ཤིན་ཧྭ་གསར་འགྱུར་ཁང་པེ་ཅིང་ནས་ཟླ་5ཚེས་15ཉིན་གློག་འཕྲིན་འབྱོར་གསལ། ཚེས་15ཉིན། ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཕྱི་འབྲེལ་པུའི་པུའུ་ཀྲང་ཝང་དབྱི་ཡིས་པེ་ཅིང་དུ་ཕ་ཁི་སི་ཐན་གྱི་ཙུང་ལི་གཞོན་པ་དང་ཕྱི་འབྲེལ་པུའི་པུའུ་ཀྲང་གཅིག་ལྕོགས་ཏའར་དབར་ཀྲུང་གོ་དང་ཕ་ཁི་སི་ཐན་གྱི་ཕྱི་འབྲེལ་པུའུ་ཀྲང་གི་འཐབ་ཇུས་ཐད་ཀྱི་སྐད་ཆ་ཤོད་རེས་ཐེངས་ལྔ་པ་བྱས་རྗེས་མཉམ་དུ་གསར་འགོད་པ་དང་ཐུག་འཕྲད་བྱེད་སྐབས། གསར་འགོད་པ་ཞིག་གིས་ཉེ་ཆར་ཨ་རིས་ཀྲུང་གོར་ཕྱོགས་རྐྱང་པའི་བཀག་སྡོམ་བསྟུད་མར་ཐེངས་མང་བྱས་པ་དང་འགག་སྒོའི་དཔྱ་ཁྲལ་མཐོ་རུ་ཤུགས་ཆེན་བཏང་བའི་སྐོར་ལ་ཀྲུང་གོ་ཕྱོགས་ཀྱིས་དཔྱད་གཏམ་གང་ཞིག་སྤེལ་རྩིས་ཡོད་དམ་ཞེས་དྲིས།

ཝང་དབྱི་ཡིས་ཚང་མས་ཤེས་གསལ་ལྟར་བར་སྐབས་ཤིག་རིང་། ཨ་རིས་ཀྲུང་གོར་ཕྱོགས་རྐྱང་པའི་བཀག་སྡོམ་ཐེངས་མང་བྱས་ནས་འགག་སྒོའི་དཔྱ་ཁྲལ་301གང་བྱུང་བཟོས་ཏེ། ཀྲུང་གོའི་རྒྱུན་གཏན་གྱི་ཚོང་དོན་དང་ཚན་རྩལ་བྱེད་སྒོར་ཧ་ལམ་སྨྱོ་བ་ལྟ་བུའི་བཙན་གནོན་བྱས་ཡོད། དེ་ནི་དེང་སྐབས་འཛམ་གླིང་ཐོག་གི་བཙན་པོ་ཧམ་ཤེད་ཀྱི་བྱ་སྤྱོད་ཆེས་དཔེ་མཚོན་ཞིག་རེད། དེ་ལས་ཨ་རིའི་མི་ཁག་གཅིག་གིས་རང་ཉིད་ཀྱི་ཕྱོགས་རྐྱང་པའི་བཙན་དབང་སྲུང་ཆེད་རང་ཚོད་མ་ཟིན་པའི་ཚད་གཞིར་སླེབས་ཡོད། ཨ་རི་ཕྱོགས་ཀྱིས་ཐབས་ངན་གང་ཡོད་སྤྱད་དེ་ཀྲུང་གོར་བཙན་གནོན་བྱས་པ་དེ་ཨ་རི་སྟོབས་ཆེན་ཡིན་པ་ར་སྤྲོད་མི་ཐུབ་པར་དེ་ལས་ལྡོག་སྟེ་ཨ་རི་ཕྱོགས་ཀྱིས་རང་གིས་རང་ལ་ཡིད་ཆེས་མེད་པར་ཆགས་ནས་ག་བྱེད་འདི་བྱེད་མེད་པར་གྱུར་པ་དམར་རྗེན་དུ་མངོན་པ་དང་། ཨ་རི་རང་ངོས་ཀྱི་གནད་དོན་ཐག་གཅོད་ཐུབ་རྒྱུ་ལྟ་ཞོག་དེ་ལས་ལྡོག་སྟེ་རྒྱལ་སྤྱིའི་ཐོན་སྐྱེད་མཁོ་སྤྲོད་འཁོར་འབྲེལ་རྒྱུན་གཏན་བཞིན་འཁོར་སྐྱོད་ལ་གཏོར་བཤིག་དེ་བས་བཏང་བ། ཀྲུང་གོའི་འཕེལ་རྒྱས་དང་དར་རྒྱས་ཀྱི་གོམ་སྟབས་ལ་འགོག་རྐྱེན་བཟོ་མི་ཐུབ་པར་དེ་ལས་ལྡོག་སྟེ་ཀྲུང་གོའི་མི་དམངས་དུང་ཕྱུར་14ལྷག་ཙམ་གྱིས་སྔར་བས་འབད་འབུངས་ཡར་བརྩོན་བྱེད་ངེས་ཡིན་པ་གསལ་བཤད་བྱས་ཡོད་ཅེས་བརྗོད།

