2023ལོའི་ལས་དོན་ཕྱིར་དྲན།

འདས་ཟིན་པའི་ལོ་གཅིག་རིང་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་གོམ་སྟབས་བརྟན་པོ་སྤོས་ཡོད།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་5ཉིན་གློག་འཕྲིན་འབྱོར་གསལ། ཚེས་5ཉིན་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་སྲིད་གཞུང་གི་ལས་དོན་སྙན་སྒྲོན་གནང་སྐབས་གསུངས་དོན། འདས་ཟིན་པའི་ལོ་དེ་ནི་ཕྱོགས་ཡོངས་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་ལག་ལེན་མཐར་ཕྱིན་བསྟར་འགོ་རྩོམ་པའི་ལོ་ཡིན་ལ། སྐབས་འདིའི་སྲིད་གཞུང་གིས་ཁྲིམས་ལྟར་འགན་འཁྲི་བསྒྲུབ་པའི་ལོ་དང་པོ་ཡིན། ཤིན་ཏུ་རྙོག་འཛིང་ཆེ་བའི་རྒྱལ་སྤྱིའི་ཁོར་ཡུག་དང་དཀའ་ཚེགས་དང་ལྗིད་རྫོབ་ཆེ་བའི་སྒྱུར་བཅོས་གོང་སྤེལ་བརྟན་ལྷིང་གསུམ་གྱི་ལས་འགན་གྱི་མདུན་དུ། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ། ཕྱིའི་གནོན་ཤུགས་ཐེག་པ་དང་ནང་གི་དཀའ་ངལ་ཁྱད་བསད་བྱས་ནས་དཀའ་སྤྱད་འབད་བརྩོན་བྱས་ཡོད། ཏོག་གསར་རིམས་ནད་སྔོན་འགོག་ཚོད་འཛིན་བརྟན་ལྷིང་མཚམས་སྒྱུར་བྱུང་ནས་ཐག་གཅོད་རང་བཞིན་གྱི་རྒྱལ་ཁ་ཆེན་པོ་ཐོབ་པ་དང་། ལོ་ཧྲིལ་པོའི་དཔལ་འབྱོར་དམིགས་འབེན་ལས་འགན་གཙོ་བོ་ཡོངས་སུ་ལེགས་གྲུབ་བྱུང་བ་དང་། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཏན་ཏིག་བཏང་ཡོད། སྤྱི་ཚོགས་སྤྱི་ཡོངས་བརྟན་ལྷིང་མཐའ་འཁྱོངས་བྱུང་བ་དང་། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་གོམ་སྟབས་བརྟན་པོ་སྤོས་ཡོད།

—— དཔལ་འབྱོར་སྤྱིའི་ཆ་ནས་བསྐྱར་འཕར་ལེགས་འགྱུར་བྱུང་ཡོད། རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་ཁྲི་126ལས་བརྒལ་ནས་5.2%འཕར་ཏེ། འཕར་ཚད་འཛམ་གླིང་གི་དཔལ་འབྱོར་དངོས་ཚན་གཙོ་བོའི་མདུན་གྲལ་དུ་སླེབས་ཡོད། གྲོང་ཁྱེར་དང་གྲོང་རྡལ་གྱི་ལས་ཞུགས་མི་གྲངས་ཁྲི་1244གསར་དུ་འཕར་བ་དང་། གྲོང་ཁྱེར་དང་གྲོང་རྡལ་གྱི་བརྟག་དཔྱད་ལས་ཀ་ཤོར་ཚད་ཆ་སྙོམས་5.2%ཡིན། སྡོད་དམངས་ཀྱི་འཛད་སྤྱོད་རིན་གོང་0.2%འཕར་ཡོད། རྒྱལ་སྤྱིའི་གཏོང་ཡོང་གཞི་རྩའི་ཆ་ནས་དོ་མཉམ་བྱུང་ཡོད།

—— དེང་རབས་ཅན་གྱི་ཐོན་ལས་མ་ལག་འཛུགས་སྐྲུན་ལ་གྲུབ་འབྲས་གལ་ཆེན་ཐོབ་ཡོད། སྲོལ་རྒྱུན་ཐོན་ལས་རིགས་སྒྱུར་རིམ་སྤར་ཇེ་མགྱོགས་སུ་བཏང་བ་དང་། འཐབ་ཇུས་རང་བཞིན་གྱི་གསར་དར་ཐོན་ལས་དབྱར་མཚོ་རྒྱས་པ་ལྟར་འཕེལ་རྒྱས་བྱུང་ཡོད། འབྱུང་འགྱུར་ཐོན་ལས་གོ་རིམ་ལྡན་པའི་ངང་བཀོད་སྒྲིག་བྱས་པ་དང་། སྔོན་ཐོན་བཟོ་སྐྲུན་ལས་རིགས་དང་དེང་རབས་ཞབས་ཞུའི་ལས་རིགས་མཉམ་འདྲེས་གཏིང་ཟབ་བྱས་ཏེ་ཐོན་ལས་གསར་གཏོད་ཀྱི་གྲུབ་འབྲས་གལ་ཆེན་ཁག་གཅིག་རྒྱལ་སྤྱིའི་སྔོན་ཐོན་ཆུ་ཚད་དུ་སླེབས་ཡོད། རང་རྒྱལ་ནས་ཐོན་པའི་གནམ་གྲུ་ཆེན་པོ་C919ཚོང་ལས་གཉེར་སྐྱོང་བྱེད་འགོ་ཚུགས་པ་དང་། རང་རྒྱལ་ནས་ཐོན་པའི་སྦྲག་གྲུ་ཆེ་གྲས་དང་པོ་བདེ་བླག་ངང་བསྐྲུན་པ། ནུས་ཁུངས་གསར་པའི་རླངས་འཁོར་ཐོན་འཚོང་བྱས་ཚད་གོ་ལ་ཧྲིལ་པོའི་བསྡུར་ཚད་ལས་60%བརྒལ་ཡོད།

—— ཚན་རྩལ་གསར་གཏོད་ཐད་འགག་སྒྲོལ་གསར་པ་བྱུང་ཡོད། རྒྱལ་ཁབ་ཚོད་ལྟ་ཁང་གི་མ་ལག་འཛུགས་སྐྲུན་ལ་སྐུལ་འདེད་ནུས་ལྡན་བཏང་ཞིང་། འགག་རྩ་དང་སྲོག་ཤིང་གི་ལག་རྩལ་འགག་སྒྲོལ་ལ་གྲུབ་འབྲས་གཡུར་དུ་ཟ་བ་ཐོབ་ཡོད། མཁའ་འགྲུལ་སྒུལ་བྱེད་འཕྲུལ་འཁོར་དང་རླངས་འབར་སྒུལ་ཤུགས་འཕྲུལ་འཁོར། ཉིང་རྡུལ་གློག་འདོན་འཕྲུལ་འཁོར་ཚན་པ་རབས་བཞི་པ་སོགས་རྩེར་སོན་སྒྲིག་ཆས་ཞིབ་འཇུག་བཟོ་སྐྲུན་ལ་འཕེལ་སྐྱེད་ཆེན་པོ་བྱུང་ཞིང་། མིས་བཟོས་རིག་ནུས་དང་ཚད་རྡུལ་ལག་རྩལ་སོགས་མདུན་གྲལ་ཁྱབ་ཁོངས་ཀྱི་གསར་གཏོད་གྲུབ་འབྲས་རྒྱུན་ཆད་མེད་པར་ཐོན་ཡོད། ལག་རྩལ་གན་རྒྱའི་ཚོང་འགྲིག་དངུལ་གྲངས་28.6%འཕར་ཡོད། གསར་གཏོད་ལ་བརྟེན་ནས་འཕེལ་རྒྱས་ལ་སྐུལ་འདེད་གཏོང་བའི་ནུས་པ་རྒྱུན་མཐུད་ཆེ་རུ་ཕྱིན་ཡོད།

