ཀྲུའུ་ཞི་ཞི་ཅིན་ཕིང་གི་གདན་ཞུས་ལྟར་ཨུ་རུ་སུའི་ཙུང་ཐུང་ཕུའུ་ཅིང་གིས་ཟླ་5ཚེས་16དང་17ཉིན་ཀྲུང་གོར་རྒྱལ་དོན་འཚམས་འདྲི་གནང་རྒྱུ་རེད། དེ་ནི་ཙུང་ཐུང་ཕུའུ་ཅིང་གི་འགན་ཡུན་གསར་པ་འགོ་ཚུགས་རྗེས་ཀྱི་འཚམས་འདྲིར་ཡོང་ཐེངས་དང་པོ་དེ་ཡིན་ལ། ན་ནིང་དཔྱིད་ཀར་ཀྲུའུ་ཞི་ཞི་ཅིན་ཕིང་ཨུ་རུ་སུར་འཚམས་འདྲིར་ཕེབས་རྗེས་ཀྲུང་གོར་འཚམས་འདྲིར་ཡོང་བ་ཡིན་པས་དོན་སྙིང་གལ་ཆེན་ལྡན་ཡོད་ལ་འཛམ་གླིང་ཡོངས་ཀྱིས་དོ་ཁུར་ཆེན་པོ་བྱེད་ཀྱི་ཡོད།

གཙོ་བདག་ཕྱི་འབྲེལ་ནི་ཀྲུང་ཨུའི་འབྲེལ་བ་འཕེལ་རྒྱས་གཏོང་བའི་ཕྱོགས་སྟོན་འཁོར་ལོ་དང་རྒྱ་མིག་ལྟ་བུ་ཡིན། ཀྲུའུ་ཞི་ཞི་ཅིན་ཕིང་དང་ཙུང་ཐུང་ཕུའུ་ཅིང་དབར་ད་བར་ཞལ་འཛོམས་ཐེངས་40ལྷག་ཙམ་གནང་ནས་རྒྱལ་སྲིད་སྐྱོང་ལུགས་དང་། རྒྱལ་སྤྱིའི་དུས་བབ་འཕེལ་ཕྱོགས། ལོ་བརྒྱའི་འགྱུར་ལྡོག་སོགས་འཐབ་ཇུས་ཀྱི་གནད་དོན་ཐད་སྤེལ་རེས་གཏིང་ཟབ་གནང་བ་ལས་སྒེར་གྱི་མཛའ་གྲོགས་ཟབ་མོ་ཆགས་ཡོད། གཙོ་བདག་ཕྱི་འབྲེལ་གྱིས་བྲག་ལྟར་བརྟན་པའི་ཀྲུང་ཨུའི་འབྲེལ་བར་སྒུལ་ཤུགས་གསར་པ་དང་གསོན་ཤུགས་གསར་པ་བསྣན་པ་མ་ཟད། ཟང་ཟིང་དང་ཡོ་ལང་ཆེ་བའི་འཛམ་གླིང་གི་དུས་བབ་ལ་བརྟན་ལྷིང་རང་བཞིན་དང་གཏན་འཁེལ་རང་བཞིན་ཡང་བསྣན་ཡོད། རྒྱལ་ཁབ་གཉིས་པོའི་གཙོ་བདག་གི་འཐབ་ཇུས་སྣེ་ཁྲིད་འོག ཀྲུང་ཨུའི་འབྲེལ་བ་ལོ་རྒྱུས་ཀྱི་ཆུ་ཚད་མཐོ་ཤོས་སུ་སླེབས་པ་དང་རྒྱལ་ཁབ་ཆེན་པོའི་འབྲེལ་བའི་དཔེ་མཚོན་གསར་པ་ཞིག་བཏོད་ཡོད།

2014ལོར་ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བའི་དུས་མཚམས་གསར་པའི་སྐོར་གྱི་མཉམ་འབྲེལ་གསལ་བསྒྲགས་ལ་ཐུན་མོང་ཐོག་མཚན་རྟགས་བཀོད་པ་ནས་2019ལོར་ཀྲུང་གོ་དང་ཨུ་རུ་སུའི་དུས་རབས་གསར་པའི་ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བ་འཕེལ་རྒྱས་གཏོང་རྒྱུ་ཐུན་མོང་ཐོག་ཁྱབ་བསྒྲགས་བྱས་པའི་བར་དང་། དེ་ནས་2021ལོར《ཀྲུང་གོ་དང་ཨུ་རུ་སུའི་ཁྱིམ་མཚེས་མཛའ་གྲོགས་མཉམ་ལས་ཀྱི་ཆིངས་ཡིག》ནར་འགྱངས་བྱ་རྒྱུའི་གཏན་འབེབས་མགྲིན་གཅིག་ཏུ་གནང་བའི་བར། ཀྲུང་གོ་དང་ཨུ་རུ་སུའི་འབྲེལ་བ་ཟབ་ཏུ་འགྲོ་ཐེངས་ཚང་མ་ཀྲུང་གོ་དང་ཨུ་རུ་སུའི་གཙོ་བདག་གི་ཕྱོགས་སྟོན་སྣེ་ཁྲིད་དང་འཐབ་ཇུས་ཀྱི་འཆར་འགོད་དང་ཁ་འབྲལ་ཐབས་མེད། ཙུང་ཐུང་ཕུའུ་ཅིང་ད་ཐེངས་ཀྲུང་གོར་འཚམས་འདྲིར་ཕེབས་པར། ཀྲུའུ་ཞི་ཞི་ཅིན་ཕིང་གིས་ཙུང་ཐུང་ཕུའུ་ཅིང་དང་ལྷན་དུ་ཀྲུང་ཨུའི་དབར་ཕྱི་འབྲེལ་བཙུགས་ནས་ལོ་75འཁོར་བའི་རྒྱབ་ལྗོངས་འོག་ཕྱོགས་གཉིས་པོའི་འབྲེལ་བ་དང་། ཁྱབ་ཁོངས་ཁག་གི་མཉམ་ལས། དེ་བཞིན་ཐུན་མོང་ཐོག་དོ་ཁུར་བྱེད་པའི་རྒྱལ་སྤྱིའི་ས་ཁུལ་གྱི་གནད་དོན་བཅས་ཀྱི་ཐད་དགོངས་འཆར་བརྗེ་རེས་གནང་ནས། ཀྲུང་ཨུའི་འབྲེལ་བ་ཚད་གཞི་མཐོ་པོས་འཁོར་སྐྱོད་བྱེད་པར་ཆབ་སྲིད་ཀྱི་འགན་ལེན་ནུས་ལྡན་མུ་མཐུད་གནང་རྒྱུ་ཡིན་པ་རེད།

