ཡུལ་མི་ཚོའི་ཁྲོད་ནས་ཐབས་ལམ་གསར་པ་གཏོད་མཁན་ཐོན་པ།
ཧོ་ནན་ཞིང་ཆེན་ཡུས་ཁྲེང་རྫོང་ཀྲང་ཅི་གྲོང་རྡལ་ཞའོ་ཆའོ་ཅི་གྲོང་ཚོར་དངོས་སྡོད་བཅར་འདྲི་བྱེད་སྐབས་ཡུལ་མི་ཚོས་གྲོང་ཚོའི་རོགས་སྐྱོར་འཁོར་ཁང་གི“ལས་མི་གསར་པ”སྟེ་སུར་པན་གྱི་རྐང་ཡུ་ལས་སྣོན་སྐོར་གླེང་བ་ཐོས་རྗེས་གསར་འགོད་པས་ས་གནས་ས་ཐོག་ཏུ་བཅར་འདྲིར་འགྲོ་རྒྱུའི་བློ་ཐག་བཅད།
མི་རིང་བའི་ས་ནས་བཟོ་གྲྭའི་སྒོ་ཁར་སུར་པན་གྱི་རྐང་ཡུ་མཐོན་པོར་སྤུངས་ཡོད་པ་མཐོང་བྱུང་། འཁོར་ཁང་དུ་སླེབས་སྐབས་འཕྲུལ་འཁོར་ལྡིར་སྒྲ་གྲགས་བཞིན་དུ་མགྱོགས་མྱུར་ལས་སྣོན་བྱེད་བཞིན་འདུག
འཕྲུལ་འཁོར་གྱི་འགྲམ་དུ་ཡོད་པའི་དགུ་བཅུའི་ནང་སྐྱེས་ཀྱི་ཕྱུག་འགྱུར་སྣེ་ཁྲིད་པ་ཀུའོ་ཀྲེན་ལེས་ཐོན་རྫས་གྲུབ་མ་གང་བཟུང་ནས“སྔོན་ཆད་སུར་པན་གྱི་རྐང་ཡུ་ཕན་ཐོགས་མེད་མོད། ད་ཆ་ཕྱེ་མ་བཏགས་ནས་ནོར་བུར་གྱུར་ཡོད། གཟན་ཆག་གི་ཟུར་སྦྱོར་དངོས་རྫས་གསར་པ་དེ་རིགས་ལ་དགའ་བསུ་ཆེན་པོ་ཐོབ་ཀྱི་ཡོད”ཅེས་བཤད།
སུར་པན་གྱི་རྐང་ཡུ་ཚོང་མ་བརྒྱབ་གོང་ཀུའོ་ཀྲེན་ལེར་ལས་གཏོད་ཀྱི་གོ་སྐབས་འཚམ་པོ་ཞིག་རྙེད་མེད། 2022ལོའི་ལོ་མཇུག་བར་ཁོང་ལ་གཞི་ནས་སུར་པན་གྱི་རྐང་ཡུ་དེ་གཟན་ཆག་གི་ཟུར་སྦྱོར་དངོས་རྫས་གསར་པར་བཟོ་བའི་ཐབས་ལམ་རྙེད་པ་རེད།
“ཁྱད་ལྡན་ཐོན་ལས་འཕེལ་རྒྱས་གཏོང་རྒྱུ་ནི་གྲོང་གསེབ་ཕྱོགས་ཡོངས་ནས་དར་རྒྱས་གཏོང་བའི་ཐབས་ལམ་གལ་ཆེན་ཞིག་རེད། ད་ཐེངས་ང་ཚོར་རང་ཉིད་ཀྱི་ཁྱད་ལྡན་ཐོན་ལས་རྙེད་བྱུང”ད་ཐེངས་ཀྱི་ལས་གཏོད་སྐོར་གླེང་སྐབས་ཀུའོ་ཀྲེན་ལེས“ཐུན་མོང་མ་ཡིན་པའི་རང་ཡུལ་གྱི་ཐོན་ཁུངས་གསར་སྤེལ་བྱས་ཚེ་གཞི་ནས་དམིགས་བསལ་གྱི་འགྲན་རྩོད་ལེགས་ཆ་ལྡན་ངེས་རེད”ཅེས་བཤད།
