“ཀྲུའུ་ཞི་ཞི་ཅིན་ཕིང་འཚམས་འདྲིར་ཕེབས་པ་ནི་སེར་པི་ཡའི་འདི་ལོའི་ཕྱི་འབྲེལ་བྱེད་སྒོ་གལ་ཆེ་ཤོས་ཤིག་རེད། སེར་པི་ཡས་སེར་ཀྲུང་དབར་གྱི་འབྲེལ་བ་ཆུ་ཚད་མཐོ་བའི་འཁོར་རྒྱུག་རྒྱུན་འཁྱོངས་བྱས་པར་སྤོབས་པ་སྐྱེ་ཡི་འདུག” ཀྲུང་གོར་བཅའ་སྡོད་སེར་པི་ཡའི་གཞུང་ཚབ་ཆེ་མོ་བ་མཱ་ཡཱ·སི་ཐེ་ཧྥ་ནུའོ་ཝུའེ་ཆིས་ཉེ་ཆར་འདི་ག་ཚགས་པར་གྱི་གསར་འགོད་པའི་ཆེད་དོན་བཅར་འདྲི་དང་ལེན་བྱེད་སྐབས་ད་ཐེངས་ཀྱི་འཚམས་འདྲི་བརྒྱུད་རྒྱལ་ཁབ་གཉིས་པོའི་མཛའ་གཅུགས་ཟབ་ཏུ་ཕྱིན་ནས་སེར་ཀྲུང་དབར་གྱི་འབྲེལ་བ་སྐས་རིམ་གསར་པ་ཞིག་ཏུ་སླེབས་པར་སྐུལ་མ་ཐེབས་རྒྱུ་རེད་ཅེས་བརྗོད་པ་རེད།

སི་ཐེ་ཧྥ་ནུའོ་ཝུའེ་ཆིས། ཉེ་བའི་ལོ་ཤས་རིང་སེར་ཀྲུང་དབར་གྱི་འབྲེལ་བ་ཕྱོགས་ཡོངས་དང་ཆུ་ཚད་མཐོ་བའི་འཕེལ་རྒྱས་ཀྱི་ལོ་རྒྱུས་དུས་མཚམས་གསར་པར་སླེབས་ཡོད། ཕྱོགས་གཉིས་པོས་རྨང་གཞིའི་སྒྲིག་བཀོད་དང་ནུས་རྒྱུ་སོགས་ཁྱབ་ཁོངས་ཀྱི་མཉམ་ལས་རྣམ་གྲངས་མང་པོ་སྔ་རྗེས་སུ་ལག་བསྟར་བྱས་པས། སེར་པི་ཡའི་དཔལ་འབྱོར་འཕེལ་རྒྱས་ལ་སྐུལ་འདེད་ནུས་ལྡན་ཐེབས་ཡོད། “ཀྲུའུ་ཞི་ཞི་ཅིན་ཕིང་གིས་ལོ་8སོང་རྗེས་སླར་ཡང་སེར་པི་ཡར་འཚམས་འདྲིར་ཕེབས་པ་དང་རྒྱལ་ཁབ་གཉིས་པོའི་འགོ་ཁྲིད་པས་འཐབ་ཇུས་ཀྱི་མཐོ་ཚད་ཐོག་ནས་ཕྱོགས་གཉིས་པོའི་འབྲེལ་བའི་འཕེལ་རྒྱས་ཀྱི་ཁ་ཕྱོགས་ལ་ཁྲིད་སྟོན་གནང་སྟེ་སེར་ཀྲུང་དབར་གྱི་མཉམ་ལས་ལ་འཆར་གཞི་གསར་པ་བཀོད་གནང་ཡོད”ཅེས་བརྗོད།

སི་ཐེ་ཧྥ་ནུའོ་ཝུའེ་ཆིས། རྒྱལ་ཁབ་གཉིས་པོའི་མཛའ་གཅུགས་ཟབ་མོ་ཕྱོགས་མང་པོའི་ཐད་ནས་མངོན་ཞིང་། ཕྱོགས་གཉིས་པོས་ཕན་ཚུན་གྱི་ལྟེ་བའི་ཁེ་ཕན་དང་དོ་ཁུར་གལ་ཆེན་ལ་རྒྱབ་སྐྱོར་མཐའ་གཅིག་ཏུ་བྱས་ནས་ཕ་རོལ་པོར་རོགས་རམ་མཁོ་ཤོས་ཀྱི་སྐབས་སུ་རོགས་སྐྱོར་བྱས་པ་དང་། ཀྲུང་གོས་སེར་པི་ཡའི་མི་མངོན་པའི་སྟོབས་ཤུགས་ལྡན་པའི་རྣམ་གྲངས་མང་པོ་ཞིག་ལ་མ་དངུལ་བཏང་བ་དེ་ནི་སེར་པི་ཡའི་དཔལ་འབྱོར་འཕེལ་རྒྱས་ལ་རྒྱབ་སྐྱོར་ནུས་ལྡན་བྱས་པ་ཞིག་རེད། “སེར་ཀྲུང་རྒྱལ་ཁབ་གཉིས་ནི་དཀའ་ངལ་སྣ་ཚོགས་བརྒྱུད་མྱོང་བ་དང་སྐྱིད་སྡུག་མཉམ་མྱོང་བྱེད་པའི‘གྲོགས་པོ་བློས་ཐུབ’ཅིག་རེད། ང་ཚོས་སེར་ཀྲུང་དབར་གྱི་མཛའ་གཅུགས་མཉམ་དུ་རྒྱུན་འཛིན་དང་དར་སྤེལ་ཧུར་ཐག་བཏང་སྟེ། རྒྱལ་ཁབ་གཉིས་པོའི་མི་དམངས་སྔར་བས་འབྲེལ་བ་དམ་ཟབ་ཡོང་བ་བྱེད་འདོད་ཡོད”ཅེས་བརྗོད་པ་རེད།

