འདི་ནི་གངས་ཤུད་རི་འཛེག་གི་གཞོན་ནུའི་འཛམ་གླིང་བུམ་པའི་ནོར་ཝེའི་མོ་ཏེ་ས་ཚིགས་ཀྱི་འགྲན་བསྡུར་ནང་ཐད་ཤུད་མྱུར་འགྲན་གྱི་U18བུད་མེད་ཚོགས་ཆུང་གི་ཨང་དང་པོ་ཐོབ་མཁན་རང་ལྗོངས་ཀྱི་ལུས་རྩལ་པ་ཚེ་བརྟན་གཡུ་སྒྲོན་ཡིན་པ།

 གངས་ཤུད་རི་འཛེག་གི་གཞོན་ནུའི་འཛམ་གླིང་བུམ་པའི་ནོར་ཝེའི་མོ་ཏེ་ས་ཚིགས་ཀྱི་འགྲན་བསྡུར་ས་གནས་དེ་གའི་དུས་ཚོད་ཟླ་3ཚེས་13ཉིན་འགོ་ཚུགས་ཤིང་། ད་ཐེངས་ཀྱི་འགྲན་བསྡུར་ནང་རྒྱལ་ཁབ་དང་ས་ཁུལ་17ནས་ཡོང་བའི་བདམས་ཐོན་པ་106ཞུགས་ཡོད་པ་དང་། རང་ལྗོངས་ཀྱི་ལུས་རྩལ་པ་4རྒྱལ་ཁབ་རུ་ཁག་ནང་བདམས་ནས་ཀྲུང་གོའི་ཚབ་བྱས་ཏེ་འགྲན་བསྡུར་ནང་ཞུགས་པ་རེད།

ཟླ་3ཚེས་13ཉིན་གྱི་འགྲན་བསྡུར་ནང་། རང་ལྗོངས་ཀྱི་ལུས་རྩལ་པ་ཚེ་བརྟན་གཡུ་སྒྲོན་ལ་ཐད་ཤུད་མྱུར་འགྲན་གྱི་U18བུད་མེད་ཚོགས་ཆུང་གི་ཨང་དང་པོ་ཐོབ་པ་དང་། བུ་མོ་ཨ་ནན་ལ་ཨང་ལྔ་པ་ཐོབ་པ། གཡུ་སྒྲོན་ལྷ་མོར་ཐད་ཤུད་མྱུར་འགྲན་གྱི་U20བུད་མེད་ཚོགས་ཆུང་གི་ཨང་གསུམ་པ་ཐོབ་པ་རེད། ཟླ་3ཚེས་14ཉིན་གྱི་འགྲན་བསྡུར་ནང་། ཚེ་བརྟན་གཡུ་སྒྲོན་ལ་ཐག་ཐུང་འགྲན་བསྡུར་གྱི་U18བུད་མེད་ཚོགས་ཆུང་གི་ཨང་གསུམ་པ་ཐོབ་པ་བཅས་རེད།