རི་ཀླུང་བརྒལ་ནས་མཉམ་དུ་ཕུགས་འདུན་དོན་གཉེར་བྱེད།
ཧྥུའུ་ཅན་ཞིང་ཆེན་གྱི“ཚོགས་སྒྲིག་རྣམ་པའི”སློབ་གསོའི་བོད་སྐྱོར་ལས་དོན་ཁག་གསུམ་པའི་སྐོར་བཀོད་པ།
འདི་ནི་བོད་སྐྱོར་དགེ་རྒན་ཁྲེང་ཡུས་ཆུན་དང་སློབ་མ་ཚོས་ལོ་རྒྱུས་སློབ་ཚན་འཚོག་བཞིན་པ།
བོད་སྐྱོར་བགྲང་བྱ་སུམ་ཅུ་འདས།
བརྩེ་བ་ཟབ་མོ་ས་མཐོར་བཅངས།
ལེ་ཚན་གཏོད་པའི་གཏམ།
1994ལོར་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་གསུམ་པར“ཁ་གཏད་བོད་སྐྱོར་དང་། ཁུལ་དབྱེ་འགན་འཁུར། དུས་བཀག་བརྗེ་རེས”བཅས་ཀྱི་ཐབས་ཇུས་གལ་ཆེན་བཏོན་ཡོད། ལོ་30ཡི་རིང་། ཁ་གཏད་རོགས་སྐྱོར་ཚན་པ་ཁག་དང་རྒྱ་ཆེའི་བོད་སྐྱོར་ལས་བྱེད་པ་ཚོས་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་ནན་ཏན་བྱས་ནས་ལས་བྱེད་པའི་བོད་སྐྱོར་དང་། དཔལ་འབྱོར་གྱི་བོད་སྐྱོར། ཤེས་ལྡན་པའི་བོད་སྐྱོར། ལག་རྩལ་གྱི་བོད་སྐྱོར། “ཚོགས་སྒྲིག་རྣམ་པའི”བོད་སྐྱོར་བཅས་ཟུང་འབྲེལ་གྱི་ལས་ཀའི་བྱེད་ཐབས་ཐོག་མཐའ་བར་གསུམ་དུ་མཐའ་འཁྱོངས་བྱས་ཏེ་བོད་སྐྱོར་བྱེད་ཤུགས་རྒྱུན་ཆད་མེད་པར་ཆེ་རུ་གཏོང་བ་དང་། བོད་སྐྱོར་གྱི་ནང་དོན་ཕུན་སུམ་ཚོགས་སུ་གཏོང་བ། བོད་སྐྱོར་གྱི་གཙོ་གནད་ལེགས་སྒྲིག་བཅས་བྱས་པ་མ་ཟད། ཕྱོགས་མང་དང་། ཁྱབ་རྒྱ་ཆེ་བ། རིམ་པ་མང་བ་བཅས་ཀྱི་སྒོ་ནས་བོད་སྐྱོར་ལས་དོན་ཁག་སྤེལ་བར་བརྟེན་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གསོན་ཤུགས་ཆེན་པོ་བསྣན་ནས་བོད་ཀྱི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཆེན་པོ་ཐེབས་ཡོད། ལོ་30རིང་དང་ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་བྱམས་བརྩེའི་ཐུགས་ཁུར་དང་འགྱུར་མེད་སྟོབས་ལྡན་གྱི་འགོ་ཁྲིད་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ཀྱི་ཁྲིད་སྟོན་འོག