ཟླ་3ཚེས་5ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་ཚོགས་འདུ་ཐེངས་གཉིས་པའི་ཅང་སུའུ་འཐུས་མི་ཚོགས་པའི་གྲོས་ཞིབ་ནང་ཞུགས་སྐབས་ཀྱི་གསུང་བཤད་གལ་ཆེན་དེ་མི་སེམས་ལ་སྐུལ་མ་ཐེབས་པ་དང་དཔའ་མཛངས་རྟུལ་ཕོད་ཀྱིས་མདུན་སྐྱོད་བྱེད་པར་སྐུལ་འདེད་ཐུབ་པ་ཞིག་ཡོད་པས་རང་ལྗོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཁྲོད་ཚུར་སྣང་ལན་ཆ་ཆེན་པོ་བྱུང་བ་རེད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། ས་གནས་ཁག་གིས་དོན་དངོས་ནས་འགོ་འཛུགས་རྒྱུ་མཐའ་འཁྱོངས་ཀྱིས་སྔོན་འཛུགས་རྗེས་གཏོར་དང་། ཡུལ་བབ་དང་བསྟུན་པ། རིགས་དབྱེ་མཛུབ་ཁྲིད་བཅས་བྱས་ནས་ས་གནས་དེ་གའི་ཐོན་ཁུངས་ཀྱི་ལེགས་ཆ་དང་། ཐོན་ལས་ཀྱི་རྨང་གཞི། ཚན་ཞིབ་ཀྱི་ཆ་རྐྱེན་སོགས་ལ་གཞིགས་ཏེ་གདམ་ག་ཡོད་པའི་སྒོ་ནས་ཐོན་ལས་གསར་པ་དང་། རྣམ་པ་གསར་པ། སྒུལ་ནུས་གསར་པ་བཅས་འཕེལ་རྒྱས་ལ་སྐུལ་འདེད་དང་ལག་རྩལ་གསར་པར་བརྟེན་ནས་སྲོལ་རྒྱུན་ཐོན་ལས་སྒྱུར་བཀོད་དང་རིམ་སྤོར་བྱས་ཏེ་ཐོན་ལས་རྩེར་སོན་ཅན་དང་། རིག་ནུས་ཅན། ལྗང་མདོག་ཅན་བཅས་ལ་འགྱུར་བར་སྐུལ་འདེད་ཧུར་ཐག་གཏོང་དགོས་པའི་ནན་བཤད་གནང་བ་རེད།

དེའི་ཐད་རང་སྐྱོང་ལྗོངས་སྤྱི་ཚོགས་ཚན་རིག་ཁང་གི་ཞིབ་འཇུག་པ་གཞོན་པ་དབྱང་ཅེ་ཡིས“རང་ལྗོངས་ཀྱི་ཆུ་ནུས་དང་། ཉི་ནུས། རླུང་ནུས་སོགས་དྭངས་གཙང་ནུས་རྒྱུའི་ཐོན་ཁུངས་ཕུན་སུམ་ཚོགས་པས་གསར་སྤེལ་གྱི་མདུན་ལམ་ཆེན་པོ་ལྡན་ཡོད། རྒྱལ་ཁབ་ཀྱི‘ཐཱན་གཉིས’ཀྱི་འཐབ་ཇུས་ལག་བསྟར་བྱེད་པའི་རྒྱབ་ལྗོངས་འོག་ཚན་རྩལ་འདེགས་སྐྱོར་ལ་ཤུགས་སྣོན་དང་ལྗང་མདོག་ཐཱན་ཉུང་ཐོན་ལས་འཕེལ་རྒྱས་མགྱོགས་མྱུར་གཏོང་བ་དེས་རང་ལྗོངས་ཀྱི་དཔལ་འབྱོར་འཕེལ་རྒྱས་ལ་སྒུལ་ནུས་གསར་པ་གཏོད་པར་ཕན་ཐོགས་ཡོད”ཅེས་མྱོང་ཚོར་ཟབ་མོའི་སྒོ་ནས་བཤད།

ཞི་ཅིན་ཕིང་གིས། བདེ་འཇགས་ཐོན་སྐྱེད་ལ་དམ་འཛིན་ཡག་པོ་བྱས་ནས་བདེ་འཇགས་ཀྱི་མངོན་མེད་རྐྱེན་ངན་གྲལ་བཤེར་སྔར་བས་ཡག་པོ་བྱེད་པ་དང་། ཉེན་ཟོན་ལྟ་ཞིབ་ཚད་ལེན་ལ་ཤུགས་སྣོན་རྒྱག་པ། འཕྲལ་སྡོམ་བྱ་ཐབས་དོན་འཁྱོལ་བཅས་བྱས་ནས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་ལ་འགན་ལེན་བྱེད་དགོས་པའི་ནན་བཤད་གནང་བ་རེད།