ཀྲུང་ཨུའི་འཐབ་ཇུས་མཉམ་ལས་ཟབ་ལ་ཕན་འབྲས་ཆེ་ཞིང་། ཐོག་མཐའ་བར་གསུམ་དུ་དྲང་གཞག་དྲང་བདེན་སྲུང་སྐྱོང་བྱས་ནས་རྒྱལ་སྤྱིའི་སྤྱི་ཚོགས་ལ་དྲང་ནུས་བསྣན་ཡོད། ཀྲུང་ཨུའི་འབྲེལ་བ་འཕེལ་རྒྱས་གཏོང་བར་ཡུན་རིང་ཁྱིམ་མཚེས་རྒྱལ་ཁབ་ཀྱི་མཛའ་གྲོགས་དང་། ཕྱོགས་ཡོངས་ཀྱི་འཐབ་ཇུས་མཉམ་ལས། གཉིས་ཁེ་གཉིས་ཕན་མཉམ་ལས་བཅས་ཀྱི་འདུ་ཤེས་རྒྱུན་འཁྱོངས་བྱས་ཏེ་དཔུང་ཁག་འགྲན་རྒོལ་དང་། རྒྱལ་ཕམ་འཐབ་འགྲན། ཕན་ཚུན་ཉེས་སྐྱོན་འཛུགས་པ་བཅས་འཇམ་འཐབ་ཀྱི་བསམ་བློ་དོར་ནས་ཕྱོགས་གསུམ་པར་མནའ་འབྲེལ་མི་བྱེད་པ་དང་། འགྲན་རྒོལ་མི་བྱེད་པ། མི་དམིགས་པ། ཕྱོགས་གསུམ་པའི་ཤུགས་རྐྱེན་མི་ཐེབས་པ་བཅས་ཀྱི་ཚད་གཞི་མཐའ་འཁྱོངས་བྱེད་དགོས། མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་ལས་འགན་རྒྱུན་འཛིན་རྒྱལ་ཁབ་ཡིན་པའི་ཀྲུང་ཨུས་ཐོག་མཐའ་བར་གསུམ་དུ་ཕྱོགས་མང་རིང་ལུགས་ངོ་མ་ལག་ལེན་བསྟར་ནས་མཉམ་ལས་ཁྲོད་ཀུན་ཕན་གཉིས་ཁེ་དོན་གཉེར་དང་འདྲ་མཉམ་དང་གོ་རིམ་ལྡན་པའི་འཛམ་གླིང་སྣེ་མང་ཅན་ལ་སྐུལ་འདེད་བཏང་སྟེ། ཕན་ཚུན་ཡིད་ཆེས་གཉིས་ཕན་དང་གཉིས་ཕན་མང་ཕན་གྱི་རྒྱལ་ཁབ་ཆེན་པོའི་ཁྱིམ་མཚེས་རྒྱལ་ཁབ་དབར་གྱི་འགྲོ་འོང་བྱེད་སྟངས་གསར་པ་ཞིག་མཉམ་དུ་བཏོད་ནས། རྒྱལ་སྤྱིའི་དྲང་གཞག་དྲང་བདེན་ལ་ཀྲུང་ཨུའི་བློ་གྲོས་དང་སྟོབས་ཤུགས་སྐྱེས་སུ་ཕུལ་ཡོད།

ཀྲུང་ཨུའི་གཙོ་བདག་སླར་ཡང་ཞལ་འཛོམས་བྱུང་བ་དེས་རྒྱལ་ཁབ་གཉིས་པོའི་འབྲེལ་བ་འཕེལ་རྒྱས་འགྲོ་བར་སྒུལ་ཤུགས་ཆེན་པོ་བསྣན་ནས། ཀྲུང་ཨུའི་དུས་རབས་གསར་པའི་ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བ་སྔར་བས་ཟབ་ཏུ་འགྲོ་བར་སྐུལ་མ་ཐེབས་རྒྱུའི་ཡིད་ཆེས་ཡོད།

(རྩོམ་པ་པོ་ནི་ཨུ་རུ་སུར་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཡིན)