དཔྱིད་ཀ་འཆར་ཉེར་ཡོད་ཀྱང་། མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཀྲོའུ་འབལ་རྫོང་རྐང་འབའ་སུམ་མདོ་གྲོང་རྡལ་དུ་སྔར་བཞིན་གྲང་ངར་ཧ་ཅང་ཆེ་ཞིང་། ཁང་ཕྱིའི་དྲོད་ཚད་ཀླད་ཀོར་འོག་གི་ཧྲེ་ཧྲི་ཏུའུ་13ཟིན་གྱི་ཡོད། ཡིན་ན་ཡང་། ལི་ཐང་ཁུལ་ཆུང་གི་ཡུལ་མི་དཀོན་མཆོག་ཚེ་རིང་གི་ཁྱིམ་དུ་ཧྲེ་ཧྲི་ཏུའུ་23ཙམ་ཟིན་ནས་ཚ་སོབ་སོབ་ཡོད་པ་རེད།

གཙང་གསུམ་ཆུ་འགོའི་མཐིལ་དུ་གནས་པའི་འབལ་རྫོང་གི་དགུན་ཁར་གྲང་ངར་ཧ་ཅང་ཆེ་ཞིང་ལོ་གཅིག་ནང་ཟླ་བ་7རིང་དྲོད་བཏང་ནས་མི་འཁྱག་པར་བྱེད་དགོས་ཀྱི་ཡོད། རྫོང་གྲོང་དུ་གཅིག་གྱུར་གྱི་དྲོད་བཏང་ནས་སྲོལ་རྒྱུན་ལྟར་ལྕི་བ་དང་རྡོ་སོལ་ལ་བརྟེན་ནས་དྲོད་ལེན་མི་དགོས་ཀྱང་། དྲོད་ལེན་སྒྲིག་བཀོད་རྗེས་ལུས་ཡིན་པས་དྲོད་གཏོང་བའི་ཕན་འབྲས་ཡག་པོ་མེད་པའི་ཁར་ཁོར་ཡུག་ཀྱང་སྔར་བཞིན་བཙོག་པ་བཟོ་གི་ཡོད། དེར་དམིགས་ཏེ། ནུས་རྒྱུ་གཙང་མར་བརྟེན་ནས་དྲོད་གཏོང་རྒྱུ་དེ་ཞིང་འབྲོག་མང་ཚོགས་ཀྱི་གྲང་ངར་ཆེ་བའི་དགུན་ཁའི་རེ་སྒུག་ཅིག་ཏུ་གྱུར་ཡོད་པ་རེད།

ཟླ་2ཚེས་1ཉིན། རྒྱུན་དུ་གངས་དེ་ཙམ་མི་བབས་པའི་འབལ་རྫོང་དུ་གློ་བུར་ཏུ་གངས་བབས་ནས་རྒྱང་རིང་གི་རི་བོ་དང་རྫོང་གྲོང་ལ་དངུལ་དཀར་གྱི་ལྭ་བ་གྱོན་པ་དང་། གྲང་རླུང་ལྡང་ཞིང་བགྲོད་ལམ་ཁག་ཀྱང་ཁ་བས་གཡོགས་པས་ལི་ཐང་ཁུལ་ཆུང་དུ་བསྐྱོད་པར་དུས་ཚོད་ཅུང་རིང་ཙམ་འགོར།

དཀོན་མཆོག་ཚེ་རིང་ཁྱིམ་དུ་དྲོ་སོབ་སོབ་ཡོད་ཅིང་སྒེའུ་ཁུང་ཁར་མེ་ཏོག་ཁ་ཤས་བཞག་ཡོད་པ་དང་། ཚོམས་ཆེན་གྱི་ཅོག་ཙེའི་སྟེང་དུ་ཏེན་ཞིམ་སྣ་ཚོགས་བསྒྲིགས་འདུག

“རྫོང་གྲོང་དུ་སྤོས་རྗེས། སྔོན་ཆད་ལྟར་རྡོ་སོལ་སྦར་ནས་དུ་བའི་ཁྲོད་སྡོད་མི་དགོས་ཀྱང་དེ་སྔའི་དྲོད་རླངས་དེ་ཚ་པོ་མི་འདུག ད་ཆ་ནུས་རྒྱུ་གཙང་མའི་དྲོད་འདོན་སྒྲིག་ཆས་བསྒར་བས་འདི་ལོའི་དགུན་ཁར་ཚ་སོབ་སོབ་དང་སྐྱིད་སྣང་དོད་པོ་འདུག”ཅེས་དཀོན་མཆོག་ཚེ་རིང་གིས་ཕྱིར་དྲན་བྱེད་བཞིན་ང་ཚོར་འོ་ཇ་བླུགས། སྡོད་ཁང་དྲོ་པོ་ཡོད་རྐྱེན་ཁོང་གིས་གྱོན་ཆས་སྲབ་མོ་ཞིག་ལས་གྱོན་མི་འདུག

