མུན་པ་རུབ་ནས་གློག་འོད་རེ་རེ་བཞིན་འཕྲོ་དུས་ལྷ་སའི“མཚན་མོའི་དཔལ་འབྱོར”འཕེལ་འགོ་ཚུགས་པ་དང་སྦྲགས། མཚན་ཁྲོམ་སྐོར་བ་དང་མཚན་ལྟོ་ཟ་བ་སོགས་སྣ་མང་ཅན་གྱི་འཛད་སྤྱོད་ཀྱིས་གྲོང་ཁྱེར་གྱི་མཚན་མོ་འཁྲུག་ཆ་ཤིན་ཏུ་དོད་པར་གྱུར། ཉེ་ཆར། སྣེའུ་ཟམ་ཆེན་གྱི་ནུབ་ཕྱོགས་སུ་གནས་པའི་ལྷ་སའི་བག་ཆགས“ཀྲུང་ཧྭའི་ཞིམ་ཟས། བོད་ཀྱི་བྲོ་བའི”ཞིམ་ཟས་ཁྲོམ་དངོས་སུ་འགོ་ཚུགས་ཤིང་། བྱེད་སྒོ་སྤེལ་ཡུལ་དབན་ཏ་ཐང་ཆེན་དང་། ཀུན་བདེ་གླིང་ཁྲོམ་ར། བོད་སྐོར་དཀྱིལ་འཁོར་བཅས“ལྷ་ས་གྲོང་ཁྱེར་གྱི་མཚན་མོའི་དཔལ་འབྱོར་དཔེ་སྟོན་ཁུལ”གྱི་མཚན་སྙན་ཐོབ་པའི་ཁེ་ལས་གསུམ་ལ་སྒོ་བྱང་འགེལ་བའི་མཛད་སྒོ་འཚོགས་པ་རེད།

ཟླ་5ཚེས་3ཉིན་གྱི་དགོང་མོའི་ཆུ་ཚོད་10པར། ལྷ་སའི་གྲོང་མི་སྒྲོལ་མ་ལྷ་མོ་དང་ནང་མི་ཚོ་ཐེན་ཧའེ་མཚན་ཁྲོམ་དུ་བསྲེགས་ཟས་ལ་རོལ་བ་དང་སྦི་རག་འཐུང་བཞིན་གུང་གསེང་གི་སྤྲོ་བས་ཁེངས། “‘ལྔ་གཅིག’གུང་གསེང་རིང‘བདེ་སྐྱིད་ལྡན་པའི་ལྷ་ས། སྤྲོ་སྣང་དོད་པའི་འཚོ་བ’དང‘ལྔ་གཅིག’གི་མཚན་མོའི་དཔལ་འབྱོར་གྱི་འཛད་སྤྱོད་འཛིན་ཤོག་སྤྱོད་ཆོག་པ་མ་ཟད་ད་དུང་འཛད་སྤྱོད་སྒོར་200ཟིན་ཚེ་སྒོར་60གཅོག་གི་འདུག་པས་ནང་མི་དང་མཉམ་དུ་འཛད་སྤྱོད་བྱས་ན་ཧ་ཅང་འཚམ་པོ་འདུག”ཅེས་སྒྲོལ་མ་ལྷ་མོས་བཤད།

ཐེན་ཧའེ་མཚན་ཁྲོམ་ནི་ལྷ་སའི་གྲོང་མིས་དགའ་ཤོས་བྱེད་པའི་མཚན་ཁྲོམ་ཤིག་ཡིན་ཞིང་། 