བོད་ལྗོངས་ཧྲུན་ཧྥུང་མྱུར་སྐྱེལ་ཚད་ཡོད་ཀུང་སི་ལྷ་ས་ཡན་ལག་ཀུང་སིར་རྒྱལ་ཡོངས་ཀྱི་ལྔ་གཅིག་ངལ་རྩོལ་གཟེངས་རྟགས་ཐོབ་མཁན་ཚེ་རིང་མཚོ་མོ་ཡིས་ལས་མིར་བདེ་འཇགས་ཞིབ་བཤེར་བྱེད་བཞིན་འདུག

ཚེ་རིང་མཚོ་མོ་དང་ཐོག་མར་འཕྲད་སྐབས་ཁོང་གིས་ལས་གོས་གྱོན་ཞིང་། སྐྲ་ལྕོག་བརྒྱབ་འདུག་པས་ཕར་ལྟ་དུས་གཙང་སྦྲ་དོད་ཅིང་། ལས་ཀ་འཇོན་པོ་ཡོད་པའི་སྣང་བ་ཞིག་སྟེར་གྱི་འདུག

“ད་ཆ་ངས་བོད་ལྗོངས་ཧྲུན་ཧྥུང་མྱུར་སྐྱེལ་ཚད་ཡོད་ཀུང་སི་ལྷ་ས་ཡན་ལག་ཀུང་སིའི་འཁོར་སྐྱོད་ཚོགས་ཆུང་གི་ཙུའུ་ཀྲང་དང་། བཟོ་ཚོགས་ཨུ་ཡོན་ལྷན་ཁང་གི་ཨུ་ཡོན། བདེ་འཇགས་ལྟ་སྐུལ་སློབ་སྟོན་པ་བཅས་ཀྱི་གོ་གནས་འཁུར་གྱི་ཡོད། གཙོ་བོ་མྱུར་སྐྱེལ་བར་བརྒྱུད་བྱེད་སྐབས་ཀྱི་བདེ་འཇགས་གྲལ་བཤེར་དང་། ལས་བཟོར་བདེ་འཇགས་ལྟ་སྐུལ་མཛུབ་ཁྲིད། ལས་བཟོའི་ཆ་འཕྲིན་བསྡུ་རུབ་སོགས་ཀྱི་ལས་ཀའི་འགན་འཁུར་གྱི་ཡོད”ཅེས་ཚེ་རིང་མཚོ་མོས་བཤད།

མྱུར་སྐྱེལ་དངོས་ཟོག་ས་ཚིགས་སུ་དབོར་བ་དང་། རླངས་འཁོར་ནས་འབེབས་པ། དབྱེ་བ་ཕྱེ་བ་བཅས་བྱེད་པ་ནས་མྱུར་སྐྱེལ་དངོས་ཟོག་རླངས་འཁོར་ནང་བཅུག་ནས་ས་ཚིགས་རྗེས་མར་དབོར་བའི་ལྷུ་ཚིགས་ཚང་མར་ཚེ་རིང་མཚོ་མོས་ཞིབ་བཤེར་ནན་པོ་བྱེད་པ་དང་། ལས་མིར་ཞིབ་བསྡུར་ནན་པོ་བྱེད་དགོས་པའི་སྐུལ་མ་བཏང་ནས་མྱུར་སྐྱེལ་དངོས་ཟོག་ལྷ་ས་བར་བརྒྱུད་ས་ཚིགས་ནས་མ་ལུས་པ་དང་། བསྐུར་ནོར་མི་ཤོར་བ། བོར་བརླག་མི་འགྲོ་བ་བཅས་ཀྱི་འགན་ལེན་བྱེད་བཞིན་ཡོད། ཁོང་གིས་ལས་ཀ་དེ་བྱས་ནས་ད་བར་བགྲང་བྱ་14ཙམ་འགྲོ་གི་ཡོད།

ཚེ་རིང་མཚོ་མོས་ངོ་སྤྲོད་བྱས་པར་གཞིགས་ན། བོད་ལྗོངས་ཧྲུན་ཧྥུང་ཀུང་སིར་དངོས་ཟོག་བསྐུར་མཁན་ཉུང་བའི་སྐབས་སུ་ཉིན་གཅིག་ལ་མྱུར་སྐྱེལ་དངོས་ཟོག་ཁྲི་གསུམ་ཙམ་གཏོང་ལེན་བྱེད་པ་དང་། དངོས་ཟོག་བསྐུར་མཁན་མང་བའི་སྐབས་སུ་དངོས་ཟོག་ཁྲི་དྲུག་བདུན་ཙམ་གཏོང་ལེན་བྱེད་ཀྱི་ཡོད། མྱུར་སྐྱེལ་བསྐུར་མ་འཕྲལ་མར་བདག་པོའི་ལག་ཏུ་འབྱོར་ཆེད། ཚེ་རིང་མཚོ་མོ་ཚུད་པའི་ཧྲུན་ཧྥུང་གི་ལས་མི་རྣམས་ཀྱིས་རྟག་ཏུ་ཞོགས་པའི་ཆུ་ཚོད་བརྒྱད་པར་ལས་འགོ་བཙུགས་པ་ནས་དགོང་མོའི་ཆུ་ཚོད་དང་པོ་དང་གཉིས་པ་ཙམ་ལ་གཞི་ནས་ལས་མཇུག་འགྲིལ་གྱི་ཡོད། ཁོང་ཚོའི་ལས་ཀ་དཀའ་ཚེགས་ཧ་ཅང་ཆེན་པོ་ཡོད་ན་ཡང་ཚེ་རིང་མཚོ་མོས་མྱུར་སྐྱེལ་ལས་རིགས་ལ་སྔར་བཞིན་སྤྲོ་སེམས་ཀྱིས་ཁེངས་ཡོད།

