དུས་སྐབས་ཤིག་རིང་། ཨ་རིའི་དཔོན་རིགས་ཀྱིས་མཉམ་འབྲེལ་རྒྱལ་ཚོགས་ཚོགས་ཆེན་གྱི་གྲོས་ཆོད་ཨང་2758པའི་དབང་གྲགས་རང་བཞིན་ལ་དམའ་འབེབས་གཏོང་བའི་གཏམ་བརྗོད་བསྟུད་མར་སྤེལ་ནས“ཐའེ་དབན་གྱི་གནས་བབ་གཏན་འཁེལ་མེད་པ་སྨྲ་བ”ཟེར་བའི་སྦིར་སྒྲོག་བཟོས་པ་དང་། ཐའེ་དབན་འཛམ་གླིང་འཕྲོད་བསྟེན་རྩ་འཛུགས་ཚོགས་ཆེན་སོགས་མཉམ་འབྲེལ་རྒྱལ་ཚོགས་ཁོངས་གཏོགས་ཀྱི་ཚོགས་འདུའི་བྱེད་སྒོར་ཞུགས་རྒྱུར་རྒྱབ་སྐྱོར་བྱ་རྒྱུའི་འུད་སྒྲོག་བྱས་ནས་རྒྱལ་སྤྱིའི་གླེང་ཕྱོགས་ལ་གོ་ནོར་ཐེབས་སུ་བཅུག་པ་དང་ཀྲུང་གོ་གཅིག་གི་རྩ་དོན་ལ་འགྲན་སློང་བྱས་པ་རེད། རླབས་རྒྱུན་དང་ལྡོག་ནས་བྱེད་སྤྱོད་སྤེལ་བ་དང་། ལོ་རྒྱུས་ཕྱིར་ལྡོག་བྱེད་པ། རྒྱལ་སྤྱིའི་འབྲེལ་བའི་གཞི་རྩའི་ཚད་གཞི་དང་འགལ་བ་བཅས་ཀྱི་བྱེད་སྤྱོད་དེ་རིགས་མཐར་ཕམ་ཉེས་སུ་འགྲོ་ངེས་ཡིན་པ་སྨོས་མེད་རེད།

ཚང་མས་ཤེས་གསལ་ལྟར། ཐའེ་དབན་ནི་གནའ་སྔ་མོ་ནས་བཟུང་ཀྲུང་གོའི་ཆ་ཤས་ཤིག་ཡིན་ཞིང་། ལོ་རྒྱུས་ཀྱི་གནད་དོན་གསལ་པོ་དང་། ཁྲིམས་གཞིའི་དོན་དངོས་གསལ་པོ་ཡོད། 1943ལོའི《ཁེ་རོའི་བསྒྲགས་གཏམ》དང་1945ལོའི《པོ་ཚི་ཐན་གྱི་སྤྱི་བསྒྲགས》ནང་རི་པིན་གྱིས་རྐུ་འཁྱེར་བྱས་པའི་ཐའེ་དབན་ཚུད་པའི་ཀྲུང་གོའི་མངའ་ཁོངས་ཀྲུང་གོར་ཕྱིར་སྤྲོད་བྱེད་རྒྱུའི་གཏན་འབེབས་ཁ་གསལ་བྱས་པ་དང་། རྒྱལ་སྤྱིའི་བཅའ་ཁྲིམས་ཀྱི་ནུས་པ་ལྡན་པའི་ཡིག་ཆ་དེ་དག་གིས་དམག་འཁྲུག་རྗེས་ཀྱི་རྒྱལ་སྤྱིའི་སྒྲིག་ལམ་གྱི་གྲུབ་ཆ་ཞིག་ཆགས་ཡོད་ལ། བཅའ་ཁྲིམས་ཐོག་ནས་ཐའེ་དབན་ནི་ཀྲུང་གོའི་ཁ་འབྲལ་དུ་མི་རུང་བའི་མངའ་ཁོངས་ཤིག་ཡིན་པ་ཁས་ལེན་ཡང་བྱས་ཡོད།