—— སྒྱུར་བཅོས་སྒོ་འབྱེད་གཏིང་ཟབ་ཕྱོགས་སུ་སྐུལ་འདེད་བཏང་ཡོད། རེབ་གསར་པའི་སྒྲིག་གཞི་སྒྱུར་བཅོས་དེ་ཀྲུང་དབྱང་རིམ་པ་ནས་གཞི་རྩའི་ཆ་ནས་ལེགས་གྲུབ་བྱུང་ཡོད་ཅིང་། ས་གནས་རིམ་པར་གོ་རིམ་ལྡན་པའི་སྒོ་ནས་སྤེལ་བཞིན་ཡོད། རྒྱལ་ཡོངས་གཅིག་གྱུར་གྱི་ཚོང་ར་ཆེན་པོ་འཛུགས་སྐྲུན་བྱེད་ཤུགས་ཆེ་རུ་བཏང་ཞིང་། གཞུང་ཁོངས་ཁེ་ལས་སྒྱུར་བཅོས་ཟབ་སྤེལ་མཐོར་འདེགས་གཏོང་བའི་བྱ་སྤྱོད་ལག་བསྟར་བྱས་ཤིང་། དམངས་གཉེར་དཔལ་འབྱོར་འཕེལ་རྒྱས་དང་རྒྱ་སྐྱེད་གཏོང་བར་སྐུལ་འདེད་གཏོང་བའི་སྲིད་ཇུས་བཏོན་ཡོད། རང་མོས་ཉོ་ཚོང་ཚོད་ལྟ་ཁུལ་གྱི་འཛུགས་སྐྲུན་བཀོད་པ་སྔར་ལས་འཐུས་ཚང་དུ་བཏང་བ་དང་། ཕྱིར་གཏོང་གིས་རྒྱལ་སྤྱིའི་ཚོང་རའི་ཐོབ་སྐལ་བཟུང་ཚད་བརྟན་པོའི་ངང་རྒྱུན་འཁྱོངས་བྱས་ཡོད། ཕྱི་རྒྱལ་གྱི་མ་དངུལ་དངོས་སུ་སྤྱོད་པའི་གྲུབ་ཚུལ་ལེགས་སྒྱུར་བྱས་ནས“རྒྱུད་གཅིག་ལམ་གཅིག”མཉམ་སྐྲུན་གྱི་རྒྱལ་སྤྱིའི་ཤུགས་རྐྱེན་ཐེབས་ནུས་དང་བློ་ཁ་འགུག་ནུས་སྔར་བས་མངོན་གསལ་དོད་པོར་གྱུར་ཡོད།

—— བདེ་འཇགས་འཕེལ་རྒྱས་ཀྱི་རྨང་གཞི་སྲ་བརྟན་བཏང་ཡོད། འབྲུ་རིགས་ཐོན་ཚད་རྒྱ་མ་དུང་ཕྱུར་ཁྲི་1.39ཟིན་ནས་སླར་ཡང་ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད། ནུས་ཁུངས་དང་ཐོན་ཁུངས་འདོན་སྤྲོད་གཏན་འཇགས་བྱུང་ཡོད། ཐོན་ལས་མུ་ཕྲེང་དང་འདོན་སྤྲོད་མུ་ཕྲེང་གལ་ཆེན་གྱི་རང་བརྟེན་ཚོད་འཛིན་ཐུབ་པའི་ནུས་པ་ཆེ་རུ་ཕྱིན་ཡོད། དཔལ་འབྱོར་དངུལ་རྩའི་གཙོ་གནད་ཁྱབ་ཁོངས་ཀྱི་ཉེན་ཁ་བརྟན་པོའི་ངང་སེལ་ཡོད། དེང་རབས་ཅན་གྱི་རྨང་གཞིའི་སྒྲིག་བཀོད་འཛུགས་སྐྲུན་ལ་རྒྱུན་ཆད་མེད་པར་ཤུགས་བརྒྱབ་ཡོད།

—— སྐྱེ་ཁམས་ཁོར་ཡུག་གི་སྤུས་ཚད་བརྟན་པོའི་ངང་ལེགས་བཅོས་བྱས་ཡོད། སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་གཏིང་ཟབ་ཏུ་སྤེལ་བ་དང་། སྦགས་བཙོག་དངོས་རིགས་གཙོ་བོ་འབུད་ཚད་མུ་མཐུད་ཆག་པ། ས་ངོས་ཀྱི་ཆུ་དང་མཚོ་འགྲམ་མཚོ་ཁོངས་ཀྱི་ཆུ་སྤུས་རྒྱུན་མཐུད་ངང་ལེགས་འགྱུར་བྱུང་ཡོད། “བྱང་གསུམ”ལས་གྲྭའི་འགག་སྒྲོལ་ལས་ཀ་ཕྱོགས་ཡོངས་ནས་སྤེལ་འགོ་བརྩམས་ཤིང་། བསྐྱར་སྐྱེ་ཐུབ་པའི་ནུས་ཁུངས་ཀྱི་གློག་འདོན་འཕྲུལ་འཁོར་གྱི་གཞི་ཁྱོན་དེ་ལོ་རྒྱུས་རང་བཞིན་ལྡན་པའི་སྒོ་ནས་མེ་ཤུགས་གློག་འདོན་ལས་བརྒལ་བ་དང་། ལོ་ཧྲིལ་པོར་འཕྲུལ་འཁོར་གསར་སྣོན་བྱུང་ཚད་གོ་ལ་ཧྲིལ་པོའི་ཕྱེད་ཀ་ལས་བརྒལ་ཡོད།

—— དམངས་འཚོ་འགན་སྲུང་ནུས་ལྡན་དང་ཕན་འབྲས་ཐོན་པར་བྱས་ཡོད། སྡོད་དམངས་ཀྱི་མི་རེའི་ཆ་སྙོམས་ལག་ཐོག་ཡོང་འབབ་6.1%འཕར་བ་དང་། གྲོང་ཁྱེར་དང་གྲོང་གསེབ་སྡོད་དམངས་ཀྱི་ཡོང་འབབ་ཧེ་བག་མུ་མཐུད་ཆུང་དུ་ཕྱིན་ཞིང་། དབུལ་བྲལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་བཏང་བ་དང་། དབུལ་བྲལ་ས་ཁུལ་གྱི་གྲོང་གསེབ་སྡོད་དམངས་ཀྱི་ཡོང་འབབ་8.4%འཕར་ཡོད། འོས་འགན་སློབ་གསོ་དང་གཞི་རྩའི་རྒན་གསོ། གཞི་རྩའི་སྨན་བཅོས་སོགས་ནོར་སྲིད་ཀྱི་ཁ་གསབ་བྱེད་ཤུགས་ཆེ་རུ་བཏང་བ་དང་། རོགས་སྐྱོབ་འགན་སྲུང་བྱ་ཡུལ་གྱི་ཁྱབ་ཁོངས་རྒྱ་སྐྱེད་བཏང་ཞིང་། “རྒན་གཅིག་བྱིས་གཅིག”གི་སྒེར་འབབ་དཔྱ་ཁྲལ་གྱི་ཆེད་དམིགས་ཟུར་སྣོན་འཕྲི་འཐེན་གྱི་ཚད་གཞི་ཇེ་མཐོར་བཏང་སྟེ། ཁྲལ་འཇལ་མཁན་ཁྲི་6600ལྷག་ལ་ཕན་ཐོགས་བྱུང་ཡོད། གྲོང་ཁྱེར་དང་གྲོང་རྡལ་གྱི་གཞིས་ཁུལ་རྙིང་པ་སྒྱུར་བཀོད་དང་འགན་སྲུང་རང་བཞིན་གྱི་སྡོད་ཁང་འདོན་སྤྲོད་བྱེད་ཤུགས་ཆེ་རུ་བཏང་ནས་ཁྱིམ་ཚང་བྱེ་བ་ཡན་ལ་ཕན་ཐོགས་བྱུང་ཡོད།

