ཉེ་ཆར། རྒྱལ་ཁབ་འཕེལ་སྒྱུར་ཨུ་ལྷན་གྱིས་བརྡ་ཐོ་བཏང་ནས་ས་ཁུལ་ཁག་དང་སྡེ་ཚན་ཁག་སྒྲིག་འཛུགས་བྱས་ཏེ་2024ལོའི་དཔྱིད་གསར་དུས་ཆེན་དང་དང་པོའི་བཅོ་ལྔའི་དུས་ཆེན་སོགས་འཛད་སྤྱོད་བྱེད་མང་བའི་གོ་སྐབས་དམ་འཛིན་གྱིས་2024ལོའི“འཛད་སྤྱོད་རོགས་སྐྱོར་གྱི་དཔྱིད་གསར་བྱ་སྤྱོད”སྤེལ་ཏེ། རིམ་ཁག་ལས་ཁུངས་དང་། ཁེ་ལས་དང་བྱ་གཞག་ཚན་པ། སྤྱི་ཚོགས་རྩ་འཛུགས། རྒྱ་ཆེའི་གྲོང་མི་མང་ཚོགས་བཅས་ཀྱིས་དུས་ཆེན་གྱི་འཛད་སྤྱོད་རོགས་སྐྱོར་ལས་དོན་ལ་ཧུར་ཐག་ཞུགས་ནས་ཁྲོམ་རའི་ཆོས་ཉིད་ལ་བརྩི་འཇོག་གང་ལེགས་བྱེད་པའི་སྔོན་འགྲོའི་ཆ་རྐྱེན་འོག་དབུལ་སྒྲོལ་ས་ཁུལ་སོགས་དར་རྒྱས་འགྲོ་འགོར་བའི་ས་ཁུལ་གྱི་ཐོན་རྫས་སྣ་ཚོགས་དང་རིག་གནས་ཡུལ་སྐོར་ཞབས་ཞུ་ཉོ་སྒྲུབ་དང་ཕྱིར་ཚོང་བྱེད་རོགས་བྱས་པར་སྐུལ་སློང་དང་འབོད་སྐུལ་བྱས་པ་རེད།

བརྡ་ཐོའི་ནང་2024ལོའི“འཛད་སྤྱོད་རོགས་སྐྱོར་གྱི་དཔྱིད་གསར་བྱ་སྤྱོད”ནང་འབྲེལ་ཡོད་ས་ཁུལ་དང་སྡེ་ཚན་ཁག་གིས་དབུལ་སྒྲོལ་ས་ཁུལ་སོགས་དར་རྒྱས་འགྲོ་འགོར་བའི་ས་ཁུལ་གྱི་ཁྱད་ལྡན་ཞིང་ལས་ཐོན་རྫས་ཀྱི་འཛད་སྤྱོད་ཉོ་སྒྲུབ་བྱེད་ཤུགས་ཆེ་རུ་བཏང་ནས། དབུལ་སྒྲོལ་ས་ཁུལ་དུ་རྫོང་ཁོངས་ཀྱི་རིག་གནས་ཡུལ་སྐོར་འཛད་སྤྱོད་ལ་ལྕག་སྐུལ་བྱས་ཏེ་དབུལ་སྒྲོལ་ས་ཁུལ་དང་ལྷག་པར་དུ“ཁུལ་གསུམ་དང་ཀྲོའུ་གསུམ”དང་། རྒྱལ་ཁབ་ཀྱི་གྲོང་གསེབ་དར་རྒྱས་ཀྱི་གཙོ་གནད་རོགས་སྐྱོར་རྫོང་། ཡུལ་གཞན་དུ་གནས་སྤོས་བཀོད་སྒྲིག་ཁུལ་བཅས་ཀྱི་ཐོན་རྫས་དང་ཞབས་ཞུ་ཕྱིར་ཚོང་བྱེད་ཤུགས་མུ་མཐུད་ཆེ་རུ་གཏོང་དགོས་པ་ཁ་གསལ་བཏོན་ཡོད།