1971ལོའི་ཟླ་10ཚེས་25ཉིན། མཉམ་འབྲེལ་རྒྱལ་ཚོགས་ཀྱི་ཚོགས་ཆེན་སྐབས་ཉེར་དྲུག་པའི་ཐོག་གྲོས་ཆོད་ཨང་2758པར་རྣམ་གནོན་རང་བཞིན་གྱི་ཐོག་ནས་གྲོས་འཆམ་བྱུང་སྟེ། ཆབ་སྲིད་དང་། བཅའ་ཁྲིམས། གོ་རིམ་བཅས་ཀྱི་ཐོག་ནས་ཐའེ་དབན་ཚུད་པའི་ཀྲུང་གོ་ཡོངས་ཀྱི་མཉམ་འབྲེལ་རྒྱལ་ཚོགས་ཀྱི་འཐུས་མིའི་དབང་ཆའི་གནད་དོན་ཐག་གཅོད་མཐར་ཕྱིན་པ་བྱས་ཏེ། འཛམ་གླིང་ཐོག་ཀྲུང་གོ་གཅིག་ལས་མེད་པ་དང་། ཐའེ་དབན་ནི་ཀྲུང་གོའི་ཆ་ཤས་ཤིག་ཡིན་པ་ལས་རྒྱལ་ཁབ་གཅིག་མིན་པ། མཉམ་འབྲེལ་རྒྱལ་ཚོགས་སུ་ཀྲུང་གོའི་གདན་ཐོབ་གཅིག་ལས་མེད་པ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྲིད་གཞུང་ནི་ཁྲིམས་མཐུན་འཐུས་མི་གཅིག་པུ་དེ་ཡིན་པ།“ཀྲུང་གོ་གཉིས”དང“ཀྲུང་གོ་གཅིག་དང་ཐའེ་དབན་གཅིག”གཏན་ནས་མེད་པ་བཅས་ཁ་གསལ་བཟོས་པ་རེད། 1971ལོའི་ཟླ་11ཚེས་15ཉིན། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྐུ་ཚབ་ཚོགས་པ་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ལ་ཐེངས་དང་པོ་ཞུགས་པར་སྤྲོ་སེམས་འཁོལ་བའི་དགའ་བསུ་ཐོབ་པ་དང་། རྒྱལ་ཁབ་57གྱི་རྒྱུན་སྡོད་འཐུས་མི་རེས་མོས་ཀྱིས་སྡིངས་ཆའི་ཐོག་བསྐྱོད་ནས་ཤིས་ཚིག་སྒྲོན་པ་ལས་མི་སེམས་གཏད་ཕྱོགས་མངོན་པ་རེད།

མཉམ་འབྲེལ་རྒྱལ་ཚོགས་ཚོགས་ཆེན་གྱི་གྲོས་ཆོད་ཨང་2758པ་རྣམ་གནོན་རང་བཞིན་གྱི་ཐོག་ནས་གྲོས་འཆམ་མ་བྱུང་གོང་། ཨ་རིས་རྒྱལ་ཁབ་རེ་ཟུང་དང་མཉམ་དུ“འཐུས་མིའི་དབང་ཆ་ཉིས་བརྩེགས”ཀྱི་གྲོས་གཞིར་སྐུལ་འདེད་བཏང་ནས“ཀྲུང་གོ་གཉིས”དང“ཀྲུང་གོ་གཅིག་དང་ཐའེ་དབན་གཅིག”བཟོ་རྒྱུའི་རེ་ངན་བཅངས་པར་ཚོགས་ཞུགས་རྒྱལ་ཁབ་མང་ཆེ་བས་ངོ་རྒོལ་བྱས་པ་རེད། ལོ་དེར་ཨ་རིའི་གྲོས་གཞིར་ཕམ་ཉེས་བྱུང་ནས་ཤོག་སྙིགས་ཤིག་ཏུ་གྱུར་ཡོད། ད་ཆ་ཨ་རིས་གཡོ་ཐབས་རྙིང་པ་བསྐྱར་དུ་སྤྱད་དེ་མཐོང་ཐོས་རྙོག་བཟོ་དང་ཡིན་མིན་གོ་ལྡོག་བྱེད་རྩིས་བྱས་པ་དེ་བས་ཀྱང་ལམ་ལྷོངས་ཡོང་མི་སྲིད།