“བདེ་འཇགས་ཐོན་སྐྱེད་ཀྱི་འགན་འཁྲི་རི་བོ་ཐའེ་ཧྲན་ལས་ཀྱང་ལྕི། རྒྱལ་ཡོངས་ཀྱི་མེ་ཟོན་བདེ་འཇགས་ཀྱི་མངོན་མེད་རྐྱེན་ངན་གཅིག་སྡུད་སེལ་བའི་འགག་སྒྲོལ་གྱི་བཅོས་སྒྲིག་ཆེ་མོའི་བྱ་སྤྱོད་སྤེལ་ཚུན། གཞིས་རྩེ་གྲོང་ཁྱེར་མེ་ཟོན་རོགས་སྐྱོབ་ཉིང་ལག་རུ་ཁག་གིས་མེ་ཟོན་བདེ་འཇགས་ཀྱི་རྩ་བཅོས་འགག་སྒྲོལ་གྱི་ལོ་གསུམ་བྱ་སྤྱོད་དང་དགུན་དཔྱིད་ཀྱི་མེ་ཟོན་བདེ་འཇགས་ཆེད་དོན་བཅོས་སྒྲིག་ལ་སྤྱི་འདོམས་སྐུལ་འདེད་བཏང་སྟེ་སྤྱི་ཚོགས་ཀྱི་ཚན་པ་4780ལ་ཞིབ་བཤེར་བྱས་པར་མངོན་མེད་རྐྱེན་ངན་ཁག་6406ཤེས་རྟོགས་དང་ཁག་6343དག་ཐེར་བྱས་པ་དང་། མི་ཐེངས་2521ལ་ནང་སྦྱོང་བྱས་པ། སྒྲིག་འགལ་ངང་བཀོད་སྒྲིག་བྱས་པའི་ལྕགས་དྲ་དང་བརྡ་ཆའི་སྒོ་བྱང་སྨི་ངོས་གྲུ་3264ལྷག་ཙམ་བཤིག་པ། དྲན་སྐུལ་དང་། ཉེན་བརྡ། སྒྲུབ་རྒྱུར་ལྟ་སྐུལ་བཅས་ཀྱི་བརྡ་ཐོ་56བཏང་ནས་མེ་ཟོན་བདེ་སྲུང་གི་ལས་འགན་ཁག་ཕུན་སུམ་ཚོགས་པོས་བསྒྲུབས་པས་གྲོང་ཁྱེར་ཡོངས་ཀྱི་མེ་ཟོན་བདེ་འཇགས་དུས་བབ་བརྟན་པོ་རྒྱུན་མཐུད་བྱུང་ཡོད”གཞིས་རྩེ་གྲོང་ཁྱེར་མེ་ཟོན་རོགས་སྐྱོབ་ཉིང་ལག་རུ་ཁག་ཏང་ཨུད་ཀྱི་ཧྲུའུ་ཅི་གཞོན་པ་ཉིང་ལག་རུ་ཁག་གི་རུ་དཔོན་བཀྲ་ཤིས་དབང་ལགས་ཀྱིས་གྲོང་ཁྱེར་ཡོངས་ཀྱི་མེ་ཟོན་རོགས་སྐྱོབ་དཔུང་ཁག་གིས་སྤྱི་ཁྱབ་ཧྲུའུ་ཅིའི་མཛུབ་སྟོན་གལ་ཆེན་གྱི་བླང་བྱ་ལྟར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུ་དམིགས་ཚད་དུ་བྱས་ཏེ་མེ་ཟོན་བཅོས་སྒྲིག་བྱེད་ཐབས་དེ་སྔོན་འགོག་གི་ཕྱོགས་སུ་སྒྱུར་རྒྱུར་མགྱོགས་མྱུར་སྐུལ་འདེད་གཏོང་བ་དང་སྤུས་ཚད་མཐོ་བའི་མེ་ཟོན་བདེ་འཇགས་ཆུ་ཚད་ཀྱི་ཞབས་ཞུས་གཞིས་རྩེའི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་འགན་ལེན་བྱ་རྒྱུ་ཡིན་ཞེས་བཤད།