“རྒྱུད་གཅིག་ལམ་གཅིག”གི་རྒྱལ་སྤྱིའི་མཉམ་ལས་མཐོ་རིམ་གླེང་སྟེགས་སྐབས་གསུམ་པའི་རིང་ཀྲུང་སེར་དབར་རང་མོས་ཚོང་དོན་གྱི་ཆོད་ཡིག་ལ་མིང་རྟགས་བཀོད་ཡོད། དེ་ནི་ཀྲུང་གོས་ཡོ་རོབ་དབུས་ཤར་རྒྱལ་ཁབ་དང་མིང་རྟགས་བཀོད་པའི་རང་མོས་ཚོང་དོན་གྱི་ཆོད་ཡིག་དང་པོ་དེ་ཡིན་པ་དང་སེར་པི་ཡ་ཀྲུང་གོའི་རང་མོས་ཚོང་དོན་རོགས་ཟླ་ཉེར་དགུ་པར་གྱུར་ཡོད། “དེ་ནི་རྒྱལ་ཁབ་གཉིས་པོས་དཔལ་འབྱོར་ཁྱབ་ཁོངས་སུ་བཞག་པའི་གྲོས་མཐུན་གལ་ཆེ་ཤོས་ཀྱི་གྲས་ཤིག་རེད། རང་མོས་ཚོང་དོན་གྱི་ཆོད་ཡིག་གིས་སེར་ཀྲུང་གི་དཔལ་འབྱོར་ཚོང་དོན་མཉམ་ལས་སྔར་བས་རྒྱ་ཆེར་གཏོང་རྒྱུར་སྒུལ་ཤུགས་ཆེན་པོ་བསྣན་ནས། རྒྱལ་ཁབ་གཉིས་པོའི་སྤུས་ལེགས་ཐོན་རྫས་དེ་བས་མང་བས་ཕ་རོལ་པོའི་རྒྱལ་ཁབ་ཀྱི་ཁྲོམ་ར་རྒྱ་སྐྱེད་གཏོང་བར་ནུས་པ་འདོན་པའི་གོ་སྐབས་ཐོབ་རྒྱུ་ཡིན་པ་དང་ཕྱོགས་གཉིས་པོས་རླངས་འཁོར་བཟོ་ལས་དང་། མཐོ་གསར་ལག་རྩལ། ཞིང་ལས་སོགས་ཁྱབ་ཁོངས་སུ་མཉམ་ལས་ལ་ཤུགས་སྣོན་རྒྱག་རྒྱུའི་རེ་སྒུག་བྱེད་ཀྱི་ཡོད་ཅེས་སི་ཐེ་ཧྥ་ནུའོ་ཝུའེ་ཆིས་བརྗོད།

སི་ཐེ་ཧྥ་ནུའོ་ཝུའེ་ཆིས། མི་ཆོས་རིག་གནས་སྤེལ་རེས་ནི་རྒྱལ་ཁབ་གཉིས་པོའི་མི་དམངས་ཀྱི་མཛའ་གཅུགས་ཟབ་ཏུ་གཏོང་བའི་འབྲེལ་ཟམ་ཞིག་ཡིན་པའི་ངོས་འཛིན་བྱེད་ཀྱི་ཡོད། ཁོང་གིས་པེར་ཀེ་ལའེ་ཏེའི་ཀྲུང་གོའི་རིག་གནས་ལྟེ་གནས་འཁོར་རྒྱུག་བྱས་པ་དེས་རྒྱལ་ཁབ་གཉིས་པོའི་མི་དམངས་དབར་གྱི་བསམ་ཤེས་དང་མཛའ་གཅུགས་ཟབ་ཏུ་འགྲོ་རྒྱུར་ལས་སྟེགས་གལ་ཆེན་མཁོ་འདོན་བྱས་ཡོད། པེ་ཅིང་སྒྱུ་རྩལ་ཁུལ་798དུ་གནས་པའི་པེ་ཅིང་སེར་པི་ཡའི་རིག་གནས་ལྟེ་གནས་ཀྱི་བྱེད་སྒོ་ཕུན་སུམ་ཚོགས་པས་གྲོགས་པོ་ཀྲུང་གོ་བ་ཚོར་སེར་པི་ཡའི་ལོ་རྒྱུས་དང་རིག་གནས་ངོ་སྤྲོད་བྱེད་ཀྱི་ཡོད་ཅེས་བརྗོད།