འདི་ནི་ཧུའུ་པེ་ཝུའུ་ཧན་དཔལ་འབྱོར་ལག་རྩལ་གསར་སྤེལ་ཁུལ་དུ་ཡོད་པའི་ལན་ཐུའུ་རླངས་འཁོར་གྱི་གློག་སྒུལ་ཅན་གྱི་ཚ་ལའི་འཁོར་ཁང་དུ་འཕྲུལ་མིས་ལས་ཀ་བྱེད་བཞིན་པ།

འདི་ནི་ཧྥ་རན་སེའི་རླངས་འཁོར་བཟོ་སྐྲུན་ཚོང་པ་ཚོས་རྒྱུས་མངའ་ཆེ་བའི་གྲོང་ཁྱེར་ཏེ། ཀྲུང་གོའི་ཧུའུ་པེ་ཞིང་ཆེན་གྱི་ལྟེ་བའི་གྲོང་ཁྱེར་ཝུའུ་ཧན་གྲོང་ཁྱེར་རེད། ལོ་རྒྱུས་ཐོག་ཧྥ་རན་སེའི་ཞུའེ་ཐེ་ལུང་དང་པེའོ་ཀྲི་རྟགས་ཅན་གྱི་རླངས་འཁོར་དང་རི་ཁྲན་དང་ལེ་ནོ་རྟགས་ཅན་གྱི་ཚོང་རྟགས་བཞི་པོ་ཚང་མར་ས་གནས་དེ་གར་མཉམ་ལས་རོགས་ཟླ་གཅིག་ཡོད་པ་ནི་ཀྲུང་གོའི་གཞུང་ཁོངས་ཁེ་ལས་ཀྱི་ཤར་རླུང་རྟགས་ཅན་རེད།

ཧྥ་རན་སེའི་ཙུང་ལི་ཟུར་པ་རང-ཕི་ཨེར·ལཱ་ཧྥ་ལན་གྱིས་དེ་སྔོན“ཀྲུང་གོའི་རླངས་འཁོར་གྱི་འབྱུང་ཁུངས”ཞེས་པའི་མིང་ཐོག་ནས་ཞུའེ་ཐེ་ལུང་ཀྲུང་གོར་བཅའ་སྡོད་བྱས་པ་མཚོན་ཡོད། ད་ཆ་ཀྲུང་གོའི་རླངས་འཁོར་ལས་རིགས་ལའང་ཀྲུང་གོའི་ལས་རིགས་གཞན་དག་དང་འདྲ་བར་འཕོ་འགྱུར་ཡོང་བཞིན་ཡོད། ཤར་རླུང་རྟགས་ཅན་གྱིས་མིག་སྔར་ཀྲུང་གོའི་རླངས་འཁོར་ཐོན་ལས་ཀྱི་གློག་སྒུལ་ཅན་གྱི་འཕེལ་ཕྱོགས་ལ་ངེས་པར་དུ་ཕྱོགས་དགོས་པ་དཔེར་ན། རང་བརྟེན་ཚོང་རྟགས་ཡིན་པའི་པི་ཡཱ་ཏི་དང་། ཅི་ལི། ཆི་རུའེ། ཝུའེ་ལའེ། ལིང་ཕའོ། ཞའོ་ཕེང་སོགས་ཀྱིས་སྟབས་བསྟུན་གྱི་ཐོན་སྐྱེད་བྱེད་སྟངས་སྤྱད་དེ་ཐོན་རྫས་ཁྲོམ་རར་འདོན་པའི་གོམ་སྟབས་མགྱོགས་སུ་གཏོང་གི་ཡོད་པ་དེ་རེད།

རླངས་འཁོར་བཟོ་གྲྭ་ཕུད་ད་དུང་ལྷུ་ལག་སྒྲིག་སྦྱོར་གྱི་ཁེ་ལས་ཁག་གཅིག་ཀྱང་ཝུའུ་ཧན་དུ་གཞི་ཚུགས་ནས་གློག་སྒུལ་ཅན་གྱི་ནང་ཐེ་ཞུགས་བྱས་པ་དཔེར་ན། ཧྥ་ལེ་ཨའོ་ཚོགས་པས་གོ་ལ་ཧྲིལ་པོའི་མཉེན་ཆས་སྒྲོམ་གཞི་དང་འཁོར་ཐོག་གློག་རྡུལ་ཐོན་རྫས་ཞིབ་འཇུག་ལྟེ་གནས་གཉེར་སྐྱོང་བྱེད་ཀྱི་ཡོད་པ་དེར་ཀྲུང་གོར་ཞིབ་འཇུག་གསར་སྤེལ་མི་སྣ་4500ཡོད་པ་དང་། དེའི་ནང་ནས་མི་1700ཝུའུ་ཧན་དུ་ཡོད། ཧྥ་ལེ་ཨའོ་ཚོགས་པ་ཀྲུང་གོ་ཁུལ་གྱི་དབུ་བཞུགས་ལག་རྩལ་དཔོན་ཀུའུ་ཅན་མིང་གིས་མཐོ་སློབ་ཀྱི་གྲངས་འབོར་ནས་བལྟས་ན། ཝུའུ་ཧན་ནི་པེ་ཅིང་ཕུད་པའི་སློབ་ཆེན་གྲོང་ཆེ་གྲས་གཉིས་པ་དེ་རེད་ཅེས་བཤད་པ་རེད།

ཤར་རླུང་ཚོགས་པའི་ངོས་ནས་བརྗོད་ན། ཁོང་ཚོས་ཀྱང་གློག་སྒུལ་ཅན་གྱི་ཁྱབ་ཁོངས་སུ་སྔོན་འགྲོའི་རྗེས་ཟིན་པ་བྱེད་བཞིན་ཡོད་པ་དཔེར་ན། ནུས་ཆེའི་ལྷུ་ལག་ལས་རིམ་དུ་ལན་ཐུའུ་གློག་སྒུལ་རླངས་འཁོར་གསར་པ་ཐོན་སྐྱེད་བྱེད་བཞིན་ཡོད་པ་ལྟ་བུ་རེད། ལན་ཐུའུ་ནི་ཤར་རླུང་རླངས་འཁོར་བཟོ་གྲྭས་2020ལོའི་ཟླ་7པར་བཏོན་པའི་གློག་སྒུལ་ཚོང་རྟགས་གསར་པ་ཞིག་ཡིན་ཞིང་། ཧྥ་རན་སེའི་རླངས་འཁོར་ལྷུ་ལག་བཟོ་ལས་མཉམ་འབྲེལ་ལྷན་ཚོགས་ཀྱི་ཚོགས་གཙོ་ཁེ་ལའོ་ཏེ་ཡིས་ལྟ་སྐོར་བྱེད་སྐབས“ཁྱེད་ཚོར་ང་ཚོས་བསླབ་དགོས་གང་ཡང་མི་འདུག”ཅེས་ཧང་སངས་བཞིན་བཤད་པ་རེད།

—— ཧྥ་རན་སེའི《འཛམ་གླིང་ཚགས་པར》ཐོག་སྤེལ་བའི་གནས་ཚུལ་གཞིར་བཟུང་།