འདས་ཟིན་པའི་ལོ་གཅིག་ལ་ཕྱིར་དྲན་བྱས་ཚེ། དཀའ་ངལ་དང་འགྲན་སློང་མང་པོ་མཉམ་དུ་འདྲེས་པ་དང་། རང་རྒྱལ་གྱི་དཔལ་འབྱོར་རླབས་ཕྲེང་ལྟར་གོང་འཕེལ་དང་ཀྱག་ཀྱོག་ལྟར་མདུན་སྐྱོད་བྱས་ཡོད་ཅིང་། གྲུབ་འབྲས་ཐོབ་པ་ནི་ལས་སླ་པོ་ཞིག་མིན། རྒྱལ་ཡོངས་གོང་འོག་ཚང་མས་འབད་བརྩོན་བྱས་པར་བརྟེན། ལོ་ཧྲིལ་པོའི་སྔོན་དཔག་འཕེལ་རྒྱས་དམིགས་འབེན་མངོན་འགྱུར་བྱུང་བ་མ་ཟད། ཕྱོགས་མང་པོའི་ཐད་ད་དུང་དགེ་མཚན་ལྡན་ཞིང་ལེགས་འགྱུར་གྱི་ཕྱོགས་སུ་འཕེལ་ཡོད། ལྷག་པར་དུ་ང་ཚོས་དུས་རབས་གསར་པར་དཔལ་འབྱོར་ལས་དོན་ཡག་པོར་བསྒྲུབ་པའི་ཆོས་ཉིད་རང་བཞིན་གྱི་ངོས་འཛིན་གཏིང་ཟབ་ཏུ་བཏང་བ་དང་། དཀའ་ངལ་ཆེན་པོ་སེལ་བའི་ཉམས་མྱོང་རྩ་ཆེན་བསགས་ཡོད། ལག་ལེན་ལས་གསལ་སྟོན་གང་ལེགས་བྱས་དོན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག ཀྲུང་གོའི་མི་དམངས་ལ་དཀའ་ཉེན་གང་རུང་ལས་རྣམ་པར་རྒྱལ་བའི་སྤོབས་པ་དང་བློ་གྲོས་ནུས་པ་བཅས་ཡོད་པ་དང་། ཀྲུང་གོའི་འཕེལ་རྒྱས་རླུང་བརྟེན་རླབས་གཤག་ཐུབ་པ་དང་། མ་འོངས་པར་རེ་བ་ཆེན་པོས་ཁེངས་ཡོད།

ལོ་གཅིག་རིང་སྤྱི་ཁོག་སྙོམས་སྒྲིག་བྱེད་ཤུགས་ཆེ་རུ་བཏང་སྟེ་དཔལ་འབྱོར་འཁོར་སྐྱོད་རྒྱུན་མཐུད་ངང་ལེགས་འགྱུར་ཡོང་བར་སྐུལ་འདེད་བཏང་ཡོད།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་5ཉིན་གློག་འཕྲིན་འབྱོར་གསལ། ཚེས་5ཉིན་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་སྲིད་གཞུང་གི་ལས་དོན་སྙན་སྒྲོན་གནང་སྐབས་གསུངས་དོན། འདས་ཟིན་པའི་ལོ་གཅིག་རིང་སྤྱི་ཁོག་སྙོམས་སྒྲིག་བྱེད་ཤུགས་ཆེ་རུ་བཏང་སྟེ། དཔལ་འབྱོར་འཁོར་སྐྱོད་རྒྱུན་མཐུད་ངང་ལེགས་འགྱུར་ཡོང་བར་སྐུལ་འདེད་བཏང་ཡོད།

