《རྒྱལ་སྤྱིའི་དུས་བབ་དང་ཀྲུང་གོའི་ཕྱི་འབྲེལ་སྐོར་གྱི་རྒྱབ་ཤ་སྔོན་པོའི་དེབ(2023ལོ་དང་2024ལོ)》ཉེ་ཆར་པེ་ཅིང་དུ་འགྲེམས་སྤེལ་བྱས་པ་རེད། རྒྱབ་ཤ་སྔོན་པོའི་དེབ་ནང་། 2023ལོ་ནི་ཀྲུང་གོའི་ཕྱི་འབྲེལ་གྱི་གསར་འབྱེད་ལོ་ཞིག་དང་གྲུབ་འབྲས་ཐོབ་པའི་ལོ་ཞིག་རེད། 2024ལོར་ཀྲུང་གོས་འཛམ་གླིང་རྒྱལ་ཁབ་ཁག་དང་མཉམ་དུ་སྤེལ་རེས་མཉམ་ལས་ཀྱི་གོ་སྐབས་དེ་བས་མང་བ་བསུ་རྒྱུ་ཡིན་ཞེས་འཁོད་ཡོད་པ་རེད།

རྒྱབ་ཤ་སྔོན་པོའི་དེབ་ནི་ཀྲུང་གོ་རྒྱལ་སྤྱིའི་གནད་དོན་ཞིབ་འཇུག་ཁང་གིས་རྩོམ་སྒྲིག་བྱས་པ་ཞིག་ཡིན་པ་དང་སྟོད་ཆ་དང་སྨད་ཆ་གཉིས་སུ་དབྱེ་ཡོད། སྟོད་ཆར་གཙོ་གནད་ཐོག་རྒྱལ་ཁབ་མི་འདྲ་བའི་དུས་བབ་དང་འཛམ་གླིང་གི་དཔལ་འབྱོར་དང་། ས་ཁུལ་གྱི་གླེང་མང་བའི་གནད་དོན། གོ་ལ་ཧྲིལ་པོའི་བཅོས་སྐྱོང་སོགས་ཀྱི་གནད་དོན་ལ་དབྱེ་ཞིབ་བྱས་ཡོད་པ་དང་། སྨད་ཆར་ཀྲུང་གོའི་ཕྱི་འབྲེལ་སྲིད་ཇུས་དང་ཀྲུང་གོ་དང་ཕྱི་རྒྱལ་གྱི་འབྲེལ་བའི་ཐད་ཆེད་མངགས་རྒྱས་བཤད་བྱས་ཡོད། རྒྱབ་ཤ་སྔོན་པོའི་དེབ་ནང་། ཀྲུང་གོས་ཕྱི་འབྲེལ་ཐད་ཐོག་མཐའ་བར་གསུམ་དུ་ཞི་ཅིན་ཕིང་གི་ཕྱི་འབྲེལ་དགོངས་པ་མཛུབ་ཁྲིད་དུ་བྱས་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་རྒྱུ་གཙོ་རྐང་དུ་འཛིན་པ་དང་། ཐོག་མཐའ་བར་གསུམ་དུ་རང་རྟོན་རང་ཚུགས་དང་། སྒོ་དབྱེ་བསྟུན་མཁས། དྲང་གཞག་དྲང་བདེན། མཉམ་ལས་གཉིས་ཁེ་བཅས་ཀྱི་བྱེད་ཕྱོགས་དང་རྩ་དོན་མཐའ་འཁྱོངས་བྱེད་པ། འདྲ་མཉམ་དང་གོ་རིམ་ལྡན་པའི་འཛམ་གླིང་སྣེ་མང་ཅན་དང་ཀུན་ཕན་བསྟུན་མཁས་ཀྱི་དཔལ་འབྱོར་གོ་ལ་ཧྲིལ་པོ་ཅན་དར་སྤེལ་བརྟན་པོ་གཏོང་བ། ཀྲུང་གོའི་ལུགས་ཀྱི་དེང་རབས་ཅན་ལ་ཕྱོགས་ཡོངས་ནས་ཞབས་འདེགས་ཞུ་བ་བཅས་བྱས་ཏེ། ཀྲུང་གོའི་ཁྱད་ཆོས་ཀྱི་རྒྱལ་ཁབ་ཆེན་པོའི་ཕྱི་འབྲེལ་གྱི་རྣམ་པ་གསར་པ་ཟམ་མི་ཆད་པར་གཏོད་ཀྱི་ཡོད་ཅེས་འཁོད་ཡོད་པ་རེད།