བོད་སྐྱོར་ལས་དོན་ལ་ཐོབ་པའི་གྲུབ་འབྲས་ཆེན་པོ་དང་དེ་བཞིན་རྒྱ་ཆེའི་བོད་སྐྱོར་ལས་བྱེད་པས་ལས་འགན་ཆུད་ཟོས་སུ་མི་གཏོང་བར་ས་མཐོར་ལེགས་སྐྱེས་ཕུལ་བའི་སྙིང་སྟོབས་དྲིལ་བསྒྲགས་ཡག་པོ་བྱ་ཆེད། འདི་ག་ཚགས་པར་གྱིས་དེ་རིང་ནས་བཟུང《བོད་སྐྱོར་བགྲང་བྱ་སུམ་ཅུ་འདས། བརྩེ་བ་ཟབ་མོ་ས་མཐོར་བཅངས》ཞེས་པའི་ཆེད་སྒྲིག་ལེ་ཚན་འདོན་རྒྱུ་ཡིན་པས་དོ་སྣང་ཡོད་པ་ཞུ།
ཉེ་ཆར། ཆབ་མདོ་གྲོང་ཁྱེར་ཁ་རུབ་ཆུས་དམའ་རིམ་སློབ་འབྲིང་གཉིས་པའི་ལོ་རིམ་བརྒྱད་པའི་འཛིན་གྲྭ་གཉིས་པའི་སློབ་མས་གཙོ་ཁྲིད་བྱེད་པ་དང་འབྲེལ་འཆད་སྟེགས་ཐོག་བསྐྱོད་དེ་ལོ་རྒྱུས་སློབ་ཚན་ལ་སློབ་ཚན་འཆད་ཁྲིད་བྱས་པས་ཉན་མཁན་དགེ་རྒན་ཚོའི་དགའ་བསུ་ཐོབ།
“ལོ་རྒྱུས་སློབ་ཚན་དེ་འདྲ་བྱས་ནས་སློབ་ཁྲིད་བྱེད་ཆོག་པས་ང་ཚོས་རྒན་ཀྲེང་ལགས་ལ་སློབ་སྦྱོང་ཞུས་ཏེ་སློབ་ཚན་གྱི་སློབ་ཁྲིད་བྱེད་ཐབས་བསྒྱུར་ནས་སློབ་མ་རྣམས་སློབ་ཚན་གྱི་མི་སྣ་གཙོ་བོར་འགྱུར་བར་བྱེད་ཀྱི་ཡིན”ཞེས་ཁ་རུབ་ཆུས་དམའ་རིམ་སློབ་འབྲིང་གཉིས་པའི་ལོ་རྒྱུས་སློབ་དཔྱོད་ཚོགས་ཆུང་གི་ཙུའུ་ཀྲང་ཁྲེན་མེང་ཅཱ་ཡིས་ཧྥུའུ་ཅན་གྱི་སློབ་གསོའི་བོད་སྐྱོར་དགེ་རྒན་ཀྲེང་ཡུས་ཆུན་གྱི་སློབ་གསོའི་བོད་སྐྱོར་དཔེ་སྟོན་སློབ་ཚན་ཉན་རྗེས་དེ་ལྟར་བཤད།
དེ་ནི་ཧྥུའུ་ཅན་ཞིང་ཆེན་གྱི“ཚོགས་སྒྲིག་རྣམ་པའི”སློབ་གསོའི་བོད་སྐྱོར་ལས་དོན་ཁག་གསུམ་པའི་སློབ་ཁྲིད་གཅིག་རེད།
2022ལོའི་ཟླ་7པར་བོད་དུ་བསྐྱོད་ཚུན། ཧྥུའུ་ཅན་ཞིང་ཆེན་གྱི“ཚོགས་སྒྲིག་རྣམ་པའི”སློབ་གསོའི་བོད་སྐྱོར་ཚོགས་པ་ཁག་གསུམ་པས“སློབ་གྲྭ་གཅིག་ལ་རྒྱབ་སྐྱོར་དང་ས་ཁུལ་གཅིག་ལ་དཔེ་སྟོན་བྱེད་པའི”སློབ་གསོའི་བོད་སྐྱོར་དམིགས་ཚད་ལ་དམ་པོར་དམིགས་ནས་ཆབ་མདོ་གྲོང་ཁྱེར་གྱི་དགེ་སློབ་དང་སྤེལ་རེས་གཏིང་ཟབ་དང་སློབ་གསོ་སློབ་ཁྲིད་ལ་བརྟག་ཞིབ་བྱས་ཏེ་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྐྱེད་སྲིང་དང་བརྟན་དུ་གཏོང་རྒྱུ་སློབ་གསོའི་བོད་སྐྱོར་ལས་དོན་གྱི་བརྒྱུད་རིམ་ཧྲིལ་པོར་ཁྱབ་པར་བྱས་ནས་ཆབ་མདོའི་སློབ་གསོ་སྒྱུར་བཅོས་འཕེལ་རྒྱས་ལ་རམ་འདེགས་བྱས་ཡོད།