འགྲན་སློང་དྲག་པོ་དང་རིམས་རྗེས་དཔལ་འབྱོར་སླར་གསོ་ཁྱད་ཆོས་ལ་དམིགས་ནས། ང་ཚོས་བརྟན་པོའི་ངང་འཕར་བ་དང་རྟིང་ཤུགས་ཆེ་རུ་གཏོང་རྒྱུ་གཅིག་གྱུར་འཆར་འགོད་བྱས་ཏེ། རྨང་བརྟན་ཟུངས་སྐྱེད་མངོན་གསལ་དོད་པོ་དང་། གནད་འཁེལ་ཇུས་འདོན་ལ་དོ་སྣང་བྱེད་པ། སྤྱི་ཁོག་སྙོམས་སྒྲིག་གི་དུས་ཚད་ནུས་གསུམ་ཁོང་དུ་ཆུད་པ། དུས་འཁོར་ལས་ལྡོག་པའི་སྙོམས་སྒྲིག་བྱེད་ཤུགས་ཆེ་རུ་བཏང་ཡོད། “ཞིང་ཆུ་ལེབ་གཏོང”དང་དུས་ཐུང་ནང་ངར་སྐུལ་དྲག་པོ་མ་བཏང་བར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ཐད་སྔར་བས་ཤུགས་བརྒྱབ་ཡོད་པས། ལོ་ཧྲིལ་པོའི་དཔལ་འབྱོར་འཁོར་སྐྱོད་ཐད་སྔོན་དམའ་བར་མཐོ་རྗེས་བརྟན་གྱི་འཕེལ་ཚུལ་བྱུང་ཡོད། ནང་མཁོ་རྒྱ་སྐྱེད་དང་། གྲུབ་ཚུལ་ལེགས་སྒྱུར། ཡིད་ཆེས་ཆེར་སྐྱེད། ཉེན་ཁ་སྔོན་འགོག་དང་སེལ་ཐབས་བཅས་བྱེད་པར་དམིགས་ཏེ། དུས་མཚམས་རང་བཞིན་གྱི་སྲིད་ཇུས་ཁག་གཅིག་རྒྱུན་སྲིང་དང་ལེགས་སྒྱུར་བྱས་པ་དང་། སྲིད་ཇུས་གསར་པ་ཁག་གཅིག་དུས་ཐོག་ཏུ་བཏོན་ཞིང་། ནུས་ལྡན་ཕན་ལྡན་གྱི་སྲིད་ཇུས་སྡེབ་སྤྱོད་བྱས་ཡོད། ནོར་སྲིད་སྲིད་ཇུས་ཐད་ཤུགས་སྣོན་ཕྱོད་འདེགས་བྱས་ནས་གཙོ་གནད་ཁྱབ་ཁོངས་ཀྱི་གཏོང་སྒོའི་འགན་སྲུང་ལ་ཤུགས་བརྒྱབ་པ་དང་། ལོ་ཧྲིལ་པོར་ཁྲལ་རིན་གཟིགས་སྐྱོང་གསར་འཕར་བྱུང་བ། སྒོར་དུང་ཕྱུར་ཁྲི་2.2ལས་བརྒལ་བ། རྒྱལ་བུན་སྒོར་དུང་ཕྱུར་ཁྲི་1འཕར་འགྲེམས་བྱས་ནས་གནོད་འཚེ་བྱུང་རྗེས་སླར་གསོ་བསྐྱར་སྐྲུན་དང་གནོད་འགོག་གེགས་སེལ་རྒུད་སྐྱོབ་བཅས་ཀྱི་ནུས་པ་ཆེ་རུ་གཏོང་བར་རྒྱབ་སྐྱོར་བྱས་ཡོད། དངུལ་ལོར་སྲིད་ཇུས་གནད་འཁེལ་ནུས་ལྡན་བྱུང་སྟེ། བཅོལ་དངུལ་གྲ་སྒྲིག་བྱེད་ཚད་ཐེངས་གཉིས་བཅག་པ་དང་། སྲིད་ཇུས་ཀྱི་སྐྱེད་ཚད་ཐེངས་གཉིས་ཕབ་ཡོད། ཚན་རྩལ་གསར་གཏོད་དང་། སྔོན་ཐོན་བཟོ་སྐྲུན། ཀུན་ཕན་ཆུང་ཕྲན། ལྗང་མདོག་འཕེལ་རྒྱས་སོགས་ཀྱི་དངུལ་བུན་འཕར་སྣོན་ཆེན་པོ་བྱུང་ཡོད། རླངས་འཁོར་དང་། ཁྱིམ་མཁོ། གློག་རྡུལ་ཐོན་རྫས། ཡུལ་སྐོར་སོགས་འཛད་སྤྱོད་ལ་རྒྱབ་སྐྱོར་བྱེད་པའི་སྲིད་ཇུས་དངོས་སུ་བཏོན་ཞིང་། ཐོན་འབོར་ཆེ་རིགས་ཀྱི་འཛད་སྤྱོད་བརྟན་པོའི་ངང་བསྐྱར་འཕར་བྱུང་བ་དང་། འཚོ་བའི་ཞབས་ཞུ་འཛད་སྤྱོད་གང་མགྱོགས་སླར་གསོ་བྱུང་བ། སྲིད་གཞུང་དངུལ་འཇོག་གི་སྐུལ་ཁྲིད་ནུས་པ་འདོན་སྤེལ་དང་། དམངས་ཁྲོད་དངུལ་འཇོག་ལ་སྐུལ་སྤེལ་གཏོང་བའི་སྲིད་ཇུས་བཟོས་ཡོད། ནུས་ཁུངས་དང་ཆུ་བེད་སོགས་རྨང་གཞིའི་སྒྲིག་བཀོད་དང་བཟོ་སྐྲུན་ལས་རིགས་ལ་མ་དངུལ་འཇོག་གྲངས་འཕར་སྣོན་མགྱོགས་ཙམ་བྱུང་ཡོད། གྲོང་ཁྱེར་དང་བསྟུན་ནས་ཇུས་འདོན་བྱས་ཏེ་ས་ཁང་ཐོན་ལས་སྙོམས་སྒྲིག་ལེགས་སྒྱུར་བྱས་ཤིང་། སྡོད་ཁང་དངུལ་བུན་གྱི་མ་གནས་ཆག་པར་སྐུལ་འདེད་བཏང་བ་དང་། ཁང་སྤྲོད་འགན་སྲུང་གི་ལས་ཀར་སྐུལ་འདེད་ཧུར་ཐག་བཏང་ཡོད། ས་གནས་ཀྱི་བུ་ལོན་སེལ་བའི་སྡེབ་གཅིག་ཇུས་གཞི་གཏན་འབེབས་དང་ལག་བསྟར་བྱས་པ་དང་། དངུལ་རྩའི་ཉེན་ཁ་རིགས་དབྱེ་ཐག་གཅོད་བྱས་ཏེ། མ་ལག་རང་བཞིན་གྱི་ཉེན་ཁ་མི་འབྱུང་བའི་མཐའ་ཚད་སྲུང་འཛིན་བྱས་ཡོད།

ལོ་གཅིག་རིང་གསར་གཏོད་ལ་བརྟེན་ནས་ཐོན་ལས་རིམ་སྤར་ལ་སྣེ་ཁྲིད་བྱས་ཏེ་གྲོང་ཁྱེར་དང་གྲོང་གསེབ་ས་ཁོངས་འཕེལ་རྒྱས་འགྲོ་བའི་སྒུལ་ནུས་གསར་པ་ཆེ་རུ་བཏང་ཡོད།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་5ཉིན་གློག་འཕྲིན་འབྱོར་གསལ། ཚེས་5ཉིན་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་སྲིད་གཞུང་གི་ལས་དོན་སྙན་སྒྲོན་གནང་སྐབས་གསུངས་དོན། འདས་ཟིན་པའི་ལོ་གཅིག་རིང་གསར་གཏོད་ལ་བརྟེན་ནས་ཐོན་ལས་རིམ་སྤར་ལ་སྣེ་ཁྲིད་བྱས་ཏེ། གྲོང་ཁྱེར་དང་གྲོང་གསེབ་ས་ཁོངས་འཕེལ་རྒྱས་འགྲོ་བའི་སྒུལ་ནུས་གསར་པ་ཆེ་རུ་བཏང་ཡོད།

