ས་མཐོའི་རླུང་གཞོང་གྱི་ཤུགས་རྐྱེན་འོག སྔོན་དཔག་བྱས་ན། ཟླ་2ཚེས་20ཉིན་ནས་ཚེས་23ཉིན་བར་རང་ལྗོངས་ཀྱི་ཤར་རྒྱུད་དང་ལྷོ་རྒྱུད་དུ་གངས་སམ་ཆར་པ་འབབ་པའི་གནམ་གཤིས་སྟོན་རྒྱུ་དང་། དུས་མཚམས་ཁག་གཅིག་ཏུ་གངས་སམ་ཆར་པ་འབབ་ཚད་ཆེ་ཙམ་ཡོད། ཚེས་24ཉིན་ནས་བཟུང་། གངས་སམ་ཆར་པ་འབབ་ཚད་ཉུང་དུ་འགྲོ་རྒྱུ་དང་། ལྗོངས་ཡོངས་ཀྱི་ས་ཆ་མང་ཆེ་བར་ལྷགས་པ་ཆེན་པོ་རྒྱག་པའི་གནམ་གཤིས་སྟོན་རྒྱུ་རེད།

གནམ་གཤིས་སྟོན་ཚུལ་གཙོ་བོ།

ཚེས་20ནས་23ཉིན་བར། ཉིང་ཁྲི་དང་གཞིས་རྩེའི་ལྷོ་རྒྱུད་དུ་གངས(ཆར་པ)ཆུང་བ་ནས་འབྲིང་བའི་བར་འབབ་རྒྱུ་དང་། དེའི་ནང་གཉའ་ལམ་དང་། ཕག་རི། མེ་ཏོག སྤོ་བོའི་ས་ཆ་ཁ་ཤས་བཅས་སུ་གངས་ཆེ་བ་འབབ་རྒྱུ་དང་། མངའ་རིས་དང་། གཞིས་རྩེའི་ནུབ་རྒྱུད། ལྷོ་ཁའི་ལྷོ་རྒྱུད། ཆབ་མདོའི་བྱང་རྒྱུད། ལྷ་སའི་བྱང་རྒྱུད། ནག་ཆུའི་དབུས་རྒྱུད་དང་ཤར་རྒྱུད་བཅས་སུ་གངས་ཆུང་བ་འབབ་རྒྱུ་དང་ས་ཆ་ཁ་ཤས་སུ་གངས་འབྲིང་བ་འབབ་རྒྱུ། གངས་བབས་རྗེས་ནུབ་ནས་ཤར་དུ་དྲོད་ཚད་4ནས་8℃བར་ཆག་རྒྱུ་རེད་འདུག

ཚེས་24ནས་26ཉིན་བར། ཉིང་ཁྲི་དང་། ཆབ་མདོའི་བྱང་རྒྱུད། མངའ་རིས་ཀྱི་ལྷོ་རྒྱུད་བཅས་སུ་གནམ་འཐིབས་ནས་གངས(ཆར་པ)ཆུང་བ་འབབ་རྒྱུ་དང་། ས་ཆ་ཁ་ཤས་སུ་གངས་འབྲིང་བ་འབབ་རྒྱུ། ནག་ཆུའི་ཤར་རྒྱུད་དང་། ལྷ་སའི་ཤར་རྒྱུད། གཞིས་རྩེའི་ལྷོ་རྒྱུད། ལྷོ་ཁའི་ལྷོ་རྒྱུད་བཅས་སུ་སྤྲིན་པ་མང་པོ་འཁོར་ནས་གངས་ཡུད་ཙམ་འབབ་རྒྱུ།

དེའི་རིང་མངའ་རིས་དང་། ནག་ཆུ། གཞིས་རྩེ། ལྷོ་ཁའི་ལྷོ་རྒྱུད་བཅས་སུ་ལྷགས་པ་ཆེ་བ་རིམ་པ་7ནས་8བར་རྒྱག་རྒྱུ་དང་། ས་ཆ་ཁ་ཤས་སུ་ལྷགས་པ་རིམ་པ་9ནས་10བར་ཡུད་ཙམ་རྒྱག་རྒྱུ། ལྷ་ས་དང་། ལྷོ་ཁའི་དབུས་རྒྱུད། ཆབ་མདོའི་བྱང་རྒྱུད་བཅས་སུ་ལྷགས་པ་རིམ་པ་5ནས་6བར་ཡུད་ཙམ་རྒྱག་རྒྱུ་རེད་འདུག་པས། བྱེ་རླུང་ལྡང་བའི་གནམ་གཤིས་སྟོན་སླ་པོ་ཡོད།

གནམ་གཤིས་སྡེ་ཚན་གྱི་གྲོས་འགོ

ཤར་རྒྱུད་དང་ལྷོ་རྒྱུད་དུ་གངས་བབས་པའི་གནམ་གཤིས་བསྟན་པ་ལས་ས་བབ་མཐོ་བའི་རི་ཁུལ་དུ་གངས་གསོག་ཐེབས་པ་དང་འཁྱགས་པ་རྒྱག་སླ་བས་འགྲིམ་འགྲུལ་བདེ་འཇགས་དོ་དམ་གྱི་ལས་དོན་ཡག་པོ་སྒྲུབ་དགོས།

གངས་སམ་ཆར་པ་བབས་པའི་རྐྱེན་གྱིས་འདམ་རྡོའི་ཆུ་རུད་དང་། རི་ཉིལ་བ། གངས་རུད་སོགས་ཀྱི་ཞོར་ཐོན་གནོད་འཚེ་ཐོན་པར་དོགས་ཟོན་བྱེད་དགོས་པ་དང་། གངས་བབས་པའི་གནམ་གཤིས་ཀྱིས་ཁྲོན་བོད་ལྕགས་ལམ་གྱི་ཨར་ལས་དང་དངོས་ཟོག་སྐྱེལ་འདྲེན་ཐད་ཤུགས་རྐྱེན་ངན་པ་བཟོ་བར་དོ་སྣང་བྱེད་དགོས།

ཉེ་དུས་རང་ལྗོངས་སུ་ལྷགས་པ་ཆེན་པོ་རྒྱག་པའི་གནམ་གཤིས་མང་པོ་སྟོན་པས་ལྷགས་པ་ཆེན་པོ་དང་། བྱེ་རླུང་། ཐལ་རླུང་བཅས་ཀྱི་གནམ་གཤིས་བསྟན་པ་ལས་འགྲིམ་འགྲུལ་སྐྱེལ་འདྲེན་དང་། གློག་ཤུགས་དང་འཕྲིན་གཏོང་སྒྲིག་ཆས། ལས་གྲྭ་གལ་ཆེན་འཛུགས་སྐྲུན། ནུས་རྒྱུ་མཁོ་སྤྲོད་འགན་ལེན། ཞིང་འབྲོག་ལས་ཐོན་སྐྱེད་དང་མང་ཚོགས་ཀྱི་འཚོ་བ་སོགས་ལ་ཤུགས་རྐྱེན་ངན་པ་བཟོ་བར་འགོག་ཟོན་བྱེད་དགོས་པ་དང་། དེ་དང་དུས་མཚུངས་ཕྱི་རོལ་དུ་ཕུབ་པའི་གུར་དང་བརྒྱབ་པའི་སྟབས་བདེའི་ཁང་པ་སོགས་བརྟན་དུ་གཏོང་དགོས།