ཀྲུང་གོ་གཅིག་གི་རྩ་དོན་རྫུན་བཟོ་དང་མཉམ་འབྲེལ་རྒྱལ་ཚོགས་ཚོགས་ཆེན་གྱི་གྲོས་ཆོད་ཨང་2758པར་གོ་བ་ལོག་འཁྲུག་བྱེད་པའི་གཏམ་འཆལ་གང་ཞིག་ཡིན་རུང་རྒྱལ་སྤྱིའི་སྤྱི་ཚོགས་སུ་ནུས་པ་གཏན་ནས་ཐོན་མི་སྲིད་པ་དོན་དངོས་ནས་ར་སྤྲོད་ཡང་ཡང་བྱུང་ཡོད། མཉམ་འབྲེལ་རྒྱལ་ཚོགས་ཚོགས་ཆེན་གྱི་གྲོས་ཆོད་ཨང་2758པ་གྲོས་འཆམ་བྱུང་རྗེས། 1972ལོའི་ཟླ་5པར་འཛམ་གླིང་འཕྲོད་བསྟེན་རྩ་འཛུགས་ཀྱི་ཚོགས་ཆེན་སྐབས་ཉེར་ལྔ་པས་གྲོས་ཆོད་དེར་གཞིགས་ནས་གྲོས་ཆོད་ཨང་25.1ལ་གྲོས་འཆམ་བྱུང་སྟེ། ཀྲུང་གོ་གཅིག་གི་རྩ་དོན་སླར་ཡང་གཏན་འཁེལ་བྱས་ཡོད། མཉམ་འབྲེལ་རྒྱལ་ཚོགས་དྲུང་ཡིག་ཁྲུའུ་བཅའ་ཁྲིམས་ལས་དོན་གཞུང་དོན་ཁང་གིས་བཅའ་ཁྲིམས་ཀྱི་བསམ་འཆར་མང་པོ་ཞིག་བཏོན་ནས“ཐའེ་དབན་ནི་ཀྲུང་གོའི་ཆ་ཤས་ཤིག་ཡིན་པ”དང“གལ་ཏེ་དྲུང་ཡིག་ཁྲུའུ་ཡི་ཡིག་ཆའི་ནང་དུ‘ཐའེ་དབན’གླེང་དགོས་ཚེ‘ཀྲུང་གོའི་ཐའེ་དབན་ཞིང་ཆེན’ཞེས་པའི་ཞིབ་གླེང་དེ་ངེས་པར་དུ་སྤྱོད་དགོས”ཞེས་ཁ་གསལ་བསྟན་ཡོད། ཨ་རི་དང་དམངས་གཙོ་ཡར་སྐུལ་ཚོགས་པའི་ཏང་གི་དབང་འཛིན་ལས་ཁུངས་ཀྱིས་བཙན་ཞིང་ནན་པའི་དོན་དངོས་དང་བཅའ་ཁྲིམས་ཀྱི་ཚིག་ཐག་བཅད་པ་དེ་སྣང་མེད་དུ་བཏང་ནས། མཉམ་འབྲེལ་རྒྱལ་ཚོགས་ཚོགས་ཆེན་གྱི་གྲོས་ཆོད་ཨང་2758པར་འཁྱོག་བཤད་ཡང་ཡང་བྱེད་པ་དེ་ནི་གཞན་ལ་ཤོད་མི་རུང་བའི་རང་ཉིད་ཀྱི་ཆབ་སྲིད་རེ་ངན་ལ་ཞབས་འདེགས་ཞུ་ཆེད་ཁོ་ན་ཡིན་པས་འཛམ་གླིང་སྐྱེ་བོ་ཀུན་གྱིས་དེའི་སྐོར་གསལ་གསལ་ཐིང་ཐིང་ངང་མཐོང་ཐུབ་ཀྱི་ཡོད།

