གཞིས་རྩེའི་གཞི་རིམ་སྨན་པ་ཅི་ལིན་དུ་ལག་རྩལ་སྦྱོང་བར་བསྐྱོད་པ།
རོགས་སྐྱོར་བྱ་ཡུལ་ས་ཁུལ་གྱི་འཕྲོད་བསྟེན་རྐང་འཛིན་ཤེས་ལྡན་པའི་གསོ་སྦྱོང་ལས་དོན་ལ་ཤུགས་སྣོན་རྒྱག་ཆེད། ཅི་ལིན་ཞིང་ཆེན་གྱི“ལོ་ལྔ་ཚན་བཅུ་བཞི་པའི”གཞིས་རྩེ་གྲོང་ཁྱེར་ལ་ཁ་གཏད་རོགས་སྐྱོར་གྱི་རྣམ་གྲངས་བཀོད་སྒྲིག་གཞིར་བཟུང་། ཉེ་དུས། གཞིས་རྩེ་གྲོང་ཁྱེར་འཕྲོད་བསྟེན་བདེ་ཐང་ཨུ་ལྷན་གྱིས་སྨན་བཅོས་མི་སྣ་25བདམས་ནས་ཅི་ལིན་ཞིང་ཆེན་ཆན་ཝུའེ་སྨན་ཁང་དུ་དུས་ཡུན་ཟླ་བ་གཅིག་གི་གསོ་སྦྱོང་སློབ་སྦྱོང་བྱེད་པར་བཏང་བ་རེད།
ད་ཐེངས་ཀྱི་གསོ་སྦྱོང་ནང་སློབ་མ་ཚང་མར་དམིགས་ཏེ། ཞིབ་ཕྲའི་ཆེད་ལས་སློབ་ཚན་བཀོད་སྒྲིག་བྱས་པ་དང་ཁ་ཕྱོགས་གཏན་འཁེལ་གྱིས་ཆེད་ལས་རྩལ་ནུས་མཐོ་རུ་བཏང་ཞིང་། དེའང་གསོ་རིག་བརྙན་རིས་དང་། ཞིབ་བཤེར། སྦྲིད་སྨན། འཇུ་བྱེད་ཁོང་ནད་ཚན་ཁག ཕྱི་ནད་ཚན་ཁག་སོགས་ཚན་ཁག་མང་པོ་འདུས་པའི་ཆེད་ལས་ཤེས་བྱ་གསོ་སྦྱོང་བྱས་ཡོད། གསོ་སྦྱོང་ལ་རྒྱ་ཆེའི་སློབ་མ་ཚོས་ཧ་ཅང་དགའ་པོ་བྱེད་པ་དང་གཞིས་རྩེའི་སྨན་རྩིས་ཁང་གི་པད་མས“འདི་ནས་ངས་ཤེས་བྱ་གསར་པ་མང་པོ་ཤེས་བྱུང་ལ། ལྟ་རྒྱ་དང་མཐོང་རྒྱ་ཡང་ཆེ་རུ་ཕྱིན་སོང་། བོད་སྐྱོར་དགེ་རྒན་གྱི་ངག་སློབ་དཔེ་སྟོན་དང་སེམས་ནུས་ཡོད་རྒུས་ང་ཚོར་སློབ་ཚན་ཁྲིད་གནང་བར་སྙིང་དབུས་ནས་ཐུགས་རྗེ་ཆེ་ཞུ་གི་ཡིན། སླད་ཕྱིན་ངས་སྦྱངས་པའི་ཤེས་བྱ་དག་རྒྱུན་ལྡན་གྱི་ལས་ཀའི་ཁྲོད་སྤྱད་དེ། ནད་པར་ཞབས་འདེགས་སྔར་བས་ཡག་པ་ཞུ་གི་ཡིན”ཞེས་བཤད།
“ད་ཐེངས་ཀྱི་གསོ་སྦྱོང་ལས‘ཁྱིམ་ཚང་གཅིག་ལྟར’གྱི་བརྩེ་བ་ཟབ་མོ་གང་ལེགས་མངོན་ཡོད། རེ་བར་གསོ་སྦྱོང་ནང་ཞུགས་མཁན་ཚོས་སྨན་ཁང་གི་སྨན་པ་དང་སྤེལ་རེས་དང་སློབ་སྦྱོང་མང་ཙམ་བྱས་ཏེ། ཆེད་ལས་ལག་རྩལ་སོགས་ཐད་ཀྱི་བྱང་ཚད་མཐོ་རུ་འགྲོ་བའི་རེ་བ་ཡོད་ལ། ས་གནས་གཉིས་དབར་གཉེན་ཉེ་ལྟར་འགྲོ་འོང་ཟབ་མོ་བྱས་ནས། ས་གནས་གཉིས་ཀྱི་འཕྲོད་བསྟེན་བདེ་ཐང་གི་བྱ་གཞག་འཕེལ་རྒྱས་ལ་ལེགས་སྐྱེས་གསར་པ་འབུལ་རྒྱུའི་རེ་བ་ཡང་ཡོད”ཅེས་ཅི་ལིན་ཞིང་ཆེན་འཕྲོད་བསྟེན་བདེ་ཐང་ཨུ་ལྷན་ནོར་དོན་ཁྲུའི་འགན་འཁུར་བ་སུན་ཡུང་ཤིན་གྱིས་བཤད།