ཤིན་ཧྭ་གསར་འགྱུར་ཁང་ཅི་ནན་ནས་གློག་འཕྲིན་འབྱོར་གསལ། ཉེ་ཆར་མཚོ་སྔོན་གྱི་མདོ་ལ་རྫོང་དང་། ནང་སོག་གི་ཁོའོ་ཡིའུ་ཀྲུང་ཆི། ཧྲན་ཏུང་གི་དབྱང་ཤིན་རྫོང་བཅས་ཀྱི་བཤས་ཕྱུགས་གསོ་སྤེལ་དུད་ཚང་དང་ཁེ་ལས་ཀྱི་འགན་འཁུར་བ་འགའ་ཞིག་བརྙན་ལམ་ནས་མཉམ་འཛོམས་བྱུང་ཞིང་། གསར་འགོད་པའང་གདན་ཞུས་ལྟར་ད་ཐེངས་ཀྱི་བརྙན་ལམ་ནང་ཞུགས་ཡོད། བར་ཐག་ལེ་དབར་སྟོང་གིས་ཆོད་ཀྱང་ཁ་པར་གྱི་བརྙན་ཤེལ་ཆུང་ཆུང་ལས་ནམ་ཡང་འགྱུར་བ་མེད་པའི་བརྩེ་སེམས་མཚོན་པར་བྱས་ཡོད།

“ཚང་མ་གང་འདྲ་འདུག ངས་ཁྱེད་ཚོ་ཤིན་ཏུ་དྲན་པོ་འདུག”ཅེས་དབྱང་ཤིན་རྫོང་ཕྱུགས་རིགས་སྨན་པའི་ཞབས་ཞུ་ལྟེ་གནས་ཀྱི་ཚོགས་ཁང་དུ་མཐོ་རིམ་ཕྱུགས་རིགས་ཆེད་ལས་ཆེ་མོ་བ་ཁྲུའུ་རེན་ཀྲུང་གིས་འཚམས་འདྲི་བྱས་རྗེས་ཚང་མས་ཅི་འཕྲོས་མོལ་འཕྲོས་བྱས་པ་རེད།

“ང་ནོར་ལུག་ཉོ་ཚོང་བྱེད་སར་ཡོད། ལས་ཀ་ཚར་ཙམ་ཡིན”ཞེས་ནང་སོག་ཧུང་ཨན་ནོར་ལས་ཚན་རྩལ་ཚད་ཡོད་ཀུང་སིའི་སྤྱི་ཁྱབ་ཅིང་ལི་ཀྲའོ་ལེ་ཡིས་ཁ་པར་བརྙན་ཤེལ་གྱི་ཁ་བསྒྱུར་ཏེ་ཉོ་ཚོང་ལྟེ་གནས་ཀྱི་རྣམ་པ་གསར་འགོད་པར་བསྟན།

“ཁྱེད་ཚོ་ལྟོས་དང་། ངའི་འགྲམ་དུ་ནོར་1200ལྷག་ཙམ་དང་ལུག་3500ལྷག་ཙམ་ཡོད”ཅེས་མཚོ་སྔོན་མདོ་ལ་རྫོང་གཡང་ལུང་ཤང་ཐོ་ལི་པི་ཀྲོའུ་ཁྱིམ་ཚང་ཕྱུགས་རའི་འགན་འཁུར་བ་རྡོ་རྗེ་རིན་ཆེན་གྱིས་བཤད། ཁོང་གི་རྒྱབ་ཕྱོགས་ནས་ནོར་ལུག་གིས“པའེ་……པའེ་……”ཞེས་པའི་སྒྲ་ཡང་ཡང་གྲགས།

ས་ཆ་འདི་གསུམ་ནི“ནོར་ལུག”ལས་ལས་འབྲེལ་བྱུང་བ་ཞིག་ཡིན་ཞིང་། 2016ལོ་ནས་བཟུང་དབྱང་ཤིན་རྫོང་གིས་བཤས་ཕྱུགས་ཐོན་ལས་འཕེལ་རྒྱས་ཀྱི་ལེགས་ཆར་བརྟེན་ཏེ་མཚོ་སྔོན་གྱི་མདོ་ལ་རྫོང་དང་ནང་སོག་གི་ཁོའོ་ཡིའུ་ཀྲུང་ཆི་དབར་ཡུལ་གཞན་དུ་རོགས་སྐྱོར་དང་མཉམ་ལས་བྱེད་པའི་འབྲེལ་ཟམ་སྔ་རྗེས་སུ་བསྐྲུན་ཡོད།

