ཉེ་དུས། ལྷོ་ཁ་གྲོང་ཁྱེར་སྣེ་གདོང་ཆུས་ཡར་སྟོད་ཤང་ཚེ་སྤོང་གྲོང་ཚོར་ཀྲའོ་ཝ་50ཡི་འགན་ལེན་རང་བཞིན་གྱི་གློག་དྲ་སྦྲེལ་མཐུད་ཀྱི་འོད་ཤུགས་གློག་གཏོང་རྣམ་གྲངས(གཤམ་དུ“ཚེ་སྤོང་གི་ཀྲའོ་ཝ་50ཡི་འོད་ཤུགས་རྣམ་གྲངས”ཞེས་བསྡུ་རྒྱུ)ཀྱི་གློག་དྲ་སྦྲེལ་མཐུད་ཐུབ་ནས་གློག་གཏོང་ཐུབ་ཡོད། འདི་ནི་མིག་སྔར་འཛམ་གླིང་ཐོག་ས་བབ་མཐོ་ཤོས་ཀྱི་འོད་ཤུགས་གློག་འདོན་རྣམ་གྲངས་ཤིག་ཡིན་པ་རེད།

ཚེ་སྤོང་གི་ཀྲའོ་ཝ་50ཡི་འོད་ཤུགས་རྣམ་གྲངས་ལ་ཆ་སྙོམས་ས་བབ་མཐོ་ཚད་སྨི་5100ཡོད་པའི་ནང་གློག་འདོན་ཤུགས་ཀྲའོ་ཝ་50ཟིན་པའི་འོད་ཤུགས་གླིང་དུ་འོད་ཤུགས་ཤེལ་ལེབ་ཁྲི་8ལ་ཉེ་བ་དང་། ཆན་ཧྥུའུ་110ཡི་གློག་ཤུགས་འཕར་ཚུགས་གཅིག་དང་ཆན་ཧྥུའུ་35ཡོད་པའི་འདུས་གྲུབ་གློག་སྐུད་ཀྱི་ལེ་ལག་ཚང་བའི་སྒྲིག་བཀོད་གསར་དུ་སྐྲུན་པ་ཚུད་ཡོད་པ་དང་། འོད་ཤུགས་གླིང་ཡོངས་ཀྱི་རྒྱ་ཁྱོན་མུའུ་800ལྷག་ཙམ་ཟིན་གྱི་ཡོད།

རྣམ་གྲངས་དེ་ལག་བསྟར་བྱེད་པའི་བརྒྱུད་རིམ་ནང་འཛུགས་སྐྲུན་བྱེད་མཁན་ཧྭ་གློག་བོད་ལྗོངས་ཀུང་སི་དང་རྣམ་གྲངས་སྐྲུན་ཡུལ་སྣེ་གདོང་ཆུས་ཡར་སྟོད་ཤང་ཏང་ཨུད་དང་སྲིད་གཞུང་གིས་མཉམ་ལས་གང་ལེགས་དང་མཐུན་སྦྱོར་ལ་ཤུགས་སྣོན་བརྒྱབ་སྟེ“མྱུར་ཚད་གང་མགྱོགས་དང་། བཅོས་སྐྱོང་ནན་པོ། བདེ་འཇགས་འགན་ལེན”བཅས་ཁྲིད་སྟོན་དུ་བྱས་ཏེ། ལས་དོན་ཚ་ཚ་འུར་འུར་ངང་སྒྲུབ་པ་དང་དངོས་སྒྲུབ་ལ་དམ་འཛིན་གྱིས་སྤུས་ཚད་འགན་ལེན་བྱས་ནས་རྣམ་གྲངས་དུས་བཀག་ལྟར་ཐོན་སྐྱེད་དང་གཉེར་སྐྱོང་ཐུབ་པའི་འགན་ལེན་བྱས་ཡོད།

