མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། 2021ལོའི་ཟླ་1ཚེས་1ཉིན་གྱི་ཆུ་ཚོད་ཀླད་ཀོར་ནས་བཟུང་འབྲི་ཆུའི་འབབ་རྒྱུད་ཀྱི་གཙོ་གནད་ཆུ་ཁོངས་སུ་ལོ་10ཡི་རིང་ཉ་རྒྱ་བསྡམས་པའི་ལས་དོན་ཕྱོགས་ཡོངས་ནས་སྤེལ་འགོ་ཚུགས་པ་རེད། ཉིན་ཤས་གོང་། གསར་འགོད་པས་མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཀྲོའུ་ཞིང་འབྲོག་ཕྱོགས་བསྡུས་སྲིད་འཛིན་ཁྲིམས་སྒྱུར་ལྟ་སྐུལ་ཅུས་ནས་ཤེས་རྟོགས་བྱས་པར་གཞིགས་ན། ལོ་10ཉ་རྒྱ་བསྡམས་པའི་ལས་དོན་སྤེལ་འགོ་བཙུགས་ནས་ལོ་3ལྷག་ཙམ་སོང་རིང་། ཡུལ་ཤུལ་ཀྲོའུ་ཡིས་སྒྲིག་འཛུགས་འགན་ལེན་བྱེད་ཤུགས་ཆེ་རུ་གཏོང་བ་དང་། ཕུགས་ཕན་ལམ་སྲོལ་འཐུས་སྒོ་ཚང་དུ་གཏོང་བ། ཁྲིམས་སྒྱུར་ལྟ་འདོམས་ལ་ཤུགས་སྣོན་རྒྱག་པ། སྐོར་སྲུང་དཔུང་ཁག་འཛུགས་སྐྱོང་ལ་ཤུགས་སྣོན་རྒྱག་པ། ཐོན་ཁུངས་སྲུང་སྐྱོང་ལ་ཤུགས་སྣོན་རྒྱག་པ། ཆུ་སྐྱེས་སྐྱེ་དངོས་ཐོན་ཁུངས་སླར་གསོར་སྔར་བས་སྐུལ་འདེད་གཏོང་བ་བཅས་བྱས་པས། འབྲི་ཆུ་རྒྱུག་ཁུལ་ཡུལ་ཤུལ་དུམ་བུའི་ཉ་རྒྱ་བསྡམས་པའི་ལས་དོན་ལ་དུས་མཚམས་རང་བཞིན་གྱི་གྲུབ་འབྲས་ཐོབ་ཡོད།

མིག་སྔར། ཡུལ་ཤུལ་ཀྲོའུ་ཡི་གོང་ནས་འོག་བར“ཀྲོའུ་རིམ་པའི་འགོ་ཁྲིད་ཀྱིས་རྫོང་འགན་གཙང་ལེན་པ་དང་། རྫོང་རིམ་པའི་འགོ་ཁྲིད་ཀྱིས་ཤང་དང་གྲོང་རྡལ་འགན་གཙང་ལེན་པ། ཤང་དང་གྲོང་རྡལ་གྱི་ལས་བྱེད་པས་གྲོང་ཚོ་འགན་གཙང་ལེན་པ། གྲོང་ཚོས་ཉ་རྒྱ་བསྡམས་པའི་ཆུ་ངོས་འགན་གཙང་ལེན་པ”བཅས་ཀྱི་འགན་འཁྲིའི་མ་ལག་ཆགས་ནས་གྲོང་གསེབ་ཀྱི་ཁོངས་གཏོགས་ས་ཆའི་དྲ་རྒྱའི་དོ་དམ་འགན་འཁྲི་སྔར་བས་དོན་འཁྱོལ་ཐུབ་ཡོད། ས་གནས་ཁག་གིས་སྐོར་སྲུང་དོ་དམ་དང་། སྡེ་ཚན་གྱི་མཉམ་འབྲེལ་ཁྲིམས་སྒྱུར། ཁྲིམས་འགལ་ཉ་འཛིན་ཐེར་འདོན་གྱི་ཁུངས་སྣེར་ཞིབ་བཤེར་ཐག་གཅོད་སོགས་ཀྱི་ལམ་སྲོལ་རིམ་བཞིན་འཐུས་སྒོ་ཚང་དུ་གཏོང་བ་དང་ཉ་རྒྱ་བསྡམས་པའི་ཆུ་ཁོངས་ཀྱི་དྲ་མི“1+N”རྣམ་པ་ཁྱབ་གདལ་བཏང་ནས“དོ་དམ་སྲུང་སྐྱོང་པས”“ཉ་སྲུང་བའི”ལས་འགན་གཅིག་ལྕོགས་ཁུར་ཏེ་ཉ་ལས་ཁྲིམས་སྒྱུར་གྱི་སྟོབས་ཤུགས་ཆུང་བ་སོགས་ཀྱི་དཀའ་ངལ་ཐག་གཅོད་བྱས་ཡོད། མིག་སྔའི་བར། ཀྲོའུ་ཡོངས་སུ་ཁྱོན་མི་536ཡོད་པའི་ཉ་སྲུང་དཔུང་ཁག་5བཙུགས་ཡོད་པ་རེད།