དུས་རབས་གསར་པའི་ཏང་གི་བོད་སྐྱོང་མཛད་ཇུས་ཕྱོགས་ཡོངས་ནས་ལག་བསྟར་དོན་འཁྱོལ་བྱ་ཆེད། ཧྲེན་དབྱང་གྲོང་ཁྱེར་གྱི་བོད་སྐྱོར་ལས་དོན་རུ་ཁག་ཁག་བཅུ་པས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་རྒྱུ་བོད་སྐྱོར་ལས་དོན་གྱི་རྩ་བ་དང་བླ་སྲོག་ལ་བརྩིས་ནས། མི་རིགས་མཐུན་སྒྲིལ་ལ་སྐུལ་འདེད་ཏན་ཏིག་གཏོང་བ་དང་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཀྱི་རྨང་གཞི་རྒྱུན་ཆད་མེད་པར་བརྟན་དུ་བཏང་སྟེ། ཧྲེན་དབྱང་དང་ཨ་མདོ་ས་ཁུལ་གཉིས་ཀྱི་སློབ་གསོའི་ཁོངས་གཏོགས་སྒྲིག་འཛུགས་བྱས་ནས“ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི”བརྗོད་དོན་གཙོ་བོའི་བྱེད་སྒོ་རབ་དང་རིམ་པ་སྤེལ་བ་རེད།