མྱུར་སྐྱེལ་ལས་རིགས་སུ་ལས་ཀ་བྱས་ནས་བགྲང་བྱ་14སོང་རིང་ཚེ་རིང་མཚོ་མོས་མྱུར་སྐྱེལ་བ་དང་། མཛོད་གཉེར། ལས་ཚབ་འགན་འཁུར་བ་བཅས་བྱེད་མྱོང་ཡོད། ཁོང་གིས་གཏོང་ལེན་བྱས་པའི་མྱུར་སྐྱེལ་གྲངས་ལས་འདས་པ་ཡོད་ཀྱང་ད་བར་ནོར་འཛོལ་གཏན་ནས་ཤོར་མྱོང་མེད། ལས་མི་ཡེ་ཤེས་ལྷ་མོས“དེ་གོང་ངར་ཕྲུ་གུ་འཁོར་སྐབས་དང་ཐོག་ཤོད་ཕོད་མ་བྱུང་། ཕྱིས་སུ་ཨ་ཅག་མཚོ་མོར་དེའི་སྐོར་བཤད་རྗེས་ཁོང་གིས་འཕྲལ་མར་ང་ལ་ལས་སོས་ཡང་བའི་ལས་ཀ་ཞིག་བཀོད་སྒྲིག་བྱས་བྱུང་། ལས་ཀ་དང་འཚོ་བ་སོགས་གང་ཅིའི་ཐད་ཁོང་གིས་ང་ཚོར་ཨ་ཅག་དང་འདྲ་བར་རྟག་ཏུ་སེམས་ཁུར་བྱེད་ཀྱི་ཡོད”ཅེས་བཤད།

དུས་ཡུན་རིང་པོའི་ནང་ཚེ་རིང་མཚོ་མོས་མྱུར་སྐྱེལ་ལས་ཀར་དགའ་ཞེན་བྱས་ནས་ཀུང་སིས་སྤྲད་པའི་ལས་འགན་ཚང་མ་ལེགས་སྒྲུབ་ཧུར་ཐག་བྱས་ཏེ་སྤྱིར་བཏང་གི་ལས་གནས་ཐོག་སྤྱིར་བཏང་མིན་པའི་གྲུབ་འབྲས་གཏོད་བཞིན་ཡོད། ཁོང་ལ་རྒྱལ་ཡོངས་ཀྱི་ལྔ་གཅིག་ངལ་རྩོལ་གཟེངས་རྟགས་དང་རྒྱལ་ཡོངས་ཀྱི“ལས་བཟོ་ཡག་ཤོས”སོགས་ཀྱི་གཟི་བརྗིད་མཚན་སྙན་ཐོབ་མྱོང་ཡོད།

ཧྲུན་ཧྥུང་མྱུར་སྐྱེལ་ཀུང་སིས་གྲོང་ཁྱེར་དང་གྲོང་གསེབ་སྦྲེལ་ཡོད་ལ་གོ་སྐབས་དང་རེ་བ་ཡང་སྦྱིན་ཡོད། ཚེ་རིང་མཚོ་མོས་གསར་འགོད་པར་བརྗོད་དོན། 2024ལོར་བོད་ལྗོངས་ཧྲུན་ཧྥུང་ཀུང་སིས་རྒྱལ་ཁབ་ཀྱི་འབོད་སྐུལ་དང་ལེན་ཞུས་ནས་བོད་ཀྱི་ཐག་རིང་ལུང་ཁུག་ས་ཁུལ་དུ་ལས་ཚབ་ས་ཚིགས་ཧུར་ཐག་བཙུགས་པ་དང་། ཧྲུན་ཧྥུང་བོད་ལྗོངས་ཁུལ་གྱི་འགན་འཁུར་བས་རུ་ཁག་གི་སྣེ་ཁྲིད་དེ་གྲོང་ཚོ་དང་ཤང་དུ་བསྐྱོད་ནས་དམངས་ཕན་རྣམ་གྲངས་གསར་སྤེལ་འཛུགས་སྐྲུན་བྱས་ཏེ་ས་གནས་དེ་གའི་ཞིང་འབྲོག་པའི་ཡུལ་ཟོག་ཕྱིར་ཚོང་དཀའ་བའི་གནད་དོན་ཐག་གཅོད་ཧུར་ཐག་བྱས་ཡོད།

“མྱུར་སྐྱེལ་ཁྱིམ་ཚང་ཁྲི་ལ་འབྱོར། བདེ་སྐྱིད་ཁྱིམ་ཚང་ཁྲི་ལ་ཁྱབ། གངས་ལྗོངས་ས་མཐོའི་མྱུར་སྐྱེལ་བ་ཞིག་ཡིན་པའི་ངོས་ནས་ངས་མུ་མཐུད་ལས་ཀ་ཡག་པོ་བྱས་ཏེ་རང་ཉིད་ཀྱི་བྱ་སྤྱོད་དངོས་ལ་བརྟེན་ནས་ངལ་རྩོལ་དཔེ་བཟང་བའི་སྙིང་སྟོབས་ལག་ལེན་བསྟར་ནས་ཉིང་ཁྲིའི་ཤ་མོ་དང་། ནག་ཆུའི་དབྱར་རྩྭ་དགུན་འབུ། ལྷོ་ཁའི་བོད་ཕག གཞིས་རྩེའི་ཞོག་ཁོག་སོགས་ཀྱི་ཁྱད་ལྡན་ཐོན་རྫས་མྱུར་སྐྱེལ་དྲ་རྒྱ་བརྒྱུད་རྒྱལ་ཡོངས་སུ་འཚོང་ཐུབ་པ་བྱེད་ཀྱི་ཡིན”ཞེས་ཚེ་རིང་མཚོ་མོས་བཤད།