ཀུའོ་ཀྲེན་ལེས་ཕྱོགས་ཡོངས་ནས་བསམ་གཞིག་ཟབ་མོ་བྱས་ཤིང་། ཐོན་ཁུངས་ཐད་ཉེ་འཁོར་གྱི་ཀྲེ་ཁྲེང་རྫོང་དུ་སུར་པན་ཐོན་འབོར་ཆེ་བ་དང་ཀྲེ་ཁྲེང་གི་སུར་པན་ནི་རྒྱལ་ཁབ་ཀྱི་ས་ཁམས་མཚོན་རྟགས་ཐོན་རྫས་ཀྱང་ཡིན་པ་དང་། མདུན་ལམ་ཐད་སུར་པན་གྱི་རྐང་ཡུའི་མ་གནས་དམའ་བ་དང་མཁོ་སྤྲོད་འདང་ངེས་ཡོད་པས་གཟན་ཆག་གི་ཟུར་སྦྱོར་དངོས་རྫས་བཟོ་ཐུབ་ན་རྒྱུན་འཁོར་དཔལ་འབྱོར་ལ་གྱུར་བ། ཟོག་འགྲེམས་ཐད་མཁྲེགས་ལམ་ཁྱིམ་གྱི་སྒོ་འགྲམ་བར་བཏིང་ཡོད་པས་སུར་པན་གྱི་རྐང་ཡུ་ཀྲེ་ཁྲེང་ནས་གྲོང་ཚོར་དབོར་བར་ཆུ་ཚོད་4ཡང་འགོར་གྱི་མེད་པ། བཟོ་ཁང་གྲབས་འཛུགས་ཐད་གྲོང་ཚོ་ཨུ་ལྷན་གཉིས་ཀྱིས་ལས་གཏོད་ཚོགས་པར་བོགས་དངུལ་གཟིགས་སྐྱོང་གི་ཐོན་སྐྱེད་འཁོར་ཁང་མཁོ་འདོན་བྱས་པ་བཅས་རེད། “ད་ཐེངས་ལས་གཏོད་ཀྱི་ཕུགས་འདུན་དངོས་སུ་གྲུབ་སོང”ཞེས་ཀུའོ་ཀྲེན་ལེས་ངོ་གདོང་ལས་འཛུམ་མདངས་འཕྱུར་བཞིན་དུ་བཤད།
“ཐོན་ལས་རོགས་སྐྱོར་སྲིད་ཇུས་དོན་འཁྱོལ་བྱས་ནས‘ཁྱད་ལྡན་ཡུལ་ཟོག’ཡག་པོ་བཟོ་བ་དང་། གྲོང་ཚོ་ཨུ་ལྷན་གཉིས་ཀྱིས་ནུས་ཤུགས་ཡོད་རྒུས་རྒྱབ་སྐྱོར་བྱས་ཏེ་བཟོ་ཁང་འགན་ལེན་དང་མ་བཅོས་རྒྱུ་ཆ་སྐྱེལ་འདྲེན་སོགས་ཀྱི་ལས་དོན་ཡག་པོ་བསྒྲུབས་ཡོད”ཞའོ་ཆའོ་ཅི་གྲོང་ཚོའི་ཏང་ཀྲི་པུའི་ཧྲུའུ་ཅི་ཐའོ་ཆིའུ་ཁྲེན་གྱིས་སུར་པན་གྱི་རྐང་ཡུ་ལས་སྣོན་འཕེལ་རྒྱས་གཏོང་རྒྱུ་དེ་ས་གནས་དེ་གའི་དོན་དངོས་དང་ཧ་ཅང་འཚམ་པ་མ་ཟད། ད་དུང་ཡུལ་མི་ཚོ་འབབ་འཕར་ཕྱུག་འགྱུར་ཡོང་བར་སྐུལ་ཁྲིད་ཀྱང་བྱེད་ཐུབ་ཅེས་ངོ་སྤྲོད་བྱས།