འབལ་རྫོང་ནི་ཤར་ལྷོའི་དབར་རིང་ཞིང་ལྷོ་བྱང་དབར་དོགས་པ་ཞིག་ཡིན་ལ། རྫོང་གྲོང་གནས་སའི་རྐ་འབའ་སུམ་མདོ་གྲོང་རྡལ་གྱི་ས་བབ་མཐོ་ཚད་སྨི་3060ཟིན། དེ་སྔའི་དྲོད་གཏོང་སྒྲིག་ཆས་ཀྱི་དཀྱིལ་ལ་ཚ་པོ་ཤར་བ་མ་གཏོགས་གཞོགས་གཉིས་ཚ་པོ་བཟོ་ཐུབ་ཀྱི་མེད། ལོ་མང་པོ་ཕྱིན་པས་དྲོད་གཏོང་མདོང་དྲ་རྙིང་པ་ཆགས་ནས་གནད་དོན་མང་པོ་ཐོན་གྱི་ཡོད་པའི་ཁར། དྲོད་གཏོང་རྒྱ་ཁྱོན་ཆེ་དྲགས་པས་ཐག་རིང་སར་ཚ་པོ་ཤར་ཐུབ་ཀྱི་མེད། 2021ལོའི་ཟླ་བདུན་པར། མཚོ་སྔོན་ཞིང་ཆེན་སྲིད་གཞུང་དང་རྒྱལ་ཁབ་ནུས་རྒྱུ་ཅུས་ཀྱིས་འབལ་རྫོང་དེ་ཉིད་མཚོ་སྔོན་ཞིང་ཆེན་ནུས་རྒྱུ་གཙང་མའི་དྲོད་གཏོང་དཔེ་སྟོན་རྫོང་གཏོད་པའི་གྲས་སུ་བཅུག་པ་རེད།

ནུས་རྒྱུ་གཙང་མའི་དཔེ་སྟོན་རྫོང་བཏོད་པ། 2023ལོར། འབལ་རྫོང་གིས་ས་བབ་ཆགས་ཚུལ་གྱི་ལེགས་ཆ་དང་འོད་འཕྲོའི་ཆ་རྐྱེན་དང་དེ་བཞིན་རྒྱལ་ཁབ་ནུས་རྒྱུ་ཚོགས་པ་འབལ་རྫོང་ཆན་ཝ་ཁྲི་120རིམ་པའི་ནུས་རྒྱུ་གཙང་མའི་དྲོད་ལེན་གློག་ཁུངས་ལྷན་སྦྱར་རྣམ་གྲངས་ཀྱི་འོད་ཤུགས་འཛུགས་སྐྲུན་རྣམ་གྲངས་ཀྱི་དཔེ་སྟོན་ནུས་པ་བཅས་ལ་བརྟེན་ནས། རྫོང་གྲོང་དེའི་གྲོང་དོན་ཚ་དྲོད་མཁོ་འདོན་མདོང་དྲ་དང་ཚ་དྲོད་མཁོ་འདོན་ཡུག་ཁུལ་7གྱི་དྲོད་ཁུངས་དང་དེའི་ལེ་ལག་ཚང་སྒྲིག་གི་སྒྲིག་བཀོད་སྒྱུར་བཀོད་ཧུར་ཐག་བྱས་ནས། ཤང་དང་གྲོང་རྡལ་གྱི་སྤྱི་པའི་བཟོ་སྐྲུན་ཁག་གི་ནུས་རྒྱུ་གཙང་མའི་དྲོད་གཏོང་ལས་གྲྭ་འཛུགས་སྐྲུན་བྱས་པ་རེད། རྣམ་གྲངས་དེར་ཁྱོན་མ་དངུལ་སྒོར་དུང་ཕྱུར་3.09བཏང་ནས་ཚ་དྲོད་མཁོ་འདོན་གྱི་སྤྱིའི་རྒྱ་ཁྱོན་སྨི་ངོས་གྲུ་ཁྲི་117སྒྱུར་བཀོད་བྱས་པ་ལས་རྫོང་གྲོང་གི་འཆར་འགོད་ནུས་རྒྱུ་གཙང་མའི་ཚ་དྲོད་མཁོ་འདོན་རྒྱ་ཁྱོན་སྨི་ངོས་གྲུ་ཁྲི་109ཟིན་པ་དང་། ཤང་དང་གྲོང་རྡལ་གྱི་སྤྱི་པའི་སྒྲིག་བཀོད་གཞི་ཁྱོན་སྨི་ངོས་གྲུ་ཁྲི་7.5ཟིན་ཡོད་པ་རེད།

