“སྤྱི་ཁྱབ་ཅིང་ལི་ཧུའུ་ལགས་ཀྱིས་གྲང་ཕྲེང་སྐྱེལ་འདྲེན་ཞབས་འདེགས་ཞུས་པར་ཐུགས་རྗེ་ཆེ་ཞུ་གི་ཡིན། ང་ཚོའི་འབྲོག་ལས་ཐོན་རྫས་ས་མཐོ་དང་ཐ་ན་ནང་སའི་ཁྲོམ་རར་བདེ་བླག་ངང་བཙོངས་ཐུབ་སོང་བས། ཁྱེད་ཀྱི་བྱ་གཞག་དར་རྒྱས་གོང་འཕེལ་ཡོང་བའི་བཀྲ་ཤིས་སྨོན་འདུན་ཞུ་གི་ཡིན” ཟླ་2ཚེས་23ཉིན་གྱི་ཞོགས་པ་སྔ་པོ་ནས་ཀུན་དགའ་རིན་ཆེན་གྱིས་ཁྱིམ་དུ་གཙང་སྦྲ་ཡག་པོ་བྱས་ནས་ལོ་ལེགས་མཚོན་པའི“ཕྱེ་མར”བསྒྲིགས་པ་དང་ཁྱིམ་དུ་བསྙལ་བའི་ཞིམ་མངར་མཆོད་ཆང་གྲ་སྒྲིག་བྱས་ཏེ་ཆེད་མངགས་གྲང་ཕྲེང་ཟོག་འགྲེམས་ཀུང་སིའི་སྤྱི་ཁྱབ་ཅིང་ལི་ཧུའུ་ཧུའེ་དང་རྫོང་ཞིང་ལས་གྲོང་གསེབ་ཅུས་ཀྱི་བློ་བཟང་རྡོ་རྗེ་རང་ཁྱིམ་དུ་མགྲོན་པོར་གདན་དྲངས།

ཀུན་དགའ་རིན་ཆེན་ནི་བོད་ལྗོངས་རི་བོ་ཆེ་རྫོང་གི་སློབ་ཆེན་སློབ་མ་ཞིག་ཡིན་ཞིང་། སློབ་གྲྭ་ཐོན་རྗེས་རྒྱལ་ཁབ་ཀྱི་གྲོང་གསེབ་དར་རྒྱས་སོགས་ཀྱི་སྲིད་ཇུས་བཟང་པོ་འབོར་ཆེན་གྱི་གཟིགས་སྐྱོང་ཐོབ་ནས་ཕ་ཡུལ་དུ་ལོག་ཏེ་ལས་གཏོད་བྱ་རྒྱུའི་སེམས་ཐག་བཅད། 2022ལོར་ཁོང་གིས་ཕ་ཡུལ་རི་བོ་ཆེ་རྫོང་ཁྲ་མོ་གླིང་ཤང་ཆོས་སྐད་གྲོང་ཚོའི་ཞིང་འབྲོག་པའི་ཆེད་ལས་མཉམ་ལས་ཁང་དང་མཉམ་དུ་མ་དངུལ་གྲབས་གསོག་བྱས་ཏེ་རི་བོ་ཆེ་རྫོང་གི“སྦྲ་ནག་ཚང”སྐྱེ་ཁམས་འབྲོག་ལས་ཐོན་ལས་འཕེལ་རྒྱས་ཚད་ཡོད་ཀུང་སི་བཙུགས། 

ཐོན་ལས་ལ་བརྟག་ཞིབ་བྱས་པ་བརྒྱུད། ལོ་10ལྷག་ཙམ་གྱི་འབྲི་གཡག་གསོ་ཚགས་ཀྱི་ཉམས་མྱོང་ལྡན་པའི་ཧུའུ་ཧུའེ་ཡིས་མ་དངུལ་སྒོར་ཁྲི་400ཙམ་བཏང་ནས་རི་བོ་ཆེ་རྫོང་དུ་གྲང་ཕྲེང་ཟོག་འགྲེམས་ཀུང་སི་འཛུགས་རྒྱུའི་གཏན་འཁེལ་བྱས། ཧུའུ་ཧུའེ་ཡི་རོགས་རམ་འོག་ཀུན་དགའ་རིན་ཆེན་གྱི་ཀུང་སིས་ཐོན་སྐྱེད་བྱས་པའི་འབྲོག་ལས་ཐོན་རྫས་སོས་པ་དུས་ཐོག་ཏུ་གྲང་ཕྲེང་སྐྱེལ་འདྲེན་བྱས་ནས་ཁྲོམ་རར་ཕྱིར་ཚོང་ཐུབ་ཡོད། ལོ་གཅིག་ལྷག་ཙམ་རིང“སྦྲ་ནག་ཚང ”སྐྱེ་ཁམས་འབྲོག་ལས་ཐོན་ལས་འཕེལ་རྒྱས་ཚད་ཡོད་ཀུང་སིའི་དཀར་ཆུའི་ཐོན་རྫས་ཁོ་ནར་ཕྱིར་ཚོང་བྱེད་ཚད་སྒོར་ཁྲི་107ལྷག་ཙམ་ཟིན་པ་དང་ཁེ་སྤོགས་བསྡོམས་སྒོར་ཁྲི་37ལྷག་ཙམ་རག་སྟེ། ཆོས་སྐད་གྲོང་ཚོའི་མི་16ལས་ཞུགས་སྐུལ་ཁྲིད་ཐུབ་པ་དང་མཉམ་ལས་ཁང་གི་ཧྲེ་ཡོན་དུད་ཚང་38ལ་རིམ་རྩིས་བྱས་ན་སྒོར་ཁྲི་30.4བགོ་འགྲེམས་བརྒྱབ་ཡོད།

