ཀྲུང་གོ་དང་ཧྥ་རན་སེའི་ཤེས་དཔལ་སྤེལ་རེས་དང་ཕན་ཚུན་དཔྱད་གཞིར་འཛིན་པའི་ལེའུ་གསར་པ་རྩོམ་པ།
ཉེ་ཆར། “ཀྲུང་གོ་དང་ཧྥ་རན་སེའི་ཤེས་དཔལ་སྤེལ་རེས་དང་དཔྱད་གཞིར་འཛིན་པ། ཕྱིར་ལྟ་དང་རྒྱང་ལྟ”ཞེས་པའི་རིག་གཞུང་བགྲོ་གླེང་ཚོགས་འདུ་ཧྥ་རན་སེའི་གྲོང་ཁྱེར་ཕ་རི་སིར་འཚོགས་པ་རེད། ད་ཐེངས་ཀྱི་བགྲོ་གླེང་ཚོགས་འདུ་དེ་ཀྲུང་གོ་སྤྱི་ཚོགས་ཚན་རིག་ཁང་དང་ཧྥ་རན་སེའི་རྒྱལ་བཙུགས་ཤར་ཕྱོགས་སྐད་ཡིག་རིག་གནས་སློབ་གླིང་གིས་ཐུན་མོང་ཐོག་གཙོ་གཉེར་བྱས་པ་དང་ཀྲུང་གོ་སྤྱི་ཚོགས་ཚན་རིག་ཁང་ཡོ་རོབ་ཞིབ་འཇུག་སུའོ་ཡིས་གཉེར་འགན་འཁུར་ཞིང་། ཀྲུང་གོ་དང་ཧྥ་རན་སེ་རྒྱལ་ཁབ་གཉིས་ཀྱི་ཇུས་འདོན་ཚོགས་པ་དང་། མཐོ་སློབ་དང་ཚན་རིག་ཞིབ་འཇུག་སྒྲིག་གཞི་བཅས་ཀྱི་རིགས་གཅིག་མཁས་ཅན་དང་མཁས་དབང་བརྒྱ་ལྷག་ཙམ་གྱིས“ཤེས་དཔལ་སྤེལ་རེས་ཀྱི་ལག་ལེན་དང་དཔང་པོ”དང“ཤེས་དཔལ་ཕན་ཚུན་དཔྱད་གཞིར་འཛིན་པའི་ཕྱིར་ལྟ་དང་བསམ་གཞིགས” “ཚན་རྩལ་གསར་གཏོད་དང་མིའི་རིགས་ཀྱི་ཤེས་དཔལ་གྱི་འབྱུང་འགྱུར”སོགས་ཀྱི་གྲོས་དོན་ལ་དམིགས་ནས་གྲོས་བསྡུར་དང་སྤེལ་རེས་གཏིང་ཟབ་བྱས་པ་རེད། ཚོགས་ཞུགས་སྐུ་མགྲོན་ཚོས། ཀྲུང་གོ་དང་ཧྥ་རན་སེའི་དབར་ཕྱི་འབྲེལ་བཙུགས་ནས་ལོ་60སོང་རིང་། རྒྱལ་ཁབ་གཉིས་པོའི་སྤྱི་ཚོགས་ཚན་རིག་ཁྱབ་ཁོངས་ཀྱི་སྤེལ་རེས་མཉམ་ལས་རྒྱུན་ཆད་མེད་པར་ཟབ་ཏུ་ཕྱིན་པ་དང་ཞིབ་འཇུག་གི་ཁ་ཕྱོགས་ཉིན་བཞིན་ཕུན་སུམ་ཚོགས་སུ་ཕྱིན་ཡོད། རྒྱལ་ཁབ་གཉིས་པོའི་མཁས་དབང་ཚོས་སྐད་ཆ་འབྲེལ་ཟམ་དང་དཔེ་དེབ་སྨྱན་སྦྱོར་ལ་བརྩིས་ནས་ཀྲུང་གོ་དང་ཧྥ་རན་སེའི་ཤེས་དཔལ་སྤེལ་རེས་དང་ཕན་ཚུན་དཔྱད་གཞིར་འཛིན་པའི་ལེའུ་གསར་པ་བརྩམས་ཏེ། འཛམ་གླིང་གི་ཤེས་དཔལ་འཆམ་མཐུན་མཉམ་གནས་དང་ཐུན་མོང་འཕེལ་རྒྱས་ལ་སྒུལ་ཤུགས་གསར་པ་སྣོན་རྒྱུའི་རེ་བ་ཡོད་ཅེས་གཅིག་རྗེས་གཉིས་མཐུད་ངང་བརྗོད་པ་རེད།
འགོ་ཚུགས་མཛད་སྒོའི་ཐོག་ཀྲུང་གོ་སྤྱི་ཚོགས་ཚན་རིག་དཔེ་སྐྲུན་ཁང་དང་ཧྥ་རན་སེ་ཡིའུ་ཧྥེང་དཔེ་སྐྲུན་ཁང་གིས་ད་དུང“ཀྲུང་གོ་ཤེས་རྟོགས་བྱེད”ཅེས་པའི་དཔེ་ཚོགས་སོགས་ཧྥ་རན་སེའི་ཡི་གེའི་དཔེ་དེབ་ཐུན་མོང་ཐོག་ཁྱབ་བསྒྲགས་བྱས་པ་རེད། “ཀྲུང་གོ་དང་ཧྥ་རན་སེའི་རིག་གཞུང་སྤེལ་རེས”ཀྱི་ཆེད་དོན་དཔེ་དེབ་འགྲེམས་སྤེལ་དེ་ཡང་བགྲོ་གླེང་ཚོགས་འདུའི་རིང་མཉམ་དུ་གཉེར་བ་དང་། ཟུར་ཚད་མང་པོའི་ཐོག་ནས་འབྲེལ་ཡོད་དཔེ་དེབ་རྩེ་གྲ་འགྲེམས་སྤེལ་དང་ཁྱབ་གདལ་བཏང་སྟེ་ཀྲུང་ཧྥའི་ཤེས་དཔལ་སྤེལ་རེས་དང་ཕན་ཚུན་དཔྱད་གཞིར་འཛིན་པའི་གྲུབ་འབྲས་གསོན་ཉམས་དོད་པོས་མངོན་པར་བྱས་ནས་ས་གནས་ས་ཐོག་གི་སྐུ་མགྲོན་ཚོའི་ཡིད་དབང་བཀུག་ཡོད།