2024ལོར“མཚན་ཁྲོམ་རྙིང་པའི”གྲོང་ཁྱེར་གྱི་དྲན་ཤེས་རྒྱུན་མཐུད་བྱ་ཆེད། ཐེན་ཧའེ་མཚན་ཁྲོམ་དེ་ཉིད་ལྷ་ས་གྲོང་ཁྱེར་གྱི་མཚན་མོའི་དཔལ་འབྱོར་དཔེ་སྟོན་ས་ཚིགས་འཛུགས་གཏོད་བྱ་ཡུལ་ཁག་དང་པོའི་གྲས་སུ་བཅུག་པ་དང་ལྷ་ས་གྲོང་ཁྱེར་གྱི་མཚན་མོའི་དཔལ་འབྱོར་འཕེལ་རྒྱས་ཀྱི་སྤྱི་ཡོངས་འཆར་འགོད་ནང་བཅུག་ཡོད། མིག་སྔར། ཀུན་བདེ་གླིང་ཁྲོམ་ར་དང་། ཐེན་ཧའེ་ཚོང་ལས་ཐང་ཆེན། ལྷ་སའི་བག་ཆགས་སོགས་མཚན་མོའི་དཔལ་འབྱོར་དཔེ་སྟོན་ས་ཚིགས(ཁུལ)ཀྱིས་ཀྱང་ལེ་ལག་ཚང་བའི་སྒྲིག་བཀོད་རིམ་སྤོར་ལས་དོན་ལ་དུས་མཚུངས་སུ་སྐུལ་འདེད་གཏོང་བཞིན་ཡོད། ལྷ་སས་འཆར་གཞི་ལྟར་2025ལོར་སླེབས་སྐབས་གྲོང་ཁྱེར་ཡོངས་སུ་སྤུས་ཚད་མཐོ་བའི་མཚན་མོའི་དཔལ་འབྱོར་གྱི་དཔེ་སྟོན་ཁུལ་10དང་མཚན་མོའི་དཔལ་འབྱོར་གྱི་དཔེ་སྟོན་ས་ཚིགས་20བསྐྲུན་ནས“ལྷ་སའི་མཚན་མོའི་འཚོ་བ་ལོངས་སུ་སྤྱོད”པའི་མཚན་མོའི་དཔལ་འབྱོར་སྤུས་རྟགས་གཏོད་རྒྱུ་རེད།

ཉེ་བའི་ལོ་ཤས་རིང་། “དབྱིངས་ཞུགས་རྣམ་པའི”འདུ་ཤེས་དར་ཁྱབ་ཆེ་བ་དང་བསྟུན་ཏེ་ལྷ་ས་གྲོང་ཁྱེར་གྱིས“རིག་གནས་ལ་བརྟེན་ནས་ཡུལ་སྐོར་ལ་སྐུལ་འདེད་གཏོང་བ་དང་། ཡུལ་སྐོར་ལ་བརྟེན་ནས་ཚོང་ལས་དར་བར་བྱེད་པ། རིག་གནས་དང་། ཡུལ་སྐོར། ཚོང་ལས། ལུས་རྩལ་བཅས་མཉམ་འགུལ”གྱི་སྤྱིའི་བསམ་ཕྱོགས་ལྟར་སྣ་མང་ཅན་གྱི་རིག་གནས་ཡུལ་སྐོར་གྱི་ལས་རྣམ་སྐྱེད་སྲིང་ཧུར་ཐག་བྱས་ནས་ཕྱོགས་བསྡུས་ཁོར་ཡུག་དང་། འཛད་སྤྱོད་རྣམ་པ། གློག་འོད་སྒྲིག་ཆས། ལས་རྣམ་མཉམ་འདྲེས། བར་མཐོངས་བཀོད་སྒྲིག་སོགས་མཚན་མོའི་དཔལ་འབྱོར་གྱི་ལེ་ལག་ཚང་བའི་སྒྲིག་ཆས་རིམ་སྤོར་གྱིས་འཛད་སྤྱོད་ཀྱི་གསོན་ཤུགས་རིམ་བཞིན་འཕེལ་བར་བྱས་ཏེ་མཐོང་ཐོས་ཉན་དང་། སྣོམ་པ་དང་རེག་པའི་ཚོར་བ་གཞི་གཅིག་ཏུ་འདུས་པའི་མཚན་མོའི་དཔལ་འབྱོར་གྱི་འཕེལ་རྒྱས་མ་ལག་ནུས་ཤུགས་ཡོད་རྒུས་བཏོད་ནས་ལྷ་སའི་མཚན་མོའི་འཛད་སྤྱོད་ཕུན་སུམ་ཚོགས་སུ་བཏང་ཡོད།