རྒྱལ་ཁབ་ཀྱི་འཐབ་ཇུས་ཚན་རྩལ་སྟོབས་ཤུགས་ཆེ་རུ་བཏང་ནས་ཚན་རྩལ་གལ་ཆེན་གྱི་ལས་གཞི་ལག་བསྟར་གང་མགྱོགས་བྱས་ཤིང་། དཔེ་གསར་བཟོ་ལས་ཅན་ཕྱོགས་ཡོངས་ནས་བཀོད་སྒྲིག་དང་སྐུལ་འདེད་བཏང་བ་དང་། བཟོ་ལས་དཔལ་འབྱོར་འཁོར་སྐྱོད་བརྟན་པོ་ཡོང་བ་དང་། སྔོན་ཐོན་གྱི་བཟོ་སྐྲུན་ལས་རིགས་ལ་རྒྱབ་སྐྱོར་བྱེད་ཐབས་དངོས་སུ་བཏོན་ཡོད། གཙོ་གནད་ལས་རིགས་ཁེ་ལས་ཀྱི་ཞིབ་འཇུག་གསར་སྤེལ་འགྲོ་གྲོན་སྣོན་རྩིས་འཕྲི་འཐེན་གྱི་བསྡུར་ཚད་མཐོ་རུ་བཏང་བ་དང་། གཙོ་གནད་ཐོན་ལས་མུ་ཕྲེང་སྤུས་ཚད་མཐོ་བའི་འཕེལ་རྒྱས་འགྲོ་བར་སྐུལ་འདེད་བཏང་སྟེ། བཟོ་ལས་ཁེ་ལས་ཀྱི་ཁེ་སྤོགས་ཆག་པ་ནས་འཕར་བར་བསྒྱུར་ཡོད། གྲངས་ཀའི་དཔལ་འབྱོར་མགྱོགས་མྱུར་འཕེལ་རྒྱས་ཕྱིན་པ་དང་། 5Gསྤྱོད་མཁན་ཁྱབ་ཚད་50%ལས་བརྒལ་ཡོད། གྲོང་ཁྱེར་དང་གྲོང་རྡལ་ཅན་དཔེ་གསར་གྱི་འཐབ་ཇུས་ལག་བསྟར་གཏིང་ཟབ་བྱས་ཏེ། གྲོང་ཁྱེར་དུ་གཞིས་ཆགས་པའི་ཆ་རྐྱེན་སྔར་བས་གློད་པ་དང་། རྫོང་མཁར་གྱི་ཕྱོགས་བསྡུས་ཐེག་ནུས་ཆེ་རུ་བསྐྱེད་ནས་རྒྱུན་སྡོད་མི་འབོར་གྲོང་ཁྱེར་དང་གྲོང་རྡལ་ཅན་དུ་འགྱུར་ཚད་66.2%ལ་མཐོར་འདེགས་བྱུང་ཞིང་། ཞིང་ལས་འཕེལ་རྒྱས་ལ་རྒྱབ་སྐྱོར་བྱེད་པའི་སྲིད་ཇུས་ལ་ཤུགས་བརྒྱབ་ཡོད། གནོད་འགོག་ལོ་ལེགས་བརྩོན་ལེན་ནུས་ལྡན་བྱས་ཏེ། རེབ་གསར་པའི་འབྲུ་རིགས་རྒྱ་མ་དུང་ཕྱུར་སྟོང་ཕྲག་གི་ཐོན་ནུས་ཆེར་སྐྱེད་བྱེད་སྒོ་ལག་བསྟར་བྱས་པ་དང་། གྲོང་གསེབ་དར་རྒྱས་ཡོང་བར་སྐུལ་འདེད་ཏན་ཏིག་བཏང་བ་དང་། ས་ཁོངས་མཐུན་སྦྱོར་ངང་འཕེལ་རྒྱས་གཏོང་བའི་སྒྲིག་སྲོལ་དང་ལམ་སྲོལ་འཐུས་ཚང་དུ་བཏང་ཞིང་། ས་ཁོངས་ཀྱི་འཐབ་ཇུས་གལ་ཆེན་དོན་འཁྱོལ་བྱེད་པའི་ཐད་བྱེད་ཐབས་གསར་པ་ཁག་གཅིག་བཏོན་པ་དང་། ལས་གཞི་གལ་ཆེན་ཁག་གཅིག་ལག་བསྟར་བྱས་པས། ས་ཁོངས་འཕེལ་རྒྱས་ཀྱི་མཐུན་སྦྱོར་རང་བཞིན་དང་དོ་མཉམ་རང་བཞིན་རྒྱུན་ཆད་མེད་པར་ཇེ་ཆེར་གྱུར་ཡོད།

ལོ་གཅིག་རིང་སྒྱུར་བཅོས་ཟབ་སྤེལ་དང་སྒོ་རྒྱ་ཆེར་འབྱེད་བྱས་ཏེ་ཚོང་གཉེར་ཁོར་ཡུག་རྒྱུན་མཐུད་ངང་ལེགས་བཅོས་བྱས་ཡོད།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་5ཉིན་གློག་འཕྲིན་འབྱོར་གསལ། ཚེས་5ཉིན་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་སྲིད་གཞུང་གི་ལས་དོན་སྙན་སྒྲོན་གནང་སྐབས་གསུངས་དོན། འདས་ཟིན་པའི་ལོ་གཅིག་རིང་སྒྱུར་བཅོས་ཟབ་སྤེལ་དང་སྒོ་རྒྱ་ཆེར་འབྱེད་བྱས་ཏེ། ཚོང་གཉེར་ཁོར་ཡུག་རྒྱུན་མཐུད་ངང་ལེགས་བཅོས་བྱས་ཡོད།

རྒྱལ་ཡོངས་གཅིག་གྱུར་གྱི་ཚོང་ར་ཆེན་པོ་འཛུགས་སྐྲུན་བྱེད་པའི་སྤྱིའི་ལས་ཀའི་ཇུས་གཞི་དངོས་སུ་བཏོན་པ་དང་། འགྲན་རྩོད་དྲང་གཞག་ལ་འགོག་རྐྱེན་བཟོ་བའི་སྲིད་ཇུས་དང་གཏན་འབེབས་ཁག་གཅིག་གཙང་བཤེར་བྱས་ཡོད། གཞུང་ཁོངས་ཁེ་ལས་དང་། དམངས་གཉེར་ཁེ་ལས། ཕྱི་དངུལ་ཁེ་ལས་བཅས་འཕེལ་རྒྱས་གཏོང་བར་རྒྱབ་སྐྱོར་བྱེད་པའི་སྲིད་ཇུས་སོ་སོར་བཏོན་ཡོད། སྲིད་གཞུང་དང་ཁེ་ལས་རྒྱུན་རྣམ་ཅན་གྱི་འབྲེལ་མཐུད་སྤེལ་རེས་བྱེད་པའི་ལམ་སྲོལ་བཙུགས་པ་དང་། ཁེ་ལས་ཀྱི་རྩིས་ཐོ་འགྱངས་ཆད་གཙང་བཤེར་བྱེད་པའི་ཆེད་དོན་བྱ་སྤྱོད་སྤེལ་ཡོད། སྒྲིག་འགལ་གྲོན་བསྡུ་བཅོས་སྒྲིག་བྱེད་པར་ཤུགས་བརྒྱབ་ཡོད། ནོར་ཁྲལ་དངུལ་རྩ་དང་། ཞིང་ལས་དང་གྲོང་གསེབ། སྐྱེ་ཁམས་ཁོར་ཡུག་སྲུང་སྐྱོབ་སོགས་ཁྱབ་ཁོངས་ཀྱི་སྒྱུར་བཅོས་ཟབ་སྤེལ་བྱས་པ་དང་། ཕྱི་ཕྱོགས་ཉོ་ཚོང་གི་གཞི་ཁྱོན་བརྟན་གནས་དང་གྲུབ་ཚུལ་ལེགས་སྒྱུར་བྱེད་པར་སྐུལ་འདེད་བཏང་སྟེ། གློག་སྒུལ་རླངས་འཁོར་དང་། ལིས་གློག་རྫས། འོད་གློག་ཐོན་རྫས་བཅས“གསར་པ་རིགས་གསུམ”ཕྱིར་གཏོང་30%ཙམ་འཕར་ཡོད། ཕྱི་དངུལ་འགུགས་པའི་སྲིད་ཇུས་འཐུས་ཚང་དུ་བཏང་ནས་ལམ་ལུགས་ཅན་གྱི་སྒོ་མོ་འབྱེད་རྒྱ་ཆེ་རུ་བསྐྱེད་པ་དང་། “རྒྱུད་གཅིག་ལམ་གཅིག”མཉམ་སྐྲུན་སྤུས་ཚད་མཐོ་བའི་འཕེལ་རྒྱས་འགྲོ་བར་སྐུལ་འདེད་ཏན་ཏིག་བཏང་ནས་མཉམ་སྐྲུན་རྒྱལ་ཁབ་དང་ཚོང་དོན་དངུལ་འཇོག་འཕར་སྣོན་ཅུང་མགྱོགས་ཙམ་བྱུང་ཡོད།