ཆབ་མདོར་བྱང་ཚད་མཐོ་བའི་དགེ་རྒན་གྱི་དཔུང་ཁག་དེ་བས་ལེགས་པ་འཛུགས་སྐྱོང་ལ་རོགས་རམ་བྱ་ཆེད། ཧྥུའུ་ཅན་གྱི་བོད་སྐྱོར་དགེ་རྒན་ཚོས“སྤུས་རྟགས་ལ་སྐུལ་འདེད་དང་བཀྲག་མདངས་འཚེར་ས་མངོན་པར་བྱེད་པའི”རྩ་དོན་རྒྱུན་འཛིན་བྱས་ནས་ཧྥུའུ་ཅན་དང་ཆབ་མདོའི་སྤུས་ལེགས་སློབ་གསོའི་ཐོན་ཁུངས་མཉམ་སྤྱོད་ཀྱི“ཧྥུའུ་ཅན་དང་ཆབ་མདོའི་དགེ་རྒན་གྲགས་ཅན་ལས་དོན་ཁང”གི་སློབ་ཁྲིད་སློབ་གསོའི་སྤུས་རྟགས་བཏོད་ཡོད།
“ཧྥུའུ་ཅན་དང་ཆབ་མདོའི་དགེ་རྒན་གྲགས་ཅན་ལས་དོན་ཁང”ནི་ཧྥུའུ་ཅན་སློབ་གསོ་སློབ་གླིང་དང་། ཧྥུའུ་ཅན་ཞིང་ཆེན་སློབ་གསོ་ཚན་རིག་ཁང་། ཧྥུའུ་ཅན་ཞིང་ཆེན་གྱི་སྤྱིར་བཏང་སློབ་གསོ་སློབ་དཔྱོད་ཁང་བཅས་ཀྱིས་བཏོད་པའི་ཧྥུའུ་ཅན་དང་ཆབ་མདོ་ས་ཁུལ་གཉིས་ཀྱི་སྤུས་ལེགས་སློབ་གསོའི་ཐོན་ཁུངས་ཀྱི་སྦྲེལ་ཟམ་ཡིན་ཞིང་། སྔ་རྗེས་སུ་ཆབ་མདོའི་རྐང་འཛིན་དགེ་རྒན་26ཧྥུའུ་ཅན་སློབ་གསོ་སློབ་གླིང་དུ་དུས་ཡུན་ལོ་གཅིག་གི་སློབ་སྦྱོང་བྱེད་པར་བཏང་བ་དང་། དཔའ་ཤོད་དང་། དཔལ་འབར། མཛོ་སྒང་། ལྷོ་རོང་བཅས་རྫོང་གི་ན་གཞོན་དགེ་རྒན་251ཧྥུའུ་ཅན་ས་ཁུལ་ཁག་གི་སྤུས་ལེགས་སློབ་གྲྭར་ལས་ཐོག་སློབ་སྦྱོང་དང་ལྟ་སྦྱོང་སློབ་ཁྲིད་ལ་བཏང་བ་མ་ཟད། ཧྥུའུ་ཅན་གྱི་དགེ་རྒན་གྲགས་ཅན་དང་སློབ་གྲྭ་གྲགས་ཅན་གྱི་ཐོན་ཁུངས་སྤྱི་འདོམས་བྱས་པ་དང་འབྲེལ། ཧྥུའུ་ཅན་གྱི་དགེ་རྒན་གྲགས་ཅན་ཚོགས་པ་ཁག་གསུམ་གྱི་ཁྱོན་དགེ་རྒན་19སྒྲིག་འཛུགས་བྱས་ཏེ་ཆབ་མདོར་གསོ་སྦྱོང་སློབ་གསོའི་ལས་དོན་སྤེལ་བ་དང་ཧྥུའུ་ཅན་གྱི་ཞིང་ཆེན་རིམ་པའི་རིག་ཚན་གྱི་སྣེ་ཁྲིད་པ་དང་རྐང་འཛིན་དགེ་རྒན་100ཙམ་སྒྲིག་འཛུགས་བྱས་ཏེ་དྲ་ཐོག་དང་དྲ་ཕྱི་ནས“ཧྥུའུ་ཅན་དང་ཆབ་མདོའི་དགེ་རྒན་གྲགས་ཅན་ལས་དོན་ཁང”གི་སློབ་དཔྱོད་དང་སློབ་ཁྲིད་བྱེད་སྒོར་ཞུགས་པ་དང་ཆབ་མདོའི་དགེ་སློབ་ཁྲི་1.5ལྷག་ཙམ་ལ་ཁྱབ་ཡོད།