དེ་དང་ཆབས་ཅིག ལྷ་ས་གྲོང་ཁྱེར་གྱི་འབྲེལ་ཡོད་སྡེ་ཚན་དང་གཉེར་སྐྱོང་བྱེད་པོ་ཁག་གིས་མཚན་མོའི་དཔལ་འབྱོར་འཕེལ་རྒྱས་ཀྱི་ཚ་རླབས་འཕྱུར་བར་དམ་འཛིན་ནན་པོ་བྱས་ཏེ། ལྷ་སའི་རང་ངོས་ཀྱི་ཁྱད་ལྡན་ཐོན་ཁུངས་དང་འཛད་སྤྱོད་གོམས་གཤིས་ལ་གཞིས་ཚུགས་ཏེ་གྲོང་མིའི་མཚན་མོའི་འཛད་སྤྱོད་ཀྱི་དགོས་མཁོ་དང་བསྟུན་ནས། སྲིད་གཞུང་གིས་ཁྲིད་སྟོན་དང་། ཁྲོམ་རས་གཙོ་ཁྲིད། ཁེ་ལས་བྱེད་པོར་བྱེད་པ། རིམ་པ་དབྱེ་ནས་སྐུལ་འདེད་གཏོང་བ་བཅས་ཀྱི་རྩ་དོན་མཐའ་འཁྱོངས་ཀྱིས་སྲིད་ཇུས་དང་བྱེད་ཐབས་ཞིབ་འཇུག་ཞིབ་ཚགས་བྱས་ནས་བཟོས་པ་དང་། འཛད་སྤྱོད་ཀྱི་རྣམ་པ་ཧུར་ཐག་བཏོད་པ། རྨང་གཞིའི་སྒྲིག་བཀོད་ལེགས་སུ་བཏང་བ། ལས་རྣམ་གྱི་སྣ་ཁ་ཟམ་མི་ཆད་པར་ཕུན་སུམ་ཚོགས་སུ་བཏང་བ། མཚན་མོའི་དཔལ་འབྱོར་ལ་བརྟེན་ནས་ལེ་ལག་ཚང་བའི་ཐོན་ལས་འཕེལ་རྒྱས་ལ་སྐུལ་ཁྲིད་བྱས་ཏེ“མཚན་མོར་ཡུལ་སྐོར་བྱེད་པ”དང་། “མཚན་མོར་གསོལ་སྟོན་གཤོམ་པ” “མཚན་མོར་འཁྲབ་སྟོན་བྱེད་པ” “མཚན་མོར་ཅ་ལག་ཉོ་བ” “མཚན་མོར་རོལ་རྩེད་རྩེ་བ”སོགས་ཐོན་ལས་འཁོར་སྦྲེལ་མང་དག་ཅིག་ཆགས་པར་བྱས་ནས་གྲོང་མི་དང་ཡུལ་སྐོར་བའི་རང་གཤིས་ཅན་དང་། རིམ་པ་མང་བ། སྤུས་ཚད་ཅན་བཅས་ཀྱི་མཚན་མོའི་འཛད་སྤྱོད་ཀྱི་དགོས་མཁོ་དེ་བས་ལེགས་པར་བསྐངས་ཡོད། མཚན་མོའི་དཔལ་འབྱོར་གྱིས་ད་དུང་ལས་ཞུགས་ལས་གནས་དེ་བས་མང་བ་བཏོད་དེ་མང་ཚོགས་ལ་འཕེལ་རྒྱས་ཀྱི་ཁེ་སྤོགས་མཉམ་སྤྱོད་ཐུབ་པར་བྱས་ཡོད། 2023ལོའི་ལོ་འཁོར་གྱི་ཀྲུང་གོའི་མཚན་མོའི་དཔལ་འབྱོར་དར་རྒྱས་གྲོང་ཁྱེར་ＴＯＰ100ཡི་མིང་ཐོར་ལྷ་ས་གྲོང་ཁྱེར་ཡང་ཚུད་ཡོད།