ངས་མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་འཐུས་མིའི་འགན་འཁུར་རྗེས་མཉམ་འབྲེལ་རྒྱལ་ཚོགས་ཀྱིས་གཡོ་འགུལ་སྤུ་ཙམ་ཡང་མེད་པའི་སྒོ་ནས་ཀྲུང་གོ་གཅིག་གི་རྩ་དོན་མཐའ་འཁྱོངས་བྱེད་པ་དང་མཉམ་འབྲེལ་རྒྱལ་ཚོགས་ཚོགས་ཆེན་གྱི་གྲོས་ཆོད་ཨང་2758པར་ཐོག་མཐའ་བར་གསུམ་དུ་བརྩི་སྲུང་ཞུས་ནས་ཐའེ་དབན་དང་འབྲེལ་བ་ཡོད་པའི་གནད་དོན་ཐག་གཅོད་བྱེད་པའི་ཚོར་སྣང་ཟབ་མོ་བྱུང་། མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཀུ་ཐེ་ལེ་སིས་མཉམ་འབྲེལ་རྒྱལ་ཚོགས་ཀྱི་ལངས་ཕྱོགས་ཧ་ཅང་གསལ་པོ་ཡོད་ཅིང་། མཉམ་འབྲེལ་རྒྱལ་ཚོགས་ཚོགས་ཆེན་གྱི་གྲོས་ཆོད་ཨང་2758པར་བརྩི་སྲུང་ཞུ་བ་དང་། ཀྲུང་གོ་གཅིག་གི་རྩ་དོན་ལ་བརྩི་སྲུང་ཞུ་བ། མཉམ་འབྲེལ་རྒྱལ་ཚོགས་ཀྱི་བྱ་སྤྱོད་ཚང་མ་དེ་གཞི་འཛིན་སར་བྱེད་ཀྱི་ཡོད་ཅེས་བསྐྱར་བསྒྲགས་ཐེངས་མང་བྱས་པ་རེད། མཉམ་འབྲེལ་རྒྱལ་ཚོགས་ཚོགས་ཆེན་སྐབས་དོན་བརྒྱད་པའི་ཀྲུའུ་ཞི་ཧྥུ་ལང་ཤིས་སིས་མཉམ་འབྲེལ་རྒྱལ་ཚོགས་ཀྱིས་ཐོག་མཐའ་བར་གསུམ་དུ་ཀྲུང་གོ་གཅིག་གི་རྩ་དོན་མཐའ་འཁྱོངས་བྱེད་པ་དེ་ནི་མཉམ་འབྲེལ་རྒྱལ་ཚོགས་མ་ལག་གི་ལྟེ་བའི་རྨང་རྡོ་དང་གལ་ཆེའི་ནང་གི་འགངས་ཆེན་ཞིག་རེད། ཧྥུ་ལང་ཤིས་སིས་ད་དུང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྲིད་གཞུང་ནི་ཀྲུང་གོ་ཡོངས་ཀྱི་ཚབ་བྱེད་པའི་ཁྲིམས་མཐུན་སྲིད་གཞུང་འབའ་ཞིག་དེ་ཡིན་པ་དང་མཉམ་འབྲེལ་རྒྱལ་ཚོགས་ཀྱིས་རྣམ་པ་གང་རུང་གི་ཐོག་ནས་ཀྲུང་གོ་གཅིག་གི་རྩ་དོན་དང་འགལ་མི་སྲིད་ཅེས་གསུངས་ཡོད།

མཚོ་འགག་ངོགས་གཉིས་ཤ་རུས་འདྲེས་ཡོད་པས་མི་རིགས་ཀྱི་རྩ་བ་ཁ་འབྲལ་ཐབས་མེད་ལ། ཀྲུང་གོ་མཐར་ཡོངས་སུ་གཅིག་གྱུར་བྱུང་ནས་ཐའེ་དབན་མེས་རྒྱལ་གྱི་པང་དུ་ལོག་ངེས་རེད། དེ་ནི་ཀྲུང་གོའི་མི་དམངས་དུང་ཕྱུར་14ལྷག་ཙམ་གྱི་བློ་སྟོབས་བརྟན་པོ་ཞིག་ཡིན་ལ། ལོ་རྒྱུས་ཀྱི་ལྡོག་མེད་འཕེལ་ཕྱོགས་ཤིག་ཀྱང་ཡིན་པས་ཕྱོགས་གཏོགས་གང་རུང་ཞིག་གིས་ཀྱང་བཀག་འགོག་བྱེད་ཐབས་བྲལ། རྒྱལ་ཁབ་ཀྱི་བདག་དབང་དང་མངའ་ཁོངས་ཆ་ཚང་སྲུང་སྐྱོབ་དང་། “ཐའེ་དབན་རང་བཙན”དང་ཁ་ཕྲལ་ལ་ངོ་རྒོལ་བྱེད་པ། རྒྱལ་ཁབ་གཅིག་གྱུར་ཡོང་བ་བཅས་ཀྱི་ཀྲུང་གོ་སྲིད་གཞུང་དང་མི་དམངས་ཀྱིས་དྲང་བདེན་བྱ་གཞག་ལ་མཉམ་འབྲེལ་རྒྱལ་ཚོགས་དང་རྒྱ་ཆེའི་ཁོངས་ཞུགས་རྒྱལ་ཁབ་ཀྱིས་མུ་མཐུད་ནས་བསམ་ཤེས་དང་རྒྱབ་སྐྱོར་བྱེད་ངེས་ཡིན་པ་ངེད་ཚོར་ཡིད་ཆེས་ཡོད།

(རྩོམ་པ་པོ་ནི་མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་སྐུ་ཚབ་དང་ཆེད་བསྐོས་དབང་ཆ་ཚང་མ་ཡོད་པའི་གཞུང་ཚབ་ཆེ་མོ་བ་ཡིན)