མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། ཉེ་ཆར་གུང་གཞོན་སྡེ་ཚོགས་མཚོ་སྔོན་ཞིང་ཨུད་ཀྱིས་ཞིང་ཆེན་སློབ་གསོ་ཐིང་དང་། ཞིང་ཆེན་མི་སྤྱི་ཐིང་། ཞིང་ཆེན་སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་ཐིང་བཅས་དང་མཉམ་འབྲེལ་ཐོག《མཚོ་སྔོན་གུང་གཞོན་སྡེ་ཚོགས་ཀྱིས་སློབ་གྲྭ་ཐོན་ཡང་ལས་ཞུགས་ཐུབ་མེད་པའི་གཞོན་ནུར་ཞབས་འདེགས་ཞུ་བའི་གཤོག་རྩལ་ངོམ་པའི་འཆར་གཞིའི་ལོ་གསུམ་བྱ་སྤྱོད་ཀྱི་ལག་བསྟར་ཇུས་གཞི》བཏོན་ཞིང་། ལས་ཞུགས་ལ་སྣེ་ཁྲིད་ཀྱི་བྱ་སྤྱོད་དང་། དངོས་སྦྱོང་ལྟ་སྦྱོང་བྱ་སྤྱོད། རྩལ་ནུས་མཐོར་གཏོང་བྱ་སྤྱོད། ལས་གནས་རྒྱ་སྐྱེད་བྱ་སྤྱོད། གསར་གཏོད་ལ་བརྟེན་ནས་ལས་ཞུགས་ལ་སྐུལ་འདེད་གཏོང་བའི་བྱ་སྤྱོད། ཁེ་དབང་འགན་ལེན་བྱ་སྤྱོད་བཅས་རིམ་པ་དང་རིགས་ཕྱེ་ནས་ལག་ལེན་བསྟར་ཏེ། རིམ་འཕར་རྣམ་པའི་གཞོན་ནུའི་ལས་ཞུགས་ལ་ཞབས་འདེགས་ཞུ་བའི་ལས་ཀའི་འབྲེལ་ཐག་ཆ་ཚང་ཞིག་ཧུར་ཐག་བསྐྲུན་རྒྱུ་རེད།

ལས་ཞུགས་ཀྱི་འགག་སྒོ་མདུན་ཕྱོགས་སུ་སྤོས་ཏེ། བརྗོད་དོན་གཙོ་བོའི་སྒྲོག་འགྲེལ་དང་། བརྗོད་དོན་གཙོ་བོའི་བྱེད་སྒོ དཔེ་མཚོན་འདེམས་གཏོད་སོགས་ཀྱི་བྱེད་ཐབས་ལ་བརྟེན་ནས་སློབ་གྲྭར་ཡོད་པའི་སློབ་ཆེན་སློབ་མར་ཚུལ་མཐུན་ཟོལ་མེད་ཀྱི་ལས་འདེམས་ལྟ་བ་དང་ལས་ཞུགས་ཀྱི་ལྟ་བ་འཛིན་རྒྱུར་ཁྲིད་སྟོན་བྱ་རྒྱུ་དང་། སློབ་ཐོན་འཛིན་གྲྭའི་སྡེ་ཚོགས་ཀྲི་པུའུ་ཚན་པར་བྱས་ཏེ་སློབ་ལོ་རེར་ལས་ཞུགས་འདུ་ཤེས་ཐད་ལ་ཁྲིད་སྟོན་དང་ལས་ཞུགས་རྩལ་ནུས་ཟུར་ཁྲིད་ལ་དམིགས་ནས་བརྗོད་དོན་གཙོ་བོའི་སྡེ་ཚོགས་ཉིན་མོའི་བྱེད་སྒོ་ཐེངས་གཉིས་ལས་མི་ཉུང་བ་སྤེལ་རྒྱུ། ལས་གནས་ཉམས་ལེན་བྱེད་སྒོ་རྒྱུན་རྣམ་ཅན་གྱིས་སྒྲིག་འཛུགས་བྱས་ཏེ་སློབ་ཆེན་