མཁོ་སྤྲོད་ཕྱོགས་བཙུགས་ཟིན་པས་མཁོ་ཡོད་ཕྱོགས་ཀྱི་གནད་དོན་ཇི་ལྟར་ཐག་གཅོད་བྱེད་དགོས་སམ། ཅི་བྱ་གཏོལ་མེད་ཀྱི་གནས་སུ་གྱར་བའི་སྐབས། ཀུའོ་ཀྲེན་ལེས་བརྙན་ཐུང་སྟེགས་བུའི་ཐོག་གཙོ་གནད་ཚིག“གཟན་ཆག”ཅེས་པ་འཚོལ་བཤེར་བྱས་པ་བརྒྱུད་དགོས་མཁོ་ཡོད་པའི་གཟན་ཆག་ཀུང་སི་ཞིག་རྙེད་པ་དང་། དྲ་ཐོག་ནས་འབྲེལ་གཏུག་བྱས་རྗེས་ཀུའོ་ཀྲེན་ལེས་མྱུར་དུ་མ་དཔེ་འཁྱེར་ནས་གྲོས་མོལ་བྱེད་པར་བསྐྱོད།
དེ་རྗེས་ཀུའོ་ཀྲེན་ལེས་དྲ་སྦྲེལ་ལ་བརྟེན་ནས་བསམ་ཕྱོགས་གསར་པ་བཏོད་དེ་མཁོ་མཁན་ཆེན་པོ་ཞིག་རྙེད་ཅིང་། ཁོང་ཚོའི་ཐོན་རྫས་ལ་ཧྲན་ཏུང་ཅི་ནན་གྱི་གཟན་ཆག་བཟོ་གྲྭ་ཞིག་གི་དགའ་བསུ་ཐོབ་ཡོད།
བསམ་ཕྱོགས་རྒྱ་སྐྱེད་དང་ཐབས་ལམ་གསར་གཏོད་བྱེད་མཁན་ཀུའོ་ཀྲེན་ལེ་གཅིག་པུ་མ་ཡིན་པར་གྲོང་རྡལ་གྱི་ཉ་བསྲེགས་ཟ་ཁང་ཞིག་གིས་དྲ་ཐོག་ཚོང་དོན་ལ་བརྟེན་ནས་དབུལ་སྐྱོར་བྱས་ཏེ། ཉ་བསྲེགས་དེ་ཉེ་འཁོར་ཤང་ནས་ས་ཁུལ་མང་པོ་ཞིག་ཏུ་ཕྱིར་ཚོང་བྱེད་ཀྱི་ཡོད། ད་དུང་ཞིང་པ་མི་གསར་མི་ཉུང་བ་ཞིག་གིས་ཞིང་ལས་ཐོན་རྫས་དྲ་ཐོག་ཚོང་དོན་ཐད་གཏོང་སོགས“ཞིང་ལས་གསར་པ”སློབ་སྦྱོང་བྱེད་པ་ལ་སོགས། ཐབས་ལམ་གསར་པ་རེ་རེས་ཡུལ་མི་ཚོ་འབབ་འཕར་ཕྱུག་འགྱུར་ཡོང་བར་རོགས་སྐུལ་བྱེད་པ་དང་དྲ་སྦྲེལ་གྱིས་ཡངས་ཤིང་རྒྱ་ཆེ་བའི་གྲོང་གསེབ་རྒྱལ་ནང་གི་ཁྲོམ་ར་ཆེན་པོར་དེ་བས་ནུས་ཆེའི་ངང་འབྲེལ་མཐུད་ཐུབ་རྒྱུ་རེད། ཡུལ་བབ་དང་བསྟུན་ནས་ཁྱད་ལྡན་དང་ལེགས་ལྡན་ཐོན་ལས་འཕེལ་རྒྱས་བཏང་སྟེ་གོ་སྐབས་གསར་པར་ཟམ་མི་ཆད་པར་དམ་འཛིན་དང་སྒུལ་ཤུགས་གསར་པ་སྐྱེད་སྲིང་བྱས་ཚེ། གྲོང་གསེབ་ཕྱོགས་ཡོངས་ནས་དར་རྒྱས་གཏོང་བའི་ལམ་བུ་ཇི་ཙམ་སྐྱོད་པ་དེ་ཙམ་གྱིས་ཡངས་སུ་འགྲོ་ངེས་རེད།