བརྗོད་དོན་གཙོ་བོའི་སློབ་གསོ་སྤེལ་ཚུན། མངའ་རིས་ས་ཁུལ་གྱི་རིམ་ཁག་ཏང་ཡོན་ལས་བྱེད་པས་བརྗོད་དོན་གཙོ་བོའི་སློབ་གསོ་དང་ལས་གནས་ཀྱི་ལས་དོན་ཟུང་འབྲེལ་མཐའ་འཁྱོངས་བྱས་ནས“དམ་པ་དོན་གཉེར”གྱི་སྟོན་ཕྱོགས་ལ་སྟངས་འཛིན་ནན་པོ་བྱས་ཏེ“བྱ་སྤྱོད”ཐད་ཤུགས་སྣོན་བརྒྱབ་ནས་སློབ་སྦྱོང་ལ་བརྟེན་ནས་སེམས་པ་སྐྱེད་པ་དང་། སློབ་སྦྱོང་ལ་བརྟེན་ནས་བློ་རིག་རྒྱས་པ། སློབ་སྦྱོང་ལ་བརྟེན་ནས་སྤྱོད་ཚུལ་སྲོང་བ། སློབ་སྦྱོང་ལ་བརྟེན་ནས་ལས་ཀར་སྐུལ་འདེད་གཏོང་བ་བཅས་ཀྱི་ཐད་ཕན་འབྲས་དངོས་ཐོན་པར་འབད་བརྩོན་བྱས་ཡོད།

ལས་གནས་ཀྱི་ཟབ་སྦྱོང་ལ་དམིགས་ནས་དགོངས་པ་སློབ་སྦྱོང་གི་ཚ་རླབས་འཕྱུར་བར་བྱས་པ། རིམ་ཁག་ཏང་རྩ་འཛུཌ་ཀྱིས“གང་ཞིག་སྤྱོད་པ་དེ་སློབ་སྦྱོང་དང་གང་ཞིག་ཆད་པ་དེ་གསབ་པ”མཐའ་འཁྱོངས་ཀྱིས་ལས་གནས་ཀྱི་འཐབ་ས་དང་པོར་གཞི་ཚུགས་ཏེ། རྒྱུན་མཐུད་ནས་ནང་སེམས་ལ་འཇགས་པ་དང་སློབ་སྦྱོང་ཟབ་མོ་ཡོང་བར་བྱས་ཏེ་རིགས་པའི་གཞུང་ལུགས་ཀྱི་སློབ་སྦྱོང་བརྗོད་དོན་གཙོ་བོའི་སློབ་གསོའི་བརྒྱུད་རིམ་ཧྲིལ་པོར་ཁྱབ་པར་བྱས་ཏེ། ལས་ཀའི་དོན་དངོས་དང་ཟུང་འབྲེལ་གྱིས་རིམ་རྩིས་བྱས་ན་གཅིག་སྡུད་སློབ་སྦྱོང་ཐེངས་1345དང་། ཆེད་དོན་བགྲོ་གླེང་ཐེངས་176 ཆེད་དོན་ཏང་གི་སློབ་ཚན་ཐེངས་342ཁྲིད་པ་བཅས་བྱས་ཏེ་ཁ་ཕྱོགས་སྔར་བས་ཁ་གསལ་དང་། བསམ་ཕྱོགས་སྔར་བས་གསལ་བ། གདེང་ཚོད་སྔར་བས་ཟབ་པ་བཅས་ཡོང་བར་བྱས་ཡོད།

གདོང་ལེན་སྣེ་ཁྲིད་ལ་དམིགས་ཏེ་བྱ་བ་དངོས་ཡག་པོ་སྒྲུབ་པ། འཇུག་སྒོ་ཆུང་བ་དང་། སྒྲུབ་ཐུབ་པ། མང་ཚོགས་ལ་ཐད་ཀར་ཕན་པ་བཅས་ཀྱི་རྩ་དོན་ལྟར། སློབ་གསོ་དང་། སྨན་བཅོས། རྒན་གསོ། སྡོད་ཁང་སོགས་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ལ་དམིགས་ཏེ། ཐབས་བརྒྱ་ཇུས་སྟོང་གིས་མང་ཚོགས་ལ་བྱ་བ་དངོས་དང་དཀའ་ངལ་ཁག་772སྒྲུབ་རོགས་དང་སེལ་རོགས་བྱས་ཏེ་མང་ཚོགས་ཀྱིས་འགྱུར་ལྡོག་དང་ཕན་འབྲས་དངོས་མཐོང་ཐུབ་པར་བྱས་ཡོད།

ལས་འགན་གཙོ་བོར་དམིགས་ནས་བྱས་རྗེས་གསར་འཇོག་གི་སྤྲོ་སེམས་འཕེལ་བར་བྱས་པ། ས་ཁུལ་ཚོང་དོན་ཅུས་ཀྱིས་སེང་གེ་ཁ་འབབ་གྲོང་རྡལ་དུ“འཛད་སྤྱོད་ལ་སྐུལ་འདེད་དང་མཁོ་སྤྲོད་ལ་འགན་ལེན་བྱེད་པའི”ཞིང་འབྲོག་ཐོན་རྫས་ཚོང་འདུས་སྐབས་དགུ་པ་འཚོགས་པ་དང་ཚོང་འདུས་ལ་ཁེ་ལས་དང་། མཉམ་ལས་ཁང་། ཁེར་རྐྱང་བཟོ་ཚོང་དུད་ཚང་བཅས་ཁྱོན་412ཞུགས་པར་བྲིན་ཚོང་དངུལ་འབོར་སྒོར་ཁྲི་2880ཟིན་ཡོད། མཚོ་ཆེན་རྫོང་གིས་གྲོང་གསེབ་ཀྱི་གཞུང་ལམ་དེ་ཐོན་ལས་འཕེལ་རྒྱས་ཀྱི་རྨང་གཞིའི“སྒྲོམ་གཞིར”བརྩིས་ནས་གསར་སྐྲུན་དང་། སྒྱུར་བཀོད། རིམ་སྤོར་སོགས་ཀྱི་བྱ་ཐབས་སྤྱད་དེ་2024ལོའིདབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དེ་གྲོང་གསེབ་དར་རྒྱས་དང་འབྲེལ་མཐུད་ནུས་ལྡན་བྱེད་པའི་རྣམ་གྲངས་6འཆར་འགོད་བྱས་ནས་ལག་ལེན་བསྟར་རྒྱུ་ཡིན་པར་སྔོན་དཔག་བྱས་ན་མ་དངུལ་སྒོར་ཁྲི་6344གཏོང་རྩིས་ཡོད་པ་རེད།