ཤིན་ཧྭ་གསར་འགྱུར་ཁང་ཐུ་ནི་སི་ནས་གློག་འཕྲིན་འབྱོར་གསལ། ཐུ་ནི་སིའི་མི་དམངས་ལས་འགུལ་གྱི་གདན་ཞུས་ལྟར་ཀྲུང་དབྱང་དང་རྒྱལ་ཁབ་ལས་ཁུངས་ལས་དོན་ཨུ་ལྷན་གྱི་རྒྱུན་གཏན་ལས་དོན་གྱི་ཁག་བགོས་ལས་འགན་འཁུར་མཁན་ཧྲུའུ་ཅི་གཞོན་པ་ཀུའོ་ཝུན་ཆིས་ཀྲུང་གུང་སྐུ་ཚབ་ཚོགས་པའི་སྣེ་ཁྲིད་དེ་ཉེ་ཆར་ཐུ་ནི་སིར་འཚམས་འདྲིར་བསྐྱོད་པ་དང་། རྒྱལ་དམངས་དབྱི་ཧུའེ་གྲོས་ཚོགས་ཀྱི་གྲོས་དཔོན་གཞོན་པ་མཱ་པུའུ་ལུའུ་ཁེ་དང་། མར་ཙུའུ་ཅི། མི་དམངས་ལས་འགུལ་གྱི་སྤྱི་ཁྱབ་ཧྲུའུ་ཅི་ཡིན་པའི་མ་ཀེ་ཀྲ་ཝུའེ་བཅས་དང་ཐུག་འཕྲད་བྱས་པ་དང་འབྲེལ། ཐུ་ནི་སིའི་ཕྱི་ཕྱོགས་འབྲེལ་བའི་ཞིབ་འཇུག་ཨུ་ཡོན་ལྷན་ཁང་དང་བཞུགས་མོལ་སྤེལ་རེས་ཀྱང་བྱས་ཤིང་། དེའི་རིང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་དྲིལ་བསྒྲགས་དང་ངོ་སྤྲོད་གཏིང་ཟབ་བྱས་ཡོད་ལ། ཀྲུང་གོ་དང་ཐུ་ནི་སིའི་འབྲེལ་བ་དང་ཁྱབ་ཁོངས་ཁག་གི་མཉམ་ལས་སོགས་ཀྱི་ཐད་བསམ་འཆར་བརྗེ་རེས་ཀྱང་བྱས་པ་རེད།

ཐུ་ནི་སི་ཕྱོགས་ཀྱིས་ཐུ་ཀྲུང་དབར་ཕྱི་འབྲེལ་བཙུགས་ནས་ལོ་60འཁོར་བ་གོ་སྐབས་སུ་བྱས་ཏེ། རྒྱལ་ཁབ་གཉིས་པོའི་གཙོ་བདག་གི་ཐུན་མོང་ངོས་འཛིན་གལ་ཆེན་དོན་འཁྱོལ་དང་དངོས་སྒྲུབ་མཉམ་ལས་གཏིང་ཟབ་ཏུ་བཏང་ནས། ཐུ་ཀྲུང་དབར་གྱི་འབྲེལ་བ་འཕེལ་རྒྱས་དེ་བས་ཆེན་པོ་ཡོང་བར་སྐུལ་འདེད་གཏོང་འདོད་ཡོད་ཅེས་བརྗོད་པ་རེད།