2020ལོར་ཧྲན་ཏུང་ཞིང་ཆེན་དབྱང་ཤིན་ཀོང་ཧྥུའུ་ཕྱུགས་ལས་ཐོན་རྫས་ཚད་ཡོད་ཀུང་སིས་ཁོའོ་ཡིའུ་ཀྲུང་ཆིར་མ་དངུལ་བཏང་ནས་ས་གནས་དེ་གའི་ནོར་ལུག་ཉོ་ཚོང་ལྟེ་གནས་ཐོག་མ་དེ་བསྐྲུན་པ་རེད། “དེ་སྔོན་ནོར་ལུག་ཉོ་ཚོང་བྱེད་དགོས་ཚེ་ང་ཚོ་འདི་ནས་བར་ཐག་སྤྱི་ལེ་བརྒྱ་ཟིན་པའི་ཐུང་ལེའོ་དང་ཅི་ལིན་སོགས་སུ་འགྲོ་དགོས་ཀྱི་འདུག ད་ཆ་གསོ་སྤེལ་ར་བ་ནས་ཉོ་ཚོང་ལྟེ་གནས་བར་སྤྱི་ལེ་10ཡང་ཟིན་གྱི་མེད་པས་སྐྱེལ་འདྲེན་གྱི་མ་གནས་ཧ་ཅང་དམའ་རུ་ཕྱིན་སོང”ཞེས་ཁོའོ་ཡིའུ་ཀྲུང་ཆི་ཨའེ་རུང་གསོ་སྤེལ་ལས་རིགས་ཆེད་ལས་མཉམ་ལས་ཁང་གི་འགན་འཁུར་བ་ཕེང་ཏེ་ཆོན་གྱིས་བཤད། མིག་སྔར་ནོར་ལུག་ཉོ་ཚོང་ལྟེ་གནས་ལས་གསོ་སྤེལ་དུད་ཚང་8354ལ་ཕན་པ་ཐོབ་པ་དང་2023ལོར་ནོར་ལུག་ཉོ་ཚོང་བྱེད་ཚད་མགོ་གྲངས་ཁྲི་82.3ཟིན་གྱི་ཡོད།

ཁོའོ་ཡིའུ་ཀྲུང་ཆིར་རང་བྱུང་ཕྱུགས་ར་མང་བ་དང་བཤས་ཕྱུགས་གསོ་སྤེལ་གྱི་མ་གནས་དམའ་པོ་ཡོད་མོད། འོན་ཀྱང་གསོ་སྤེལ་བྱེད་སྟངས་རྐྱང་པ་ཡིན་པ་མ་ཟད། ཐོན་ལས་འཁོར་འབྲེལ་ཡང་རིང་པོ་མེད། དབྱང་ཤིན་ཧྭ་དབྱང་ཚོགས་པ་ཚད་ཡོད་ཀུང་སིའི་སྤྱི་ཁྱབ་ཅིང་ལི་གཞོན་པ་ཝང་ཀྲི་ཐའོ་ཡིས“ང་ཚོས་གསོ་སྤེལ་སྡོམ་གསོ་རྟེན་གཞི་བསྐྲུན་ནས་ས་གནས་དེ་གའི་མཉམ་ལས་ཁང་དང་གསོ་སྤེལ་དུད་ཚང་དེའི་ནང་ཞུགས་པར་གདན་དྲངས་ཡོད། དེའི་སྣེ་ཁྲིད་འོག་ཁོའོ་ཡིའུ་ཀྲུང་ཆིའི་གྲོང་ཚོའི་མཉམ་སྡེབ་20དང་། མཉམ་ལས་ཁང་500 གསོ་སྤེལ་དུད་ཚང་ཁྲི་3ལྷག་ཙམ་བཅས་ཀྱིས་བཤས་ཕྱུགས་ཐོན་ལས་འཕེལ་རྒྱས་བཏང་ཞིང་། བཤས་ཕྱུགས་མགོ་གྲངས་2018ལོའི་མགོ་གྲངས་ཁྲི་23ནས་ཁྲི་46.5བར་མང་དུ་ཕྱིན་ཡོད”ཅེས་གསར་འགོད་པར་བཤད།

