་དང་མཁོ་སྤྲོད་འཁོར་འབྲེལ་རྒྱུན་གཏན་ངང་འཁོར་སྐྱོད་ལ་སྔར་བས་གཏོར་བཤིག་ཕོག་རྒྱུ་ཡིན་པ། ཀྲུང་གོའི་འཕེལ་རྒྱས་དང་དར་རྒྱས་ལ་བཀག་འགོག་བྱེད་མི་ཐུབ་པར་དེ་ལས་ལྡོག་སྟེ་ཀྲུང་གོའི་མི་དམངས་དུང་ཕྱུར་14ལྷག་ཙམ་གྱི་འབད་འབུངས་ཡར་བརྩོན་གྱི་ཧུར་སེམས་དེ་བས་ཆེ་རུ་འགྲོ་སྲིད།

ཨ་རིས་ཀྲུང་གོར་དམིགས་པའི་སྒོ་ཁྲལ་301གི་བྱེད་ཐབས་ལག་བསྟར་བྱས་ནས་ལོ་6སོང་བས་རྒྱལ་ཁབ་གཉིས་ཀྱི་ཁེ་ལས་དང་ཨ་རིའི་འཛད་སྤྱོད་པར་དཔལ་འབྱོར་གྱི་ཁུར་པོ་ཐོལ་པ་བཟོས་པ་མ་ཟད། གོ་ལ་ཧྲིལ་པོའི་ཚོང་དོན་སྒྲིག་ལམ་དཀྲུགས་པ་དང་གོ་ལ་ཧྲིལ་པོའི་དཔལ་འབྱོར་གྱི་བརྟན་ལྷིང་དང་བདེ་འཇགས་ལ་ཤུགས་རྐྱེན་བཟོས་ཡོད། མུའུ་ཏི་ཀུང་སིས་ཚོད་རྩིས་བྱས་པར་གཞིགས་ན། ཨ་རིའི་འཛད་སྤྱོད་པས་ཀྲུང་གོར་དམིགས་པའི་སྒོ་ཁྲལ་92%ཀྱི་ཐོལ་པ་བསྡུས་པའི་མ་གནས་ཀྱི་ཁུར་པོ་འཁུར་དགོས་ལ། ཨ་རིའི་ཁྱིམ་ཚང་རེར་ལོ་ལྟར་ཨ་སྒོར་1300ཐོལ་པ་གཏོང་དགོས་ཀྱི་ཡོད། ཨ་རི་ཕྱོགས་ཀྱིས་ཕྱོགས་རྐྱང་རིང་ལུགས་དང་སྲུང་སྐྱོང་རིང་ལུགས་ཀྱི་སྐྱོན་ཆ་ཚབས་ཆེན་ལ་བསམ་གཞིག་མ་བྱས་པར་དེ་ལས་ལྡོག་སྟེ་ལྐུགས་པ་ཨུ་ཚུགས་བྱས་ན། ནང་འདྲེན་ཚོང་ཟོག་གི་མ་གནས་མངོན་གསལ་དོད་པོས་མཐོ་རུ་ཕྱིན་ནས་ཨ་རིའི་ཁེ་ལས་དང་འཛད་སྤྱོད་པར་གྱོང་གུན་ཆེན་པོ་ཕོག་རྒྱུ་མ་ཟད། བློས་གཏོང་ཡང་ཆེན་པོ་བྱེད་དགོས་ཀྱི་ཡོད། ཨ་ཀྲུང་ཚོང་དོན་རྒྱལ་ཡོངས་ཨུ་ཡོན་ལྷན་ཁང་གི་ཚོགས་གཙོ་ཁེ་ལེ་ཀེ·ཨའེ་ལུན་གྱིས་དེ་སྔའི་སྒོ་ཁྲལ་རྒྱུན་འཁྱོངས་དང་དེ་བཞིན་སྒོ་ཁྲལ་ཐོལ་པ་བསྡུ་བ་དེས། མཐར་ཨ་རིའི་ཁེ་ལས་རྒྱལ་ཁབ་ཕྱི་ནང་དུ་འགྲན་རྩོད་བྱེད་པའི་དཀའ་ངལ་ཆེ་རུ་འགྲོ་རྒྱུ་མ་ཟད། ཨ་རིའི་ལས་ཞུགས་ལས་གནས་ཉུང་དུ་འགྲོ་བ་དང་དངུལ་ལོར་འགྲེམས་ཐལ་ཤོར་ནས་ཨ་རིའི་བཟོ་སྐྲུན་ཚོང་པ་དང་འཛད་སྤྱོད་པའི་ཁུར་པོ་ཡང་ཆེ་རུ་འགྲོ་ངེས་ཡིན་པའི་ངོས་འཛིན་བྱས་ཡོད།