རི་བོ་ཆེ་རྫོང་གི་ཆ་སྙོམས་ས་བབ་མཐོ་ཚད་སྨི་4500ཙམ་ཟིན་ཞིང་། རྩྭ་ཁ་བཟང་ལ་ཕྱུགས་རིགས་ཤ་ཤེད་རྒྱས་པ་དང་ཚགས་ཤའི་སྤུས་ཚད་ལེགས་པས། ཀྲུང་གོའི་རྒྱལ་ཁབ་ས་གཤིས་མཚོན་རྟགས་ཀྱི་ཐོན་རྫས་ཤིག་ཡིན། ཉེ་བའི་ལོ་ཤས་རིང་རི་བོ་ཆེ་རྫོང་གིས་ས་གནས་ཀྱི་དོན་དངོས་དང་ཟུང་འབྲེལ་བྱས་ནས“རི་བོ་ཆེའི་འབྲི་གཡག”གི་སྤུས་རྟགས་བཏོད་དེ་ནུས་ཤུགས་ཡོད་རྒུས་འབྲི་གཡག་ཐོན་ལས་ཀྱི་ལས་དོན་སྤེལ་ཤུགས་ཆེ་རུ་བཏང་བས་ས་གནས་ཀྱི་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བ་དང་ཞིང་འབྲོག་པའི་ཡོང་འབབ་མང་དུ་གཏོང་བའི་ཐད་ཕན་འབྲས་ཐོན་ཡོད།

མཉམ་དུ་མགྲོན་དུ་ཕེབས་པའི་བློ་བཟང་རྡོ་རྗེས་གསར་འགོད་པར་མིག་སྔར་རི་བོ་ཆེ་རྫོང་གིས་སྤུས་རྟགས་ཀྱི་ཕན་འབྲས་ལ་བརྟེན་ནས་འབྲི་གཡག་ཐོན་ལས་ཁེ་ལས་6རྒྱ་སྟོབས་ཆེ་རུ་བཏང་སྟེ་ཁེ་ལས་5ཡི་ཐོན་རྫས་15བཏོན་པ་དང་། རྩྭ་ར་མུའུ་400ཡི་སྐྱེ་ལྡན་ཁས་ལེན་དཔང་འདོན་རེ་ཞུའི་ལས་དོན་ལེགས་སྒྲུབ་བྱུང་ནས། ཚགས་ཤ་སྐམ་པོ་ཁ་ཚའི་བྲོ་བ་དང་ཚགས་ཤའི་རྩིབ་ཤ་སོགས་ཐོན་རྫས་རིགས་བཅུ་གྲངས་ཁ་ཤས་བཏོན་པའི་ནང་ཐོན་རྫས་13ལ་རྒྱལ་ཁབ་ཀྱི་ལྗང་མདོག་བཟའ་བཅའི་ཁས་ལེན་དཔང་འདོན་ར་སྤྲོད་ཐོབ་ཡོད་ཅེས་བཤད།

འབྲི་གཡག་ཐོན་ལས་སྐོར་གླེང་སྐབས་བློ་བཟང་རྡོ་རྗེས“གོམ་སྟབས་རྗེས་མར་རྫོང་ཡོངས་ཀྱིས་ས་ཁམས་མཚོན་རྟགས་ཀྱི་ཐོན་རྫས་ཀྱི་མིང་བྱང་ཡག་པོ་སྤྱད་དེ་འབྲི་གཡག་ཐོན་ལས་རྒྱ་སྟོབས་ཆེ་རུ་བཏང་ནས་འབྲོག་པ་རྣམས་འཚོ་བ་ཡག་པོ་སྐྱེལ་ཐུབ་པར་བྱེད་ཀྱི་ཡིན”ཞེས་སེམས་ཤུགས་ཆེན་པོས་བཤད།

དཔྱིད་གསར་དུས་ཆེན་སྐབས་རི་བོ་ཆེ་རྫོང་ཁྲ་མོ་གླིང་ཤང་ཆོས་སྐད་གྲོང་ཚོར་འབྲི་གཡག་ཐོན་ལས་འཕེལ་རྒྱས་ལ་དམིགས་པའི་འདུ་འཛོམས་འཁྲུག་པོ་ཞིག་བྱས་ཤིང་། དེ་གར་གསར་འགོད་པར“ས་མཐོའི་གྲུ་གཟིངས”ཞེས་སུ་གྲགས་པའི་འབྲི་གཡག་གིས་ཞིང་འབྲོག་པའི་ཕྱུག་འགྱུར་གྱི་ཕུགས་འདུན་མངོན་འགྱུར་དང་ས་མཐོའི་ཁྱད་ལྡན་ཐོན་ལས་འཕེལ་རྒྱས་ཀྱི་རེ་བ་མངོན་འགྱུར་བྱེད་བཞིན་ཡོད་པ་མྱོང་ཚོར་ཐུབ་བྱུང་།

(《འོད་ཟེར་ཉིན་རེའི་ཚགས་པར》ཐོག་2024ལོའི་ཟླ་2ཚེས་24ཉིན་གྱི་པར་ངོས་2པ་ནས་བརྒྱུད་འགོད་བྱས)