ཝང་ཀྲི་ཐའོ་ཡིས་ས་གནས་དེ་གའི་བཤས་ཕྱུགས་ཐོན་ལས་ཀྱི་འཁོར་འབྲེལ་སྔར་བས་རིང་དུ་བཏང་ནས་ཐོན་ལས་ཕྱོགས་སྒྱུར་རིམ་སྤོར་ལ་སྐུལ་འདེད་གཏོང་ཆེད། 2023ལོའི་ཟླ་8པར་ཀུང་སིས་མ་དངུལ་བཏང་ནས་བཤས་ཕྱུགས་བཤས་གཏོང་ལས་སྣོན་དང་དེ་བཞིན་གྲང་ཕྲེང་ཟོག་འགྲེམས་རྣམ་གྲངས་བསྐྲུན་ཡོད། མིག་སྔར་ལོ་རེར་བཤས་ཚད་མགོ་གྲངས་ཁྲི་10དང་ལོ་རེར་གྲང་ཕྲེང་ཟོག་འགྲེམས་སྡེབ་སྐྱེལ་བྱེད་ཚད་ཏུན་ཁྲི་20ཟིན་ཡོད་ལ། ས་གནས་དེ་གར་ལས་ཞུགས་ལས་གནས་180ལྷག་ཙམ་མཁོ་འདོན་བྱས་ཡོད་ཅེས་ངོ་སྤྲོད་བྱས།

“ཁོང་ཚོས་ས་ཆ་གཞན་གྱི་ཁེ་ལས་གདན་འདྲེན་པ་དང་ང་ཚོས་ཡུལ་དེ་གའི་ནོར་ལུག་ཕྱིར་གཏོང་བྱེད་ཀྱི་ཡོད། མདོ་ལ་རྫོང་གི་འགྲིམ་འགྲུལ་དང་ས་ཁམས་ཁོར་ཡུག་ཞན་པའི་དབང་གིས་ནོར་ལུག་འཚོང་བར་འགོག་རྐྱེན་ངེས་ཅན་བྱུང་ཡོད” རྡོ་རྗེ་རིན་ཆེན་གྱིས“2016ལོའི་ཟླ་11པར་ཁག་དང་པོར་འབྲི་གཡག་100དང་བོད་ལུག་1000མདོ་ལ་ནས་ལ་ལུང་མང་པོ་བརྒལ་ནས་དབྱང་ཤིན་དུ་འབྱོར་ཏེ‘ནོར་ལུག་ཁྲི་སྟོང་ཧྲན་ཏུང་དུ་དབོར’འགོ་ཚུགས་པ་ངས་གསལ་པོར་དྲན་གྱི་འདུག”ཅེས་བཤད།

2016ལོ་ནས་བཟུང་དབྱང་ཤིན་གྱི་ཁེ་ལས་དེ་བས་མང་པོ་མདོ་ལ་རྫོང་དུ་ནོར་ལུག་ཉོ་བར་ཡོང་གི་ཡོད། ཧྲན་ཏུང་ཞིང་ཆེན་དབྱང་ཤིན་རྫོང་ཧྥུའུ་ཨན་ཆིང་ཀྲེན་ཤ་རིགས་ཚད་ཡོད་ཀུང་སིའི་འགན་འཁུར་བ་དབྱང་ཅིན་ཧྭ་ཡིས་2023ལོའི་ཟླ་4པར་ཁོང་ཚོས་རྡོ་རྗེ་རིན་ཆེན་གྱི་ཕྱུགས་ར་ནས་ནོར་1500དང་ལུག་2000ཉོས་པ་དང་། ལོ་ཕྱེད་རིང་སྡོམ་གསོ་བྱས་རྗེས་ནོར་ལུག་གི་ཤ་ཡིས་ནོར་ལུག་ཐོན་རྫས་མང་པོ་ལས་སྣོན་བྱས་པ་དག་འདི་ལོའི་དཔྱིད་གསར་དུས་ཆེན་གོང་ཚང་མ་བྲིན་སོང་ཞེས་བཤད། “ད་ཆ་གང་སར་ཚོང་ལམ་འཚོལ་དགོས་ཀྱི་མི་འདུག དེ་ལས་ང་ཚོར་དངོས་དངོས་རྗེན་རྗེན་གྱི་སྟབས་བདེ་བྱུང་སོང”ཞེས་རྡོ་རྗེ་རིན་ཆེན་གྱིས་བཤད།