རྣམ་གྲངས་སྐྲུན་ཡུལ་དུ་ཧྭ་གློག་བོད་ལྗོངས་ཀུང་སིས་གནས་སྐབས་ཏང་ཀྲི་པུའུ་བཙུགས་པ་དང་ཏང་ཀྲི་པུའུ་ཡིས་རྣམ་གྲངས་འཛུགས་སྐྲུན་དང་དོ་དམ་ལ་སྐུལ་འདེད་བཏང་ནས་ཨར་སྐྲུན་བདེ་འཇགས་དང་། རྒྱབ་ཕྱོགས་མཁོ་སྒྲུབ་འགན་ལེན། ས་གནས་དེ་གའི་མང་ཚོགས་སྒྲིག་འཛུགས་བྱས་ཏེ་ངལ་རྩོལ་ནང་ཞུགས་སུ་འཇུག་པ། སྐྱེ་ཁམས་སྲུང་སྐྱོང་སོགས་ཀྱི་ཕྱོགས་མང་པོའི་ཐད་ཏང་ཡོན་གྱི་གདོང་ལེན་དཔེ་བཟང་གི་ནུས་པ་འདོན་སྤེལ་བྱས་ཏེ་རྣམ་གྲངས་འཛུགས་སྐྲུན་གྱི“འཕྲལ་སྒྲུབ་རུ་ཁག”ཅིག་བཙུགས་ཡོད།

ཡར་སྟོད་ཤང་ཆོས་སྡེ་གོང་གྲོང་ཚོའི་གྲོང་མི་ཕུན་ཚོགས་བཀྲ་ཤིས་ཀྱིས“རྣམ་གྲངས་འཛུགས་སྐྲུན་ལས་ང་ཚོར་ལས་ཀ་མང་པོ་རག་བྱུང་། ད་ལྟ་ང་ལས་ཡུལ་དུ་རྐོ་འདྲུའི་འཕྲུལ་འཁོར་གཏོང་གི་ཡོད། ཡོང་འབབ་ཡག་པོ་འདུག ཁྱིམ་གྱི་སྒོ་ཁར་ལས་ཞུགས་ཐུབ་ཡོང་སྙམ་པ་བསམ་པའི་ཡུལ་ལའང་འཁོར་མྱོང་མེད། ཤང་ཏང་ཨུད་དང་། སྲིད་གཞུང་། ཧྭ་གློག་ཀུང་སི་བཅས་ཀྱི་ཐུགས་ཁུར་དང་རོགས་རམ་གནང་བར་ཐུགས་རྗེ་ཆེ་ཞུ་རྒྱུ་ཡིན”ཞེས་བརྗོད།

ཤེས་རྟོགས་བྱུང་བར་གཞིགས་ན། ཚེ་སྤོང་གི་ཀྲའོ་ཝ་50ཡི་འོད་ཤུགས་རྣམ་གྲངས་ཀྱིས་སྔོན་དཔག་བྱས་ན་ལོར་ཆ་སྙོམས་གློག་གཏོང་ཚད་ཆུ་ཚོད་རེར་ཆན་ཝ་དུང་ཕྱུར་0.9ཟིན་པ་དེས་ལོ་ལྟར་ཚད་ལྡན་རྡོ་སོལ་ཏུན་ཁྲི་2.8གྲོན་ཆུང་ཐུབ་པ་དང་དབྱང་གཉིས་ཐཱན་འགྱུར་འབུད་ཚད་ཏུན་ཁྲི་9.2ཉུང་དུ་གཏོང་ཐུབ། འོད་ཤུགས་གློག་ཁང་དེའི་ཉིན་རེའི་གློག་གཏོང་ཚད་ཀྱིས་གྲོང་མི་དུད་ཚང་བཞི་སྟོང་གི་ཉིན་གཅིག་གི་གློག་འདང་གི་ཡོད་པས། ཁུལ་ཁོངས་རང་བཞིན་དང་དུས་ཚིགས་རང་བཞིན་གྱི་གློག་གི་དགོས་མཁོ་སྐོང་ཐུབ་པ་མ་ཟད། མང་ཚོགས་ཀྱི་འཚོ་བའི་སྤུས་ཚད་ཀྱང་ལེགས་སུ་འགྲོ་རྒྱུ་རེད།