ལོ་གཅིག་རིང་སྐྱེ་ཁམས་ཁོར་ཡུག་སྲུང་སྐྱོབ་དང་བཅོས་སྐྱོང་ལ་ཤུགས་བརྒྱབ་སྟེ་འཕེལ་རྒྱས་གཏོང་སྟངས་ལྗང་མདོག་རིགས་སྒྱུར་མགྱོགས་སུ་བཏང་ཡོད།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་5ཉིན་གློག་འཕྲིན་འབྱོར་གསལ། ཚེས་5ཉིན་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་སྲིད་གཞུང་གི་ལས་དོན་སྙན་སྒྲོན་གནང་སྐབས་གསུངས་དོན། འདས་ཟིན་པའི་ལོ་གཅིག་རིང་སྐྱེ་ཁམས་ཁོར་ཡུག་སྲུང་སྐྱོབ་དང་བཅོས་སྐྱོང་ལ་ཤུགས་བརྒྱབ་སྟེ། འཕེལ་རྒྱས་གཏོང་སྟངས་ལྗང་མདོག་རིགས་སྒྱུར་མགྱོགས་སུ་བཏང་ཡོད། མཛེས་སྡུག་ལྡན་པའི་ཀྲུང་གོ་འཛུགས་སྐྲུན་ལ་སྐུལ་འདེད་གཏིང་ཟབ་བཏང་ཞིང་། གནམ་སྔོན་པོ་དང་། ཆུ་དྭངས་མོ། ས་གཙང་མ་བཅས་སྲུང་སྐྱོབ་བྱེད་པའི་དམག་འཐབ་མུ་མཐུད་ཡག་པོ་བརྒྱབ་ཡོད། སྐྱེ་ཁམས་མ་ལག་གལ་ཆེན་སྲུང་སྐྱོབ་དང་ཉམས་གསོའི་ལས་གྲྭ་གལ་ཆེན་མྱུར་དུ་ལག་བསྟར་བྱས་པ་དང་། ས་ཆུ་ཤོར་བ་དང་ཐང་རྒོད་ཅན་དུ་འགྱུར་བ་ཕྱོགས་བསྡུས་ཀྱིས་འགོག་བཅོས་བྱ་རྒྱུར་དམ་འཛིན་ལེགས་པོ་བྱས། སྐྱེ་ཁམས་ཁོར་ཡུག་སྲུང་སྐྱོབ་ལ་ལྟ་ཞིབ་བྱེད་ཤུགས་ཆེ་རུ་བཏང་། ལྗང་མདོག་ཐཱན་ཉུང་ཐོན་ལས་འཕེལ་རྒྱས་ལ་རྒྱབ་སྐྱོར་སྲིད་ཇུས་གཏན་འབེབས་བྱས་པ་དང་། གཙོ་གནད་ལས་རིགས་འབུད་སྐྱུར་ཆེས་ཉུང་བར་སྒྱུར་བཀོད་བྱེད་པར་སྐུལ་འདེད་བཏང་བ་དང་། ཁག་དང་པོའི་ཐཱན་རྩེར་སོན་ཚོད་ལྟའི་གྲོང་ཁྱེར་དང་གླིང་ཁུལ་འཛུགས་སྐྲུན་བྱེད་འགོ་བརྩམས་ཡོད། གོ་ལ་ཧྲིལ་པོའི་གནམ་གཤིས་བཅོས་སྐྱོང་ནང་ཧུར་ཐག་ཞུགས་པ་དང་སྐུལ་འདེད་བཏང་ཡོད།

ལོ་གཅིག་རིང་དམངས་འཚོ་འགན་སྲུང་ལ་ནུས་ཤུགས་ཡོད་རྒུས་དམ་འཛིན་ཡག་པོ་བྱས་ཏེ་སྤྱི་ཚོགས་བྱ་གཞག་འཕེལ་རྒྱས་ལ་སྐུལ་འདེད་བཏང་ཡོད།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་5ཉིན་གློག་འཕྲིན་འབྱོར་གསལ། ཚེས་5ཉིན་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་སྲིད་གཞུང་གི་ལས་དོན་སྙན་སྒྲོན་གནང་སྐབས་གསུངས་དོན། འདས་ཟིན་པའི་ལོ་གཅིག་རིང་དམངས་འཚོ་འགན་སྲུང་ལ་ནུས་ཤུགས་ཡོད་རྒུས་དམ་འཛིན་ཡག་པོ་བྱས་ཏེ། སྤྱི་ཚོགས་བྱ་གཞག་འཕེལ་རྒྱས་ལ་སྐུལ་འདེད་བཏང་ཡོད།

མང་ཚོགས་ཀྱི་དོ་ཁུར་ལ་དམིགས་ཏེ་དམངས་འཚོའི་བྱ་བ་དངོས་ཡག་པོར་བསྒྲུབས་ཡོད། ལས་ཞུགས་བརྟན་པོ་ཡོང་བར་ཚད་མཐོའི་མཐོང་ཆེན་བྱས་ནས། ཁེ་ལས་ཀྱི་ལས་གནས་བརྟན་སྲུང་དང་ལས་གནས་རྒྱ་སྐྱེད་གཏོང་བར་རྒྱབ་སྐྱོར་བྱེད་པའི་སྲིད་ཇུས་བཏོན་ཡོད། མཐོ་སློབ་མཐར་ཕྱིན་སློབ་མ་སོགས་གཙོ་གནད་མི་ཚོགས་ཀྱི་ལས་ཞུགས་ལ་སྐུལ་འདེད་གཏོང་བའི་ཞབས་ཞུར་ཤུགས་བརྒྱབ་པ་དང་། དབུལ་བྲལ་མི་འབོར་ལས་གཉེར་བྱེད་ཚད་ཁྲི་3300ལས་བརྒལ་ཡོད། འོས་འགན་སློབ་གསོའི་ལྷུ་ཚིགས་ཞན་ས་འཛུགས་སྐྲུན་བྱེད་ཤུགས་ཆེ་རུ་བཏང་བ་དང་། “གཉིས་འཕྲིའི”ལས་དོན་ལེགས་སྒྲུབ་བྱས་ཤིང་། རྒྱལ་ཁབ་ཀྱི་སློབ་རོགས་དངུལ་བུན་ཚད་འདེགས་སྐྱེད་གཅོག་བྱས་ནས་སློབ་མ་ཁྲི་1100ལྷག་ལ་ཕན་ཐོགས་ཡོད། ཏོག་གསར་ནད་དུག་འགོ་བ་དེར“ཁ་པའི་རིགས་ཁ་པ་ལྟར་དོ་དམ”གྱི་བྱེད་ཐབས་དོན་འཁྱོལ་བྱས་པ་དང་། ཆམ་རིམས་དང་ཕྲ་གྱེས་གདོད་གཟུགས་གློ་ཚད་སོགས་འགོས་ནད་ཏན་ཏིག་གིས་འགོག་བཅོས་བྱས་ཡོད། ལས་བཟོ་པའི་སྤྱིར་བཏང་སྒོ་བསྟེན་སྨན་ཡོན་ནི་སྨན་བཅོས་འགན་བཅོལ་གྱི་གཅིག་གྱུར་འཆར་འགོད་ཐེབས་རྩས་སྤྲོད་པ་ལག་བསྟར་བྱས་ཡོད། སྡེ་ཁུལ་གྱི་ཕྱོགས་བསྡུས་ཞབས་ཞུའི་སྒྲིག་བཀོད་འཛུགས་སྐྲུན་བྱེད་ཤུགས་ཆེ་རུ་བཏང་བ་དང་། རྒན་རྒོན་གྱི་བཟའ་བཏུང་ཞབས་ཞུ་འཕེལ་རྒྱས་ཤུགས་ཆེན་བཏང་ཡོད། གཟིགས་སྐྱོང་གི་ཚད་གཞི་མཐོ་རུ་བཏང་བ་དང་། དཀའ་ངལ་ཡོད་པའི་མང་ཚོགས་ལ་མཐའ་སྐྱོང་འགན་སྲུང་བྱེད་ཤུགས་ཆེ་རུ་བཏང་བ། མཚོ་དང་གཙང་པོ་སོགས་འབབ་རྒྱུད་ཀྱི་ཆུ་ལོག་དང་ཞོད་སྐྱོན་ཆེན་པོར་ཁ་གཏད་ནུས་ལྡན་འཇལ་བ། ཀན་སུའུ་ཡི་ཅི་ཧྲི་ཧྲན་ལ་ས་ཡོམ་བྱུང་བ་སོགས་ཀྱི་ཉེན་སེལ་རོགས་སྐྱོབ་ལས་དོན་ཡག་པོར་བསྒྲུབས་པ་དང་། གནོད་འཚེ་བྱུང་རྗེས་སླར་གསོ་བསྐྱར་སྐྲུན་ལ་ཤུགས་བརྒྱབ་ཡོད། རིག་གནས་རྒྱུན་འཛིན་འཕེལ་རྒྱས་ཡོང་བར་སྐུལ་འདེད་བཏང་བ་དང་། ཡུལ་སྐོར་ཚོང་ར་ཕྱོགས་ཡོངས་ནས་སླར་གསོ་བྱུང་ཡོད། མང་ཚོགས་ཀྱི་ལུས་རྩལ་དབྱར་མཚོ་རྒྱས་པ་བཞིན་སྤེལ་ཞིང་། ཁྲེང་ཏུའུ་སློབ་ཆེན་སློབ་མའི་ལུས་རྩལ་འགྲན་ཚོགས་དང་། ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་བདེ་བླག་ངང་གཉེར་བ་དང་། རང་རྒྱལ་གྱི་ལུས་རྩལ་པ་རྣམས་ཀྱིས་དཔའ་ངར་ཆེན་པོས་གྲུབ་འབྲས་བཟང་པོ་བླངས་ཡོད།

