མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། ཉེ་བའི་ལོ་ཤས་རིང་། མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཀྲོའུ་རྐང་ཚ་རྫོང་འོམ་ཆུ་གྲོང་རྡལ་གྱིས“སྲོག་ཤིང་གཅིག་དང་རུ་ཁག་ལྔ་ཡིས་དར་རྒྱས་ལ་སྐུལ་འདེད་གཏོང་བའི”འཛུགས་སྐྱོང་ལ་བརྟེན་ནས་བྱེད་ཐབས་ནུས་ལྡན་མང་པོ་སྤྱད་དེ་དུས་རབས་གསར་པའི་བོད་གྲོང་གི་ས་མཐོའི་མཛེས་ལྗོངས་གསར་པ་ཞིབ་ཚགས་ངང་བསྐྲུན་པ་རེད།

སྤྱི་ཚོགས་འགན་སྲུང་རུ་ཁག་གི་ལས་དོན་པས་དམངས་འཚོ་བདེ་སྐྱིད་ཀྱི་བྱ་བཟང་བསྒྲུབས་ཤིང་། གྲོང་ཚོའི“ཨུ་ལྷན་གཉིས”ལ་གཞོགས་འདེགས་ཀྱིས་ཞིང་འབྲོག་ཁུལ་གྱི་མ་མཐའི་འཚོ་བ་འགན་ལེན་གྱི་ཞིབ་དཔྱད་ལེགས་སྒྲུབ་བྱས་ནས་ཞིང་འབྲོག་མང་ཚོགས་སྨན་བཅོས་འགན་བཅོལ་དང་རྒན་གསོ་འགན་བཅོལ་ལ་ཞུགས་པར་ཁྲིད་སྟོན་བྱས་པས་འགན་བཅོལ་ལ་ཞུགས་ཚད་100%ཟིན་ཡོད། ཞིང་འབྲོག་ཁུལ་གྱི་གསང་སྤྱོད་73བཅོས་སྒྲིག་བྱས་པ་དང་དུད་ཁྱིམ་1895ཡི་སྡོད་ཁང་གི་མངོན་མེད་རྐྱེན་ངན་གྲལ་བཤེར་ཐེངས་46བྱས་པ་རེད།

ཐོན་ལས་སྐུལ་སྤེལ་རུ་ཁག་གིས་ལས་སྒྲུབ་བྱས་ཏེ་གྲོང་གསེབ་དར་རྒྱས་ཀྱི་ཕྱུག་འགྱུར་ཉམས་བཟང་བསྐྲུན་ཞིང་། སྔ་རྗེས་སུ་རྫོང་གི་ཕྱི་ནང་དུ་ཚགས་ཤ་དང་ལུག་ཤ་ཐད་འཚོང་བྱ་ཡུལ་2བཙུགས་ནས་ཚགས་ཤ་དང་ལུག་ཤ་ལས་སྣོན་རྟེན་གཞི་2སྐྱེད་སྲིང་བྱས་པ་མ་ཟད། གྲོང་ཚོ་ཁག་ལ་གཞོགས་འདེགས་བྱས་ཏེ་འབྲི་གཡག་16857དང་ལུག་48208བཤས་བཏང་བ་དང་དེ་བཞིན་གཟན་རྩྭ་དང་གཟན་ཆག་ཏུན་3852གྲབས་གསོག་བྱས་པ་རེད།

སྤྱི་ཚོགས་བཅོས་སྐྱོང་རུ་ཁག་གིས་ལས་ཀ་བྱས་ཏེ་འཆམ་མཐུན་གྲོང་གསེབ་ཀྱི་དུས་བདེའི་གནས་སྟངས་བཏོད་ཅིང་། གྲོང་རྡལ་དེ་ཡོངས་ཀྱི“ཀྲི་པུའུ་དྲ་མིག”11དང“དྲ་མིག་ཆུང་གྲས”48གཞི་རྟེན་དུ་བྱས་ནས“དོ་དམ་དང་། ཞབས་ཞུ། འགན་ལེན”བཅས་ཀྱི་ལམ་སྲོལ་གསུམ་གསར་གཏོད་བྱས་ཏེ་འགལ་ཟླ་དང་རྩོད་གཞི་19གྲལ་བཤེར་དང་། གྲོང་རྡལ་རིམ་པས་གྱོད་གཞི་ཁག་15འདུམ་གཅོད། ཁོངས་གཏོགས་ཁུལ་གྱི་མངགས་གཏོང་ཁང་གིས་གྱོད་གཞི་ཁག་4འདུམ་གཅོད། ཁྲིམས་ཁང་གིས་གྱོད་གཞི་ཁག་28བདག་སྤྲོད་བྱ་རྒྱུར་རྩིས་སྤྲོད་བཅས་བྱས་པ་རེད།

སྐྱེ་ཁམས་ཤེས་དཔལ་རུ་ཁག་གིས་འབད་བརྩོན་བྱས་ཏེ་རི་སྔོན་ཆུ་དྭངས་ཀྱི་གནས་འཕྲོད་ཡུལ་བབ་བསྐྲུན་ཞིང་། རྩྭ་ཕྱུགས་དོ་སྙོམས་ཀྱི་དམིགས་ཚད་འགན་འཁྲིའི་ཡི་གེ་དང་དཔྱད་ཞིབ་རེའུ་མིག་1200བྲིས་པ་མ་ཟད་རྩྭ་ཐང་ཁྲིམས་འགལ་སྒྲིག་འགལ་ངང་ཧམ་བཟུང་བྱེད་ཚུལ་ལ་མཐིལ་བཤེར་ལས་དོན་སྤེལ་བ་རེད། གཞན་ཡང་ཁོར་ཡུག་གཅིག་སྡུད་བཅོས་སྒྲིག་དང་དང་བླངས་ཞབས་ཞུའི་བྱེད་སྒོ་སྤེལ་ནས་གད་སྙིགས་ཏུན་54མེད་པར་བཟོས་པ་དང་སྲོག་ཆགས་ཀྱི་རོ་121ལ་གནོད་མེད་གཙང་སེལ་བྱས་པ་རེད།

རིག་གནས་དྲིལ་བསྒྲགས་རུ་ཁག་གིས་ལས་ཀར་གཞོལ་ནས་མཛེས་མཐུན་གྲོང་གསེབ་ཀྱི་ཡུལ་སྲོལ་མིག་དཔེ་བཏོད་ཅིང་། གྲོང་སྲོལ་དམངས་ཆིངས་ཀྱི་སྐར་མ་གསོག་པའི་ལམ་ལུགས་ལ་བརྟེན་ནས་དང་བླངས་པས་རྒན་འཁོགས་དང་གཟུགས་ཞན་མི་ཚོགས་མི་ཐེངས་129ལ་ཞབས་འདེགས་ཞུས་པ་དང་རིག་རྩལ་བྱེད་སྒོ་སྣ་ཚོགས་22སྤེལ་བ་མ་ཟད། “སྒྱུག་མོ་ཡག་པོ”33དང“མནའ་མ་ཡག་པོ”32 “ལྗང་མདོག་ཁྱིམ་ཚང”23 “སྐར་ལྔ་རིམ་པའི་ཡ་རབས་དུད་ཁྱིམ”27བཅས་ལ་སྔ་རྗེས་སུ་གཟེངས་བསྟོད་བྱས་པ་རེད།