2023ལོར། ལྷོ་ཁ་གྲོང་ཁྱེར་ཁྲིམས་ཁང་ཁོངས་གཏོགས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་ལེན་བསྟར་བའི་བརྗོད་དོན་གཙོ་བོའི་སློབ་གསོ་ཏན་ཏིག་སྤེལ་ཏེ་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་། དྲིལ་བསྒྲགས། ལག་བསྟར་བཅས་བྱེད་པ་དང་། “དོན་ཆེན་བཞིར”དམིགས་པ་དང“འཛུགས་གཏོད་བཞི”དང་ལྷོ་ཁའི“ལྗོངས་ཡོངས་ཀྱི་མདུན་གྲལ་དུ་སླེབས་པ་དྲུག”ལ་ཤུགས་རྒྱག་པ། ལས་ཀའི་བརྗོད་དོན་གཙོ་བོ“དྲང་གཞག་དང་ལས་ཕྱོད”ལ་དམ་པོར་དམིགས་པ། སྤྱི་ཡོངས་ལ་ཞབས་འདེགས་དང་དམངས་ཆེད་ཁྲིམས་འཛིན་ཏན་ཏིག་སྒྲུབ་པ། འདྲི་གཅོད་ལས་དོན་དེང་རབས་ཅན་ལ་སྐུལ་འདེད་མྱུར་པོ་གཏོང་བ་བཅས་བྱས་ཏེ། ཁྲིམས་འཛིན་གྱི་ཞབས་ཞུ་ནུས་ལྡན་ལ་བརྟེན་ནས་ལྷོ་ཁའི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱས་པ་རེད།

བསྡོམས་རྩིས་བརྒྱབ་པར་གཞིགས་ན། 2023ལོར། ལྷོ་ཁ་གྲོང་ཁྱེར་ཁྲིམས་ཁང་ཁོངས་གཏོགས་ཀྱིས་གྱོད་གཞི་སྣ་ཚོཌ་5977བདག་སྤྲོད་བྱས་པ་དེ་དུས་མཚུངས་ལས་20.45%འཕར་བ་དང་། གྱོད་གཞི་5288འདྲི་གཅོད་ལག་བསྟར་བྱས་ནས་གྱོད་མཇུག་སྒྲིལ་བ་དེ་དུས་མཚུངས་ལས་16.52%འཕར་ཏེ་ཁྲིམས་གཏན་འཁེལ་བའི་འདྲི་གཅོད་དུས་བཅད་ནང་གྱོད་མཇུག་སྒྲིལ་ཚད་99.79%ཟིན་ཡོད་པ་རེད། ལྷོ་ཁ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་གྱོད་གཞི་319བདག་སྤྲོད་བྱས་པ་ནས་གྱོད་གཞི་278འདྲི་གཅོད་ལག་བསྟར་བྱས་ནས་གྱོད་མཇུག་བསྒྲིལ་ཏེ་ཁྲིམས་གཏན་འཁེལ་བའི་འདྲི་གཅོད་དུས་བཅད་ནང་གྱོད་མཇུག་སྒྲིལ་ཚད་98.48%ཟིན་ཡོད་པ་རེད།

འགན་འཁྲི་གཙང་སྒྲུབ་ཀྱིས་དུས་བདེ་བསྲུངས་ནས། དངོས་སྒྲུབ་འགན་འཁུར་གྱིས་འཕེལ་རྒྱས་ལ་སྐུལ་འདེད་བཏང་བ།

ལོ་གཅིག་གི་རིང་། ལྷོ་ཁ་གྲོང་ཁྱེར་ཁྲིམས་ཁང་ཁོངས་གཏོགས་ཀྱིས་ཐོག་མཐའ་བར་གསུམ་དུ་སྤྱི་ཚོགས་ཀྱི་བརྟན་ལྷིང་སྲུང་སྐྱོང་བྱེད་པ་དེ་ལས་འགན་ཨང་དང་པོར་བརྩིས་ནས་ཆུ་ཚད་མཐོ་བའི་དུས་བདེའི་ལྷོ་ཁ་འཛུགས་སྐྲུན་ལ་ཕྱོགས་ཡོངས་ནས་རམ་འདེགས་བྱས་ཏེ། རྒྱལ་ཁབ་ཀྱི་བདེ་འཇགས་ལ་གནོད་འཚེ་བཟོ་བའི་ཉེས་གསོག་ལ་ཆད་པ་ནན་པོ་བཅད་པ་དང་ཉེས་དོན་ཉེས་གསོག་ལ་རྡུང་རྡེག་ཚ་ནན་བཏང་བ་རེད།

