ཉེ་ཆར། གསར་འགོད་པར་རང་སྐྱོང་ལྗོངས་སློབ་གསོ་ཐིང་ནས་ཤེས་རྟོགས་བྱུང་བར། རང་ལྗོངས་ཀྱི་སློབ་གསོའི་ཁོངས་གཏོགས་ཀྱི་2024ལོའི་གཙོ་གནད་རྣམ་གྲངས་ཚང་མའི་ལས་འགོ་ཚུགས་པའམ་ལས་འགོ་བསྐྱར་དུ་ཚུགས་ཤིང་། ལས་འགོ་ཚུགས་པ་དང་ལས་འགོ་བསྐྱར་དུ་ཚུགས་ཚད་100%ཟིན་གྱི་ཡོད་ཅིང་། འདི་ལོའི་ཟླ་དང་པོ་ནས་གསུམ་པའི་བར། རང་ལྗོངས་ཀྱི་སློབ་གསོའི་ཁོངས་གཏོགས་ཀྱི་གཙོ་གནད་རྣམ་གྲངས་ལ་རིམ་རྩིས་བྱས་ན་མ་དངུལ་སྒོར་དུང་ཕྱུར་2.59བཏང་སྟེ། དུས་ཚིགས་དང་པོའི་མ་འཇོག་འཆར་གཞིའི་ལས་འགན་གྱི་121.8%ལེགས་སྒྲུབ་བྱས་ཡོད། གཞན་ཡང་། རང་ལྗོངས་ཀྱི་སློབ་གསོའི་ཁོངས་གཏོགས་ཀྱི་2024ལོའི་གཙོ་གནད་འཛུགས་སྐྲུན་རྣམ་གྲངས་ནང་བཅུག་མེད་པའི་རྣམ་གྲངས་202ཀྱི་ཁྲོད་ནས་མ་དངུལ་བཏང་བ་སྒོར་དུང་ཕྱུར་0.52ཟིན་ཡོད། དུས་ཚིགས་དང་པོར། རང་ལྗོངས་ཀྱི་སློབ་གསོའི་ཁོངས་གཏོགས་རྣམ་གྲངས་ལ་རིམ་རྩིས་བྱས་ན་མ་དངུལ་སྒོར་དུང་ཕྱུར་3.11བཏང་ཡོད་པ་རེད།

ལྷ་ས་གྲོང་ཁྱེར་ཁྲེང་ཀོན་ཆུས་ཚལ་གུང་ཐང་ཁྲོམ་གཞུང་ཧྲེང་ཐའོ་ལམ་སྒོ་རྟགས་ཨང་88པའི་ལྷ་ས་དགེ་འོས་མཐོ་རིམ་ཆེད་སྦྱོང་སློབ་གྲྭ(གཤམ་དུ་ལྷ་ས་དགེ་འོས་ཆེད་སྦྱོང་ཞེས་བསྡུ་རྒྱུ)ནི་བོད་ཀྱི་དགེ་འོས་སློབ་ཆེན་འབའ་ཞིག་ཡིན་པ་དེས། རིམ་རྩིས་བྱས་ན་རང་ལྗོངས་ལ་ཤེས་ལྡན་པ་ཁྲི་7ལྷག་ཙམ་གསོ་སྦྱོང་བྱས་ཡོད་ཅིང་། རྒྱལ་ཡོངས་ཀྱི་དཔེ་ཁྲིད་མི་སྐྱོང་གི་དཔེ་བཟང་བ་བྱམས་པ་ཚེ་རིང་དང་། རྒྱལ་ཡོངས་ཀྱི་གྲོང་གསེབ་དགེ་རྒན་ཡག་ཤོས་སུང་ཡུས་ཀང་། རྒྱལ་ཡོངས་ཀྱི་སློབ་སྤྱི་གྲགས་ཅན་བུ་ཉི་མ་སོགས་ཚང་མ་སློབ་གྲྭ་དེ་ནས་ཐོན་པ་ཤ་སྟག་རེད།

སློབ་གྲྭ་དེའི་ཕྱོགས་བསྡུས་སློབ་ཁྲིད་ཐོག་ཁང་འཛུགས་སྐྲུན་རྣམ་གྲངས་ཀྱི་ལས་ཡུལ་དངོས་ནས་གསར་འགོད་པས་ཐོག་སོ་ཁ་ཤས་ཀྱི་མཐོ་ཚད་དང་མཚུངས་པའི་འདེགས་འཕྲུལ་མཁའ་དབྱིངས་སུ་ཕར་འགུལ་ཚུར་འགུལ་བྱེད་པ་དང་།ཨར་ལས་ཚན་པས་ས་གནས་ས་ཐོག་ཏུ་ལྕགས་སྒྲོམ་མཐོན་པོར་སློང་བ། ཨར་ལས་སྐྲུན་བཞིན་པའི་སློབ་ཁྲིད་ཐོག་ཁང་ལྗང་མདོག་གི་བདེ་འཇགས་དྲ་བས་བསྐོར་བ་སོགས་ལས་བྲེལ་ཆེ་བའི་རྣམ་པ་མཐོང་བྱུང་།

“ཕྱོགས་བསྡུས་སློབ་ཁྲིད་ཐོག་ཁང་གི་རྣམ་གྲངས་དེ་འདི་ལོའི་ཟླ་3ཚེས་11ཉིན་ལས་འགོ་བསྐྱར་དུ་ཚུགས་པ་དང་ཨར་སྐྲུན་ཕྱོགས་ཀྱིས་སྤུས་འབོར་གཉིས་ལྡན་ངང་ལས་འགན་ལེགས་པར་སྒྲུབ་པ་དང་ཆབས་ཅིག འཕེལ་རིམ་མགྱོགས་སུ་བཏང་ནས་འདི་ལོའི་ཟླ་དགུ་པར་སྤྱོད་ཐུབ་པའི་བརྩོན་ལེན་བྱེད་བཞིན་ཡོད”ཅེས་དང་སློབ་གྲྭ་དེའི་ཕྱོགས་བསྡུས་སློབ་ཁྲིད་ཐོག་ཁང་འཛུགས་སྐྲུན་རྣམ་གྲངས་ཀྱི་འཛུཌ་སྐྲུན་རྒྱ་ཁྱོན་ཡོངས་ལ་སྨི་ངོས་གྲུ་9059.09ཟིན་པ་དང་། ཁྱོན་མ་དངུལ་སྒོར་ཁྲི་4409བཏང་བ། མིག་སྔར་ཐོག་སོ་གཉིས་པའི་སྒྲོམ་གཞི་སྐྲུན་ཟིན་པ། རིམ་རྩིས་བྱས་ན་མ་དངུལ་སྒོར་ཁྲི་1453.29བཏང་ཡོད་ཅེས་ལྷ་ས་དགེ་འོས་མཐོ་རིམ་ཆེད་སྦྱོང་སློབ་གྲྭའི་སློབ་སྤྱི་གཞོན་པ་བསྟན་པས་ངོ་སྤྲོད་བྱས་པ་རེད།

གཞན་ཡང་འདི་ལོའི་ཟླ་3ཚེས་27ཉིན། མ་དངུལ་སྒོར་ཁྲི་12123.99བཏང་བ་དང་ས་བཟུང་རྒྱ་ཁྱོན་སྨི་ངོས་གྲུ་22408.95ཟིན་པའི་སློབ་མའི་སྤྱི་ཤག་འཛུགས་སྐྲུན་རྣམ་གྲངས་ཀྱང་དངོས་སུ་སྐྲུན་འགོ་ཚུགས་ཡོད།