ཧྲེན་དབྱང་གྲོང་ཁྱེར་གྱི་བོད་སྐྱོར་ལས་དོན་རུ་ཁག་ཁག་བཅུ་པས་2023ལོའི་ཟླ་6པ་དང་ཟླ་11པར་ཨ་མདོའི་གཞོན་ནུ་ལོ་ཆུང་སྒྲིག་འཛུགས་བྱས་ཏེ་ཧྲེན་དབྱང་དུ་བསྐྱོད་ནས“ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་དགོས་པའི”བརྗོད་དོན་གཙོ་བོར་བྱས་པའི་ཞིབ་འཇུག་སློབ་སྦྱོང་གི་བྱེད་སྒོ་ཐེངས་གཉིས་སྤེལ་བ་རེད། ཨ་མདོའི་གཞོན་ནུ་ཚོ་སྤྱི་ལེ་སྟོང་ཕྲག་ཁ་ཤས་བརྒལ་ཏེ་སྤྲོ་སེམས་ཀྱིས་ཕྱུག་པའི་ཧྲེན་དབྱང་གི་ལེའོ་ཉིང་ཀྲུང་ལུགས་གསོ་རིག་སློབ་ཆེན་དུ་ཕྲུ་གུ་ཚོས“གཞུང་བཞི་དང་བསྟན་བཅོས་ལྔ”དང་། “ཆི་ཧོང་གི་ལག་རྩལ” “ལྟ་ཉན་འདྲི་བརྟག་བཞི”སོགས་དང་ཕུན་སུམ་ཚོགས་པའི་ཀྲུང་ལུགས་གསོ་རིག་གི་ཤེས་བྱ་ཤེས་རྟོགས་བྱས། ཁོང་ཚོས་ཀྲུང་ལུགས་གསོ་རིག་ཤེས་འདོད་བྱེད་པའི་འདོད་བློ་ཁེངས་པར་བྱས་པ་མ་ཟད། ཕྲུ་གུ་ཚོས་ལྟ་སྐོར་དང་ཤེས་རྟོགས་བྱས་པ་བརྒྱུད་ཀྲུང་ལུགས་གསོ་རིག་གི་ཡིད་དབང་འཕྲོག་ཤུགས་དང་གཏིང་ཟབ་ཚད་རྒྱུས་ལོན་ཐུབ་པ་དང་། ལེའོ་ཉིང་ཞིང་ཆེན་ཚོད་ལྟའི་སློབ་འབྲིང་དང་ཧྲེན་དབྱང་གྲོང་ཁྱེར་གྱི་སློབ་འབྲིང་བཅུ་གཅིག་པར་ཕྲུ་གུ་ཚོས་ནང་སའི་སློབ་གྲྭ་གྲགས་ཅན་གྱི་གཏིང་ཟབ་པའི་རིག་གནས་ཀྱི་ནང་དོན་དང་། སློབ་སྦྱོང་གི་རྣམ་པ་ཟབ་མོ། སྐྱེ་སྟོབས་ཀྱི་དཔལ་འབར་བའི་ལང་ཚོའི་རྣམ་པ་བཅས་མྱོང་ཚོར་ཟབ་མོ་ཐུབ་པ་དང་། ཕྲུ་གུ་ཚོས་ནང་སའི་ན་ཟླ་ཚོ་དང་བར་ཐག་ཉེ་པོས་འབྲེལ་གཏུག་དང་སློབ་སྦྱོང་གི་ཉམས་མྱོང་སྤེལ་རེས་བྱས་ནས་མེས་རྒྱལ་ལ་དྲིན་ལན་འཇལ་བ་དང་འཇོན་ཐང་ཅན་དུ་འགྱུར་བར་བྱེད་པའི་ཕུགས་འདུན་ཨ་མདོའི་གཞོན་ནུ་ལོ་ཆུང་ཚོའི་སེམས་ལ་ཟུག་པར་བྱས་པ། ཧྲེན་དབྱང་གྲོང་ཁྱེར་གྱི་སློབ་འབྲིང་43པ་དང་ཧྲེན་དབྱང་གྲོང་ཁྱེར་ཐུང་ཧུའེ་སློབ་ཆུང་དུ་ཕྲུ་གུ་ཚོས་ནང་སའི་དགེ་སློབ་ཚོ་དང་མཉམ་དུ་སློབ་ཚན་འཚོག་པ་དང་། མཉམ་དུ་སྙན་ངག་ཀློག་པ། མཉམ་དུ་གཞས་གཏོང་བ་བཅས་བྱས་ཏེ་ཁོང་ཚོའི་དབར་གྱི་སེམས་ཐག་ཉེ་རུ་བཏང་ནས་མི་རིགས་མཐུན་སྒྲིལ་ཡར་ཐོན་གྱི་སློབ་གསོ་དང་གཞོན་ནུ་ལོ་ཆུང་གི་བསམ་བློ་ཆབ་སྲིད་ཀྱི་ཁྲིད་སྟོན་མཉམ་འདྲེས་གཏིང་ཟབ་བྱས་ཏེ་བོད་རིགས་དང་རྒྱ་རིགས་སློབ་མའི་སེམས་སུ་མི་རིགས་མཐུན་སྒྲིལ་གྱི་ས་བོན་བཏབ་པ་རེད།

ཨ་མདོ་རྫོང་སློབ་འབྲིང་གི་སློབ་གྲོགས་རིན་ཆེན་བག་གྲོས“དེ་ནི་་ངའི་ངོས་ནས་བརྗོད་ན་ད་ཐེངས་ཀྱི་བྱེད་སྒོ་མཐོང་རྒྱ་ཆེ་རུ་དང་ཤེས་རྒྱ་ཟབ་ཏུ་གཏོང་བའི་གོ་སྐབས་ཤིག་རེད། ད་རེས་ཀྱི་ཞིབ་འཇུག་སློབ་སྦྱོང་གི་བྱེད་སྒོའི་ནང་ཞུགས་པ་བརྒྱུད་ཕ་ཡུལ་ཕུད་པའི་ངོ་མཚར་ཆེ་བའི་འཛམ་གླིང་ཞིག་མཐོང་བྱུང་བས་མེས་རྒྱལ་འཛུགས་སྐྲུན་གྱི་གྲུབ་འབྲས་རླབས་པོ་ཆེར་དངོས་གནས་སྤོབས་པ་སྐྱེ་འོས་པ་ཞིག་འདུག”ཅེས་བཤད།