ལས་གྲྭ་འཛུགས་སྐྲུན་ཚན་རིག་དང་མཐུན་དགོས་ལ་དེ་བས་ལྗང་མདོག་ཡིན་དགོས།

རྣམ་གྲངས་སྐྲུན་རིང་འཕྲུལ་འཁོར་ཆེ་གྲས་ཀྱིས་སྐྱེལ་འདྲེན་བྱེད་སྐབས་ལྗོན་ཤིང་སོགས་ལ་གཏོར་སྐྱོན་ཕོག་པར་དོགས་ནས། མང་ཆེ་བ་རྟ་དྲེལ་དང་མི་ཤུགས་ལ་བརྟེན་ནས་སྐྱེལ་འདྲེན་བྱས་ཏེ་སྐྱེ་ཁམས་ཁོར་ཡུག་ལ་སྲུང་སྐྱོང་གང་ལེགས་བྱས་ཡོད། རྣམ་གྲངས་བསྐྲུན་ནས་ད་བར་ཁོར་ཡུག་ལ་སྦགས་བཙོག་ཐེབས་པ་དང་གཏོར་སྐྱོན་ཕོག་པ་སོགས་ཀྱི་དོན་རྐྱེན་གཅིག་ཀྱང་ཐོན་མེད་ཅེས་རྣམ་གྲངས་ཀྱི་འབྲེལ་ཡོད་འགན་འཁུར་བ་ལི་སུང་གིས་བརྗོད་པ་དང་། ཁོང་གིས“རི་གཉིས”ཀྱི་འདུ་ཤེས་ལག་བསྟར་གཏིང་ཟབ་དང་ལྗང་མདོག་འཕེལ་རྒྱས་ཡོང་ཆེད། ང་ཚོས“འབྲོག་ལས་དང་འོད་ནུས”ཕན་ཚུན་གསབ་རེས་རྣམ་པར་གཞིགས་ནས་གློག་ཁང་འཛུགས་སྐྲུན་བྱས་པ་དང་། གྲལ་སྟར་སྒྲིག་པའི་འོད་ཤུགས་ཤེལ་ལེབ་དབར་གྱི་བར་ཐག་དང་སྒྲིག་སྟངས་ལེགས་སུ་བཏང་ནས་འོད་འཕྲོའི་ཁྱབ་འགྱེད་ནུས་ལྡན་ཐུབ་པར་བྱས་ཏེ་རྩྭ་དང་རྩི་ཤིང་སྐྱེ་འཚར་ལེགས་པ་དང་ཉེ་འགྲམ་གྱི་རྩྭ་རར་གཏོར་སྐྱོན་མི་ཕོག་པའི་འགན་ལེན་བྱས་ཡོད།

དགུན་དུས་སུ་བདེ་འཇགས་ཐོན་སྐྱེད་ནི་ཧ་ཅང་གལ་འགངས་ཆེ་བ་ཞིག་ཡིན། དེར་བརྟེན་ཧྭ་གློག་བོད་ལྗོངས་ཀུང་སིས་ཡར་སྟོད་ཤང་ཏང་ཨུད་དང་སྲིད་གཞུང་དང་མཉམ་དུ་བྱ་སྤྱོད་སྤེལ་ནས། སྒྲིག་ཆས་གཉེར་སྐྱོང་དང་ལས་སྒྲུབ་མི་སྣའི་བདེ་འཇགས་འགོག་སྲུང་ལ་ཤུགས་སྣོན་རྒྱག་པ་སོགས་ལ་དོ་དམ་དང་བདེ་འཇགས་པ་ཆེད་མངགས་བཀོད་སྒྲིག་བྱས་ཏེ། མངོན་མེད་རྐྱེན་ངན་གྲལ་བཤེར་བྱེད་ཤུགས་ཆེ་རུ་བཏང་ནས་རྣམ་གྲངས་བརྟན་པོ་དང་་བདེ་འཇགས་གཉེར་སྐྱོང་ཐུབ་པའི་འགན་ལེན་ བྱས་ཡོད།