རྐུ་རྒྱག་དང་། རྒན་གསོའི་ཁ་བསླུས། གློག་འཕྲིན་ཁ་བསླུས་སོགས་རྒྱུ་ནོར་ལ་གནོད་འཚེ་བཟོ་བའི་ཉེས་གསོག་གྱོད་གཞི་58དང་མི་93ལ་ཞིབ་གཅོད་མཇུག་སྒྲིལ་བ་དང་། ཉེན་ཆེའི་འཁོར་གཏོང་དང་འགྲིམ་འགྲུལ་ཆག་སྒོ་སློང་བ་སོགས་སྤྱི་པའི་བདེ་འཇགས་ལ་གནོད་འཚེ་བཟོ་བའི་གྱོད་གཞི་70དང་མི་70ལ་འདྲི་གཅོད་མཇུག་བསྒྲིལ་བ། “འཆལ་རྒྱན་དུག་གསུམ”སོགས་དང་འབྲེལ་བའི་སྤྱི་ཚོགས་ཀྱི་དོ་དམ་སྒྲིག་ལམ་ལ་གནོད་སྐྱོན་བཟོ་བའི་ཉེས་གསོག་གྱོད་གཞི་13དང་མི་33ལ་འདྲི་གཅོད་མཇུག་བསྒྲིལ་བ། ཁྲིམས་ལྟར་མི་16དུས་བཀག་བཙོན་འཇུག་ལོ་5ཡན་བྱས་པ། གཤེད་འབྲེལ་ཉེས་གསོག་རིགས་དགུའི་གྱོད་གཞི་8དང་མི་21ལ་འདྲི་ཞིབ་བྱས་པ། ལྐོག་ཟ་ལྐོག་རྔན་སོགས་ལས་གནས་ཉེས་གསོག་ཀྱི་གྱོད་གཞི་11དང་མི་13ལ་འདྲི་གཅོད་མཇུག་བསྒྲིལ་བ་བཅས་རེད།

ཏང་ལ་དོ་དམ་དང་ཉེན་རྟོག་བཅོས་སྐྱོང་ཟབ་ཏུ་བཏང་ནས་ལས་སྒྲུབ་ལས་གཏོད་ཀྱི་སྲོལ་གསར་བཏོད་པ།

ལོ་གཅིག་གི་རིང་། ལྷོ་ཁ་གྲོང་ཁྱེར་ཁྲིམས་ཁང་ཁོངས་གཏོགས་ཀྱིས་ཐོག་མཐའ་བར་གསུམ་དུ་ཕྱོགས་ཡོངས་ནས་ཏང་ལ་དོ་དམ་ནན་པོ་དང་ཉེན་རྟོག་བཅོས་སྐྱོང་དང་དེ་བཞིན་སྤྱོད་གཙང་གཞུང་ཞེན་ལ་བརྟེན་ནས་སྲོལ་གསར་གཏོད་པ་དེ་གནས་བབ་གལ་ཆེན་དུ་བཞག་ནས་འཇོན་ཐང་ཆེ་རུ་དང་སྤྱོད་ཚུལ་ལེགས་སུ་བཏང་སྟེ་སྤྱོད་གཙང་གཞུང་དྲང་དང་ལས་སྒྲུབ་ལས་གཏོད་ཀྱི་རྣམ་པ་བཟང་པོ་ཞིག་བཏོད་པ་རེད།

ཁྲིམས་འཛིན་གྱི་ནུས་པ་འཛུགས་སྐྱོང་ལ་ཤུགས་སྣོན་བརྒྱབ་སྟེ་མཁོ་བསྟུན་ཐབས་སྤྱོད་དང་གསོ་སྦྱོང་ལ་ཤུགས་སྣོན་བརྒྱབ་ནས་ཏང་གི་སློབ་གྲྭ་དང་གོང་རིམ་ཁྲིམས་ཁང་གིས་སྒྲིག་འཛུགས་བྱས་པའི་གསོ་སྦྱོང་སྣ་ཚོགས་ལ་ཞུགས་པ་དང་། བཅའ་ཁྲིམས་སྤྱོད་པར་འཚམ་པ་དང་། མང་ཚོགས་ཀྱི་ལས་དོན། ཆ་འཕྲིན་ཅན་ཉེར་སྤྱོད་སོགས་ཀྱི་འཇོན་ཐང་ཆེ་རུ་གཏོང་བར་ཤུགས་བརྒྱབ་པ་དང་། རྒྱ་བོད་སྐད་ཡིག་གཉིས་ཤེས་ཀྱི་ཁྲིམས་འཛིན་ཤེས་ལྡན་པ་གསོ་སྐྱོང་གསོ་སྦྱོང་བྱེད་པར་སྣང་ཆེན་བྱས་ཏེ། འདྲི་གཅོད་བྱེད་རིང་རྒྱ་བོད་སྐད་ཡིག་གཉིས་ཀ་སྤྱོད་ཚད་རྒྱུན་ཆད་མེད་པར་མང་དུ་བཏང་ཐོག་མང་ཚོགས་ཀྱི་ཁྲིམས་འཛིན་དགོས་མཁོ་དེ་བས་ལེགས་པར་བསྐངས་བ། རིག་ལྡན་ཁྲིམས་ཁང་གི་རིམ་པ་4.0སྤོར་བའི་གྲུབ་འབྲས་བེད་སྤྱོད་ལ་སྐུལ་འདེད་བཏང་སྟེ་དམངས་ཆེད་ཁྲིམས་འཛིན་དང་དྲང་གཞག་ཁྲིམས་འཛིན་གྱི་ཕན་འབྲས་དངོས་ལ་སྔར་བས་བསྒྱུར་པ། སྣེ་གདོང་ཆུས་མི་དམངས་ཁྲིམས་ཁང་གིས“དབྱེ་འདུམ་ཁྲུན་ཞིབ་བཞིའི”སྒྱུར་བཅོས་ལས་དོན་གྱི་ཉམས་མྱོང་ལྗོངས་ཡོངས་ཀྱི་ཁྲིམས་ཁང་དུ་ཁྱབ་གདལ་བཏང་བས་ཆེས་མཐོའི་མི་དམངས་ཁྲིམས་ཁང་གིས“གཅིག་འཐུས་རྣམ་པའི”ལས་དོན་གྱི་ཆེད་དོན་སྙན་ཞུ་བཟོས་ཏེ་རྒྱལ་ཡོངས་ཀྱི་ཁྲིམས་ཁང་ལ་བརྒྱུད་བསྐུར་བྱས་ཡོད།

