བོད་ལ་དམངས་གཙོའི་བཅོས་སྒྱུར་བྱས་ནས་ལོ་65འཁོར་བའི་གལ་ཆེའི་དུས་སྐབས་སུ་གསར་འགོད་པ་ལྷོ་ཁ་གྲོང་ཁྱེར་སྣེ་གདོང་ཆུས་ཁེ་གསུམ་སྡེ་ཁུལ་དུ་ཕྱིན་ནས་དུད་ཚང་གཅིག་གི་མི་རབས་གསུམ་གྱི་ལོ་རྒྱུས་ཉན།

སྤོ་བོ་བསོད་ནམས་རྡོ་རྗེ་ནས་བུ་བསོད་ནམས་ཚེ་རིང་བར་དང་དེ་ནས་ཚ་མོ་པད་མ་དབྱངས་ཅན་བར། ཁོང་ཚོའི་འཚོ་བའི་འགྱུར་ལྡོག་ནི་ས་གཞི་འདིའི་ཐོག་གི་ལོ་རྒྱུས་ཀྱི་འཕོ་འགྱུར་ཆེན་པོའི་མཚོན་ཚུལ་ཞིག་ཏུ་གྱུར་ཡོད།

བསོད་ནམས་རྡོ་རྗེ་ནི་ཞིང་བྲན་གྱི་ཁྱིམ་དུ་སྐྱེས་པ་དང་ཆུང་དུས་སྟོད་སྒུར་སྒུར་ཁོ་ན་བྱས་ནས་འགྲོ་བ་དང་དཀའ་ཚེགས་ཆེ་བའི་ཞིང་ལས་བྱེད་དགོས་པས་རྔུལ་ཆུ་ས་ཞིང་ཚང་མར་སིམ་ཡོད་མོད། འོན་ཀྱང་ཁོང་ལྟོ་གྲོད་པ་རྒྱགས་པ་ཐེངས་གཅིག་ཀྱང་ཟ་མྱོང་མེད། ཞིང་བྲན་གྱི་ཐོབ་ཐང་ནི་ལྕགས་སྒྲོག་ལྕི་པོ་ཞིག་དང་འདྲ་བར་ཁོ་པ་ས་གཞི་དང་དབུལ་ཕོངས་ཁྲོད་དུ་དམ་པོར་བཅིངས།

“ངས་ཆུང་དུས་ནས་ཞིང་བྲན་བདག་པོའི་ཕྱུགས་འཚོ་གི་ཡོད། ནམ་མ་ལངས་གོང་ནས་ནམ་ཕྱེད་བར་ལས་ཀ་བྱེད་དགོས་རུང་ཉིན་ལྟར་རྩམ་པ་རྒྱ་ཕྱེད་ལས་ལེན་རྒྱུ་མེད། རྩམ་པ་ཏོག་ཙམ་དེ་སྤགས་གཡོས་ནས་བཟས་ཚེ་ལྟོ་དུས་གཅིག་ལས་མི་འདང་བས་ངས་རྩམ་ཐུག་བསྐོལ་ནས་འཐུང་གི་ཡོད”ཅེས་བསོད་ནམས་རྡོ་རྗེས་དྲན་གསོ་བྱེད་བཞིན་བཤད།

1959ལོར་ཁེ་གསུམ་གྲོང་ཚོར་སྔོན་ལ་དམངས་གཙོའི་བཅོས་སྒྱུར་བྱས་པ་ལས་བསོད་ནམས་རྡོ་རྗེའི་འཚོ་བར་འགྱུར་ལྡོག་ཆེན་པོ་བྱུང་ཡོད། ཞིང་བྲན་ལམ་ལུགས་རྩ་མེད་དུ་བཏང་བ་ལས་ཁོང་ལ་རང་དབང་ཐོབ་སྟེ་ལ་རྒྱ་དང་དབང་ཆ་ཡོད་པའི་ཞིང་པ་ཞིག་ཏུ་གྱུར་ཡོད། དེ་ཙམ་མ་ཟད། ཁོང་ད་དུང་ཏང་ནང་ཞུགས་ནས་རང་ཉིད་ཀྱི་དཀའ་སྤྱད་དང་བློ་རིག་ལ་བརྟེན་ཏེ་ཡུལ་མི་རྣམས་ལ་ལས་ཀ་ཧ་ཅང་མང་པོ་བསྒྲུབས་རོགས་བྱས་ཡོད།

དམངས་གཙོའི་བཅོས་སྒྱུར་མ་བྱས་གོང་བསོད་ནམས་རྡོ་རྗེར་ས་ཞིང་དང་ཕྱུགས་རིགས་མེད་པ་དང་དམངས་གཙོའི་བཅོས་སྒྱུར་བྱས་རྗེས་ཁོང་ལ་ས་ཞིང་མུའུ་3དང་བ་གླང་1བགོས་པ་ལས་འཚོ་བ་རིམ་བཞིན་ཇེ་ཡག་ཏུ་ཕྱིན་ཡོད། ད་ཆ་བསོད་ནམས་རྡོ་རྗེར་ས་རྒྱུ་གཤིན་པོའི་ཞིང་ཁ་མུའུ་16ཡོད་པ་མ་ཟད། ད་དུང་གྲོང་ཚོའི་ནང་ཇ་ཁང་ཡང་བཙུགས་ཡོད་པས་ལོའི་ཡོང་འབབ་སྒོར་ཁྲི་30ཟིན་གྱི་ཡོད། འདི་ལོ་ཁོང་གི་ཁྱིམ་དུ་ད་དུང་ཐོག་ཁང་གསར་པའང་བརྒྱབ་ཡོད།

