ཡུན་ནན་གྱིས་རང་བྱུང་ཐོན་ཁུངས་ཀྱི་བདག་དབང་གཏན་འཁེལ་དང་ཐོ་འགོད་ལས་དོན་ཁག་དང་པོ་ལེགས་པར་བསྒྲུབས་པ།
གསར་འགོད་པར་ཡུན་ནན་ཞིང་ཆེན་རང་བྱུང་ཐོན་ཁུངས་ཐིང་ནས་ཤེས་རྟོགས་བྱུང་བར། ཉེ་ཆར། ཡུན་ནན་ཞིང་ཆེན་གྱི་ཀའོ་ལི་ཀུང་རི་བོ་དང་ཁྲི་ཧྲུའེ་གཙང་པོ་འབབ་རྒྱུད(ཡུན་ནན་དུམ་བུ)ཀྱི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་གྱི་རང་བྱུང་ཐོན་ཁུངས་ཀྱི་བདག་དབང་གཏན་འཁེལ་དང་ཐོ་འགོད་ལས་དོན་ལེགས་གྲུབ་བདེ་བླག་བྱུང་སྟེ། ཞིང་ཆེན་ཡོངས་ཀྱི“ཐེམ་ཐོ”ཡོད་པའི་རང་བྱུང་ཐོན་ཁུངས་ཁག་དང་པོར་དངོས་སུ་གྱུར་ཡོད། དེ་ཐོག་ནས་ཡུན་ནན་ཞིང་ཆེན་གྱི་རང་བྱུང་ཐོན་ཁུངས་ཀྱི་བདག་དབང་གཅིག་གྱུར་ཐོག་གཏན་འཁེལ་ཐོ་འགོད་ལས་དོན་སྤེལ་མྱོང་མེད་པ་ནས་ཡོད་པའི་བར་ཚད་བརྒལ་བྱུང་བ་མཚོན་གྱི་ཡོད།
ད་ཐེངས་ཀྱི་རང་བྱུང་ཐོན་ཁུངས་ཀྱི་བདག་དབང་གཏན་འཁེལ་དང་ཐོ་འགོད་ལས་དོན་དེས་ཀའོ་ལི་ཀུང་རི་བོ་དང་ཁྲི་ཧྲུའེ་གཙང་པོ་འབབ་རྒྱུད(ཡུན་ནན་དུམ་བུ)ཀྱི་སྐྱེ་ཁམས་བར་མཐོངས་ཀྱི་རང་བྱུང་ཐོན་ཁུངས་ཀྱི་རྒྱུ་ནོར་སྣ་ཚོགས་ཀྱི་བདག་དབང་བྱེད་པོ་གཏན་འཁེལ་བྱས་པ་མ་ཟད། ད་དུང་དམངས་ཡོངས་ལ་དབང་བ་དང་མཉམ་སྡེབ་ལ་དབང་བ་དང་། དམངས་ཡོངས་ལ་དབང་བ་དང་རིམ་པ་མི་འདྲ་བའི་སྲིད་གཞུང་གིས་སྤྱོད་པའི་བདག་དབང་། མཉམ་སྡེབ་ལ་དབང་མཁན་མི་འདྲ་བ། རང་བྱུང་ཐོན་ཁུངས་རིགས་མི་འདྲ་བ་བཅས་དབར་གྱི“དབྱེ་མཚམས་བཞི”གསལ་པོར་ཕྱེ་ཡོད།
བདག་དབང་གཏན་འཁེལ་ཐོ་འགོད་བྱས་ནས་སྔོན་ཆད་རང་བྱུང་ཐོན་ཁུངས་ཀྱི་བདག་དབང་བྱེད་པོ་མེད་པ་དང་། བེད་སྤྱོད་འབྲེལ་བ་ཟང་ཟིང་ཆེ་བ། བེད་སྤྱོད་བྱས་དྲགས་པ་སོགས་ལས་བྱུང་བའི་གནད་དོན་སྣ་ཚོགས་ཞི་ལྷོད་དུ་བཏང་བ་དང་། ལྟ་སྐུལ་དོ་དམ་སྡེ་ཚན་གྱི་འགན་འཁྲི་ཁ་གསལ་བཟོས་པ་མ་ཟད། ད་དུང་དོ་དམ་ཡག་པོ་མ་བྱུང་བའི་དབང་གིས་རང་བྱུང་ཐོན་ཁུངས་གཏོར་བརླག་སོང་བའི་གནས་ཚུལ་ཐོན་རྒྱུ་སྔོན་འགོག་ཐུབ་ཡོད། དེ་ནི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་གྱི་རང་བྱུང་ཐོན་ཁུངས་གསར་སྤེལ་ལུགས་མཐུན་དང་བེད་སྤྱོད་དང་། སྐྱེ་ཁམས་མ་ལག་སྲུང་སྐྱོང་ལ་ཤུགས་སྣོན། བདག་པོའི་ཁེ་དབང་ཚད་ལྡན་དུ་གཏོང་བ། སྐྱེ་ཁམས་ཤེས་དཔལ་སྲོལ་གཏོད་ལ་སྐུལ་འདེད་གཏོང་བ་བཅས་ཀྱི་ངོས་ནས་བརྗོད་ན་དོན་སྙིང་གལ་ཆེན་ལྡན་པ་ཞིག་རེད།