ཨ་མདོའི་གཞོན་ནུ་ལོ་ཆུང་ཚོས་ལེའོ་ཉིང་ཧྲེན་དབྱང་དུ“9·18”ལོ་རྒྱུས་རྟེན་རྫས་བཤམས་མཛོད་ཁང་དང་། བྱང་ཤར་རི་འགོག་མཉམ་འབྲེལ་དམག་དཔུང་གི་ལོ་རྒྱུས་སྒྲིག་གཤོམ་ཁང་། ཨ་འགོག་ཁྲའོ་རོགས་ཀྱི་སྔོན་གཤེགས་དཔའ་བོའི་བང་སོའི་སྐྱེད་ཚལ། ཧྥུའུ་ཧྲུན་གྲོང་ཁྱེར་གྱི་ལེ་ཧྥུང་དྲན་གསོ་ཁང་སོགས་ལ་ལྟ་སྐོར་བྱས་ཤིང་། རི་འགོག་དམག་འཁྲུག་གི་ལོ་རྒྱུས་དང་། ཨ་འགོག་ཁྲའོ་རོགས་ཀྱི་ལོ་རྒྱུས། སྤྱི་མཐུན་རྒྱལ་ཁབ་ཀྱི་བཟོ་ལས་དར་འཕེལ་ལོ་རྒྱུས་བཅས་ཀྱིས་བོད་བྱང་ཐང་གི་དགེ་སློབ་ཚོའི་སེམས་ལ་གཡོ་འགུལ་ཐེབས་པ་དང་ཆབས་ཅིག ཀྲུང་གོ་གུང་ཁྲན་ཏང་གིས་བློ་བརྟན་འགྱུར་མེད་ངང་མི་དམངས་ལ་བདེ་སྐྱིད་བསྐྲུན་པ་དང་མི་རིགས་བསྐྱར་དར་ཡོང་བར་བྱེད་པའི་ཐོག་མའི་བསམ་འདུན་རླབས་པོ་ཆེར་གོ་བ་གཏིང་ཟབ་ལོན་པ་མ་ཟད། ད་དུང་མ་འོངས་པར་ཕན་ཚུན་ཚང་མ་ལག་གདང་སྦྲེལ་ནས་མིག་དཔེའི་སྟོབས་ཤུགས་བསྡུ་ལེན་བྱས་ཏེ་བློ་སེམས་གཅིག་མཐུན་ངང་སྙིང་སྟོབས་དང་ཁྲག་རྒྱུན་རྒྱུན་འཛིན་བྱེད་པའི་ལྕག་སྐུལ་ཡང་ཐུབ་ཡོད་པ་རེད།

ཨ་མདོ་རྫོང་སློབ་འབྲིང་གི་སློབ་གྲོགས་གཡུ་མཚོ་ལྷ་མོས“ད་ཐེངས་ཀྱི་བྱེད་སྒོ་བརྒྱུད། ངས་དཔེ་དེབ་ཁྲི་ཀློག་དགོས་ལ་ལེ་དབར་ཁྲིར་དེ་བས་ཀྱང་སྐྱོད་དགོས་པའི་གནས་ལུགས་ཤེས་བྱུང་། ལོ་རྒྱུས་མང་པོ་ཞིག་ཤེས་ནས་ཤེས་རྒྱ་ཆེ་རུ་ཕྱིན་སོང”ཞེས་བཤད།