ལོ་གཅིག་རིང་ཕྱོགས་ཡོངས་ནས་སྲིད་གཞུང་འཛུགས་སྐྲུན་ལ་ཤུགས་བརྒྱབ་སྟེ་བཅོས་སྐྱོང་གི་ཕན་ནུས་ཆེ་རུ་བཏང་ཡོད།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་5ཉིན་གློག་འཕྲིན་འབྱོར་གསལ། ཚེས་5ཉིན་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་སྲིད་གཞུང་གི་ལས་དོན་སྙན་སྒྲོན་གནང་སྐབས་གསུངས་དོན། འདས་ཟིན་པའི་ལོ་གཅིག་རིང་ཕྱོགས་ཡོངས་ནས་སྲིད་གཞུང་འཛུགས་སྐྲུན་ལ་ཤུགས་བརྒྱབ་སྟེ་བཅོས་སྐྱོང་གི་ཕན་ནུས་ཆེ་རུ་བཏང་ཡོད།

བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་དབང་གྲགས་དང་གཅིག་སྡུད་གཅིག་གྱུར་གྱི་འགོ་ཁྲིད་སྲུང་སྐྱོང་མཐའ་གཅིག་ཏུ་བྱས་པ་དང་། ཏང་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་བྱེད་མཁན་དང་། བྱ་སྤྱོད་སྤེལ་མཁན། དངོས་སུ་སྒྲུབ་མཁན་བཅས་ཡག་པོ་བྱས་ཡོད། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་བརྗོད་དོན་གཙོ་བོའི་སློབ་གསོ་གཏིང་ཟབ་ཏུ་སྤེལ་ཡོད། ཆབ་སྲིད་འཛུགས་སྐྲུན་དེ་ཨང་དང་པོར་འཇོག་པ་རྒྱུན་འཁྱོངས་བྱས་ཏེ་ཕྱོགས་ཡོངས་ནས་སྲིད་གཞུང་གི་འགན་ནུས་སྒྲུབ་ནུས་ཆེ་རུ་བཏང་ཞིང་། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་ལ་བཅའ་ཁྲིམས་ཀྱི་གྲོས་གཞི་10གྲོས་ཞིབ་གནང་བྱར་ཕུལ་བ་དང་། སྲིད་འཛིན་ཁྲིམས་སྲོལ་25གཏན་འབེབས་དང་བཟོ་བཅོས་བྱས་པ་དང་། སྲིད་འཛིན་ཁྲིམས་བསྟར་གྱི་སྤུས་ཚད་མཐོར་འདེགས་གཏོང་བའི་ལོ་གསུམ་བྱ་སྤྱོད་ལག་བསྟར་བྱས་ཡོད། རང་རྟོགས་ངང་ཁྲིམས་ལྟར་ལྟ་སྐུལ་དང་ལེན་བྱས་པ་དང་། མི་དམངས་འཐུས་ཚོགས་ཀྱི་འཐུས་མིའི་གྲོས་འགོ་དང་སྲིད་གྲོས་ཨུ་ཡོན་གྱི་གྲོས་གཞི་ནན་ཏན་གྱིས་བསྒྲུབས་པ། བརྟག་དཔྱད་ཞིབ་འཇུག་ལ་དོ་སྣང་བྱས་ནས། སྲིད་ཇུས་དང་ལས་དོན་དེ་དོན་དངོས་དང་མཐུན་པ་དང་མང་ཚོགས་དང་ཉེ་བར་བཅར་གང་ཐུབ་བྱས་ཡོད། ལྟ་ཞིབ་ལས་དོན་གྱི་ལམ་སྲོལ་ལེགས་སྒྱུར་བྱས་ཡོད། ཏང་སྲོལ་སྲིད་གཙང་འཛུགས་སྐྲུན་དང་རུལ་སུངས་ལ་ངོ་རྒོལ་བྱེད་པའི་འཐབ་རྩོད་ལ་ཤུགས་བརྒྱབ་ཡོད། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་དོན་འཁྱོལ་ནན་པོ་བྱས་པ་དང་། “སྤྱོད་ཚུལ་བཞི”རྒྱུན་མཐུད་ངང་ཡོ་བསྲང་དང་བཅོས་སྐྱོང་བྱས་པ། དངུལ་རྩའི་སྡེ་ཚན་དང་གཞུང་ཁོངས་ཁེ་ལས་སོགས་ཀྱི་སྐོར་གཟིགས་དག་ཐེར་ལས་དོན་ལ་སྐུལ་འདེད་ནུས་ལྡན་བཏང་ཡོད། གྲོང་ཁྱེར་དང་གྲོང་གསེབ་ཀྱི་གཞི་རིམ་བཅོས་སྐྱོང་གསར་གཏོད་དང་འཐུས་ཚང་དུ་བཏང་བ་དང་། ཡིག་བསྐུར་ངོ་བཅར་གྱི་ལས་དོན་ཏན་ཏིག་ངང་ཡག་པོར་བསྒྲུབས་ཡོད། བདེ་འཇགས་ཐོན་སྐྱེད་དང་འཕྲལ་སྡོམ་དོ་དམ་ལ་དམ་འཛིན་ནན་པོ་བྱས་ནས་ལས་འཛོལ་ཚབས་ཆེན་འབྱུང་བའི་མངོན་མེད་རྐྱེན་ངན་ཆེད་དོན་གྲལ་བཤེར་དང་བཅོས་སྒྲིག་བྱས་ཡོད། རྒྱལ་ཁབ་བདེ་འཇགས་མ་ལག་འཐུས་ཚང་དུ་གཏོང་བར་སྐུལ་འདེད་བཏང་བ་དང་། སྤྱི་ཚོགས་བདེ་འཇགས་ཕྱོགས་བསྡུས་བཅོས་སྐྱོང་བྱེད་ཤུགས་ཆེ་རུ་བཏང་ཞིང་། གློག་འཕྲིན་དང་དྲ་རྒྱའི་ཁ་བསླུས་ཀྱི་ཁྲིམས་འགལ་ཉེས་གསོག་བྱ་སྤྱོད་ལ་རྡུང་རྡེག་ནུས་ལྡན་བཏང་བས་དུས་བདེའི་ཀྲུང་གོ་འཛུགས་སྐྲུན་ལ་འཕེལ་རྒྱས་གསར་པ་བྱུང་ཡོད།

