ཀྲུང་གོ—ནེ་པ་ལའི་རྒྱལ་སྒྲོལ་སྐམ་སའི་དྲ་སྐུད་མ་ལག་དངོས་སུ་སྤྱོད་འགོ་ཚུགས་པ།
གསར་འགོད་པར་ཀྲུང་གོ་སྒུལ་བདེ་བོད་ལྗོངས་ཀུང་སི་ནས་ཤེས་རྟོགས་བྱུང་བར། ཉིན་ཤས་གོང་། ཀྲུང་གོ་སྒུལ་བདེ་བོད་ལྗོངས་ཀུང་སིས་ཀྲུང་གོ—ནེ་པ་ལའི་སྐམ་སའི་དྲ་སྐུད་མ་ལག་ཚོད་ལྟ་ལེགས་སྒྲིག་ཐུབ་པ་དེ་ཐོག་ནས་ཀྲུང་གོ་སྒུལ་བདེ་ནེ་པ་ལའི་ཕྱོགས་ཀྱི་རྒྱལ་སྒྲོལ་སྐམ་སའི་དྲ་སྐུད་མ་ལག་དངོས་སུ་གཏོང་འགོ་ཚུགས་པ་དང་ཆབས་ཅིག་སྤྱོད་འགོ་ཚུགས་པའང་མཚོན་ཡོད།
ཀྲུང་གོ—ནེ་པ་ལའི་སྐམ་སའི་དྲ་སྐུད་ལམ་དེ་ནེ་པ་ལའི་རྒྱལ་ས་ཀ་ཏ་མན་རྡུ་དང་བོད་ལྗོངས་གཞིས་རྩེ་སྦྲེལ་མཐུད་བྱས་པ་དང་ཆབས་ཅིག སྲིད་གཞུང་དང་ཁེ་ལས་ཀྱི་ཆེད་དོན་དྲ་ཚིགས་བརྒྱུད་དེ་རང་རྒྱལ་གྱི་ས་ཁོངས་ནང་གི་གྲོང་ཁྱེར་ཚང་མར་སྣུར་སྲིང་བྱས་ནས་ཞེང་ཚད་Gbps100ཟིན་ཏེ། སྐམ་སའི་དྲ་རྒྱའི་སྐུད་ལམ་གྱིས“རྒྱུད་གཅིག་ལམ་གཅིག”གི་ཨེ་ཤེ་ཡའི་ལྷོ་མར་ཕྱོགས་པའི་ཆ་འཕྲིན་བགྲོད་ལམ་གལ་ཆེན་ཤར་གཏོང་བྱས་པས། ཀྲུང་གོ་དང་ནེ་པ་ལའི་འཕྲིན་གཏོང་ཐད་ཀར་སྦྲེལ་མཐུད་དང་ཕན་ཚུན་ཤར་གཏོང་བྱེད་ནུས་སྔར་བས་ཆེ་རུ་ཕྱིན་པ་མ་ཟད། ཀྲུང་གོའི་མ་འཇོག་ཁེ་ལས་དང་ཕྱི་རྒྱལ་གྱི་ཁེ་ལས་གཞན་དག་དབར་གྱི་འཕྲིན་གཏོང་གི་དགོས་མཁོ་ཡང་བསྐངས་ནས“རྒྱུད་གཅིག་ལམ་གཅིག”ས་ཁུལ་མཉམ་སྦྲེལ་མཉམ་མཐུད་ཀྱི་འཕེལ་རྒྱས་ལ་སྐུལ་འདེད་ཐུབ་ཡོད།
གོམ་སྟབས་རྗེས་མར། ཀྲུང་གོ་སྒུལ་བདེ་བོད་ལྗོངས་ཀུང་སིས་རྒྱལ་སྤྱིའི་ཆ་འཕྲིན་གྱི་རྨང་གཞིའི་སྒྲིག་བཀོད་འཛུགས་སྐྲུན་ལ་མུ་མཐུད་སྐུལ་འདེད་ཧུར་ཐག་བཏང་ནས། འགྲམ་འགག་སྒོའི་ཀྲུང་ནེའི་ཕྱིར་གཏོང་སྦྲེལ་མཐུད་འཛུགས་སྐྲུན་བྱས་ཏེ། སྦྲེལ་མཐུད་སྣ་མང་ལ་བརྟེན་ནས་ཀྲུང་ནེའི་རྒྱལ་སྤྱིའི་མ་ལག་གི་བདེ་འཇགས་དང་འཁོར་སྐྱོད་བརྟན་པོ་ཐུབ་རྒྱུ་འགན་ལེན་བྱས་པས། “རྒྱུད་གཅིག་ལམ་གཅིག”གི་ལམ་རྒྱུད་དང་གོ་ལ་ཧྲིལ་པོའི་ཐོན་ཁུངས་ཀྱི་བཀོད་པ་རྒྱུན་ཆད་མེད་པར་ལེགས་སུ་འགྲོ་རྒྱུ་མ་ཟད། ཀྲུང་གོ་དང་གོ་ལ་ཧྲིལ་པོའི་མཉམ་སྦྲེལ་མཉམ་མཐུད་རྒྱུན་མཐུད་གཏིང་ཟབ་ཏུའང་གཏོང་རྒྱུ་རེད།