ལྷོ་ཁ་གྲོང་ཁྱེར་གྱིས་འཛད་སྤྱོད་རོགས་སྐྱོར་བྱས་ནས་གྲོང་གསེབ་འཕེལ་རྒྱས་ཀྱི་གསོན་ཤུགས་འཕེལ་བ་བྱས་པ།
2023ལོ་ཚུན་དུ། ལྷོ་ཁ་གྲོང་ཁྱེར་གྱིས“སྲིད་གཞུང་གིས་སྣེ་ཁྲིད་དང་། སྤྱི་ཚོགས་ཞུགས་པ། ཁྲོམ་རའི་འཁོར་རྒྱུག གཉིས་ཁེ་གཉིས་ཕན”བཅས་ཀྱི་རྩ་དོན་གཞིར་བཟུང་། འཛད་སྤྱོད་རོགས་སྐྱོར་ལས་དོན་ཡག་པོ་བསྒྲུབས་ཏེ། དྲ་ཐོག་དང་དྲ་ཕྱི་ཟུང་འབྲེལ་གྱི་བྱ་ཐབས་སྤྱད་ནས་ཆ་སྒྲིག་རོགས་སྐྱོར་ཚན་པ་དང་། ཁ་གཏད་བོད་སྐྱོར་ཚན་པ། ཆ་སྒྲིག་རོགས་སྐྱོར་ལས་བྱེད་པ་སོགས་ལ་ལྕག་སྐུལ་དང་ཁྲིད་སྟོན་དང་། ཞིང་འབྲོག་པའི་མཉམ་ལས་ཁང་དང་ཡུལ་དེའི་ཁེ་ལས་ཀྱིས་ཐོན་སྐྱེད་བྱས་པའི་ཞིང་ཞོར་ཐོན་རྫས་ཉོ་སྒྲུབ་ཧུར་ཐག་བྱས་ཏེ་མང་ཚོགས་ལ་འབབ་འཕར་ཡོང་བར་སྐུལ་ཁྲིད་དང་གྲོང་གསེབ་དར་རྒྱས་ལ་རམ་འདེགས་བྱས་པ་རེད། ན་ནིང་ལོ་ཧྲིལ་པོར་ལྷོ་ཁ་གྲོང་ཁྱེར་གྱིས་རིམ་རྩིས་བྱས་ན་འཛད་སྤྱོད་ལ་རོགས་སྐྱོར་བྱེད་ཚད་སྒོར་དུང་ཕྱུར་9.42ལྷག་ཙམ་ཟིན་ནས་འཛད་སྤྱོད་ཀྱིས་ཞིང་ལས་ལ་རོགས་རམ་བྱེད་པའི་ནུས་པ་འདོན་སྤེལ་གང་ལེགས་བྱས་ཡོད།
ལོ་གཅིག་རིང་ལྷོ་ཁ་གྲོང་ཁྱེར་གྱིས“ཉོས་ནས་རོགས་སྐྱོར་བྱེད་པའི”ལས་དོན་ཧུར་ཐག་སྤེལ་ཏེ་གྲོང་ཁྱེར་ཡོངས་ཀྱི་རིམ་ཁག་ལས་ཁུངས་དང་། ཁེ་ལས་དང་བྱ་གཞག་ཚན་པ། གྲོང་སྡོད་ལས་དོན་རུ་ཁག་སོགས་ཀྱིས་དབུལ་སྒྲོལ་མང་ཚོགས་དང་དེ་བཞིན་ཞིང་ལས་ཐོན་རྫས་ཁེ་ལས་དང་། མཉམ་ལས་ཁང་ནས་ཤ་དང་། སྒོ་ང་། འོ་མ། སྔོ་ཚལ། ཤིང་འབྲས། རྩམ་པ། ལག་ཤེས་བཟོ་རྩལ་ཐོན་རྫས་སོགས་སྔོན་ལ་ཉོ་སྒྲུབ་བྱས་པ་དང་། ལས་བཟོའི་ཟ་ཁང་བཙུགས་པའི་སྡེ་ཚན་གྱིས་ས་གནས་དེ་གའི་ཞིང་ཞོར་ཐོན་རྫས་སྔོན་ལ་ཉོ་སྒྲུབ་བྱེད་པ་དང་འབྲེལ“བཟོ་ཚོགས་དང་རོགས་སྐྱོར”ཟུང་དུ་འབྲེལ་ནས་ལས་བྱེད་པ་དང་ལས་བཟོ་ཚོའི་མཉམ་སྡེབ་རང་བཞིན་གྱི་ཕན་བདེའི་ཐོན་རྫས་འཛད་སྤྱོད་རོགས་སྐྱོར་ཐད་སྤྱད་ནས་ཞིང་ཞོར་ཐོན་རྫས་གྱི་འཚོང་ལམ་གནད་དོན་སྔར་བས་ཐག་གཅོད་བྱས་ཡོད།
དེ་དང་དུས་མཚུངས། ཞིང་ཞོར་ཐོན་རྫས་བྲིན་ཚོང་ལས་སྟེགས་ཧུར་ཐག་བཏོད་དེ་ཞིང་ཞོར་ཐོན་རྫས་བྲིན་ཚོང་བྱ་ཡུལ་ལམ་ཡང་ན་བྲིན་ཚོང་ཆེད་ཁུལ་བཙུགས་པ་དང་། ཡུལ་དེ་གའི་ཐོན་རྫས་མཛེས་ལྗོངས་ཁུལ་དང་། མགྲོན་ཁང་། གསོལ་མགྲོན་ཁང་། སྒོ་རྩིས་ཚོང་ཁང་བཅས་སུ་བཙོངས་པ། ཡུལ་དེ་གའི་སྣེ་འདྲེན་ཁེ་ལས་དང་ཞིང་འབྲོག་པའི་མཉམ་ལས་ཁང་གིས་ཡར་ཀླུང་ཚོང་འདུས་དང་དེ་བཞིན་རྫོང(གྲོང་ཁྱེར་དང་ཆུས)ཁག་གི་ཚོང་འདུས་སོགས་འགྲེམས་འཚོང་བྱེད་སྒོར་ཞུགས་པར་ཁྲིད་སྟོན་ཧུར་ཐག་བྱས་པ། འགྲེམས་ཚོང་བྱ་ཡུལ་དུ་ཞིང་ཞོར་ཐོན་རྫས་བྲིན་ཚོང་བྱེད་ས་ཆེད་མངགས་བཀོད་སྒྲིག་བྱས་པ་མ་ཟད། འགྲེམས་ཚོགས་ཐོག་དྲིལ་བསྒྲགས་བྱེད་ཤུགས་ཆེ་རུ་བཏང་སྟེ་ཡུལ་དེ་གའི་མཚོན་རྟགས་ཀྱི་ཁྱད་ལྡན་ཐོན་རྫས་ཀྱི་སྐད་གྲགས་ཆོད་ཚད་ཆེ་རུ་བཏང་ནས་ཐོན་རྫས་བྲིན་ཚོང་གི་ཐབས་ལམ་རྒྱ་ཆེར་གཏོང་གང་ཐུབ་བྱས་ཏེ་ཞིང་འབྲོག་པའི་ཡོང་འབབ་མང་དུ་བཏང་བ་རེད།