དམངས་ཆེད་ཁྲིམས་འཛིན་གྱིས་ཐོག་མའི་བསམ་འདུན་བསྒྲུབས་ཏེ། སྤྱི་ཡོངས་ལ་ཞབས་འདེགས་ཞུས་ནས་འགན་འཁྲི་ཁུར་སེམས་མངོན་པ།

“ཁྲིམས་ཁང་གིས་ང་ཚོ་ཞིང་པ་ལས་མིར་ཐུགས་བསམ་བཞེས་ པར་ཐུགས་རྗེ་ཆེ་ཞུ་གི་ཡིན། ཞུ་གཏུག་གོང་གི་འདུམ་འགྲིག་ལས་དོན་དངོས་གནས་མགྱོགས་པོ་འདུག དུས་ཚོད་མང་པོ་ཞིག་གྲོན་ཆུང་ཐུབ་སོང”ཞེས་འདུམ་འགྲིག་གྲོས་མཐུན་བཞག་རྗེས་བསྟན་ཆེ་གེ་མོ་སོགས་ཀྱིས་དགའ་ཚོར་ཆེན་པོས་ལྷོ་བྲག་རྫོང་མི་དམངས་ཁྲིམས་ཁང་གི་འདུམ་འགྲིག་པར་དེ་ལྟར་བརྗོད། ན་ནིང་ལོ་མཇུག་ཏུ། ལྷོ་བྲག་རྫོང་མི་དམངས་ཁྲིམས་ཁང་གིས་ཞུ་གཏུག་གོང་གི་འདུམ་འགྲིག་ལས་དོན་སྤེལ་ཐབས་ལ་བརྟེན་ནས། ཞིང་པ་ལས་མི་14ཡི་གླ་ཆ་སྒོར་52038དང་འབྲེལ་བ་ཡོད་པའི་རྩོད་གཞི་ཞིག་གྲུབ་འབྲས་ཐོབ་པའི་ངང་འདུམ་འགྲིག་བྱས་པ་དང་། ཞུ་གཏུག་གོང་གི་འདུམ་འགྲིག་གི་གྱོད་དོན་ཐོ་འགོད་ནས་གྱོད་མཇུག་སྒྲིལ་བའི་བར་ཉིན་གཅིག་ལས་མ་འགོར་བར་ཞིང་པ་ལས་མིའི་ཁེ་དབང་འགན་སྲུང་ནུས་ལྡན་ཐུབ་པ་མ་ཟད་དམངས་ཆེད་ལས་དོན་སྒྲུབ་པའི་ཐོག་མའི་བསམ་འདུན་ཡང་མངོན་ཡོད།

ལོ་གཅིག་གི་རིང་། ལྷོ་ཁ་གྲོང་ཁྱེར་ཁྲིམས་ཁང་ཁོངས་གཏོགས་ཀྱིས་ལག་བསྟར་གྱོད་གཞི་2434བདག་སྤྲོད་བྱས་པ་དང་། གྱོད་གཞི་2059ལག་བསྟར་བྱེད་མཇུག་བསྒྲིལ་ནས་དངུལ་སྒོར་ཁྲི་29452.44གནད་སར་འབྱོར་བར་བྱས་ཏེ་ལག་བསྟར་བྱེད་མཇུག་སྒྲིལ་ཚད་ལྗོངས་ཡོངས་ཀྱི་ཨང་དང་པོར་སླེབས་ཡོད། ཆུ་གསུམ་དང་། མཚོ་སྨད། འཕྱོངས་རྒྱས། གྲ་ནང་། ཟངས་རི་སོགས་རྫོང་དྲུག་གི་མི་དམངས་ཁྲིམས་ཁང་གི་ལག་བསྟར་བྱེད་མཇུག་སྒྲིལ་ཚད་ལྗོངས་ཡོངས་ཀྱི་ཁྲིམས་ཁང་གི་མདུན་གྲལ་བཅུ་ལ་སླེབས་པ་དང་། ལྷོ་ཁ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ལག་བསྟར་ཅུས“རྒྱལ་ཡོངས་ཁྲིམས་ཁང་གི་སྔོན་ཐོན་མཉམ་སྡེབ”ལ་བདམས་ཡོད།