བརྡ་ཐོའི་ནང་དར་རྒྱས་འགྲོ་འགོར་བའི་ས་ཁུལ་གྱི་ཁྱད་ལྡན་ཞིང་ལས་ཐོན་རྫས་ཀྱི་ཟོག་ཁུངས་སྒྲིག་འཛུགས་ཡག་པོ་བྱས་ཏེ། ཐོན་རྫས་ཕྱིར་ཚོང་ལམ་བུ་ཤར་གཏོང་ཐུབ་པ་དང་། ཐོན་རྫས་ཀྱི་སྤུས་ཚད་འགན་ལེན་ཡག་པོ་བྱེད་པ། གཙོ་གནད་ཁེ་ལས་ཀྱི་སྣེ་ཁྲིད་དང་སྐུལ་ཁྲིད་ཀྱི་ནུས་པ་འདོན་སྤེལ་ཏན་ཏིག་གིས་ཁྲོམ་ར་ཅན་གྱི་འཚོང་རོགས་ཀྱི་བསྡུར་ཚད་སྔར་བས་མཐོ་རུ་བཏང་ནས་ཁྲོམ་རའི་ལམ་སྲོལ་གྱི་གཙོ་ཁྲིད་ནུས་པ་འདོན་སྤེལ་བྱེད་པ། “མི་ཚང་མས་སྒྲུབ་ཐུབ་པ་དང་། མི་ཚང་མས་བྱེད་འདོད་པ། མི་ཚང་མས་བྱེད་ཐུབ་པ”བཅས་ཀྱི་འཛད་སྤྱོད་རོགས་སྐྱོར་གྱི་རྣམ་པ་བཟང་པོ་ཞིག་ཧུར་ཐག་བཏོད་དེ“ཁྲོམ་རས་གཙོ་ཁྲིད་དང་། ཕྱོགས་མང་ཞུགས་པ། དངོས་པོ་སྤུས་ཀ་དག་ལ་རིན་གོང་འཚམ་པ། མཉམ་ལས་གཉིས་ཕན”བཅས་ཀྱི་རྣམ་པ་བཟང་པོ་ཞིག་གཏོད་དགོས་པའི་བླང་བྱ་བཏོན་ཡོད།

ཉིན་ཤས་གོང་། ཁྲུང་ཆིང་དང་། ཧྲན་ཏུང་། ཀོང་ཏུང་། སི་ཁྲོན། ཧྲང་ཧའེ། ཧོ་ནན། ཧེ་ལུང་ཅང་སོགས་ས་ཁུལ་གྱིས་2024ལོའི“འཛད་སྤྱོད་རོགས་སྐྱོར་གྱི་དཔྱིད་གསར་བྱ་སྤྱོད”སྔ་རྗེས་སུ་སྤེལ་ཏེ་བརྗོད་དོན་གཙོ་བོའི་དྲིལ་བསྒྲགས་བྱེད་སྒོ་སྤེལ་བ་དང་། དྲ་ཐོག་བྱེད་སྒོའི་ཆེད་ཁུལ་འཛུགས་པ། དྲ་ཕྱིར་གཅིག་སྡུད་འགྲེམས་ཚོང་བྱེད་པ། ཆེད་མངགས་ཐོན་སྐྱེད་དང་ཕྱིར་ཚོང་སྦྲེལ་མཐུད་བཅས་བྱས་ནས་དབུལ་སྒྲོལ་ས་ཁུལ་གྱི་ཐོན་རྫས་དེ་བས་མང་བ་རྒྱལ་ཡོངས་ཀྱི་ཁྲོམ་ར་ཆེ་མོར་ཁྱབ་གདལ་གཏོང་བཞིན་ཡོད་པ་རེད།

ངོ་སྤྲོད་བྱས་པར་གཞིགས་ན། 2022ལོ་དང་2023ལོའི“འཛད་སྤྱོད་རོགས་སྐྱོར་གྱི་དཔྱིད་གསར་བྱ་སྤྱོད”ནང་ས་ཁུལ་ཁག་དང་སྡེ་ཚན་ཁག་གིས་ཕྱིར་ཚོང་ལ་རོགས་རམ་བྱེད་པའི་དངུལ་འབོར་རིམ་རྩིས་བྱས་ན་སྒོར་དུང་ཕྱུར་1700ཟིན་ནས་དབུལ་སྒྲོལ་མང་ཚོགས་ཀྱི་ཡོང་འབབ་མང་དུ་ནུས་ལྡན་ཕྱིན་ཡོད་པ། འཕེལ་རྒྱས་འགྲོ་འགོར་བའི་ས་ཁུལ་གྱི་ཁྱད་ལྡན་ཐོན་ལས་འཕེལ་རྒྱས་དང་ཐོན་རྫས་རིམ་སྤོར་དང་རྒྱལ་ནང་གི་འཛད་སྤྱོད་རྒྱུན་མཐུད་སླར་གསོ་དང་རྒྱ་ཆེར་འགྲོ་བར་སྐུལ་འདེད་བཏང་ཡོད།