གསར་འགོད་པ་དང་མཉམ་དུ་ཡོད་པའི་འབལ་རྫོང་འཕེལ་སྒྱུར་ཅུས་རྣམ་གྲངས་གཞུང་ལས་ཁང་གི་ཀྲུའུ་རེན་ཝང་ཅུན་པང་གིས་གསར་འགོད་པར་གནས་ཚུལ་གཉིས་འགྲེལ་བཤད་བརྒྱབ་པ་སྟེ། དང་པོ་སྐྱེ་ཁམས་ཐད། ནུས་རྒྱུ་གཙང་མའི་དྲོད་རླངས་མཁོ་འདོན་རྣམ་གྲངས་བསྐྲུན་ནས་གཉེར་སྐྱོང་བྱས་པས་རྫོང་ཡོངས་སུ་ལོ་ལྟར་རྡོ་སོལ་ཏུན་ཁྲི་2.5གྲོན་ཆུང་ཐུབ་པ་དང་། དབྱང་གཉིས་ཟི་འགྱུར་དང་དབྱང་གཉིས་ཐཱན་འགྱུར་འབུད་ཚད་སོ་སོར་ཏུན་212དང་ཏུན་65500ཉུང་དུ་ཕྱིན་ནས་འབལ་རྫོང་གི་མཁའ་རླུང་གི་སྤུས་ཚད་དང་ས་ཁུལ་གྱི་རང་བྱུང་སྐྱེ་ཁམས་ཁོར་ཡུག་ལེགས་སུ་ཕྱིན་ཏེ་མང་ཚོགས་ལ་དགུན་དུས་གཙང་ཞིང་བློ་བདེ་བའི་དྲོད་རླངས་ཉམས་ལེན་ཐུབ་ཡོད།

གཉིས་པ་དཔལ་འབྱོར་ཐད། ཚོད་རྩིས་བརྒྱབ་པ་ལྟར་ན་ནུས་རྒྱུ་གཙང་མས་དྲོད་རླངས་མཁོ་འདོན་བྱས་པ་ལས་འཁོར་རྒྱུག་གི་མ་གནས་ཟླ་རེར་སྨི་ངོས་གྲུ་རེ་ནས་སྒོར་3ནས་4.5བར་ཆུང་དུ་ཕྱིན་ཏེ་འབལ་རྫོང་གི་མང་ཚོགས་ཀྱི་འཚོ་བའི་མ་གནས་ཆུང་དུ་དང་འཚོ་བའི་སྤུས་ཚད་མཐོ་རུ་ནུས་ལྡན་ཕྱིན་ཡོད། དེ་དང་ཆབས་ཅིག་འབལ་རྫོང་དུ་ཨར་ལས་བྱས་པ་དེས་ནུས་རྒྱུ་གསར་པའི་སྒྲིག་ཆས་སོགས་ཐོན་ལས་འཕེལ་རྒྱས་ལ་སྐུལ་མ་ཐེབས་ནས་ས་ཁུལ་དེའི་མི་ལས་ཞུགས་ཐུབ་པ་དང་ཡུལ་དེ་གའི་དཔལ་འབྱོར་འཕེལ་རྒྱས་ལ་སྐུལ་ཁྲིད་ཐུབ་ཡོད།

དཀོན་མཆོག་ཚེ་རིང་གི་ཁྱིམ་ནས་ཐོན་ཏེ་སྨི་100ཙམ་བསྐྱོད་ན་ལི་ཐང་ཁུལ་ཆུང་གི་དྲོད་རླངས་མཁོ་འདོན་ས་ཚིགས་ཡིན་ཞིང་། ས་ཚིགས་དེར་ཚོད་འཛིན་སྒྲོམ་ཚན་ཆེ་གྲས་4གྲལ་སྟར་འགྲིག་པོས་བསྒྲིགས་ཡོད་པ་དང་། འཁོར་རྒྱུག་མདོང་ལམ་རེ་རེ་ཁོད་སྙོམས་ལ་གོ་རིམ་ལྡན་པའི་ངང་བཏིངས་ཡོད་པ། ལས་མི་ཚོས་དྲོད་རླངས་མཁོ་འདོན་སྒྲིག་ཆས་དང་དེ་བཞིན་མདོང་ལམ་གྱི་གཅུན་སྒོར་ཕྱོགས་ཡོངས་ནས་སྐོར་བཤེར་བྱེད་བཞིན་ཡོད་པ། དྲོད་ཁོལ་ལྡན་པའི་དྲོད་རླངས་དུད་ཁྱིམ་ཁག་ཏུ་དྲངས་པ་བཅས་ལས་མང་ཚོགས་ཀྱི་འཚོ་བར་དྲོ་སྐྱིད་སྦྱིན་པ་མ་ཟད། འཚོ་བའི་སྤུས་ཚད་ཀྱང་མཐོ་རུ་ཕྱིན་ཡོད།