བསོད་ནམས་རྡོ་རྗེའི་བུ་བསོད་ནམས་ཚེ་རིང་1970ལོར་སྐྱེས་པ་དང་ཁོང་གིས་དཀའ་སྤྱད་ལས་བརྩོན་ལ་བརྟེན་ནས་རང་ཉིད་ཀྱི་རྩལ་ནུས་ཆེ་རུ་བཏང་བས་གྲོང་ཚོའི་ཕྱུག་འགྱུར་སྣེ་ཁྲིད་པར་གྱུར་ཡོད།

བསོད་ནམས་ཚེ་རིང་གིས་ལོ་15ནས་འགོ་བཙུགས་ཏེ་ཤིང་བཟོའི་ལག་རྩལ་སྦྱངས་ཤིང་། རྩེར་སོན་གྱི་ལག་རྩལ་དང་ལོ་མང་གི་འབད་བརྩོན་དང་ས་གནས་དེ་གའི་ལས་གཏོད་སྲིད་ཇུས་ཀྱི་རྒྱབ་སྐྱོར་འོག་བོད་བཟོའི་ཁྱིམ་ཆས་མཉམ་ལས་ཁང་ཞིག་བཙུགས་པས་ཁོང་ནི་ཁྱིམ་གྱི་ཀ་བ་ལྟ་བུར་གྱུར་པ་མ་ཟད། ད་དུང་གྲོང་མི་ཚོའི་སྣེ་ཁྲིད་དེ་མཉམ་དུ་ཕྱུག་པོ་ཆགས་ཡོད།

བསོད་ནམས་ཚེ་རིང་གི་བུ་ཕྲུག་ཚོ་མི་རབས་གསར་པའི་གཞོན་ནུ་ཡིན་པའི་ངོས་ནས་དར་དམར་འོག་འཚར་ལོངས་བྱུང་ཞིང་། དུས་རབས་གསར་པའི་ཆེད་འབད་འཐབ་བྱེད་བཞིན་ཡོད། ཏང་གི་སློབ་གསོའི་སྲིད་ཇུས་དང་ཁྱིམ་སྲོལ་བཟང་པོའི་ཤུགས་རྐྱེན་འོག་ཕྲུ་གུ་གསུམ་པོས་སློབ་གསོ་ཡག་པོ་དང་ལེན་ཐུབ་སྟེ་སློབ་ཆེན་དུ་རྒྱུགས་འཕྲོད།

ད་ཆ་བསོད་ནམས་ཚེ་རིང་གི་བུ་མོ་ཆེ་བ་སྣེ་གདོང་ཆུས་སྤྱི་བདེ་ཅུས་སུ་ལས་ཀ་བྱེད་ཀྱི་ཡོད་པ་དང་། བུ་ཉིང་ཁྲི་གྲོང་ཁྱེར་རྫ་ཡུལ་སློབ་འབྲིང་གི་དགེ་རྒན་ཡིན་པ། བུ་མོ་ཆུང་བ་གྲ་ནང་རྫོང་ཁྲིམས་འཛིན་ཅུས་ཀྱི“རྒྱབ་སྐྱོར་གསུམ་དང་རོགས་སྐྱོར་གཅིག”གི་མི་སྣ་ཡིན་ཞིང་ལས་ཀར་འབད་བརྩོན་ཆེ་བས་ཝུའུ་ཧན་དུ་སློབ་སྦྱོང་དང་སྦྱོང་བརྡར་བྱེད་པར་བཏང་ཡོད། ཁྱིམ་ཚང་གཅིག་ནས་སློབ་ཆེན་སློབ་མ་གསུམ་ཐོན་པ་དང་གཅེན་གཅུང་གསུམ་མཉམ་དུ་འཚར་ལོངས་དང་ཡར་ཐོན་བྱུང་བ་དེ་ནི་ནང་མི་ཚང་མའི་སྤོབས་པ་ཞིག་རེད།

བསོད་ནམས་རྡོ་རྗེ་ནས་པད་མ་དབྱངས་ཅན་བར་དང་། དབུལ་པོ་ནས་ཕྱུག་པོའི་བར། སྡུག་བསྔལ་ནས་བདེ་སྐྱིད་བར་བཅས་ཁྱིམ་ཚང་གཅིག་གི་མི་རབས་གསུམ་གྱི་འཚོ་བར་འཕོ་འགྱུར་ཆེན་པོ་བྱུང་ཡོད། འཕོ་འགྱུར་དེ་ནི་བོད་དུ་དམངས་གཙོའི་བཅོས་སྒྱུར་བྱས་ནས་ལོ་65སོང་རིང་ལོ་རྒྱུས་རང་བཞིན་གྱི་གྲུབ་འབྲས་ཐོབ་པའི་གསོན་ཉམས་དོད་པའི་མཚོན་ཚུལ་ཞིག་རེད་ལ། གངས་ལྗོངས་ས་མཐོའི་ཁྱིམ་ཚང་ཁྲི་སྟོང་མང་པོའི་བདེ་སྐྱིད་ལྡན་པའི་འགྱུར་ལྡོག་གི་མཚོན་ཚུལ་ཞིག་དེ་བས་ཀྱང་རེད།