ལྷ་ས་གྲོང་ཁྱེར་ཚོང་དོན་ཅུས་ཀྱི་འབྲེལ་ཡོད་འགན་འཁུར་བས། རང་སྐྱོང་ལྗོངས་ཀྱིས་ཁྱབ་བསྒྲགས་བྱས་པའི《2024ལོའི་འཛད་སྤྱོད་ལ་སྐུལ་འདེད་གཏོང་བའི་བྱེད་ཐབས་འགའ་ཞིག》དང《ཀྲུང་གུང་ལྷ་ས་སྐབས་བཅུ་པའི་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་ཐེངས་བདུན་པ་དང་གྲོང་ཨུད་ཀྱི་དཔལ་འབྱོར་ལས་དོན་ཚོགས་འདུ》 《ལྷ་ས་གྲོང་ཁྱེར་གྱི་2023ལོའི་སྲིད་གཞུང་གི་ལས་དོན་སྙན་སྒྲོན》བཅས་ཚང་མར་མཚན་མོའི་དཔལ་འབྱོར་དཔེ་སྟོན་ཁུལ་འཛུགས་གཏོད་བྱ་རྒྱུ་གཙོ་གནད་ལས་དོན་ནང་བཅུག་ཡོད། ལྷ་ས་གྲོང་ཁྱེར་ཚོང་དོན་ཅུས་ཀྱིས་གྲོང་ཨུད་དང་གྲོང་ཁྱེར་སྲིད་གཞུང་གིས་མཚན་མོའི་དཔལ་འབྱོར་ཁུལ་གཏོད་རྒྱུའི་ལས་དོན་བཀོད་སྒྲིག་སྔར་བས་ལག་བསྟར་དོན་འཁྱོལ་བྱས་ནས“བཟའ་བཏུང་དང་། འགྲོ་སྐྱོད། ཡུལ་སྐོར། ཉོ་སྒྲུབ། རོལ་རྩེད”སོགས་ལ་དམིགས་ཏེ། “དབྱིངས་ཞུགས་རྣམ་པ་དང་མཉམ་འགུལ་རྣམ་པ”ཟུང་དུ་འབྲེལ་བའི་ཐོག་ནས་སྣ་མང་ཅན་གྱི་འཛད་སྤྱོད་རྣམ་པ་ཧུར་ཐག་གཏོད་པ་དང་། འཛད་སྤྱོད་ཚོགས་སྤྱིའི་བསམ་པའི་རིག་གནས་ཀྱི་དགོས་མཁོ་སྐོང་བ། མཚན་མོའི་དཔལ་འབྱོར་གྱི་དྲ་ཐོག་མིང་ཅན་གྱི་ཐོ་འགོད་ས་དེ་བས་མང་བ་རིམ་བཞིན་སྐུལ་སྤེལ་གཏོང་བ། མི་རིགས་ཀྱི་ཁྱད་ཆོས་དང་ས་ཁོངས་ཀྱི་ཡུལ་སྲོལ་གོམས་གཤིས་མཉམ་འདྲེས་གཏིང་ཟབ་བཅས་བྱས་ཏེ་ལྷ་སའི“ས་མཐོའི་ཞིམ་ཟས་ཀྱི་ཡུལ་མཆོག”ཅེས་པའི་གྲོང་ཁྱེར་གྱི་མིང་བྱང་ཟམ་མི་ཆད་པར་གཏོད་རྒྱུ་རེད་ཅེས་བཤད།