ལོ་གཅིག་རིང་ཀྲུང་གོའི་ཁྱད་ཆོས་ལྡན་པའི་རྒྱལ་ཁབ་ཆེན་པོའི་ཕྱི་འབྲེལ་ལ་ཕྱོགས་ཡོངས་ནས་སྐུལ་འདེད་བཏང་ཡོད།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་5ཉིན་གློག་འཕྲིན་འབྱོར་གསལ། ཚེས་5ཉིན་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་སྲིད་གཞུང་གི་ལས་དོན་སྙན་སྒྲོན་གནང་སྐབས་གསུངས་དོན། འདས་ཟིན་པའི་ལོ་གཅིག་རིང་ཀྲུང་གོའི་ཁྱད་ཆོས་ལྡན་པའི་རྒྱལ་ཁབ་ཆེན་པོའི་ཕྱི་འབྲེལ་ལ་ཕྱོགས་ཡོངས་ནས་སྐུལ་འདེད་བཏང་ཡོད།

ཀྲུའུ་ཞི་ཞི་ཅིན་ཕིང་སོགས་ཏང་དང་རྒྱལ་ཁབ་ཀྱི་འགོ་ཁྲིད་པ་རྒྱལ་ཁབ་མང་པོར་འཚམས་འདྲིར་ཕེབས་པ་དང་། འབོ་གསེར་རྒྱལ་ཁབ་ཀྱི་དབུ་ཁྲིད་པའི་མཇལ་འཛོམས། ཨེ་ཤེ་ཡ་དང་ཞི་བདེ་རྒྱ་མཚོ་ཆེན་པོའི་དཔལ་འབྱོར་མཉམ་ལས་རྩ་འཛུགས་ཀྱི་དབུ་ཁྲིད་པའི་དངོས་གཞི་མིན་པའི་ཚོགས་འདུ། ཨེ་ཤེ་ཡ་ཤར་མའི་མཉམ་ལས་དབུ་ཁྲིད་པའི་མུ་འབྲེལ་གྲོས་ཚོགས་སོགས་ཕྱོགས་མང་ཕྱོགས་གཉིས་ཀྱི་བྱེད་སྒོ་གལ་ཆེན་ལ་ཞུགས་ཡོད། ཀྲུང་གོ་དང་ཨེ་ཤེ་ཡ་དབུས་མའི་དབུ་ཚོགས་དང་། “རྒྱུད་གཅིག་ལམ་གཅིག”གི་རྒྱལ་སྤྱིའི་མཉམ་ལས་མཐོ་རིམ་གླེང་སྟེགས་སྐབས་གསུམ་པ་སོགས་ཚོགས་ར་གཙོ་བོའི་ཕྱི་འབྲེལ་བྱེད་སྒོ་གལ་ཆེན་བདེ་བླག་ངང་སྤེལ་ཡོད། མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་སྐུལ་འདེད་བཏང་བ་དང་། གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་དང་གོ་ལ་ཧྲིལ་པོའི་བདེ་འཇགས་ཀྱི་གྲོས་འགོ གོ་ལ་ཧྲིལ་པོའི་ཤེས་དཔལ་གྱི་གྲོས་འགོ་བཅས་དོན་འཁྱོལ་བྱས་ཤིང་། གོ་ལ་ཧྲིལ་པོའི་རོགས་ཟླའི་འབྲེལ་བ་རྒྱ་སྐྱེད་ཟབ་སྤེལ་བཏང་བ་དང་། རྒྱལ་སྤྱི་དང་ས་ཁུལ་གྱི་གླེང་བྱ་ཆེ་བའི་གནད་དོན་ཐག་གཅོད་བྱེད་སྐབས་དགེ་མཚན་ལྡན་པའི་ནུས་པ་འདོན་སྤེལ་བྱས་ནས། ཀྲུང་གོས་འཛམ་གླིང་གི་ཞི་བདེ་དང་འཕེལ་རྒྱས་ལ་སྐུལ་འདེད་གཏོང་བར་བྱས་རྗེས་གལ་ཆེན་བཞག་ཡོད།

འདས་ཟིན་པའི་ལོ་གཅིག་རིང་ཐོབ་པའི་གྲུབ་འབྲས་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྣེ་ཁྲིད་ཕྱོགས་སྟོན་མཛད་པ་དང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པས་ཚན་རིག་དང་མཐུན་པའི་མཛུབ་ཁྲིད་གནང་བ་ལས་བྱུང་བ་ཞིག་ཡིན།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་5ཉིན་གློག་འཕྲིན་འབྱོར་གསལ། ཚེས་5ཉིན་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་སྲིད་གཞུང་གི་ལས་དོན་སྙན་སྒྲོན་གནང་སྐབས་གསུངས་དོན། འདས་ཟིན་པའི་ལོ་གཅིག་རིང་ཐོབ་པའི་གྲུབ་འབྲས་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྣེ་ཁྲིད་ཕྱོགས་སྟོན་མཛད་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པས་ཚན་རིག་དང་མཐུན་པའི་མཛུབ་ཁྲིད་གནང་བ་ལས་བྱུང་བ་ཞིག་ཡིན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་ལ་བརྟེན་ནས་བྱུང་བའི་འབྲས་བུ་དང་། ཏང་ཡོངས་དང་། དམག་ཡོངས། རྒྱལ་ཡོངས་མི་རིགས་ཁག་གི་མི་དམངས་བཅས་ཀྱིས་མཐུན་སྒྲིལ་འབད་འཐབ་བྱས་པའི་འབྲས་བུ་ཡིན།

(རྒྱལ་ཡོངས་ཚོགས་འདུ་གཉིས་ཀྱི་དྲུང་ཡིག་ཁྲུའུ་ནས་མཁོ་འདོན་བྱས་པ་གཞིར་བཟུང)