2023ལོའི་ཟླ་7པར་དབྱང་ཤིན་རྫོང་ཨུད་ཀྱི་ཧྲུའུ་ཅི་ཀྲེང་ལིང་ཅན་དང་འབྲེལ་ཡོད་ཁེ་ལས་ཀྱི་འགན་འཁུར་བ་ནང་སོག་གི་ཁོའོ་ཡིའུ་ཀྲུང་ཆི་རུ་རོགས་སྐྱོར་རྣམ་གྲངས་འཛུགས་སྐྲུན་གྱི་གནས་ཚུལ་ཤེས་རྟོགས་བྱེད་པར་བསྐྱོད་པ་དང་། 2023ལོའི་ཟླ་11པར་མདོ་ལ་རྫོང་ཨུད་དང་རྫོང་སྲིད་གཞུང་གི་འགན་འཁུར་བ་གཙོ་བོ་དབྱང་ཤིན་རྫོང་དུ་ཁ་གཏད་རོགས་སྐྱོར་དང་མཉམ་ལས་ལས་དོན་སྤེལ་བར་བསྐྱོད་དེ། ཚགས་ཤའི་ཐོན་ལས་འཕེལ་རྒྱས་དང་སྟོབས་ཆེར་གཏོང་བའི་ཉམས་མྱོང་དང་བྱེད་སྟངས་སློབ་སྦྱོང་བྱས། “ནོར་ལུག”འབྲེལ་ཐག་ཏུ་བྱས་ཏེ་དབྱང་ཤིན་དང་། མདོ་ལ། ཁོའོ་ཡིའུ་ཀྲུང་ཆི་བཅས་ཀྱི་འབྲེལ་བ་ཉིན་བཞིན་ཟབ་ཏུ་བཏང་ནས་ཤར་ནུབ་རྒྱུད་ས་ཁུལ་གྱི་ཐོན་ལས་མཉམ་ལས་དེ་བས་རྒྱ་ཆེ་བའི་ཁྱབ་ཁོངས་སུ་བསྐྱོད་པར་རམ་འདེགས་བྱས་ཡོད།

“‘ནོར་ལུག’གིས་ས་ཁུལ་གསུམ་མཉམ་དུ་སྦྲེལ། ས་ཁུལ་གསུམ་པོ་ཁྱིམ་ཚང་གཅིག་ལྟར་བརྩེ”བརྙན་ལམ་སྦྲེལ་མཐུད་བྱེད་མཚམས་འཇོག་གྲབས་བྱེད་སྐབས་རྡོ་རྗེ་རིན་ཆེན་གྱིས“ན་ནིང་ང་དབྱང་ཤིན་དུ་ཕྱུགས་ལས་གསོ་སྦྱོང་འཛིན་གྲྭར་ཞུགས་པ་ཡིན། གྲངས་འཛིན་ཅན་གྱི་ཕྱུགས་རའི་གསོ་སྤེལ་དང་ཐོན་ལས་འཁོར་འབྲེལ་ཧྲིལ་པོའི་ལས་སྣོན་བྱེད་སྟངས་ལས་ང་ལ་བག་ཆགས་ཟབ་མོ་བྱུང་། འདི་ལོ་སླར་ཡང་དེ་གར་སློབ་སྦྱོང་བྱེད་པར་འགྲོ་བའི་གོ་སྐབས་བརྩོན་ལེན་བྱེད་ཀྱི་ཡིན”ཞེས་བཤད།