“ཀྲུང་གོ་ནི་སེར་པི་ཡའི་ཡིད་ཆེས་བྱེད་འོས་པའི་གྲོགས་པོ་བཟང་པོ་དང་རོགས་ཟླ་ཡག་པོ་ཞིག་ཡིན་ཞིང་། རྒྱལ་ཁབ་གཉིས་པོའི་གཙོ་བདག་གི་འཐབ་ཇུས་སྣེ་ཁྲིད་དང་སྐུ་ངོ་མའི་ཐུགས་ཁུར་འོག་སེར་ཀྲུང་དབར་གྱི་མཛའ་གྲོགས་ཟབ་མོ་མ་ཉམས་གོང་འཕེལ་བྱུང་ཡོད”ཉེ་ཆར་སེར་པི་ཡའི་པེར་ཀེ་ལའེ་ཏེའི“རྒྱུད་གཅིག་ལམ་གཅིག”ཞིབ་འཇུག་སུའོ་ཡི་སུའོ་ཀྲང་པོ་དབྱང·ལཱ་ལི་ཆིས་འདི་ག་ཚགས་པར་གྱི་གསར་འགོད་པའི་ཆེད་དོན་བཅར་འདྲི་དང་ལེན་བྱེད་སྐབས། སེར་ཀྲུང་རྒྱལ་ཁབ་གཉིས་པོས་ཐོག་མཐའ་བར་གསུམ་དུ་ཕན་ཚུན་བརྩི་འཇོག་དང་། ཕན་ཚུན་གྱི་ལྟེ་བའི་ཁེ་ཕན་དང་དོ་ཁུར་གལ་ཆེན་ལ་བློ་བརྟན་འགྱུར་མེད་ངང་རྒྱབ་སྐྱོར། རང་སོ་སོས་བདམས་པའི་འཕེལ་རྒྱས་ཀྱི་འགྲོ་ལམ་ལ་བློ་བརྟན་འགྱུར་མེད་ངང་རྒྱབ་སྐྱོར་བཅས་བྱས་ཏེ། ཡོ་རོབ་རྒྱལ་ཁབ་དང་ཀྲུང་གོའི་དབར་གྱི་མཛའ་གྲོགས་འབྲེལ་བའི་མིག་དཔེ་བཏོད་ཡོད་ཅེས་བརྗོད།

སེར་པི་ཡ་ནི་ཀྲུང་གོ་དང“རྒྱུད་གཅིག་ལམ་གཅིག”མཉམ་སྐྲུན་གྱི་མཉམ་ལས་ཡིག་ཆར་མིང་རྟགས་བཀོད་སྔ་ཤོས་ཀྱི་ཡོ་རོབ་རྒྱལ་ཁབ་ཀྱི་གྲས་ཤིག་ཡིན་ཞིང་། ལཱ་ལི་ཆིས། སེར་པི་ཡས“རྒྱུད་གཅིག་ལམ་གཅིག”གི་རྒྱལ་སྤྱིའི་མཉམ་ལས་མཐོ་རིམ་གླེང་སྟེགས་ནང་ཧུར་ཐག་ཞུགས་ནས། ན་ནིང་ཀྲུང་གོ་ཕྱོགས་དང“རྒྱུད་གཅིག་ལམ་གཅིག”མཉམ་སྐྲུན་གྱི་དུས་འབྲིང་བྱ་སྤྱོད་འཆར་གཞི་དང་། ཐོན་ལས་དང་མ་འཇོག་མཉམ་ལས་ཀྱི་བསམ་ཤེས་དྲན་ཐོ། རང་མོས་ཚོང་དོན་གྲོས་མཐུན་སོགས་ཕྱོགས་གཉིས་པོའི་མཉམ་ལས་ཡིག་ཆ་མང་པོར་མིང་རྟགས་བཀོད་དེ“རྒྱལ་ཁབ་གཉིས་པོས‘རྒྱུད་གཅིག་ལམ་གཅིག’སྤུས་ཚད་མཐོ་པོས་མཉམ་སྐྲུན་བྱ་རྒྱུར་རྨང་གཞི་བརྟན་པོ་བཏིང་ཡོད་ལ། དུས་རབས་གསར་པའི་སེར་ཀྲུང་འབྲེལ་བ་འཕེལ་རྒྱས་འགྲོ་རྒྱུར་སྒུལ་ནུས་གསར་པའང་བསྣན་ཡོད”ཅེས་བརྗོད།

ལཱ་ལི་ཆིས“རྒྱུད་གཅིག་ལམ་གཅིག”མཉམ་སྐྲུན་གྱི་འཕེལ་རིམ་ལ་ཡུན་རིང་དོ་ཁུར་བྱས་པ་དང་འབྲེལ། 2021ལོར་པེར་ཀེ་ལའེ་ཏེའི“རྒྱུད་གཅིག་ལམ་གཅིག”ཞིབ་འཇུག་སུའོ་སྣེ་ཁྲིད་དེ་བཙུགས་པ་རེད། ཁོང་གིས། ལོ་10ལྷག་ཙམ་རིང་། “རྒྱུད་གཅིག་ལམ་གཅིག”མཉམ་སྐྲུན་བྱ་རྒྱུ་དེ་ཀྲུང་གོའི་གྲོས་འགོ་ནས་རྒྱལ་སྤྱིའི་ལག་ལེན་དུ་འགྱུར་ཏེ་དངོས་དངོས་རྗེན་རྗེན་གྱི་མཉམ་ལས་གྲུབ་འབྲས་ཐོབ་ཡོད། “ཉིན་བཞིན་རྙོག་འཛིང་ཆེ་རུ་འགྲོ་བའི་རྒྱལ་སྤྱིའི་དུས་བབ་ཀྱི་མདུན་དུ‘རྒྱུད་གཅིག་ལམ་གཅིག’མཉམ་སྐྲུན་བྱས་པ་དེས་ཕྱོགས་ཁག་རྒྱལ་ཕམ་གྱི་བསམ་གཞིག་ལས་ཐར་ནས་མཉམ་ལས་གཉིས་ཕན་མངོན་འགྱུར་ཐུབ་སྟེ་འཛམ་གླིང་ཞི་བདེ་དང་འཕེལ་རྒྱས་ལ་གོ་སྐབས་དེ་བས་མང་བ་གཏོད་རྒྱུར་ཕན་པ་ཡོད”ཅེས་བརྗོད།

ལཱ་ལི་ཆིས། ཉེ་བའི་ལོ་ཤས་རིང་། སེར་ཀྲུང་རྒྱལ་ཁབ་གཉིས་པོས་མི་ཆོས་རིག་གནས་ཁྱབ་ཁོངས་ཀྱི་སྤེལ་རེས་མཉམ་ལས་ལ་རྒྱུན་ཆད་མེད་པར་སྐུལ་འདེད་བཏང་བ་དང་། པེར་ཀེ་ལའེ་ཏེའི་ཀྲུང་གོའི་རིག་གནས་ལྟེ་གནས་ཀྱིས་སེར་ཀྲུང་རྒྱལ་ཁབ་གཉིས་པོའི་མི་དམངས་དབར་ཕན་ཚུན་རྒྱུས་མངའ་ལོན་པ་དང་དམངས་སེམས་འབྲེལ་མཐུད་ལ་སྐུལ་འདེད་གཏོང་རྒྱུར་དོན་སྙིང་གལ་ཆེན་ལྡན་ཡོད། “ཕན་ཚུན་གྱི་འཚོ་བ་སྐྱེལ་སྟངས་རྒྱུས་ལོན་པ་དང་ཕན་ཚུན་གྱི་ཤེས་དཔལ་རླབས་པོ་ཆེ་མྱོང་རོལ་བྱས་ཚེ་གཞི་ནས་དངོས་སྒྲུབ་མཉམ་ལས་མདུན་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་ངོ་མ་གཏོང་ཐུབ”ཅེས་བརྗོད་པ་དང་། ཁོང་གིས་འབྱུང་འགྱུར་ལ་ཕྱོགས་སྐབས། སེར་ཀྲུང་རྒྱལ་ཁབ་གཉིས་པོས་གཞོན་ནུ་དང་། མཐོ་སློབ། ཇུས་འདོན་ཚོགས་པ་སོགས་ཁྱབ་ཁོངས་ཀྱི་སྤེལ་རེས་ཐད་སྔར་བས་ཤུགས་སྣོན་བརྒྱབ་ནས། མི་ཆོས་རིག་གནས་ཀྱི་རྨང་གཞི་རྒྱུན་ཆད་མེད་པར་བརྟན་དུ་བཏང་སྟེ་སེར་ཀྲུང་རྒྱལ་ཁབ་གཉིས་པོས“རྒྱུད་གཅིག་ལམ་གཅིག”སྤུས་ཚད་མཐོ་པོས་མཉམ་སྐྲུན་བྱ་རྒྱུར་མི་ཆོས་རིག་གནས་ཀྱི་གཟི་བརྗིད་དེ་བས་མང་བ་སྣོན་དགོས་ཞེས་བརྗོད།

(འདི་ག་ཚགས་པར་ཁང་དུ་པེར་ཀེ་ལའེ་ཏེ་ནས་ཟླ་5ཚེས་4ཉིན་འབྱོར་བའི་གློག་འཕྲིན)