ཧྥུའུ་ཅན་དང་བོད་ཀྱི་གཞོན་ནུ་ལོ་ཆུང་སློབ་མ་འགྲོ་འོང་དང་། སྤེལ་རེས། མཉམ་འདྲེས་བཅས་ལ་མུ་མཐུད་སྐུལ་འདེད་གཏོང་བ་དང་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་གཏོང་ཆེད། བོད་དུ་བསྐྱོད་ཚུན། ཧྥུའུ་ཅན་སློབ་གསོ་བོད་སྐྱོར་ཚོགས་པས་སྔ་རྗེས་སུ་ཆབ་མདོའི་དགེ་སློབ་409སྒྲིག་འཛུགས་བྱས་ནས་ཧྥུའུ་ཅན་དུ་བསྐྱོད་དེ“གསར་བརྗེའི་རིག་གནས་དར་སྤེལ་དང་གསར་བརྗེའི་ས་བོན་རྒྱུན་འཛིན་བྱས་ནས་དུས་རབས་ཀྱི་མི་གསར་པ་ཞིག་བརྩོན་ལེན་བྱེད་པ”དང“རི་ཀླུང་བརྒལ་ནས་ཕུགས་འདུན་མཉམ་དུ་སྒྲུབ། ཧྥུའུ་ཅན་གྱི་རི་ཀླུང་གསར་པ་སྐྲུན”ཞེས་པའི་ཧྥུའུ་ཅན་དང་བོད་ལྗོངས་སློབ་འབྲིང་སློབ་མའི་ཧྥུའུ་ཅན་གྱི་རིག་གནས་ཡུལ་སྐོར་ཞིབ་འཇུག་སྒར་ས་སོགས་ཀྱི་ཞིབ་འཇུག་སློབ་སྦྱོང་བྱེད་སྒོར་ཞུགས་པ་མ་ཟད། “བོད་རྒྱའི་ལོ་ཆུང་ལག་གདང་སྦྲེལ་ནས་འཕྲིན་གཏོང་བསྐུར་རེས”བྱེད་སྒོ་སྤེལ་ཏེ་ཆབ་མདོ་གྲོང་ཁྱེར་གྱི་སློབ་གྲྭ་འབྲིང་ཆུང་གི་ལོ་ཆུང་སློབ་མ་དང་ཧྥུའུ་ཅན་གྱི་སློབ་གྲྭ་འབྲིང་ཆུང་50ཡི་སློབ་མའི་དབར་འཕྲིན་ཡིག་བསྐུར་རེས་བྱས་ཏེ་སྤེལ་རེས་ལ་ཤུགས་སྣོན་རྒྱག་པ་དང་མཛའ་གྲོགས་ཟབ་ཏུ་བཏང་ཡོད།
ཆབ་མདོ་གྲོང་ཁྱེར་སློབ་གསོ་ཅུས་ཀྱི་ཅུས་ཀྲང་གཞོན་པ་ཧྥུའུ་ཅན་ཞིང་ཆེན་བོད་སྐྱོར་ལས་དོན་རུ་ཁག་ཁག་བཅུ་པའི་སློབ་གསོ་ཚོགས་ཆུང་གི་ཙུའུ་ཀྲང་ཁྲེན་ཕུང་ཁྲེང་གིས“སློབ་གསོའི་བོད་སྐྱོར་གྱི་རོགས་སྐྱོར་ནི་དངོས་པོ་ཁོ་ན་སྤྲོད་རྒྱུ་དེ་མིན་པར་སྤེལ་རེས་དང་འབྲེལ་གཏུག་གི་ཟམ་པ་རེ་རེ་བསྐྲུན་ནས་བོད་ཀྱི་ཕྲུ་གུ་ཚང་མའི་ཕུགས་འདུན་མངོན་འགྱུར་བྱ་རྒྱུ་དེ་ཡིན། འབྱུང་འགྱུར་ང་ཚོས་ཆབ་མདོའི་སློབ་གསོ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་སྟོབས་ཤུགས་སྐྱེས་སུ་འབུལ་གྱི་ཡིན”ཞེས་བཤད།