འཛམ་གླིང་ཚོང་དོན་རྩ་འཛུགས་ཀྱིས་ཨ་རིའི་འགག་སྒོའི་དཔྱ་ཁྲལ་301བཟོས་པ་དག་འཛམ་གླིང་ཚོང་དོན་རྩ་འཛུགས་ཀྱི་སྒྲིག་སྲོལ་དང་རྒྱབ་འགལ་དུ་སོང་ཡོད་ལ། རྒྱལ་སྤྱིའི་བཅའ་ཁྲིམས་དང་འགལ་བའི་བྱ་སྤྱོད་ཅིག་ཀྱང་ཡིན་པའི་སྡོམ་ཚིག་ཁ་གསལ་བཀོད་ཡོད། འཛམ་གླིང་ཐོག་གཞི་རྩའི་རྒྱུན་ཤེས་ཡོད་པའི་རྒྱལ་སྤྱིའི་ཚོང་དོན་མི་སྣས་ཨ་རིའི་བྱེད་སྟངས་དེས་མི་གཞན་ལ་གནོད་པ་རང་ལ་ཕན་མི་ཐོགས་པའི་བྱེད་སྤྱོད་ཅིག་ཡིན་པ་དང་། ཨ་རི་ཕྱོགས་འཛམ་གླིང་ཚོང་དོན་རྩ་འཛུགས་འཛུགས་མཁན་གྲས་ཤིག་ཡིན་པའི་ངོས་ནས། མིག་དཔེ་ཡག་པོ་འདོན་འདོད་མི་བྱེད་པར་སྣེ་ཁྲིད་ནས་སྒྲིག་ལམ་ལས་འགལ་བ་དང་། ནོར་འཁྲུལ་ཡོ་བསྲང་མི་བྱེད་པར་ནོར་འཁྲུལ་ཉིས་བརྩེགས་གསོག་མཁན་ཞིག་བྱེད་ཀྱི་ཡོད་པའི་ངོས་འཛིན་བྱེད་ཀྱི་ཡོད། ཨ་རི་ཕྱོགས་ཀྱིས་ཁྱེད་ཚོས་འུད་བསྟོད་བྱེད་པའི“དྲང་གཞག་འགྲན་རྩོད”ལ་འགྲེལ་བཤད་ཇི་ལྟར་རྒྱག་གམ། རྒྱལ་སྤྱིའི་སྤྱི་ཚོགས་ཀྱི་ཡིད་ཆེས་ཇི་ལྟར་ཐོབ་ཐབས་བྱེད་དམ།

ཝང་དབྱི་ཡིས་ཕྱོགས་རྐྱང་པའི་བྱེད་སྤྱོད་དང་སྲུང་སྐྱོང་རིང་ལུགས་ནི་དུས་རབས་འཕེལ་རྒྱས་ཀྱི་རླབས་རྒྱུན་དང་རྒྱབ་འགལ་དུ་སོང་བས་ལོ་རྒྱུས་ཀྱིས་རྡོག་རོལ་གཏོང་ངེས་རེད། གོ་ལ་ཧྲིལ་པོའི་དཔལ་འབྱོར་བསྐྱར་གསོའི་འགག་རྩའི་དུས་འདིར་ད་དུང་འཛམ་གླིང་ལ་རྙོག་དྲ་གསར་པ་བཟོ་རྒྱུ་མེད་ལུགས་ཨ་རི་ཕྱོགས་ལ་རྒྱལ་སྤྱིའི་སྤྱི་ཚོགས་ཀྱིས་ངེས་པར་དྲང་བདེན་གྱི་སྒོ་ནས་བརྗོད་དགོས་ཞེས་ནན་བཤད་བྱས་ཡོད།