སློབ་མའི“གྲུ་གཡོར་སྒྲེང་པའི་འཆར་གཞི”དང་། “སྡེ་ཁུལ་གྱི་ལག་ལེན་འཆར་གཞི” “གཤམ་སྤེལ་གསུམ”སོགས་དངོས་སྦྱོང་ལག་ལེན་བྱེད་སྒོ་དང་། སློབ་ཆེན་སློབ་མའི་དང་བླངས་ཞབས་ཞུའི་ནུབ་རྒྱུད་འཆར་གཞི། གཞོན་ནུའི་ལས་ཞུགས་ལྟ་སྦྱོང་ལས་དོན་བཅས་ལག་བསྟར་བྱས་ནས་གཞོན་ནུ་སློབ་མའི་ལས་ཞུགས་ལག་ལེན་གྱི་འཇོན་ཐང་ཟམ་མི་ཆད་པར་ཆེ་རུ་གཏོང་རྒྱུ། ཞིང་འབྲོག་ཁུལ་གྱི་ལས་རིགས་སློབ་གྲྭ་ནས་ཐོན་པའི་སློབ་མ་དང་མཐོ་སློབ་དཀྱུས་མ་ནས་ཐོན་པའི་ལས་ཞུགས་ཐུབ་མེད་པའི་སློབ་མ་སོགས་ལ་ཕྱོགས་ནས་ལས་ཞུགས་རྩལ་ནུས་གསོ་སྦྱོང་བྱས་ཏེ། ཀ་བརྟེན་ཐོན་ལས་དང་། གཙོ་གནད་ལས་རིགས་ཀྱི་ཁེ་ལས། ལས་རིགས་ཁ་ཐང་བ་བཅས་ལ་ཞབས་འདེགས་ཞུ་བའི་རྩལ་ནུས་གསོ་སྦྱོང་རྣམ་གྲངས་གསར་སྤེལ་བྱ་རྒྱུ་རེད།

དེ་དང་ཆབས་ཅིག་ལོ་ལྟར་ལས་མི་བསྡུ་བའི་འདུ་ཚོགས་ཐེངས་20སྒྲིག་འཛུགས་དང་ཐད་གཏོང་ལས་གཏོད་ཀྱི་བྱེད་སྒོ་ཐེངས་20ལས་མི་ཉུང་བ་སྤེལ་ཏེ། ལས་ཞུགས་ལས་གནས་དང་དེ་བཞིན་ལས་ཞུགས་ཆ་འཕྲིན་བློ་འདྲིའི་ཞབས་ཞུ་ཕུན་སུམ་ཚོགས་པོ་བྱས་ནས་གཞོན་ནུའི་ལས་ཞུགས་ལས་དོན་གྱི་སྤུས་ཚད་དང་ཕན་འབྲས་ཟམ་མི་ཆད་པར་ཆེ་རུ་གཏོང་རྒྱུ་དང་། ལོ་ལྟར་གཞོན་ནུའི་ལས་གཏོད་སྲིད་ཇུས་གསོ་སྦྱོང་ཐེངས་20ལས་མི་ཉུང་བ་བྱས་ནས་ལས་གཏོད་ཀྱིས་ལས་ཞུགས་ལ་སྐུལ་ཁྲིད་ཐུབ་པའི་མི་གྲངས་1000ལས་མི་ཉུང་བ་ཟིན་པར་བྱ་རྒྱུ། ལས་གཏོད་དངུལ་བུན་སྒོར་ཁྲི་2000ལས་མི་ཉུང་བ་གཏོང་རྒྱུ། “གཞོན་ནུའི་གསར་གཏོད་དྲུག”གི་ལས་ཀའི་མ་ལག་བརྒྱུད་ལས་གཏོད་གཞོན་ནུར་མ་དངུལ་བསྡུ་སྒྲིལ་གྱི་དངུལ་བུན་དང་། སློབ་དཔོན་གྱི་རོགས་སྐྱོར། སྲིད་ཇུས་འབྲེལ་མཐུད་སོགས་ཀྱི་ཞབས་འདེགས་ཞུས་ནས་གཞོན་ནུས་གསར་གཏོད་ལས་གཏོད་བྱེད་པར་རམ་འདེགས་བྱ་རྒྱུ་རེད།