ཨ་མདོའི་གཞོན་ནུ་ལོ་ཆུང“ཕྱིར་བསྐྱོད་པ”དང་དུས་མཚུངས་ཧྲེན་དབྱང་གི་བོད་སྐྱོར་ལས་དོན་རུ་ཁག་ཁག་བཅུ་པས་ཀྱང“བོད་དུ་གདན་འདྲེན་ཞུ་བའི”ལས་དོན་ཧུར་ཐག་སྤེལ་ནས་ས་ཆ་དེ་གཉིས་ཀྱི་དགེ་སློབ་ཕྱོགས་གཉིས་ཀར་བསྐྱོད་རྒྱུར་སྐུལ་འདེད་བཏང་ཞིང་། 2023ལོའི་ཟླ་བཅུ་གཅིག་པར་ཧྲེན་དབྱང་གི་སློབ་གསོའི་རིགས་གཅིག་མཁས་ཅན་ཨ་མདོར་གདན་དྲངས་ནས་ས་ཁུལ་གཉིས་པོའི་འགོ་ཁྲིད་དང་དགེ་རྒན་གྱི་འཐུས་མིས་མཉམ་དུ་སློབ་གསོ་འཕེལ་རྒྱས་གཏོང་རྒྱུའི་སྐོར་གྱི་བཞུགས་མོལ་ཚོགས་འདུ་འཚོགས་པ་དང་། ཧྲེན་དབྱང་གྲོང་ཁྱེར་ཧོང་ཀུའུ་ཆུས་སློབ་གསོ་ཅུས་ཀྱིས་ད་དུང་ཨ་མདོ་རྫོང་སློབ་གསོ་ལུས་རྩལ་ཅུས་དང་ཁ་གཏད་རོགས་སྐྱོར་གྱི་གྲོས་མཐུན་བཞག་ནས། “ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་བསམ་བློ་དང་ཆབ་སྲིད་གཞི་གཅིག་ཅན་གྱི་མཉམ་ལས་མནའ་འབྲེལ་ཆེན་པོ”ཡང་བཙུགས་པ་རེད།

ཧྲེན་དབྱང་གྲོང་ཁྱེར་གྱི་དགེ་རྒན་ཧུའུ་དབྱིངས་ཀྱིས“ཨ་མདོར་ཡོང་ནས་བྱེད་སྒོ་སྤེལ་བ་བརྒྱུད། ས་བབ་མཐོ་ཁུལ་དུ་དཀའ་ངལ་ཧ་ཅང་ཆེ་བ་དང་། ས་གནས་འདི་གའི་དགེ་རྒན་ཚོས་རང་ཉིད་ཀྱི་བྱང་ཚད་མཐོ་རུ་གཏོང་འདོད་ཆེན་པོ་ཡོད་པ་ཚོར་ནས། རང་ཉིད་ཀྱི་སྙིང་སྟོབས་ལ་ཡང་སྦྱོང་བརྡར་ཐེབས་བྱུང་། སླད་ཕྱིན་ཨ་མདོའི་དགེ་རྒན་ཚོ་དང་མཉམ་དུ་མི་སྣ་གསོ་སྐྱོང་བྱེད་ངེས་ཡིན”ཞེས་བཤད།

“ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི”བརྗོད་དོན་གཙོ་བོའི་བྱེད་སྒོ་རབ་དང་རིམ་པ་སྤེལ་བ་ལས། ཨ་མདོ་དང་ཧྲེན་དབྱང་ས་ཁུལ་གཉིས་ཀྱི་གཞོན་ནུ་ལོ་ཆུང་དབར་གྱི་འགྲོ་འོང་སྤེལ་རེས་དང་མཉམ་འདྲེས་དང་། སྤུན་ཟླའི་དབར་གྱི་མཛའ་མཐུན། ལྟ་རེས་དང་སྐྱོང་རེས་བཅས་བྱེད་པར་སྐུལ་འདེད་ཐེབས་ནས། ས་ཁུལ་དེ་གཉིས་ཀྱི་སློབ་མ་ཚོ་སེ་འབྲུའི་རྡོག་ལྟར་གོང་བུ་གཅིག་ཏུ་བསྒྲིལ་བ་དང་། ཕྲུ་གུ་ཚོ་དང་འབྱུང་འགྱུར་མི་རབས་ཕྱི་མར་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་ཚུགས་ནས་མི་རིགས་མཐུན་སྒྲིལ་གྱི་བསམ་བློའི་རྨང་གཞི་བརྟན་དུ་གཏོང་བཞིན་ཡོད་པ་རེད།